Ávaxtamót Skákakademíunnar fer fram á föstudag

Eftir hina svo vel heppnuðu tilraun með Súpuskák 2011 er það ljóst að bragðlaukar skákmanna njóta sína vel við taflmennsku. Nú skal blásið til Ávaxtaskákar 2011!  Föstudaginn 3. júní verður opið hús í Skákakademíu Reykjavíkur frá þrjú fram eftir síðdegi. Sjálf Ávaxtaskákin, fimm umferðir hraðskák, hefst um fjögur leytið.

Fyrir sjálft mótið mun sjálfur Róbert Lagerman spreyta sig í blindhraðskák gegn nemendum Skákakademíunnar, sem fá þó að hafa skákborðið fyrir framan sig. Sigurvegari Súpuskákmótsins, Hjörvar Steinn Grétarsson, teflir nú í júní á First Saturday mótinu í Búdapest. Sigrar Hjörvars á undanförnum árum eru nær óteljandi og er hann orðinn einn allra sterkasti skákmaður þjóðarinnar. Í tilefni af þessu verða allir verðlaunagripir Hjörvars til sýnis á föstudaginn. Sigurbjörn bóksali mætir svo á staðinn með sínar fjölbreyttu skákbækur til sölu og sýnis.  Viðburður þessi markar upphafið að starfssemi Skákakademíunnar þetta sumarið en um 50 börn og unglingar verða á sumarnámskeiðunum sem byrja eftir helgi. Starfssemi Skákakademíunnar næsta vetrar er að skýrast og verður frekar kynnt á föstudaginn. Allir skákmenn og skákáhugamenn eru boðnir velkomnir í Skákakademíuna á föstudaginn; gæða sér á ljúffengum og suðrænum ávöxtum og grípa í tafl.