Mikael Jóhann, Jón Kristinn og Guðmundur Aron barna- og unglingameistarar SA

Í gær lauk haustmóti barna og unglinga hjá Skákfélagi Akureyrar. Keppt var í  þremur aldursflokkum; 9 ára og yngri, 12 ára og yngri og 15 ára og yngri.  Þátttakendur voru alls sextán og tefldu í einum flokki, 7 umferðir eftir Monrad-kerfi. 

 Eins og búast mátti við voru keppendur í elsta aldursflokknum í forystu allt mótið, ásamt Jóni Kristni, sem einnig gat unnið til verðlauna í 12 ára flokknum. Til tíðinda dró strax í 3. umferð, þegar Jón bar sigurorð af Mikael Jóhanni, eftir að sá síðarnefndi lék illa af sér í endatafli þar sem hann átti góða sigurmöguleika.  Þeir Jón Kristinn og Hjörtur Snær Jónsson voru þá einir efstir með fullt hús og tók Hjörtur forystuna með því að leggja Jón nokkuð örugglega að velli í innbyrðis skák þeirra. Hann var því einn efstur al lokum 4 skákum,  en tapaði í næstu umferð fyrir Mikael og missti flugið í lokin. Það fór því svo að tveir stigahæstu keppendurnir og nýbakaðir Íslandsmeistarar í sínum aldursflokkum, Jón Kristinn Þorgeirsson og Mikael Jóhann Karlsson, urðu efstir og jafnir á mótinu, en í stigaútreikningi hafði Mikael hálfu stigi meira og hreppti titilinn skákmeistari Skákfélags Akureyrar í unglingaflokki. Þeir Andri Freyr Björgvinsson og Logi Rúnar Jónsson urðu jafnir að vinningum í 3. sæti með 4½ vinning en Andri hreppti bronsið á stigum.  

Jón Kristinn var svo langefstur í 12 ára flokknum, en þeir Guðmundur Aron Guðmundsson og Gunnar Aðalgeir Arason fengu 3½ vinning í 2-3. sæti. Enn var gripið til stigaútreiknings og þar hafði Guðmundur betur og hreppti silfrið. Fjórði í þessum flokki varð Jón Stefán Þorvarsson með 3 vinninga.

Þar sem þeir Guðmundur Aron og Gunnar Aðalgeir eru báðir fæddir 2001, voru þeir einnig að tefla um meistaratitilinn í yngsta flokknum og þar færði sami stigaútreikningur Guðmundi fyrsta sætið og meistaratitilinn, Gunnar hreppti silfrið og bronsið fékk Hjálmar Jón Pjetursson.

 Röð efstu manna (allir aldursflokkar):

                                                vinn.     stig       f.ár

1. Mikael Jóhann Karlsson        6 v.      23        1995

2. Jón Kristinn Þorgeirsson       6          22,5     1999 

3. Andri Freyr Björgvinsson      4½       24,5     1997

4. Logi Rúnar Jónsson  4½       22,5     1996

5. Hjörtur Snær Jónsson           4                      1996

6. Hersteinn B. Heiðarsson       4                      1996

7. Erik Snær Elefsen                 4                      1997

8. Friðrik Jóh. Baldvinsson        4                      1997

9. Guðm. Aron Guðmundss.     3½       18,5     2001

10. Gunnar A. Arason              3½       17,5     2001