Jónas nýársmeistari í Vin

Sextán þátttakendur voru mættir til leiks þegar Skákfélag Vinjar hélt mót til heiðurs nýju ári í gær, mánudag. Tefldar voru 6 umferðir með sjö mínútna umhugsunartíma þar sem Björn Þorfinnsson stjórnaði, paraði og tefldi eins og engill - næstum allan tímann.

Hrafn Jökulsson, sem því miður átti ekki heimangengt í gær, gaf glæsilega ljósmyndabók sína: „Við ysta haf - Mannlíf og náttúra í Árneshreppi á Ströndum" fyrir efstu sætin þrjú.

Kaffiveitingar voru að sjálfsögðu í miðju móti til að peppa liðið upp. Björn leiddi fram að síðustu umferð þar sem hann misreiknaði riddarafórn í blálokin gegn Páli Andrasyni sem er að leggja hvern meistarann af öðrum þessa dagana.

Jónas Jónasson hafði þó fyrr unnið Pál og kom því fyrstur með fimm vinninga, líkt og Palli. Birgir Berndsen og skákstjórinn komu jafnir í þriðja sæti með fjóra og hálfan og Csaba Dabay var með fjóra.

Úrslit:

1. Jónas Jónasson 5

2. Páll Andrason 5

3. Birgir Berndsen 4,5

4. Björn Þorfinnsson 4,5

5. Csaba Dabay 4

6. Jón Úlfljótsson 3,5

Gunnar Freyr Rúnarsson, Eiríkur Örn Brynjarsson, Björn Sigurjónsson, Atli Viðar Thorstensen og Guðmundur Valdimar Guðmundsson voru með þrjá og í humátt þar á eftir þeir Kristján Örn Elíasson, Birgir Óskar Axelsson, Sævaldur Harðarson, Bjarni Davíðsson og Ævar Árnason.

Myndaalbúm mótsins