Hinir fornu Lewis taflmenn taldir geta verið íslenskir

Eftir heimsókn Guðmundar G. Þórarinssonar og viðræður hans við fræðimenn Breska þjóðminjasafnsins á föstudag útiloka þeir ekki að þessir merku gripir og fornminjar geti verið af íslenskum uppruna. 

Í gær var haldin málstefna um Lewis taflmennina  í Skoska þjóðminjasafninu í Edinborg þar sem nú stendur yfir sýning helguð þeim.  Þar kynnti Guðmundur kenningu sína við góðar undirtektir.  Þar var miklu lofsorði lokið á íslenskar gullaldarbókmenntir hjá öðrum fyrirlesurum og sagt að skoða mætti þessa fornu taflmenn í ljósi Íslendingasagnanna,  hvort tveggja væri ómetanlegt fyrir Norður-Evrópska menningu.

Þeir fræðimenn svo sem Dr. David Caldwell og Dr. Alex Woolf sem höfðu gefið lítið fyrir kenningu Guðmundar fyrirfram gáfu þar mjög eftir og viðurkenndu að hann hefði mikið til síns máls og þökkuðu framlag hans til umræðunnar um uppruna þessara merku muna. 

Óhætt er að segja að eftir þessa fundi og kynningu sé nú almennt viðkennt meðal þeirra sem gerst þekkja að eins líklegt sé að Lewis list- og taflgripirnir séu íslenskir að uppruna en ekki gerðir í Þrándheimi eins og hingað til hefur verið haldið fram.  Má því vænta þess að kynning þeirra muni taka mið af því hér eftir.

Mikil umfjöllun hefur verið um þessa athyglisverðu og nýstárlegu kenningu Guðmundar í alþjóðlegum fjölmiðlum síðustu daga, svo sem í The New York Times, The Scotsman og Daily Telagraph hér í Bretlandi, fyrir málstefnuna og nú er yfirgripsmikill frétt á ChessBase.com um þetta efni.

Í The Scotsman staðfestir talsmaður the British Museum það sem fram kemur hér að ofan um að hugsanlegt sé að taflmennirnir séu íslenskir, enda þótt annað hafi hingað til verið talið líklegra.

Þá  eru Lewis listmunirnir sagðir vera merkustu taflmenn sögunnar og eru meira að segja nú taldir meðal 5 mikilvægustu fornleifa í eigu British Musemum/Breska Þjóðminjasafnsins og kennir þar þó margra grasa.

Athygli vekur að á forsíðu leiðarvísis British Museum um taflmennina trónir mynd af "berserknum", staðgengli hróksins, sem sýnir hvað þessum fornu munum er gert þar hátt undir höfði.  Samkvæmt kenningu Guðmundar telur hannað þeir hafi verið skornir út úr rostungstönnum af Margréti hinni högu í Skálholti 1180-1200 í smiðju Páls Jónssonar biskups.

Sjá nánar á www.leit.is/lewis

Tengill á greinarnar í The Scotsman og the Telegraph ofl.

Myndaalbúm (ESE)

Athugasemdir

[Erlingur Þorsteinsson (IP-tala skráð) 14.9.2010 kl. 15:26]

Þeir eru semsé HUGSANLEGA íslenskir. Það er ekki verið að halda því fram að þeir séu það heldur að það sé möguleiki.

Guðni Ágústsson hefur verið að ræða um safn tengt Bobby Fischer og Friðrik Ólafssyni. Þá tillögu kom ég með upphaflega á blogginu, það er safn tengt Bobby Fischer.

Skáksaga Íslendinga er auðvitað mjög merkileg, og blandast Bobby Fischer inn í þá mynd. 

Ljóst þykir mér að þáttur Freysteins Þorbergssonar sé meiri en menn almennt ætla.

Helgarskákmótin og margt fleira Fiske safnið og munir frá hinum ýmsu einvígum og mótum hérlendis.

Þetta myndi vekja Heimsathygli og auk þess styrkja ferðamannaiðnaðinn verulega.