Skákþáttur Morgunblaðsins: Hannes Hlífar efstur á Opna tékkneska

Hannes Hlífar Stefánsson hefur heldur betur byrjað af krafti á Opna tékkneska meistaramótinu sem stendur yfir þessa dagana í Pardubice í Tékklandi. Hannes var einn í efsta sæti þegar tefldar höfðu verið sex umferðir með 5 ½ vinning og frammistöðu sem reiknast upp á 2824 elostig. Mótinu lýkur um helgina. Alls taka 279 skákmenn þátt í mótinu þar af 50 stórmeistarar en auk Hannesar taka þeir Guðmundur Kjartansson og Guðmundur Gíslason einnig þátt í mótinu. Kjartansson var með 4 vinninga og Gíslason með 3 ½ vinning.

Eftir að hafa hlotið 2 ½ vinning úr fyrstu þrem skákum sínum tók Hannes mikinn sprett, vann tvo öfluga rússneska skákmenn og síðan Indverjann Panchanathan í eftirfarandi skák.

Stóra stundin rann upp þegar Hannes ákvað að fórna manni í 27. leik. Andstæðingur hans stóð frammi fyrir tveim kostum: að taka fórninni og reyna að standast áhlaupið eða finna aðra leið. Undir svona kringumstæðum er nauðsynlegt að „reiknivélin" sé í lagi. Horfi menn nógu lengi út í loftið, eða í „gegnum andstæðinginn" að hætti Gelfands eða Ivantsjúks, flögrar kannski að manni gömul speki á við þá að besta ráðið við fórn sé að taka henni. Góð lína, sem Kortsnoj mun hafa fylgt dyggilega á sínum yngri árum, en tryggir þó að öðru leyti engan veginn að menn sleppi lifandi út úr því völundarhúsi sem skákin er. Indverjinn hefur sennilega verið í allt öðrum hugleiðingum, hann sá möguleika á gagnsókn en hafði ekki reiknað dæmið nægilega vel:

Pardubice, 6. umferð:

Chandran Panchanathan - Hannes Hlífar Stefánsson

Slavnesk vörn

1.d4 d5 2.Rf3 Rf6 3.c4 c6 4.Rc3 e6 5. e3 Nbd7 6. Qc2 b6!? 7. b3 Bb7 8. Be2 Be7 9. O-O O-O 10. Bb2 Qc7 11. Rad1 Rfd8 12. Rfe1 Rac8 13. Bd3 h6 14. Qe2 Re8 15. Bb1 c5 16. cxd5 exd5 17. Bf5 Rcd8 18. Rc1 Bf8 19. Red1 Bc6 20. Qa6 Nb8 21.Qf1 Nbd7 22. Bd3 Ne4 23. Bb5 Ndf6 24. h3 Re6 25. Na4 Bxb5 26. Qxb5 c4!?

Eftir þunglamalega byrjun lætur Hannes til skarar skríða. Þessi leikur, sem er undanfari mannsfórnarinnar í 27. leik, sker á samgang drottningarinnar við kóngsvænginn.

26. ... c4!? 27. bxc4

27. ... Nxf2!?

Hér er þvingað leika 28. Kxf2 Re4+ 29. Kg1 Dg3 og nú er best að leika 30. Hf1! t.d. 30. ... Hg6 31. Hc2 og 31. ... Bd6 má svara með 32. c5! og drottning kemst í vörnina. Staðan eftir 30. Hf1 eða 30. Hc2, sem er lakari leikur er stórskemmtileg og verðugt rannsóknarefni.

28. Ne5?? Nxd1 29.cxd5 Hxd5!

Indverjanum hafði greinilega sést yfir þennan einfalda leik.

30. Qb3 Qd8 31. Nxf7 Kxf7 32. Rxd1 Ne4 33. Rf1+ Kg8 34. Nc3 Nxc3 35.Bxc3 Qd7

- og hvítur gafst upp.

Fyrsta tap Magnúsar í hálft ár

Daginn eftir að fréttir bárust af hryðjuverkunum í Noregi tapaði Magnús Carlsen sinni fyrstu kappskák í hálft ár. Það var Frakkinn Vachier Lagrave sem náði að leggja Norðmanninn í 95 leikja maraþonskák. Hann vann þó næstu skákir en gerði svo jafntefli við helsta keppinaut sinn, Alexander Morozevic. Þriggja stiga reglan gildir í stórmeistaraflokki skákhátíðarinnar í Biel og samkvæmt henni er staðan þessi eftir átta umferðir:

1. Carlsen 17 stig ( 6 v. ) 2. Morozevich 14 stig ( 5 ½ v. ) 3. - 4. Lagrave og Shirov 10 stig ( 4 v. hvor ) 5. Caruna 6 stig ( 2 ½ v. ) 6. Pelletier 4 stig ( 2 v. ).

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 31. júlí 2011.

Skákþættir Morgunblaðsins

[Event "CZECH OPEN 2011 "] [Site "Pardubice (CZE)"] [Date "2011.07.27"] [Round "6.1"] [White "Panchanathan, Magesh Chandran"] [Black "Stefansson, Hannes"] [Result "0-1"] [ECO "A00"] [WhiteElo "2556"] [BlackElo "2546"] [PlyCount "70"] [EventDate "2011.07.22"] 1. d4 d5 2. Nf3 Nf6 3. c4 c6 4. Nc3 e6 5. e3 Nbd7 6. Qc2 b6 7. b3 Bb7 8. Be2 Be7 9. O-O O-O 10. Bb2 Qc7 11. Rad1 Rfd8 12. Rfe1 Rac8 13. Bd3 h6 14. Qe2 Re8 15. Bb1 c5 16. cxd5 exd5 17. Bf5 Rcd8 18. Rc1 Bf8 19. Red1 Bc6 20. Qa6 Nb8 21. Qf1 Nbd7 22. Bd3 Ne4 23. Bb5 Ndf6 24. h3 Re6 25. Na4 Bxb5 26. Qxb5 c4 27. bxc4 Nxf2 28. Ne5 Nxd1 29. cxd5 Rxd5 30. Qb3 Qd8 31. Nxf7 Kxf7 32. Rxd1 Ne4 33. Rf1+ Kg8 34. Nc3 Nxc3 35. Bxc3 Qd7 0-1

Við erum ein fjölskylda: Upphæðin dugar til að hjúkra 1300 alvarlega vannærðum börnum til heilsu!

Skákhátíðinni Við erum ein fjölskylda lauk í Ráðhúsi Reykjavíkur klukkan 18 á sunnudag, með skák Friðriks Ólafssonar stórmeistara og fv. forseta FIDE, og Nansýar Davíðsdóttur, 9 ára. Þau gerðu jafntefli í hörkuskák -- en sigurvegarar helgarinnar eru börnin í Sómalíu.

,,Upphæðin sem hefur safnast, bæði hér í Ráðhúsinu og með símhringingum, meðan á maraþoninu stóð dugar til að kaupa bætiefnaríkt hnetusmjör til að hjúkra 1300 alvarlega vannærðum börnum til heilbrigðis," sagði Þórir Guðmundsson hjá Rauða krossinum. ,,Krakkarnir geta því sannarlega verið stoltir af framlagi sínu."

Alls söfnuðu krakkarnir í Ráðhúsinu næstum heilli milljón króna með taflmennsku sinni, og Þórir sagði að öll umfjöllunin kringum maraþonið hefði skilað sér í skriðu hringinga í styrktarsíma Rauða krossins, 904-1500.

Þannig hefðu 500 hringt í gær, sem skilaði 750 þúsund krónum, til viðbótar við þá tæpu milljón sem gestir Ráðhússins létu af hendi rakna.

Um 20 börn tóku þátt í maraþoninu, og stóðu sig með miklum sóma. Þau unnu hug og hjörtu, þeirra mörghundruð gesta sem lögðu leið sína í Ráðhúsið um helgina. Þeim til halds og trausts voru fjölmargir sjálfboðaliðar úr skákhreyfingunni, auk þess sem foreldrar skiluðu ómældri vinnu.

Skákakademía Reykjavíkur og Skáksamband Íslands stóðu að verkefninu.

Til hamingju, krakkar. Þið stóðuð ykkur frábærlega í þágu málstaðarins!

Hápunktur og lokapunktur glæsilegrar hátíðar í Ráðhúsinu: Friðrik Ólafsson og Nansý Davíðsdóttir gerðu jafntefli!

Hápunktur og verðugur lokapunktur glæsilegrar skákhátíðar í Ráðhúsinu var þegar Friðrik Ólafsson, fyrsti stórmeistari Íslendinga og fv. forseti FIDE, gerði jafntefli í hörkuskák við Nansý Davíðsdóttur, 9 ára.

Friðrik, fæddur 1935, var um árabil meðal allra bestu skákmanna heims, og sá Íslendingur sem lagt hefur flesta heimsmeistara að velli. Hann sigraði t.d. Bobby Fischer og Mikael Tal í tvígang.

Friðrik Ólafsson átti mikinn þátt í stofnun Skákakademíu Reykjavíkur, og sat í undirbúningshópnum sem kom SR á laggirnar. Friðrik er jafnframt sérlegur verndari Akademíunnar.

,,Kannski er þetta í fyrsta sinn sem alþjóðaskákhreyfingin vinnur raunverulega í anda kjörorða sinna," sagði Friðrik, og bar mikið lof á framgöngu íslensku krakkanna, sem teflt hafa linnulaust í Ráðhúsinu til að safna fé fyrir sveltandi börn í Sómalíu.

Hann hreifst af kunnáttu ungu meistaranna, og bar mikið lof á taflmennsku Nansýar. ,,Þú átt framtíðina fyrir þér," sagði meistarinn þegar hann stóð upp frá taflborðinu.

Skák Friðriks og Nansýar verður birt með skýringum á skákhorninu í kvöld.

Nansý og krakkarnir vekja aðdáun í Ráðhúsinu

Nansý Davíðsdóttir, 8 ára, hefur farið á kostum í Ráðhúsinu alla helgina og vakið mikla aðdáun fyrir taflmennsku sína og framkomu.

FIDE-meistarinn Davíð Kjartansson skoraði á Nansý, svo úr varð æsispennandi skák. Davíð sagði eftir skákina að hann hefði staðið mjög tæpt og verið heppinn að vinna.

Nansý hefur lagt marga öfluga skákáhugamenn að velli í Ráðhúsinu, og undirstrikað rækilega hvílíkt efni er þarna á ferðinni.

Öll börnin og unglingarnir hafa staðið sig einsog sannkallaðar hetjur, og verið skákhreyfingunni og ungu kynslóðinni til sóma.

Framtíðin er björt!

Böðvar og gömlu kempurnar mæta vel í Ráðhúsið

Margar gamlar skákkempur hafa mætt í Ráðhúsið til að tefla við unga fólkið. Í þeim hópi er trésmíðameistarinn Böðvar Böðvarsson, einn harðskeyttasti hraðskákmaður landsins.

Böðvar, sem orðinn er 77 ára, hefur verið virkur í skáklífinu í áratugi. Hann tefldi til dæmis í fjöltefli við argentíska stórmeistarann Hermann Pilnikk, sem kom hingað í tvígang á sjötta áratugnum og tefldi  sögufræg einvígi við Friðrik Ólafsson.

Böðvar gerði jafntefli við Pilnikk í fjölteflinu um árið, og segir að stórmeistarinn hafi þar verið stálheppinn.

Böðvar er einn skemmtilegasti kvisturinn í íslenskri skákhreyfingu og skák hans við Elínu Nhung var ævintýraleg.

Nýtt met í Ráðhúsinu: Jón Gerald borgaði 50 þúsund fyrir eina skák

Nýtt met var slegið í Ráðhúsinu þegar Jón Gerald Sullenberger kaupmaður mætti á maraþon krakkanna.

Gerald borgaði 50 þúsund krónur fyrir skák Stefáns Bergssonar og Doniku Kolica.

Margir góðir gestir hafa lagt leið sína í Ráðhúsið eftir hádegið, og lagt sitt af mörkum í þágu málstaðarins.

Krakkarnir þakka Jóni Gerald og öðrum gestum kærlega fyrir komuna og vona að sem flestir komi til viðbótar, nú þegar tveir og hálfur tími er eftir af maraþoninu mikla!

Hörkuskák hjá Guðmundi Sigurjónssyni og Vigni Vatnari

Guðmundur Sigurjónsson stórmeistari kom í heimsókn í Ráðhúsið og lagði sitt af mörkum í þágu málstaðarins.

Guðmundur varð stórmeistari í skák árið 1970, 23 ára að aldri. Hann varð þrisvar Íslandsmeistari á árunum 1965-1972 og lagði marga sterkustu skákmenn heims.

Guðmundur sagðist ekki hafa teflt í 20 ár þegar hann settist að tafli gegn Vigni Vatnari, 8 ára. Úr varð hörkuskák og þurfti stórmeistarinn að rifja upp gamla takta gegn hinum geðþekka meistara framtíðarinnar.

Þar með hafa þrír af stórmeisturum okkar lagt leið sína í Ráðhúsið, Þröstur Þórhallsson, Helgi Ólafsson og Guðmundur Sigurjónsson.

 

Listmálari gefur fallegt málverk í söfnunina fyrir börnin í Sómalíu: Hver býður best?

Krakkarnir sem nú tefla í Ráðhúsi Reykjavíkur til bjargar sveltandi börnum í Sómalíu fengu aldeilis liðsstyrk.

Listmálarinn Ingunn Nielsen sem nú heldur einmitt sýningu í Ráðhúsinu, færði söfnuninni málverk, sem boðið verður upp og selt hæstbjóðanda.

Ingunn sagðist hrífast af framtaki krakkanna, og vildi leggja sitt af mörkum.

Gestir í Ráðhúsinu í dag geta skoðað þetta fallega málverk.

Skákkrakkarnir þakka Ingunni hlýhuginn.

Og bíða eftir tilboðum!

Henrik tapaði í lokaumferðinni - endar í 16.-36. sæti

Henrik Danielsen (2535) tapaði fyrir kínverska stórmeistarann Hua Ni (2662) í 10. og síðustu umferð Politiken Cup sem fram fór í morgun.  Henrik hlaut 7 vinninga og endaði í 16.-36. sæti.  Rússneski stórmeistarinn Igor Kurnosov (2633) sigraði á mótinu en hann hlaut 8,5 vinning. 

Í 2.-6. sæti með 8 vinninga urðu stórmeistararnir Julian Radulski (2556), Búlgaríu, Boris Savchenko (2615), Rússlandi, Robert Hess (2609), Bandaríkjunum, Peter Heine Nielsen (2681), Danmörku og áðurnefndur Nua Hi.

Frammistaða Henriks samsvaraði 2556 skákstigum og hækkar hann um 8 stig fyrir frammistöðu sína. 

Gunnar Finnlaugsson (2079) tapaði í lokaumferðinni, hlaut 5 vinninga, endaði í 126.-179. sæti, og stendur í stað, stigalega séð.

Skákir Henriks á mótinu má nálgast hér. 

311 skákmenn taka þátt í þessu móti, sem fram fer í 30. júlí - 7. ágúst, og þar af eru 26 stórmeistarar.  Henrik er nr. 19 í styrkleikaröð keppenda en Gunnar er nr. 126.  Tefldar eru 10 umferðir.

• Heimasíða mótsins
• Beinar útsendingar (hefjast kl. 11 nema síðasta umferðin kl. 8)

Við erum ein fjölskylda: Straumurinn er í Ráðhúsið!

Guðfríður Lilja Grétarsdóttir mætti fersk í Ráðhúsið og keypti skák fyrir tengdamóður sína. Hún réð Hrafn Jökulsson til að tefla við Nansý Davíðsdóttur fyrir 10 þúsund krónur, sem renna í söfnunina til bjargar börnunum í Sómalíu.

Lilja, sem hefur 11 sinnum orðið Íslandsmeistari kvenna, lék fyrsta leikinn fyrir Nansý. Úr varð mikil baráttuskák, með þungri undiröldu, en jafntefli urðu sanngjörn úrslit.

Jafn straumur fólks er í Ráðhúsið. Afi kom með þrjú barnabörn, sem öll spreyttu sig gegn skákkrökkunum, og borgaði 5000 krónur fyrir hverja skák.

Skákkrakkarnir í Ráðhúsinu senda skákmönnum kveðju og vonast til að sjá sem flesta í dag.

 Mikið er í húfi: Rauði krossinn berst upp á líf og dauða við hungursneyðina í Sómalíu.

Og eins og Donika Kolica sagði í fréttum Stöðvar 2 í gærkvöldi: Margt smátt gerir eitt stórt.