Skákfélag Vinjar fær góðan liðsstyrk

Þrír góðir piltar og öflugir skákmenn hafa gengið til liðs við Vinjarliðið.  Haukur Angantýsson (2290), Jorge Rodriguez Fonseca (2006) og Eymundur Eymundsson (1795).

Alþjóðlegi meistarinn Haukur Angantýsson tók sér hlé frá skákinni í vel á annan áratug en hann var með öflugri mönnum hér áður fyrr þar sem hann var í Taflfélagi Reykjavíkur.   Haukur var Íslandsmeistari í skák árið 1976 og tefldi fyrir Íslands hönd á Ólympíuskákmótinu 1970.  Það er mikið gleðiefni að Haukur sé sestur við borðið á ný og hann hefur svo sannarlega sýnt að það lifir í glæðunum.

Jorge Fonseca hefur teflt með Haukum undanfarin ár. Jorge hefur verið duglegur að mæta á mót Vinjargengisins undanfarin misseri og hefur margoft sýnt hve öflugur hann getur verið, bæði á Íslandsmótinu sem og á minni mótum. Hann heldur með Real Madrid.

Eymundur Eymundsson hefur frá blautu barnsbeini teflt með Skákfélagi Akureyrar, enda fæddur og uppalinn í þorpinu. Hann hefur verið búsettur í borginni í nokkurn tíma og verður nú með Skákfélagi Vinjar sem sendir tvö lið til leiks í haust, í þriðju og fjórðu deild. Liðið er með í Íslandsmótinu í fjórða sinn í vetur og markmiðið er, sem fyrr, að gera betur frá ári til árs og hefur félagið staðið við það hingað til. Fimmtíu félagar eru nú skráðir í skákfélagið og liðsfélagar fagna komu þessara öflugu skákmanna og frábæru liðsmanna.