Ól í skák: Sjöundi pistill

Virkilega góður dagur í gær.   Strákarnir unnu Bólivíu, mjög sannfærandi, 4-0, og stelpurnar unnu Íraka 3,5-0,5.   Semsagt 7,5-0,5.   Í dag mæta strákarnir Svisslendingum en við stelpurnar teflum við Englendinga. 

Fyrst um strákanna.    Mér skilst að þeir hafi unnið allir frekar örugglega.   Alltaf frábært að vinna 4-0 og aldrei sjálfgefið.   Góð og örugg taflmennska.  Eins og ónefndur liðsstjóri sagði, „það er óþarfi að skjóta spörfugla með fallbyssum".

Björn hvílir á móti Svisslendingum.   Furðulegt hvað þetta verður oft Deja Vu á þessum mótum en við teflum býsna oft við Svía og Svisslendinga.   Florian Jenni, teflir ekki með þeim að þessu sinni.  Semsagt enginn Tommi og Jenni.  

Strákarnir eru í 43. sæti með 5 stig og 11 vinninga.  Sjö lið, Rússland II, Georgía, Víetnam, Rússland I, Ungverjaland, Holland og Armenía hafa fullt hús stig, 8 stig. 

Svíarnir eru efstir Norðurlandanna með 7 stig og eru í 11. sæti á mótinu.   Aðeins gert jafntefli við Íslendinga og unnu góðan sigur á Dönum.   Norðmenn hafa 6 stig, Danir og Finnar hafa 5 stig og Færeyingar hafa 4 stig.

Tinna vann góðan sigur á þriðja borði.   Og þar kom góður byrjunarundirbúningur að gagni.   Björn, gaf henni hugmyndir hvernig tefla ætti á móti ítalska leiknum sem hún nýtti sér í botn og hreinlega valtaði yfir andstæðinginn.   Hallgerður var næst að klára.   Hún hafði svart og jafnaði taflið fremur auðveldlega.   Þegar andstæðingurinn bauð jafntefli leyst mér ágætlega á það því þótt Jóhanna væri með tapað taldi ég að Lenka myndi vinna og sigur í viðureigninni þá í hús.  En skömmu síðar leyst mér ekkert á þetta því mér fannst andstæðingur Lenku hafa jafnað taflið.  Lenka seiglaðist áfram, vann peð en í stað þess að tefla hróksendataflið áfram, peði undir, gafst andstæðingurinn hennar upp.   Jóhanna fékk slæma stöðu en var heppin þegar andstæðingur hennar lék illa af sér.    Tvær írösku stelpnanna höfðu slæður.   Eins og ávallt hingað til voru við stelpurnar seinni að klára en strákarnir.  

Stelpurnar eru í 66. sæti með 4 stig og 8,5 vinning.  Úkraína, Kína, Búlgaría og Rússland I hafa fullt hús stiga.  Norðmenn hafa 5 stig og Svíar og Danir hafa 4 stig eins og við.

Jóhanna hvílir í dag.   Semsagt tveir sigurvegarar gærdagsins sem hvíla en erfitt er að velja þann sem hvílir þegar vel gengur eins og í gær. 

Á morgun er frídagur og í kvöld fer fram Bermúda-partýið.  Á morgun förum við flest í skoðunarferð á vegum mótshaldara um Mammúta!

Lífið hérna er ávallt að verða rútínulegra.   Vaknað er í morgunmat, stúderað, hádegismatur, stúderað, teflt, kvöldmatur, farið yfir skákirnar, stúderað og sofið.    Í gær fór hluti hópsins í göngutúr og skoðuðu kirkju sem er hér í Khanty.  

Ég er dálítið fyrir utan þar sem ég bý á öðru hóteli en kem á aðalhótelið á morgnana, borða þar morgun- og kvöldmat, fer með þeim til baka eftir skákirnar og er hérna eins og grá köttur fyrir og eftir umferðir.   Maður er farinn að upplifa svoldinn „Groundhog day".   Allir dagar eins!  Það tók mig t.d. smástund í morgun að átta mig á því að það er laugardagur.    Stemming í hópnum er fyrirmyndar og allir í góðu formi.  

Ég hitti Ali, tyrkneska forsetann í gær.  Hann er mjög bjartsýnn á sigur sinn í Evrópska skáksambandinu.   Hann telur einnig að Kirsan vinni auðveldan sigur á Karpov í FIDE-kosningunum.   Hann telur að Karpov fái um 50 atkvæði af u.þ.b. 160.   Ég hef ekki forsendur til að meta hvort hann hafi rétt fyrir sér.

Var að spjalla við Finnbjörn frá Færeyjum, sem er mikill stuðningsmaður Karpovs og Kasparovs.  Hann spurði mig hvort ég væri tilbúinn að hafa umboð frá annarri þjóð, og samþykkti ég það.  Ég hef ekki hugmynd um hvaða þjóð, en ljóst er að sú þjóð styður Karpov.  Finnbjör er bjartsýnn á sigur Karpov og telur að mörg Afríkuríki og Ameríkuríki sé að snúast á sveif með með Karpov.    Andrúmsloftið hér verður æ rafmagnaðara.  Hér í VIP-herberginu sit skynjar maður spennuna og mikið er rætt um kosningarnar, mikið hvíslað og skrafað.  

Ég fæ töluverð viðbrögð  vegna MP Reykjavíkurmótsins.   Ali segist ætla að senda tyrkneska stórmeistara mótið og Danilov, frá Búlgaríu sem einnig býður sig fram sem forseti ECU,  vildi athga hvort Cheparinov fengi boð á mótið.  Semsagt Ali ætlar að senda menn,  án þess að fá kjör, en mótframbjóðandinn fór strax að spyrja um kjör fyrir sinn mann ef hann kæmi!  Þess má geta að Danilov er umboðsmaður bæði Topalov og Cheparinov.

Í gær var ég einni lyftunni og fannst lyftutónlistin sérstök, þ.e. arabísk tónlist.   Í ljós kom svo þetta var einn keppendanna sem var að hlusta á útvarp í lyftunni!

Nóg í bili, áfram Ísland!

 

Gunnar Björnsson, sem er fram á Hlö-lausan laugardag.

Athugasemdir

[Óttar Felix Hauksson (IP-tala skráð) 25.9.2010 kl. 11:39]

....við stelpurnar teflum við Englendinga.

Þessa grein undirritar Gunnar Björnsson?

[Snorri Bergz, 25.9.2010 kl. 14:43]

Já, Óttar, Gunzó sagði í fyrri pistli, að hann myndi hér eftir tala um "við stelpurnar".

Fer honum ágætlega.