Norðurlandamót stúlkna 2012 - tveir Norðulandameistaratitlar Íslendinga

Fimmtu og síðustu umferð Norðurlandamóts stúlkna er nú rétt nýlokið.  Óhætt er að segja að stelpurnar hafi staðið sig vel því tvö gull og eitt brons í þremur flokkum er frábær frammistaða.  Tveir Norðurlandameistaratitlar unnust þær Jóhanna Björg Jóhannsdóttir og Hrund Hauksdóttir sigruðu í A- og B-flokki.  Sóley Lind Pálsdóttir varð í þriðja sæti í C-flokki.  Semsagt verðlaun í öllum flokkum!

Að skákum dagsins:

A-flokkur:
Emilie Ellegaard Christiansen - Jóhanna Björg Jóhannsdóttir 0-1
Sigríður Björg Helgadóttir – Erle Andrea Marki Hansen ½-½

Jóhanna var greinilega miklu betri en andstæðingurinn í dag.  Eins og við bjuggumst við fyrirfram þá tefldi andstæðingurinn byrjunina mjög varlega þannig að Jóhanna átti ekki í neinum vandræðum með að jafna taflið.  Fljótlega eftir að Jóhanna lét sverfa til stáls vann hún skiptamun og eftir það var hún ekki í neinum vandræðum með að innbyrða vinninginn þrátt fyrir að hún hafi á einum stað leikið af sér án þess að andstæðingurinn tæki eftir því.  Glæsilegur árangur hjá Jóhönnu sem tefldi afar vel á þessu móti og var virkilega vel að sigrinum komin.

Sigríður tefldi mjög vel í dag eins og flestar aðrar skákir í mótinu.  Skákin var reyndar í beinni útsendingu þannig að allir heima gátu fylgst með.  Andstæðingur Sigríðar var efst fyrir lokaumferðina (var með betri monrad stig en Jóhanna og Jessica hin sænska).  Sigríður hafði tögl og haldir nánast alla skákina og var mjög nálægt því að vinna.  Minnstu munaði þó að hún teygði sig of langt í vinningstilraunum en að lokum endaði skákin með jafntefli og er því óhætt að segja að hún hafi lagt sitt að mörkum til að Jóhanna gæti unnið flokkinn.

B-flokkur:
Ina Kraemer - Hrund Hauksdóttir 0-1
Veronika Steinunn Magnúsdóttir - Rina Weinman 0-1 

Hrund átti hreint út sagt stórkostlegan afmælisdag í dag.  Báðar skákirnar í beinni útsendingu enduðu með öruggum sigrum og norðurlandameistaratitill í höfn.  Eins og áhorfendur heima gátu séð þá tefldi Hrund afar vandað og uppskar öruggan sigur.  Hún sýndi það og sannaði í þessu móti að hún er langbest í þessum flokki.

Veronika hélt áfram að tefla vel og var í sjálfu sér með mjög fína stöðu þegar hún ákvað að plata andstæðinginn.  Ekki fór það nú betur en svo að hún plataði sjálfa sig illa og tapaði manni og skákinni skömmu síðar.  Veronika sýndi það samt í þessu móti að hún á fullt erindi í þennan flokk þrátt fyrir að vera á yngsta aldursári í flokknum.

C-flokkur:
Lisa Fredholm  - Sóley Lind Pálsdóttir 0-1
Nansý Davíðsdóttir – Brandy Paltzer 1-0 

Sóley mætti með gríðarlega gott hugarfar í skákina í dag.  Hún atti kappi við efstu stelpuna í flokknum sem hafði hingað til unnið allar sínar skákir.  Sóley tefldi afar vel og lét peðsfórn andstæðingsins í byrjun ekki slá sig út af laginu og tefldi óhikað til sigur og neitaði meðal annars jafnteflisboði andstæðingsins.  Að lokum innbyrti hún mjög góðan sigur á Norðurlandameistaranum í C-flokki og náði bronsinu.  Flottur árangur hjá henni. 

Það er ekki mikið að segja um skákina hjá Nansý.  Hún var harðákveðin í því að vera ekki hrædd við andstæðinginn og í stuttu máli sagt þá hreinlega valtaði hún yfir sænsku stelpuna.  Hún gerði sér svo lítið fyrir og kláraði skákina með því að máta andstæðinginn með biskup vegna þess að það var miklu flottara en að máta með drottningu.  Flottur endir á mótinu. 

Heildarárangurinn á mótinu var afar góður en ég get ekki sagt að hann hafi komið mér á óvart.  Það er greinilegt að sú ákvörðun Skákskólans og Skáksambandsins að hafa sérstakar kvennaæfingar bæði á landsliðsstyrkleika og á lægri stigum er klárlega að skila sér.  Skömmu fyrir mót ræddi ég við Gunnar Björnsson forseta Skáksambandsins þar sem hann spurði mig hver væru markmiðin fyrir þetta mót og ég svaraði því til að markmiðið væri að vinna tvo flokka en að vinna alla þrjá flokkana væri bónus.  Forsetinn hélt því fram að nú væri ég allt of bjartsýnn – bjartsýni hvað?  Á góðum degi hefðum við alveg getað unnið alla flokkana. 

Lokastaða mótsins 

A-flokkur
1.       Jóhanna Björg Jóhanssdóttir 4 vinningar
2.       Jessica Bengtsson, Svíþjóð 3,5 vinningar
3.       Erle Andrea Marki Hansen, Noregur 3,5 vinningar
4.       Sigríður Björg Helgadóttir 3 vinningar
5.       Emilie Ellegaard Christensen, Danmörk 2 vinningar
6.       Louise Segerfelt, Svíþjóð 2 vinningar
7.       Amalie Heiring Lindestrom, Danmörk 1 vinningur
8.       Ingrid Øen Carlsen, Noregur 0,5 vinningur 

B-flokkur
1.       Hrund Hauksdóttir 4,5 vinningar
2.       Edit Machlik, Noregur 3,5 vinningar
3.       Rina Weinman, Svíþjóð 3,5 vinningar
4.       Marte B Kyrkjebø, Noregur 3 vinningar
5.       Thea Nicolajsen, Danmörk 3 vinningar
6.       Veronika Steinunn Magnúsdóttir 2,5 vinningar
7.       Ina Kraemer, Svíþjóð 2,5 vinningar
8.       Alise Haukenes, Noregur 2 vinningar
9.       Hanna Kyrkjebø, Noregur 2 vinningar
10.   Freja Vangsgaard, Danmörk 2 vinningar
11.   Maud Rødsmoen, Noregur 2 vinningar
12.   Jarani Suntharalingam, Noregur 2 vinningar
13.   Carolina Beer Jacobsen, Noregur 1,5 vinningur
14.   Sif Tylvad Linde, Danmörk 1 vinningur 

C-flokkur
1.       Lisa Fredholm, Svíþjóð 4 vinningar
2.       Elise Sjøttem Jacobsen, Noregur 3,5 vinningar
3.       Sóley Lind Pálsdóttir 3 vinningar
4.       Regina Forså, Noregur 3 vinningar
5.       Nansý Davíðsdóttir 3 vinningar
6.       Ingrid Andrea Greibrokk, Noregur 3 vinningar
7.       Helene Lorem, Noregur 2,5 vinningar
8.       Marlene S Østebø, Noregur 2 vinningar
9.       Brandy Paltzer, Svíþjóð 2 vinningar
10.   Hanna Jacobsen, Færeyjum 2 vinningar
11.   Linnea Holmboe Bårregård, 2 vinningar 

Aðstæður hjá Norðmönnum voru algjörlega til fyrirmyndar.  Gist og teflt var á fínasta hóteli þar sem allt var til alls meira að segja íslenskir starfsmenn!  Sænski farastjórinn hafði á orði við mig að það væri erfitt að toppa þessa framkvæmd. 

Stelpurnar voru eins og alltaf til fyrirmyndar í alla staði í ferðinni.  Ég vil því nota tækifærið til að þakka þeim fyrir skemmtilega helgi hér í Noregi.  Einnig vil ég þakka þeim Páli Sigurðssyni (föður Sóleyjar) og Davíð Hallsyni (föður Nansýar) fyrir frábæra samveru.

  

Heimasíða mótsins

Davíð Ólafsson