Dagur vann Suba - er í 1.-2. sæti - Ingvars hefnt!

Alþjóðlegi meistarinn Dagur Arngrímsson (2366) vann rúmenska stórmeistarann Mihai Suba (2428) í sjöundu umferð alþjóðlegs móts í Arad í Rúmeníu.  Dagur er nú í 1.-2. sæti á mótinu með 6 vinninga ásamt ungverska stórmeistaranum Imre Balog (2542).  Segja má að Dagur hafi þarna hefnt Ingvars heitins Ásmundssonar, en Suba svindlaði á honum á Ólympíuskákmótinu 1978 þegar hann vildi ekki kannast ekki við eigið jafnteflisboð og hafði svo sigur.  Farið er yfir skák dagsins, sem var afar fjörleg, á Skákhorninu. 

Dagur hefur nú mætt fjórum stórmeisturum og hlotið í þeim 3 vinninga.  Á morgun teflir hann við rúmenska alþjóðlega meistarann Boris Itkis (2437).  Skákin verður sýnd beint á vefsíðu mótsins og hefst kl. 13:30

183 skákmenn taka þátt í mótinu frá 9 löndum.  Þar á meðal eru 11 stórmeistarar og 11 alþjóðlegir meistarar.  Dagur er nr. 22 í stigaröð keppenda.

• Heimasíða mótsins
• Beinar útsendingar (15 efstu borðin) - flestar umferðir hefjast kl. 13:30.
• Chess-Results