Skákþáttur Morgunblaðsins: Anand nær forystu í HM – einvígi

Byrjun heimsmeistaraeinvígis Wisvanathan Anand og Venselin Topalov í Sofia í Búlgaríu er með hressilegra móti. Eftir afleita byrjun, tap í fyrstu skák sem margir vildu kenna röskun á ferðaáætlun vegna gossins í Eyjafjallajökli, lét Anand hendur standa fram úr ermum og vann aðra og fjórðu skák einvígisins og heldur forystu, 2½ : 1½. Þeir tefla 12 skákir en fimmta skákin var á dagskrá sl. föstudag.

Heimavöllurinn virðist enn sem komið er ekki skipta miklu máli, þetta er í raunar í fyrsta sinn síðan 1921 er Emanuel Lasker mætti Jose Raoul Capablanca í Havana á Kúbu, að heimsmeistari í skák fellst á að tefla á heimavelli andstæðingsins. Og kannski var Anand, sem býr í smábænum Collado Mediano steinsnar frá Madrid, með Spán í farangrinum á sínu langa ferðalagi til Búlgaríu: báðar vinningsskákir hans koma upp úr katalónskri byrjun. Þar virtist hann hitta á veikan blett hjá Topalov sem í báðum skákunum hirti peð en varð afar bumbult af. Rannsóknir beggja eru vissulega keyrðar áfram af miklu afli hugbúnaðar sem reynir á minnið og í fyrstu skákinni varð óvænt skammhlaup í heilabúi Anand sem ruglaðist í ríminu þegar tefld var Grünfelds-vörn. Þess finnast dæmi að auðfenginn sigur í fyrstu skák fari illa í menn og Indverjinn kom til baka af miklum krafti. Hin magnaða fjórða skák fer hér. Lokin eru tefld með glæsilegum hætti:

Sofia 2010; 4. skák:

Wisvanathan Anand - Venselin Topalov

Katalónsk byrjun

1. d4 Rf6 2. c4 e6 3. Rf3 d5 4. g3 dxc4 5. Bg2 Bb4+ 6. Bd2 a5 7. Dc2 Bxd2+ 8.Dxd2 c6 9. a4 b5 10. Ra3

Endurbót Anand á 1. einvígisskák Kramnik og Topalov í Elista 2006. Þar var leikið 10. axb5 cxb5 11. Dg5 og hvítur náði peðinu til baka.

10. ... Bd7 11. Re5 Rd5 12. e4 Rb4 13. 0-0 0-0 14. Hfd1 Be8 15. d5!

Sprengir upp miðborðið.

15. ... Dd6 16. Rg4 Dc5 17.Re3 R8a6 18. dxc6 bxa4 19. Raxc4 Bxc6 20. Hac1 h6?

H6-peðið er því miður fyrir Topalov kjörið skotmark riddarans. Sennilega er hér kominn tapleikurinn í þessari skák. Nú spyrja menn tölvurnar hvað best sé að gera! Rybka mælir með 20. ... De7 t.d. 21. Rd6 Had8 22. Rac4 f5 með flókinni stöðu.

21. Rd6 Da7 22. Rg4 Had8

( Sjá -stöðumynd )

23. Rxh6+! gxh6 24.Dxh6 f6 25.e5!

Það tók Anand 10 mínútur að finna þennan leik sem molar niður varnir svarts.

25. ... Bxg2 26.exf6! Hxd6 27. Hxd6 Be4 28. Hxe6 Rd3 29.Hc2 Dh7 30. f7+!

Lokahnykkurinn. Að leika peði ofan í þrælvaldaðan reit kom oft fyrir í skákum Kasparovs.

30. ...Dxf7 31. Hxe4 Df5 32. He7

- og Topalov gafst upp. Eftir 32. ... Hf7 getur hvítur t.d. unnið með 33. Hc8+! Dxc8 34. Dg6+ Kh8 35. Dh5+! og mátar í tveim leikjum

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 2. maí  2010.

Skákþættir Morgunblaðsins

[Event "Sofia BUL, WCC 2010 game_4"] [Site "Sofia BUL"] [Date "2010.04.28"] [Round "4"] [White "Anand, V."] [Black "Topalov, V."] [Result "1-0"] [ECO "E04"] [WhiteElo "2787"] [BlackElo "2805"] [PlyCount "63"] [EventDate "2010.04.24"] [EventType "match"] [EventRounds "12"] [EventCountry "BUL"] 1. d4 Nf6 2. c4 e6 3. Nf3 d5 4. g3 dxc4 5. Bg2 Bb4+ 6. Bd2 a5 7. Qc2 Bxd2+ 8. Qxd2 c6 9. a4 b5 10. Na3 Bd7 11. Ne5 Nd5 12. e4 Nb4 13. O-O O-O 14. Rfd1 Be8 15. d5 Qd6 16. Ng4 Qc5 17. Ne3 N8a6 18. dxc6 bxa4 19. Naxc4 Bxc6 20. Rac1 h6 21. Nd6 Qa7 22. Ng4 Rad8 23. Nxh6+ gxh6 24. Qxh6 f6 25. e5 Bxg2 26. exf6 Rxd6 27. Rxd6 Be4 28. Rxe6 Nd3 29. Rc2 Qh7 30. f7+ Qxf7 31. Rxe4 Qf5 32. Re7 1-0