Íslendingar tefla á "Västerås Open"

Tæplega 300 þátttakendur taka þátt í skákmótinu Västerås Open sem fam fer í bænum Västerås í Svíþjóð nú um helgina. teflt er í tveimur flokkum, þ.e. yfir 1600 og undir 1600 stigum. Meðal þátttakenda eru átta Íslendingar, fjórir í hvorum flokk. Í opna flokknum tefla þeir Sverrir Þorgeirsson sem nemur stærðfræði við háskólann í Uppsala, Þorvarður Ólafsson sem er þarna á kunnugum slóðum, Sverrir Þór og íslensk/sænski drengurinn Baldur Theodor Petersson sem fær tækifæri á að máta sig við þá bestu.

Í flokknum undir 1600 stigum eru fjórir ungir og efnilegir Rimaskólanemendur meðal þátttakenda. Er þetta B-sveit skólans sem náði þeim einstaka árangri á Íslandsmóti grunskóla 2012 að verða í 2. sæti næst á eftir A - sveitinni. Þetta eru þau Kristófer Jóel, Nansý, Jóhann Arnar og Svandís Rós.

Rimaskóli fékk veglegan styrk frá samstarfssjóði Svíþjóðar og Íslands til að taka þátt í mótinu og hafa krakkarnir einnig notið liðsinnis Höllu systur Palla Sig sem ásamt manni sínum Robert tók á móti krökkunum, hýsir þau og ferðast með þau til Västerås.

Eftir fyrri hluta mótsins, fjórar umferðir af átta, eru þeir Sverrir Þorgeirsson og Þorvarður Ólafsson báðir með 3 vinninga og í neðri flokknum eru Rimaskólakrakkar á góðri siglingu. Nansý Davíðsdóttir hefur unnið allar sínar skákir og er í 1. - 5. sæti mótsins. Jóhann Arnar Finnsson er með 3 vinninga og þau Kristófer Jóel Jóhannesson og Svandís Rós Ríkharðsdóttirmeð 2,5 vinninga.

Í dag laugardag eru tefldar tvær umferðir og mótinu lýkur á morgun með tveimur síðustu umferðunum. 

Texti og myndir frá Helga Árnasyni.

• Heimasíða mótsins
• Chess-Results (aðalmótið)
• Chess-Results (minna mótið)
• Myndaalbúm (HÁ)