Hannes og Bragi með jafntefli í fimmtu umferð

Hannes Hlífar Stefánsson (2588) og Bragi Þorfinnsson (2422) gerðu báðir jafntefli í fimmtu umferð Bosna Saravejo sem fram fór í dag.  Hannes við ítalska alþjóðlega meistarann Carlo D'amore (2484) og Bragi við Armenann Aghasi Inants (2259)  .  Guðmundur Gíslason (2377) tapaði fyrir tyrkneska FIDE-meistaranum Yasin Emrah Yagiz (2234).   Hannes hefur  10 stig (3,5 vinning), Bragi hefur 7 stig (2,5 vinning) og Guðmundur hefur 6 stig (2 vinninga).

Í sjöttu umferð, sem fram fer á morgun, teflir Hannes við rússneska alþjóðlega meistarann Egor Krivoborodov (2490), Bragi við þýska FIDE-meistarann Jens Hirneise (2294) og Guðmundur við Serbann Samir Sadikovic (2177).

Skák Hannesar verður í beinni útsendingu á morgun en umferðin hefst kl. 12:30.

Efstir með 13 stig (4,5 vinning) eru stórmeistararnir Artyom Timofeev (2677), Rússlandi, Jan Gustafsson (2640), Þýskalandi, Ante Brkic (2573), Króatíu, Dmitry Svetushkin (2547), Makedóníu, og David Berczes (2519), Ungverjalandi. 

Alls taka 169 skákmenn þátt í mótinu og þar af 44 stórmeistarar og 38 alþjóðlegir meistarar.  Stigahæstur er kínverski stórmeistarinn Wang Hao (2722) en meðal annara keppenda má nefna Ivan Sokolov (2654) sjálfan sem er mótsstjóri.  Hannes er nr. 18 á stigum, Bragi nr. 66 og Guðmundur nr. 81.  Veitt eru 3 stig fyrir sigur, 1 stig fyrir jafntefli og 0 stig fyrir tap. 

 

• Heimasíða mótsins
• Beinar útsendingar
• Chess-Results