Íslandsmót skákfélaga hefst í kvöld

Íslandsmót skákfélaga hefst nú um helgina í Rimaskóla í Grafarvogi.  Um er að ræða langstærstu skákhátíð hvers ár en um 400 skákmenn á öllum aldri og öllum styrkleika munu tefla um helgina. 

Meðal gesta um helgina verður Anatoly Karpov, fyrrverandi heimsmeistari í skák, sem verður á landinu 6.-10. október í boði Taflfélags Reykjavíkur.   Karpov mun verða viðstaddur setningu mótsins og mun taka þátt í henni. 

Einnig munu margir aðrir frægar kappar mæta til leiks en mikil leynd ríkir yfir liðsskipan félaganna sem fæst vilja gefa upp sína liðsskipan fyrirfram.   Verður því ekki ljóst fyrr en upphafi fyrstu umferðar, kl. 20, hvaða skákmenn mæta til leiks.  Fyrirfram er búist við baráttan standi á milli Íslandsmeistara síðustu þriggja ára, Taflfélags Bolungarvíkur, Taflfélags Vestmannaeyja, Taflfélags Reykjavíkur og Taflfélagsins Hellis. 

Í árlegri spá ritstjóra sem birtist í gær var TR spáð sigri.

Þó er ljóst að nánast allir sterkustu skákmenn landsins munu mæta til leiks.  Þar á meðal má nefna stórmeistarana Jóhann Hjartarson, Jón L. Árnason, Helga Ólafsson, Héðin Steingrímsson, Hannes Hlífar Stefánsson og Henrik Danielsen. 

Það sem gerir Íslandsmót skákfélaga að svo einstökum atburði er að þar taka þátt jafnt byrjendur og sterkustu skákmenn heims.   Á Íslandsmótinu tefla allt niður í 6 ára krakka og allt upp í áttræða öldunga sem hafa engu gleymt.  Skákmenn koma frá öllum landshornum.   Þarna tefla konur og karlar og allir í sama sal við sambærilegur aðstæður.     

Skákin brúar bil!

Dagskrá mótsins (helstu viðureignir í sviga):

• 1. umferð: föstudaginn, 7. október, kl. 20-00
• 2. umferð: laugardaginn, 8. október, kl. 11-15 (Hellir - TV)
• 3. umferð: laugardaginn, 8. október, kl. 17-21 (TV - TR)
• 4. umferð: sunnudaginn, 9. október, kl. 11-15 (TB - TV)

• Heimasíða mótsins
• Chess-Results
• Spá ritstjóra

111 ára afmælishóf T.R. í kvöld - Anatoly Karpov heiðursgestur

Taflfélag Reykjavíkur hélt í dag upp á 111 ára afmælið með afmæliskaffiboði fyrir boðsgesti í félagsheimili T.R. Klukkan 17 byrjuðu boðsgestir að streyma að og eftirvænting var í loftinu, því von var á heiðursgesti afmælisins, Anatoly Karpov, fyrrverandi heimsmeistara í skák.

Karpov lenti á Keflavíkurflugvelli í dag kl. 15 ásamt löndum sínum Vasily Papin stórmeistara og Michael Ivanov stórmeistara. Það var Björn Jónsson stjórnarmaður í T.R. og aðalhvatamaður og skipuleggjari heimsóknar Karpovs til Íslands sem tók á móti þeim. Björn renndi síðan í hlað í Faxafeninu rétt um kl. 17.20.

Það var stór stund þegar Anatoly Karpov gekk inn í salinn í T.R. Afmælisgestir stóðu þá upp og klöppuðu honum lof í lófa og hann var hinn hressasti og brosti út að eyrum. Þegar Karpov hafði heilsað Friðrik Ólafssyni og fleiri kunningjum hélt formaður T.R. ávarp. Sigurlaug bauð fyrrverandi heimsmeistarann velkominn sem nýjan félagsmann í T.R. Klöppuðu þá allir í salnum og Karpov stóð upp og hneigði sig og brosti. Í ávarpinu sagði Sigurlaug m.a. að heimsókn Karpovs í T.R. í dag væri sögulegt augnablik í Taflfélagi Reykjavíkur og að vera hans hér í Reykjavík væri einn af hápunktum í skáklífi landsins. Karpov var afhendur blómvöndur og eintak af bókinni Í uppnámi (íslensk skákrit útgefin árið 1901).

Sigurlaug minntist einnig á fyrirtækin MP banka og CCP sem styddu félagið af miklum áhuga og legðu sitt á vogarskálarnar við að gera hugmyndir stjórnarmanna T.R. að veruleika eins og sýndi sig með komu Anatoly Karpovs hér í dag.

Einnig voru stórmeistaranir Vasily Papin og Mikael Ivanov boðnir velkomnir svo og alþjóðlegi meistarinn Karl Þorsteins. Fengu þeir allir afhentan blómvönd.

Að ávarpinu loknu var boðið upp á veglegt afmælishlaðborð sem Birna Halldórsdóttir hafði útbúið af mikilli elju og snilld eins og hún er vön að gera. Gerðu afmælisgestir þessu öllu góð skil.

Góð og létt stemning var í afmælishófinu. Guðmundur G. Þórarinsson tók til máls og færði Karpov gjafir. Einnig tók Friðrik Ólafsson til máls og að lokum steig Anatoly Karpov í pontu og spjallaði vítt og breitt dágóða stund. Hann var yfir sig hrifinn af því að vera kominn til Íslands og færði hann Taflfélagi Reykjavíkur áritaða bók að gjöf sem gefin hafði verið út í vor í tilefni af sextugsafmæli hans. Í bókinni eru m.a. myndir sem aldrei áður hafa birst á prenti.

Undir lokin voru teknar margar myndir og Karpov stóð og spjallaði við afmælisgesti. Afmælishófinu lauk um kl. 19. Óhætt er að segja að afmælishófið og móttaka Karpovs hafi heppnast með eindæmum vel. Karpov var léttur og kíminn, brosmildur og skemmtilegur. Við í T.R. erum í skýjunum yfir því að hann sé kominn til landsins og látum okkur hlakka til að hafa hann hérna hjá okkur yfir helgina!

Dagskrá Karpovs er á heimasíðu T.R. Á morgun er einn dagskrárliður opinn almenningi: kl. 16.30 - 17.30 Karpov og Friðrik Ólafsson tefla sýningarskák með 10 -15 mínútna umhugsunartíma í húsakynnum Taflfélagsins Faxafeni 12.
Eftir skákina munu meistararnir fara yfir hana og skýra út fyrir áhorfendum.

Endilega kíkið við í T.R. á morgun!

Pistill eftir Sigurlaugu Regínu Friðþjófsdóttur

Myndir (JHR)

Fimmtudagurinn þrettándi – stórmót í sal TR

Í tilefni Alþjóðlegs geðheilbrigðisdags verður blásið til móts í sal TR við Faxafen klukkan 19:30, fimmtudaginn 13. okt. Skráning hefst strax uppúr klukkan 19:00.  Taflfélagið Hellir,  Taflfélag Reykjavíkur og Skákfélag Vinjar sameina krafta sína, líkt og í fyrra og þá varð úr magnað kvöld með 79 þátttakendum.

Tefldar verða sex umferðir með sjö mínútna umhugsunartíma og skákstjóri er Gunnar Björnsson, forseti Skáksambandsins með dyggri aðstoð Sigurlaugar Regínu Friðþjófsdóttur, formanns TR.

Forlagið gefur glæsilega vinninga og veitt verða níu verðlaun. Allir þátttakendur eiga möguleika á bókaverðlaunum auk verðlaunapenings um háls en verðlaun verða veitt fyrir:

• 3 efstu sætin og efsta sætið  í flokkunum:
• 60 ára og eldri
• Kvenna
• 13-18 ára (fædd 1993-98)
• 12 ára og yngri (fædd 1999 of eftir)
• Stigalausir
• Auk þess  er bókavinningur fyrir óvæntasta vinningin að mati skákstjóra.

Þetta er í sjöunda skipti sem mót í tilefni Alþjóðlegs geðheilbrigðisdags (sem reyndar er haldinn hátíðlegur um allan heim þann 10. okt) er haldið og hefur þátttaka aukist ár frá ári og algjört met sl ár þegar þessi þrjú félög sameinuðust um mótshaldið. En áður hefur mótið farið fram í Ráðhúsinu, Perlunni og í Mjódd. 

Félögin hvetja allt skákáhugafólk, á öllum aldri, að vera með því gott er að muna að það er engin heilsa án geðheilsu. Og svo er ekkert þátttökugjald.

Ivanchuk með yfirburði í Bilbao

Í dag var Alslemmumótinu framhaldið með sjöttu umferð.  Nú héldu keppendurnir til Bilbao en fyrri hlutinn fór fram í Sao Paulo.  Ivanchuk (2765) vann Nakamura (2753) en öðrum skákum lauk með jafntefli.  Ivanchuk er langefstur með 13 stig en fjórir keppendur koma svo hnapp með 7 stig.  

Vegna Íslandsmóts skákfélaga um helgina verður ekkert um Alslemmumótið fjallað fyrr en að lokinni níundu umferð sem fram fer á mánudag.  Þeim sem vilja fylgjast með mótinu í millitíðinni er bent á heimasíðu mótsins og á ChessBomb.

 Staðan:

• 1. Ivanchuk (2765) 12 stig
• 2.-5. Carlsen (2823), Nakamura (2753), Anand (2817) og Aronian (2807) 7 stig
• 6. Vallejo (2716) 3 stig

Tefld er tvöföld umferð.  Fyrri hlutinn fer fram í Sao Paulo í Brasilíu en sá síðari í Bilbao á Spáni.   Veitt eru 3 stig fyrir sigur en 1 fyrir jafntefli.  

• Heimasíða mótsins
• Beinar útsendingar (hefjast kl. 14 í Bilbao)
  
• ChessBomb

 

Bjarni Jens með 3½ vinning eftir 6 umferðir í Osló

Bjarni Jens Kristinsson (2033) hefur 3½ vinning að loknum sex umferðum ELO-flokki á Osló-mótinu sem nú er í fullum gangi.   Bjarni Jens er í 15.-24. sæti

Í GM-flokki er stórmeistarinn Matthew Sadler (2625) með eins vinnings á næstu menn, en hann hefur 5½ vinning.  

Bjarni Jens teflir í Elo-flokki og er sjöundi stigahæsti keppandinn.  Mótið stendur frá 2.-9. október

• Heimasíða mótsins
• TournamentServices (áþekkt og Chess-Results)

 

Spá ritstjóra um Íslandsmót skákfélaga

Gunnar Björnsson, ritstjóri Skák.is, mun venju samkvæmt birta spá ritstjóra um Íslandsmót skákfélaga á bloggsíðu sinni. 

Nálgast má spánna á slaginu kl. 17:30.

Bloggsíða Gunnars

Dagskrá Anatoly Karpovs á meðan á dvöl hans stendur 6. – 10 október

Dagskrá Anatoly Karpovs á meðan á dvöl hans stendur 6. – 10 október

Koma Karpovs er samstarfsverkefni Taflfélags Reykjavíkur,  CCP og MP banka.

Fimmtudagur 06. október

15.00 Anatoly Karpov lendir á Keflavíkurflugvelli

 17.00 – 19.00   Móttaka fyrir Karpov í félagsheimili Taflfélags Reykjavíkur, Faxafeni 12 fyrir boðsgesti.  
Þetta er jafnframt afmæliskaffiboð félagsins sem er 111 ára þennan dag. 

 Föstudagur 07. október

10.30 – 11.30  Karpov heimsækir Salaskóla. 
Krakkar frá Rimaskóla sem nýverið urðu Norðurlandameistarar grunnskóla í skák verða í heimsókn.  Karpov mun ræða við börnin um skákina og taka tvær skákir við afreksbörn úr hvorum skóla.

14.00 – 15.00 Karpov heimsækir CCP og skoðar starfsemi fyrirtækisins.

16.30 – 17.30  Karpov og Friðrik Ólafsson tefla sýningarskák með 10 -15 mínútna umhugsunartíma í húsakynnum Taflfélagsins Faxafeni 12. 
Eftir skákina munu meistararnir fara yfir hana og skýra út fyrir áhorfendum.  Opið almenningi.

20.00 Karpov verður viðstaddur setningu Íslandsmóts Skákfélaga sem fram fer í Rimaskóla og er stærsti einstaki skákviðburður landsins á hverju ári.

 

Laugardagur 08. október

 

            14.00 – 14.45 Karpov heimsækir UNICEF á Íslandi, en hann er einmitt sérlegur sendiherra samtakanna í mið og austur Evrópu.

 

15.00 – 16.00 Karpov mætir á skákæfingu hjá barna og unglingadeild Taflfélagsins að Faxafeni 12. 

Hann mun ræða við krakkana um skák, halda skákskýringar og árita myndir fyrir krakkana.

 

Sunnudagur 09. október

 

            16.00 – 17.30 Karpov teflir fjöltefli við 20 manns í Ráðhúsi Reykjavíkur. 

            OPIÐ ÖLLUM! Allir velkomnir í Ráðhús Reykjavíkur.

 

Mánudagur 10. október

 

            Brottför.

Sigurður sigraði á fyrsta kappteflinu um Hörpuna

Kappteflið um Hörpuna - fyrsta mót af fjórum - hófst í gær hjá Ridduranum í Hafnarfirði. Besti árangur í 3 mótum af 4 telur til GrandPrix stiga (10-8-6-5-4-3-2-1). Mótaröðin er haldin til heiðurs Fjölni Stefánssyni, tónskáldi, öldnum félaga skákklúbbsins.

Þetta er í fjórða sinn sem keppnin fer fram og sigurvegarar undanfarinna ára eru þeir:

Guðfinnur R. Kjartansson 2010; Jóhann Örn Sigurjónsson 2009 og Sigurður A. Herlufsen 2008.

Í dag tók hinn slyngi og slóttugi Sigurður E. Kristjánsson, fyrrum skákmeistari Kópavogs, forystuna og er þetta 3 mótið af síðustu fimm sem hann vinnur í musteri skáklistarinnnar í Strandbergi, þar sem Riddarar reitaða borðsins mætast til tafls vikulega allan ársins hring á miðvikudögum kl. 13. Góð þátttaka er í jafnan, þetta um 20 aldnar skákkempur að jafnaði.

Önnur úrslit skv. meðf. töflu.

 

 

Sjá einnig www.riddarinn.net

Fimmtudagsmót fellur niður í kvöld

Fimmtudagsmót fellur niður næsta fimmtudag
(6. október) vegna anna við undirbúning TR fyrir þátttöku í Íslandsmóti
skákfélaga. Þar næsta fimmtudag (13. október) verður hins vegar örugglega mót,
því þá verður stórmót í samvinnu við Vin, svipað og í fyrra, en þá voru rétt
tæplega 80 manns með.

Jóhann og Guðmundur efstir í leikhléi á Haustmótinu

Jóhann H. Ragnarsson (2068) og Guðmundur Kjartansson (2314) eru efstir með 4 vinninga í a-flokki Haustmóts TR en fimmta umferð fór fram í kvöld.  Jóhann vann Tómas Björnsson (2162) í vel útfærðri sóknarskák og Guðmundur lagði Stefán Bergsson (2135).   Davíð Kjartansson(2291) er þriðji með 3½ vinning.  Nú verður vikuhlé á mótinu vegna Íslandsmóts skákfélaga.  

Sjötta umferð fer fram á miðvikudaginn, 12. október og hefst kl. 19:30. 

A-flokkur:

Úrslit 5. umferðar:

 

1	Kjartansson David	1 - 0	Bergsson Stefan
2	Olafsson Thorvardur	1 - 0	Baldursson Haraldur
3	Valtysson Thor	0 - 1	Kjartansson Gudmundur
4	Jonsson Bjorn	0 - 1	Bjornsson Sverrir Orn
5	Ragnarsson Johann	1 - 0	Bjornsson Tomas

Staðan:

 

Rk.		Name	RtgI	RtgN	Club/City	Pts.
1		Ragnarsson Johann	2068	2057	TG	4
2	IM	Kjartansson Gudmundur	2314	2316	TR	4
3	FM	Kjartansson David	2291	2266	Víkingaklúbburinn	3,5
4		Bjornsson Sverrir Orn	2158	2141	Haukar	3
5	FM	Bjornsson Tomas	2162	2147	Goðinn	2,5
6		Olafsson Thorvardur	2174	2181	Haukar	2,5
7		Bergsson Stefan	2135	2135	SA	2
8		Jonsson Bjorn	2045	1962	TR	1,5
9		Valtysson Thor	2041	2025	SA	1,5
10		Baldursson Haraldur	2010	1950	Víkingaklúbburinn	0,5

 

Aðrir flokkar: 

Dagur Ragnarsson (1761) er efstur í b-flokki með 4½ vinning.  Stephen Jablon (1965) er annar með 3½ vinning.  Kristján Örn Elíasson (1906) og Mikael Jóhann Karlsson eru í 3.-4. sæti með 3 vinninga.  Sjá nánar hér.

Oliver Aron Jóhannesson (1645) er efstur í c-flokki með 4½ vinning. Birkir Karl Sigurðsson (1597) er annar með 4 vinninga.  Friðgeir Hólm (1667), Þorsteinn Leifsson (1772) og Jón Trausti Harðarson (1660) eru í 3.-5. sæti með 3 vinninga.  Sjá nánar hér.

Vignir Vatnar Stefánsson (1444) er efstur í d-flokki (opnum flokki) með fullt hús.  Jóhann Arnar Finnsson (1199) og Nansý Davíðsdóttir (1309) eru í 2.-3. sæti með 4 vinninga.  Sjá nánar hér.

• Heimasíða mótsins
• Beinar útsendingar
• Chess-Results
• Myndaalbúm (GB)