Gunnar Finnlaugsson: Pistill um EM öldunga

Gunnar Finnlaugsson hefur sent Skák.is pistil um EM öldungasveita sem fram fór í Dresden í Þýsklandi 10.-18. febrúar sl. en það var Gunnar sem átti frumkvæðið að því að íslensk skáksveit, sem tefldi undir nafni KR tók þátt.

Hér er pistillinn:

Aðdragandi

Höfundur þessa pístils er mjólkurverkfræðingur á eftirlaunum og býr í Lundi í Svíþjóð.

Þegar ég varð "fríherra" fyrir tæpum tveimur árum gafst meiri tími fyrir eigin áhugamál, skákina og golfið. Þegar ekki er hægt að spila golf má grípa í tafl!

Skákiðkun meðal "öldunga", það er karla yfir sextugt og kvenna yfir fimmtugt hefur aukist mjög undanfarin ár. Þessi hópur er kallaður "seniors". Mitt fyrsta mót sem "senior" var Norðurlandamótið í Fredrikstad í Noregi í september síðastliðnum.

Skáksamböndin hafa ekki sinnt þessum aldurhópi að ráði. Þar sitja konur, börn og stórmeistarar í fyrirrúmi. Á þessu eru þó undantekningar. Norðmaðurinn Per Ofstad hefur verið potturinn og pannann í "seniorsjakk" í Noregi og jafnframt verið "seniorpresident" í Skáksambandi Evrópu undanfarin ár.

Nú í febrúar fór fram 12. Evrópukeppni öldungaliða. Ísland hefur einu sinni áður sent sveit, það var árið 2005. Þessu keppni hefur alltaf farið fram í Dresden að undanskildu árinu 2008, en þá fór mótið fram í Austurríki.

Með hjálp góðra manna tókst að fá í lið frá Íslandi að þessu sinni. Skáksambandið styrkti okkur lítillega og skákdeild KR styrkti okkur hressilega og það gerði útslagið. Við þökkum þessum aðilum fyrir veittan stuðning.

Auk mín voru í liðinu; Gunnar Kr Gunnarsson, Magnús Gunnarsson, Ingimar Jónsson og svo Ingimar Halldórsson. Ingimar Jónsson sá um fararstjórn fjórmenninganna og var okkur til trausts og halds í viðskiptum við heimamenn. Held jafnvel að þýskan hans sé betri en danskan mín!

Mótið var teflt á RAMADA hótelinu í Dresden 10. til 18 febrúar sl. Alls tóku 78 sveitir þátt og var um helmingur þeirra þýskar. Teflt var á fjórum borðum, 9 umferðir eftir svissneska kerfinu. Umhugsunartími var 90 mínútur á 40 leiki og síðan 30 mínútur til að ljúka skákinni. 30 sekúndur bættust við fyrir hvern leik. Stig töldu fyrst, síðan vinningar. Tveir vinningar gáfu eitt stig og tveir og hálfur eða meira gaf tvö stig.

Ég var liðsstjóri og kom áratuga reynsla mín af stigakerfinu sem notað er hér í Svíþjóð að notum. Ég var til dæmis eini maðurinn sem mátti taka jafntefli án þess að spyrja. Ef til vill misnotaði ég þessi forréttindi.

Seint að kvöldi tveimur dögum fyrir mót komum við á hótelið. Daginn eftir fengum við borð og aukastóla inn á mitt herbergi. Í minni tölvu hef ég Chess Assistent (CA) og var CA mikið notuð til undirbúnings og einnig þegar skákir hverrar umferðar voru skoðaðar.

Mótshaldið

Mótshaldarar komust vel frá sinni vinnu. Hér tefldu fleiri lið en í opnum flokki á Ólympíuskákmótinu í Argentínu 1978.

Það sem ég dáðist mest að var Bulletin. Hún er á netinu ásamt „download" á eftirfarandi slóð;

http://www.schachfestival.de/www_festival/92e9ee85b2a0843ab8dfe06a2e51adee.php

Alls voru tefldar 1404 skákir er eru nær allar í Bulletin. Þó vantar því miður leiki víða.

Teflt var í stórum aðalsal og öðrum minni. Við byrjuðum í minni salnum. Minni salurinn fékk síðan viðurnefnið „norska svæðið". Norðmenn voru með sjö lið og mörg þeirra veik.

Tólf skákir voru sendar beint.

Opnun mótsins og sér í lagi verðlaunaafhendingin voru skemmtilegar og vel skipulagðar samkomur. Maður hafði á tilfinningunni að maður væri að tefla á Ólympíuskákmóti. Því miður misstu félagar mínir af verðlaunaafhendingunni, því þeir þurftu að fara til Berlínar til að komast í flug heim.

Úrslit mótsins

Úrslit mótsins má sjá á hinni ágætu heimasíðu mótsins;

http://www.schachfestival.de/www_festival/4f529984eccb6ebdc4795ee0cf154f5a.php

Rússar unnu létt og verðskuldað. Hinn gamli Íslandsvinur Vasjukov hélt þakkarræðu við verðlaunaafhendinguna. Svisslendingar komu næstir með Korchnoi í broddi fylkingar.

Mest á óvart komu Finnar og voru himinlifandi. Þeir unnu Svía í síðustu umferð. Góðkunningi minn Westerinen þakkaði okkur hjálpina, en við töpuðum stórt fyrir þeim í sjöundu umferð.

Að mínum dómi er árangur okkar þokkalegur. Átta af þeim níu liðum sem við tefldum við voru fyrir ofan okkur í lokin. Reiknuð voru svo kölluð Buchholtz stig, sem eru samanlögð vinningatala mótherjanna. Við vorum með jafnmörg Buchholtz stig og Finnarnir. Hálfur vinningur meira í síðustu umferð hefði lyft okkur um tíu sæti. Toppurinn var að sjálfsögðu vinningurinn gegn England 1 í sjöttu umferð sem fyrr er getið. Að torska á sænsku þýðir að tapa.

Einstaklingsúrslitin hafa þegar birst á skak.is. Við nafnarnir áttum á brattann að sækja á efstu borðunum. Við áttum ljósa punkta en fengum nokkra slæma skelli. Ég tel að heppni og óheppni sé ekki til í skák, bara klaufaskapur og heimska, annað hvort eigin eða andstæðingsins. Meðalstig andstæðinga Gunnars Gunnarssonar voru tæp 2300 stig.

Magnús Gunnarsson stóð sig best og hafði svart í 6 af 8 skákum og tefldi afbragðsvel. Við Magnús erum báðir Selfyssingar og þökkum skyrinu að við getum enn teflt. Einnig verður að hafa í huga að á því herrans ári 1958 var Benóný sendur austur yfir fjall til að kenna okkur byrjanir. Mikil hefur ávallt umhyggja skákforystunnar verið hvað varðar skáklíf úti á landi.

Ingimar Halldórsson var leynivopnið okkar, hann hafði hvorki íslensk né FIDE stig fyrir mótið. Ingimar vann meistaraflokk á Skákþingi Íslands 1967 og tefldi í efsta flokki á Norðurlandamótinu í Finnlandi sama ár. Hann var þaulsetinn við skákborðið og kom mér mest á óvart. Baráttuhugur Ingimars Jónssonar jókst með hverri umferð.

Yfirbókun og magavírus

Í seinni hluta mótsins dró til tíðinda. Eini frídagurinn minn var þegar félagar mínir unnu "fjórða þorskastríðið" og unnu England 1 með minnsta mun. Þá fékk ég að fara inn á netið hjá móthöldurum. Þá fékk ég pappír með fyrirsögninni;

"To the captains of the foreign teams"

Menn voru beðnir að þjappa sér saman eða flytja á annað hótel. Þá kom upp kurr og spurt var; hvað með þýsku liðin? Norðmenn sem ég hitti töluðu um að fara heim. Á sama tíma fengu margir heiftarlega magapest og grunur lék á að þetta væri matareitrun (hótelið?) Ég sá til að við gætum haldið upp á sigurinn áður en vandamálin yrðu rædd. Orðrómur var uppi um að þýsku liðin hefðu fyrst verið beðin um að rýma 35 herbergi, en þvertekið fyrir að verða við því. Síðan var boðað til fundar með öllum liðsstjórum og fundarboðum dreift meðan teflt var. Ingimar Jónsson fór með mér á fundinn. Við fengum eftirfarandi boðskap frá hótelstýrunni;

" Hótelið er yfirbókað nóttina fyrir síðustu umferð. Okkur vantar 35 herbergi. Innan tveggja tíma þurfum við að fá að vita hvaða herbergi þetta verða. Ef þið getið ekki orðið við þessu verður skáksalurinn ekki opnaður í fyrramálið"

Þessi unga kona var mjög góð í þýsku en neitaði að tala ensku! Konur hafa allmennt ekki mikinn skilning á þessum "stríðsleik" okkar.

Dr Jordan, foringi mótshaldara tók sökina á sig til að bjarga í horn. Ingimar H og Magnús fóru í sambýli síðustu nóttina og þannig bjargaði KR líka í horn. Þetta var síðasta ár kempunnar Ofstad sem "seniorpresident" og við norðurlandabúar lögðum okkar að mörkum til þess að hann gæti hætt með sóma. Hann fór yfir á annað hótel og sagði við mig; "Aldrei aftur RAMADA hótel".

Þegar síðasta umferðin stóð yfir kom rúta með Japönum. Þeir hafa eflaust borgað betur!

Okkur var sagt að Oleg Chernikov, varamaður Rússanna hafi veikst fyrstur. Læknar sögðu að þetta væri vírus frá Moskvu. Þægilegasta svarið fyrir Þjóðverjana. Alvarlegast varð þetta þegar einn Svíanna féll í yfirlið á veitingastað, var meðvitundarlaus og án hjartsláttar í nokkrar
mínútur. Síðan var hann fluttur á sjúkrahús, en fékk að fara heim um nóttina. Enn sögðu læknar að þetta væri magavírus frá Moskvu. Að minnsta kosti þriðjungur norrænu keppendanna fengu Chernikov-vírusinn á meðan á mótinu stóð. Margir héldu að þetta væri matareitrun. Ef þetta var matareitrun kom bara hótelið til greina

Þegar um matareitrun er að ræða veikjast yfirleitt margir samtímis. Hér veiktust menn koll af kolli. Við fimmmenningarnir fundum ekki fyrir neinu á meðan á mótinu stóð, sem betur fer.  Bæði ég og Ingimar Jónsson fengum heiftarlega magakveisu á heimleiðinni, og Magnús veikist eftir heimkomuna. Þetta er trúlega það sem er kallað "vinterkräksjuka" á sænskunni. Hins vegar er ég ekki viss um að vírusinn væri Rússi. Nóg komið af vælinu...

Vissi ekki að það væri svona erfitt að vera teflandi liðsstjóri hjá KR?!

Lokapunktar

 

• Taugaveiklunar vegna efnahagskreppunnar gætir víðar en á ísa köldu landi. Ég varð var við þetta í Hollandi í fyrra líka. Hótelið krafðist „pinncode" þegar borgað var með korti. Að sögn nýjar reglur í Þýskalandi fyrir öll erlend kort. Þegar ég þurfti að taka út seðla með gullkorti MP banka þurfti ég at setja „pinncode"þrisvar. Mörg ágætis veitingahús voru í nágrenni RAMADA, eitt þeirra stærstu tók ekki VISA.
• Nafni minn ofreyndi sig eitt kvöldið á heilsubótargöngu okkar. Næsta dag var farið í gufu og vatnsnudd í kjallara hótelsins. Ég fór í sundskýlu og inn þar sem var sturta, gufuböð og vatnsnudd var fyrir alla. Þýsk kona í hvítum slopp sagði mér að fara úr sundskýlunni og þvo mér almennilega. Þetta var í votta viðurvist. Þegar inn í gufubaðið kom var þar blanda af fólki og mikið rétt þarna voru konur á Evuklæðum. Gleraugnaleysi og „þoka" skertu þó útsýnið. Skotland 2 varð neðst og var konan í þeirra liði þarna í þokunni. Myndarlegur Svíi tjáði mér að hún hafi reynt að fá hann til lags við sig.

• Næsta Evrópumót öldungaliða verður í Grikklandi í apríl á næsta ári.

Áfram KR! Ekki ala þá heldur mala þá!