Róbert efstur á Haítí

Methúsalem vert á Cafe Haítí hefur fagnað mjög þeirri skákvæðingu sem hefur átt sér stað á staðnum undanfarnar vikur. Skákakademía Reykjavíkur færði staðnum töfl og klukkur og fara þar nú fram einkatímar ungmenna jafnt sem skákmót fyrir sókndjarfa kaffihúsakákmenn.

Einn slíkur, Róbert Lagerman, fór með sigur úr býtum á Skákmóti Haítí sem fór fram á Skákdaginn. Þrettán keppendur mættu til leiks og eftir stigaútreikning úrskurðaði Róbert sjálfan sig sigurvegara mótsins en hann var jafnframt skákstjóri. Í næstu sætum voru Björn Ívar Karlsson og Tómas Björnsson en alls tefldu 13 vaskir piltar á mótinu.