Hraustlega teflt í Hörpu

Nokkuð var um óvænt úrslit í 2. umferð  N1 Reykjavíkurskákmótsins.  Má þar nefna að Sverrir Örn Björnsson vann alþjóðlega meistarann Björn Þorfinnsson, og að Einar Hjalti Jensson gerði jafntefli við Íslandsmeistarann Héðin Steingrímsson og tók að sér skákskýringar í kjölfarið.   Sverrir Örn  er meðal þeirra sem hafa fullt hús.  Hin ungu og efnilegu Vignir Vatnar Stefánsson og Nansý Davíðsdóttir gerðu bæði jafntefli gegn mun stigahærri keppendum.  Oliver Aron Jóhannesson, sem átti 14 ára afmæl í dag vann mun stigahærri skákmann í aðeins 14 leikjum!

Íslenskir skákmenn fengu tækifæri á að tefla við sterka skákmenn í dag.  Sigurður Daði Sigfússon tefldi við sjöunda stigahæsta skákmann heims Fabiano Caruana og Róbert Lagerman tefldi við heimsmeistara kvenna, Hou Yifan.   Guðmundur Gíslason situr enn að tafli gegn David Navara. 

Auk Sverris hafa Hannes Hlífar Stefánsson, Henrik Danielsen, Stefán Kristjánsson, Hjörvar Steinn Grétarsson, Jón Viktor Gunnarsson, Bragi Þorfinnsson, Þröstur Þórhallsson og Dagur Arngrímsson fullt hús vinninga og mögulega bætast fleiri við í þennan hóp. 

Þriðja umferð fer fram á morgun og hefst kl. 16:30.   Þá hefjast skakskýringar kl. 19 og verða í umsjón Helga Ólafssonar.  Úrslit 2. umferðar má finna hér. 

 

• Heimasíða mótsins
• Beinar útsendingar
• Pallborðið og vefútsending
• Chess-Results