Ísland - Danmörk 10-3

Ísland - Danmörk 10-3

Ísland hefur tekið afgerandi forystu gegn Danmörku í landskeppni í bréfskák sem nú stendur yfir. Fyrstu þrettán skákunum er lokið og hefur íslenska liðið hlotið tíu vinninga gegn þremur vinningum danska liðsins. Það bendir því allt til afgerandi sigurs Íslands í þessari viðureign, þótt enn sé mörgum skákum ólokið, sjá: http://www.simnet.is/chess/

Teflt er á tuttugu borðum og hver skákmaður teflir tvær skákir við andstæðing sinn, með hvítu og svörtu. Þrír skákmenn hafa þegar unnið báðar skákir sínar, en það eru þeir Jóhann H. Ragnarsson, Jóhann Helgi Sigurðsson og Guðbjörn Sigurmundsson sem er að tefla í sinni fyrstu bréfskákkeppni.

Nú til dags er bréfskák tefld í gegnum Internetið á sérstökum bréfskákþjónum, sem þúsundir skákmanna tengjast. Tæknin hefur því séð til þess, að hin eiginlega "bréfskák", þar sem menn senda póstkort sín á milli, er nánast liðin undir lok og nú berast leikir heimsálfanna á milli á sekúndubroti í stað þess að áður gat það jafnvel tekið margar vikur.

Íslenskir bréfskákmenn hafa verið duglegir við að nýta sér tæknina og mikil gróska er í bréfskákinni hér á landi. Auk landskeppninnar við Dani etja Íslendingar nú kappi við Spánverja, Englendinga  og Hollendinga og eru Íslendingar yfir í öllum þessum viðureignum.