Skák.is

Færsluflokkur: Spil og leikir

2.5.2011 | 08:07

Skákir 2. deildar Íslandsmóts skákfélaga

Tómas Veigar hefur ennig slegið inn skákir 2. deildar. Þær minna finna hér að neðan.

Veljið skák (71 alls):

Spil og leikir | Slóð | Facebook | Athugasemdir (0)

2.5.2011 | 07:00

Hraðkvöld hjá Helli í kvöld

Taflfélagið Hellir heldur hraðkvöld mánudaginn 2. maí nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Einnig verður dreginn út af handahófi annar keppandi, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Spil og leikir | Breytt 24.4.2011 kl. 10:09 | Slóð | Facebook | Athugasemdir (0)

1.5.2011 | 20:00

Skákþáttur Morgunblaðsins: Héðinn sigurstranglegur á Íslandsþingi

Þrír skákmenn berjast um Íslandsmeistaratitilinn í skák í keppni landsliðsfokks Skákþings Íslands sem stendur yfir þessa dagana á Eiðum. Þegar þetta er ritað trónir stigahæsti keppandinn Héðinn Steingrímsson á toppnum með fullt hús vinninga eftir fjórar umferðir. Henrik Danielsen og Bragi Þorfinnsson deila 2. sæti með 3½ vinning en þar á eftir koma Þröstur Þórhallsson og Stefán Kristjánsson með 2 vinninga.

Keppendur i landsliðsflokknum eru færri en oftast áður eða tíu talsins en hafa yfirleitt verið 12 talsins og stundum 14. Greinarhöfundur minnist Íslandsþingsins 1953 þegar tíu skákmenn tefldu um titilinn. Það breytir því ekki að Austfirðingar með Sverri Gestsson í broddi fylkingar bjóða upp á frábærar aðstæður fyrir þátttakendur.

Hannes Hlífar Stefánsson sem vann Íslandsþingið fyrst árið 1998 og alls tíu sinnum eftir það tók sér frí að þessu sinni en aðrir virkir skákmenn sem gætu styrkt mótið, Björn Þorfinnsson, Jón Viktor Gunnarsson, Hjörvar Steinn Grétarsson, sem ákvað að tefla í áskorendaflokki, Sigurbjörn Björnsson og Snorri Bergsson svo nokkrir séu nefndir eru ekki með að þessu sinni.

Héðinn kom inn þegar Björn Þorfinnsson forfallaðist og er fengur að þátttöku hans. Hann ber höfuð og herðar yfir aðra keppendur þegar kemur að byrjanakunnáttu enda hafa sigrar hans ráðist í þeim þætti skákarinnar. Ýmsir í landsliðsflokknum gætu bætt sig verulega á þessu sviði og hafa sumir setið uppi með óteflandi stöðu jafnvel með hvítu eftir aðeins tíu leiki! Þetta á þó ekki við Henrik Danielsen sem hefur þróað með sér persónulegt byrjanakerfi sem gefist hefur vel í keppni við skandinavíska skákmenn á undanförnum misserum. Bragi Þorfinnsson hefur verið að bæta sig hægt og bítandi undanfarið og teflir af miklu öryggi. Fátt bendir til þess að aðrir keppendur nái að blanda sér í baráttuna um titilinn.

Guðmundur Kjartansson var með jafntefli í hendi sér þegar hann tefldi við Henrik í fyrstu umferð en teygði sig of langt í vinningstilraunum og tapaði. Þetta tap virðist hafa slegið hann út af laginu. Héðinn gaf engin grið þegar þeir mættust í þriðju umferð:

Skákþing Íslands, 3. umferð:

Héðinn Steingrímsson –

Guðmundur Kjartansson

Nimzo-indversk vörn

1. d4 d5 2. c4 e6 3. Rc3 Bb4 4. Rf3 Rf6 5. cxd5 exd5 6. Bg5 Rbd7 7. Hc1 h6

Upphafið að vafasamri áætlun. Traustara er 7.... c6 eða jafnvel 7.... c5.

8. Bh4 g5 9. Bg3 Re4 10. Rd2 Rxg3 11. hxg3 Rb6 12. a3 Bxc3 13. Hxc3 Be6 14. Dc2 c6 15. e3 De7 16. b4 Bd7 17. Bd3 0-0-0 18. Ke2 Kb8 19. a4 f5?

19.... Dxb4 er varla gott. Eftir 20. Hb1 hefur hvítur sterka sókn eftir b-línunni.Best var hinsvegar 19.... Bg4+! því að 20. f3 má svara með 20.... Hhe8 með færum eftir e-línunni. Betra e 20. Rf3 en þá kemur til greina að leika 20..... f5.

20. a5 Rc8 21. a6 b6 22. Bxf5 Dxb4?

Skárra var 22.... Bxf5 23. Dxf5 Dxb4 24. Hhc1 Db5+ 25. Dd3 Dxd3 26, Kxd3 Re7 28. Rf3 hhf8 og svartur getur varist.

23. Bxd7 Hxd7 24. Hb1 Df8 25. Rf3 Hf7 26. Hf1 Rd6 27. Re5 Re4 28. Rxf7 Rxc3 29. Dxc3 Dxf7 30. Dxc6 Hc8 31. Dd6+ Ka8

32. Hc1!

Laglegur lokahnykkur, 32.... Hxc1 er vitanlega svarað með 33. Dd8+ og mátar.

32.... Hf8 33. f3 g4 34. Hc7 gxf3 35. Kd2

– og svartur gafst upp.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í Sunnudagsmogganum, 24. apríl 2011.

Skákþættir Morgunblaðsins

Spil og leikir | Breytt s.d. kl. 20:37 | Slóð | Facebook | Athugasemdir (0)

1.5.2011 | 18:49

Skákir fyrstu deildar

Tómas Veigar Sigurðarson hefur slegið inn skákir síðari hluta Íslandsmóts skákfélaga, þ.e. fyrstu deild. Þær má finna hér með fréttinni.

Veljið skák (96 alls):

Spil og leikir | Slóð | Facebook | Athugasemdir (0)

1.5.2011 | 17:39

Henrik sigraði í sjöundu umferð í Lübeck

Henrik Danielsen (2533) vann þýska alþjóðlega meistarann Ulf Von Herman (2395) í sjöundu umferð alþjóðlega mótsins í Lübeck í Þýskalandi sem fram fór í dag. Henrik hefur 5½ vinning og er efstur ásamt rússneska stórmeistaranum Vladimir Epishin (2567). Í áttundu og næstsíðustu umferð sem fram fer á morgun teflir Henrik við þýska alþjóðlega meistarann Christoph Scheerer (2422).

10 skákmenn taka þátt og tefla þeir allir við alla. Henrik er einn þriggja stórmeistara sem tekur þátt og næststigahæstur keppenda. Stigahæstur er rússneski stórmeisarinn Vladimir Epishin (2567).

Heimasíða mótsins

Spil og leikir | Slóð | Facebook | Athugasemdir (0)

1.5.2011 | 13:00

Skákdeild Fjölnis heiðrar Íslandsmeistara

Nýkrýndur Íslandsmeistari í skák Héðinn Steingrímsson stórmeistari mætti á síðustu hefðbundnu skákæfingu Fjölnis í vetur og var þá heiðraður af félögum sínum í Fjölni með áritaðri skákbók. Héðinn þakkaði fyrir sig með því að bjóða upp á klukkutíma kennslustund í úrvalsflokki skákdeildarinnar. Við sama tækifæri kynnti Helgi Árnason formaður skákdeildarinnar val á æfingameisturum Fjölnis þetta árið. Fyrir valinu urðu þeir Dagur Ragnarsson og Oliver Aron Jóhannesson sem auk þess að mæta á nær allar æfingar félagsins í vetur hafa tekið gífurlegum framförum sem skákmenn.

Dagur og Oliver Aron eru 13 og 14 ára gamlir og sýndu ótrúlega frammistöðu á MP-Reykjavík Open alþjóðlega skákmótinu í Ráðhúsi Reykjavíkur í mars og Íslandsmótinu í áskorendaflokki þar sem þeir hækkuðu í báðum mótunum mest allra á skákstigum og unnu fjölmarga stigahærri innlenda-og erlenda skákmeistara. Þeir eru einnig lykilmenn í sigursælum skáksveitum Rimaskóla sem unnu bæði Íslandsmót grunn-og barnaskólasveita. Skákdeild Fjölnis lýkur skákstarfinu í vetur n.k. laugardag 7. maí með Sumarskákmóti Fjölnis sem haldið verður í Rimaskóla og hefst kl. 11:00. Það er Rótarýklúbbur Grafarvogs sem gefur verðlaunagripi auk þess sem 20 verðlaun verða í boði, pítsugjafabréf og bíómiðar.

Spil og leikir | Breytt s.d. kl. 03:04 | Slóð | Facebook | Athugasemdir (0)

1.5.2011 | 11:00

Dagur og Oliver Aron skólaskákmeistarar Reykjavíkur

Skólaskákmót Reykjavíkur í eldri og yngri flokki var haldið í Taflfélagi Reykjavíkur á laugardaginn.
Teflt var um 3 sæti á Landsmóti í eldri flokki og tvö sæti í yngri flokki. Báðir titlarnir fóru á kunnuglegar slóðir; Þeir félagar úr Rimaskóla Dagur Ragnarsson og Oliver Aron Jóhannesson voru öruggir sigurvegarar og báru af í sínum flokkum. Drengirnir tveir eru í svakalegri framför eins og stigahækkanir þeirra á nýjum lista sýna. Vert er að geta árangurs Leifs Þorsteinssonar sem hefur bætt sig mikið í vetur.

Úrslit:

Eldri flokkur:
1. Dagur Ragnarsson 5.5v/6
2. Hrund Hauksdóttir 4v/6
3. Dagur Kjartansson 4v/6

Öll þessi fara á Landsmótið í Skólaskák um miðjan maí á Akureyri.

Keppendur voru 7 talsins og tefldu allir við alla.

Yngri flokkur:
1. Oliver Aron Jóhannesson 7v/7!
2. Leifur Þorsteinsson 6v
3. Jacob Alexander Petersen 5v

Oliver og Leifur eru fulltrúar Reykjavíkur á Landsmóti.

Keppendur voru 24.

Nánari úrslit á Chess Results: eldri flokkur og yngri flokkur.

Myndaalbúm.

Skákstjórn var í höndum Stefáns Bergssonar.

Spil og leikir | Breytt s.d. kl. 02:37 | Slóð | Facebook | Athugasemdir (0)

1.5.2011 | 09:00

Mikael Jóhann og Jón Kristinn kjördæmismeistarar Norðurlands eystra

Mikael Jóhann Karlsson og Jón Kristinn Þorgeirsson urðu kjördæmismeistarar í eldri og yngri flokki í skólaskák, en kjördæmismótið var haldið á Akureyri í gær. þeir unnu báðir sína flokka með fullu húsi vinninga. Hersteinn Heiðarsson og Logi Jónsson urðu jafnir í 2-3. sæti með 5 vinninga og háðu því aukakeppni til að skera úr um hvor þeirra hreppti annað sætið, en það sæti gefur keppnisrétt á Landsmótinu í skólaskák sem haldið verður á Akureyri um miðjan maí. Hersteinn hafði betur í þeirri keppni en tvær 15 mín skákir og tvær hraðskákir þurfti til að skera úr um það.

Snorri Hallgrímsson Borgarhólsskóla varð í fjórða sæti með 4 vinninga og Valur Heiðar Einarsson Borgarhólsskóla varð í 5. sæti með 2,5 vinninga.

Keppendur í eldri flokki: Logi Rúnar Jónsson, Hersteinn Heiðarsson, Birkir Freyr Hauksson, Mikael Jóhann Karlsson, Jóhanna Þorgilsdóttir, Valur Heiðar Einarsson, Snorri Hallgrímsson og Svavar Hinriksson.

Úrslitin í eldri flokki:

1. Mikael Jóhann Karlsson Brekkuskóla 7 vinninga af 7.
2. Hersteinn Heiðarsson Glerárskóla 5 (+ 3)
3. Logi Rúnar Jónsson Glerárskóla 5 (+1)
4. Snorri Hallgrímsson Borgarhólsskóla 4
5. Valur Heiðar Einarsson Borgarhólsskóla 2,5
6. Birkir Freyr Hauksson Glerárskóla 2
7. Jóhanna þorgilsdóttir Valsárskóla 1,5
8. Svavar A Hinrkisson Valsárskóla 1

Jón Kristinn Þorgeirsson Lundaskóla vann eins og áður segir yngri flokkinn örugglega en Aðalsteinn Leifsson Brekkuskóla, varð í öðru sæti með 4 vinninga. Jafnir í 3-4 sæti urðu þeir Sævar Gylfason Valsárskóla og Oliver Ísak Ólason Brekkuskóla og háðu þeir aukakeppni um þriðja sætið, því það sæti gefur keppnisrétt á landsmótinu í skólaskák. Sævar vann þá keppni 2-0. Ari Rúnar Gunnarsson Reykjahlíðarskóla varð í 5-6 sæti ásamt Telmu Eir Aradóttur Valsárskóla með 1. vinning. Tefldar voru skákir með 15 mín umhugsunartíma í báðuð flokkum.

Spil og leikir | Breytt s.d. kl. 02:27 | Slóð | Facebook | Athugasemdir (0)

1.5.2011 | 07:00

Barna-og unglingameistaramót Reykjavíkur fer fram í dag

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 1. maí í félagsheimili T.R. Faxafeni 12. Taflið hefst kl.14 og stendur til ca. kl. 18.

Tefldar verða 7 umferðir eftir Monrad-kerfi með umhugsunartímanum 15 mín. á skák.

Teflt verður í einum flokki. Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2011, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2011, sé hún búsett í Reykjavík eða félagi í reykvísku taflfélagi.

Til viðbótar verða veitt verðlaun fyrir þrjú efstu sætin í aldursflokknum 12 ára og yngri (fædd 1998 og síðar).

Mótið er opið öllum krökkum 15 ára og yngri (fædd 1995 og síðar). Skráning fer fram á taflfelag@taflfelag.is (vinsamlegast gefið upp nafn, fæðingarár, símanúmer, skóla og taflfélag (ef við á)) og einnig er hægt að skrá sig á mótsstað sunnudaginn 1. maí. frá kl. 13.30- 13.45.

Aðgangur á mótið er ókeypis.

Spil og leikir | Breytt 25.4.2011 kl. 23:41 | Slóð | Facebook | Athugasemdir (0)

1.5.2011 | 02:23

Henrik efstur eftir 6. umferð í Lübeck

Henrik Danielsen (2533) vann Þjóðverjann Ullrich Krause (2265) í sjöttu umferð alþjóðlega mótsins í Lübeck í Þýskalandi sem fram fór í dag. Henrik hefur 4½ vinning og er efstur ásamt rússneska stórmeistaranum Vladimir Epishin (2567). Í sjöundu umferð sem fram fer á morgun teflir Henrik við þýska alþjóðlega meistarann Ulf Von Herman (2395).

Heimasíða mótsins

Spil og leikir | Slóð | Facebook | Athugasemdir (0)

« Fyrri síða | Næsta síða »