Útiskákmót Goðans í Vaglaskógi fer fram annað kvöld

Útiskákmót Goðans verður haldið við verslunina í Vaglaskógi föstudaginn 24 júní og hefst það kl 21.00. Mótið er útiskákmót og verður teflt á pallinum framan við verslunina. 
Verslunin verður opin þetta kvöld og geta keppendur fengið sér mæru og drykk á meðan mótið stendur yfir.  Líkleg tímamörk verða 5-7 mín á mann og líklegt er að umferðirnar verði ekki fleiri en 11.

Goðinn býður nágrönnum sínum í SA velkomna yfir í Vaglaskóg til þátttöku í mótinu, en ekkert mótsgjald er og engin verðlaun verða veitt. Mótið er einungis til gamans og væntir stjórn Goðans þess að félagsmenn fjölmenni til keppni og vonandi geta Akureyringar litið við í einni af perlum Þingeyinga sem Vaglagskógur er svo sannarlega.

Að afloknu móti er ætlunin að taka hópmynd af keppendum á gömlu bogabrúnni yfir Fnjóská í tilefni dagsins en bogabrú þessi var, samkvæmt öruggum heimildum, ein elsta og ef ekki stærsta brú slíkrar gerðar á norðurlöndunum þegar hún var byggð. Er því um frekar merkilegt mannvirki að ræða.