Skákþáttur Morgunblaðsins: Kvennaliðið stóð sig vel á Ólympíumótinu

Íslenska liðið sem tefldi í kvennaflokki á Ólympíumótinu í Khanty Manyisk í Síberíu hafnaði í 57. sæti af 115 þátttökuþjóðum, hlaut 22 vinninga af 44 mögulegum eða 50% vinningshlutfall. Í Dresden í Þýskalandi varð sveitin í 60. sæti. Allar stúlkurnar í sveitinni voru að bæta árangur sinn og sveitin varð að lokum 12 sætum ofar en röðun fyrir mótið úthlutaði. Lenka Ptacnikova hlaut 8½ v. af 11 á 1. borði sem reiknast sem 20 skáka áfangi að alþjóðlegum meistaratitli, Hallgerður Helga Þorsteinsdóttir hlaut 5½ vinning af 11 á 2. borði, Sigurlaug Friðþjófsdóttir hlaut 2½ v. af átta mögulegum á 3. borði, Tinna Kristín Finnbogadóttir fékk 3 v. af sjö mögulegum á 4. borði og Jóhanna Björg Jóhannsdóttir sem var 1. varamaður, hlaut 2½ v. af sjö mögulegum.

Niðurstaðan gefur tilefni til að stefna enn hærra á næstu mótum. Hallgerður sem tefldi allar skákirnar ellefu stóð sig vel og á heilmikið inni. Tinna og Jóhanna voru nýliðar í hópnum og áttu slæman kafla um miðbik mótsins þar sem einbeitnin var ekki nógu góð.

Hin nýja kynslóð tekur þarna við keflinu af skákkonum á borð við Guðlaugu Þorsteinsdóttur, Guðfríði Lilju Grétarsdóttur og Hörpu Ingólfsdóttur. Þó er alls ekki útilokað og raunar óskandi að þessar þrjár snúi aftur og fleiri til sem myndi þýða að í dag ættum við mjög frambærilegan hóp kvenna á alþjóðlegum vettvangi.

Á síðustu Ólympíumótum hafa sveitir frá Georgíu og Kína verið atkvæðamiklar í keppninni um efsta sætið en nú var rússneska sveitin var gjörsamlega óstöðvandi og vann allar viðureignir sínar og var því með fullt hús stiga og 34 vinninga. Lokaniðurstaða efstu þjóða varð þessi:

1. Rússland 22 stig 2. Kína 18 stig 3. Georgía 16 stig 4. Kúba 16 stig 5. Bandaríkin 16 stig.

Athygli vekur góð frammistaða Kúbverja en þeir áttu einnig öfluga sveit í karlaflokki. Lengi geta þeir sótt í arf þriðja heimsmeistarans, Jose Raoul Capablanca.

Íslenska kvennaliðið var í raun án liðsstjóra því Davíð Ólafsson sem hafði tekið hlutverkið að sér forfallaðist á síðustu stundu. Gunnar Björnsson, forseti SÍ, sem sat þing FIDE hljóp í skarðið að einhverju leyti en segja má að þarna hafi Lenka Ptacnikova tekið að sér forystuhlutverkið. Hún tefldi af miklum þrótti og hikaði ekki við að taka djarfar ákvarðanir yfir skákborðinu eins og eftirfarandi skák ber vott um:

Lenka Ptacnikova – Eva Repkova (Slóvakía )

Frönsk vörn

1. e4 e6 2. d4 d5 3. Rd2 c5 4. exd5 Dxd5 5. Rgf3 cxd4 6. Bc4 Dd6 7. 0-0 Rf6 8. Rb3 Rc6 9. Rbxd4 Rxd4 10. Rxd4 a6 11. He1 Dc7 12. De2 Bd7 13. Bg5 0-0-0 14. a4 Bc5 15. c3 h5

Hér var betra að leika 15.... h6.

16. b4 Bd6 17. h3 e5

Sjá stöðumynd

18. Rb5!

Mannsfórn ber vott um sókndirfsku og sjálfstraust. Hvítur gat einnig leikið 18. Rf3 og hefur þá góða stöðu.

18.... axb5 19. axb5 Bf5 20. b6 Dxb6 21. Be3 Dc7 22. Bb5! Rd7

22.... Kb8 má svara með 23. Ha7 með sterkri sókn eftir a-línunni.

23. Ha8 Rb8 24. Ba7 Dxc3 25. Be3!

Og nú á svartur enga vörn við hótuninni 26. Hc1.

25.... Bc7 26. Hc1 Dxc1 27. Bxc1 Hd6 28. Be3 Hhd8 29. Ba4 Hg6 30. Dxh5 Be4 31. f3 Bd3 32. Bb3 Hd7 33. Dh8+ Hd8 34. Dh4 f5 35. Bg5 Bb6 36. Kh1 Hf8 37. Be7 Bf1 38. Ha2 Bd8 39. Dh7 Hh6 40. Dxg7 Hfh8 41. Bxd8 Kxd8 42. Hd2+

- og svartur gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 17. október 2010.

Skákþættir Morgunblaðsins