Haustmót TR: Sjötta umferð í beinni

Skákir 6. umferðar í a-flokki Haustmóts TR auk einnar skákar í b-flokki, sem hefst kl. 19:30, má nálgast í beinni útsendingu.  

Bein útsending frá Haustmóti TR

Vinafélagið stofnað fimmtudaginn 13. október undir kjörorðinu: Allir saman!

Vinafélagið blæs til stofnfundar á stórmóti í skák, í tilefni Alþjóðlegs geðheilbrigðisdags, fimmtudaginn 13. október klukkan 19 í Faxafeni 12. Að Vinafélaginu standa vinir og velunnarar Vinjar, athvarfs Rauða krossins við Hverfisgötu, en lokun vofir nú yfir þessum griðastað mörg hundruð einstaklinga.

Af þessum sökum hafa nokkrir einstaklingar tekið höndum saman um að stofna Vinafélagið, og eru allir hjartanlega velkomnir í félagið. Markmiðið er að standa vörð um og efla samfélagið í Vin. Markmið félagsins er að safna árlega þeirri upphæð, sem þarf til reksturs Vinjar, fyrir utan starfsmannahald.

Rauði krossinn hefur rekið Vin í 20 ár, en Reykjavíkurborg hefur lagt til húsnæðið. Í Vin eru fjórir starfsmenn og heildarkostnaður við rekstur rétt rúmlega 20 milljónir króna. Vinafélagið mun beita sér fyrir því að fleiri aðilar komi að rekstrinum, enda allir sammála um mikilvægi heimilisins í Vin.

Strax að loknum stofnfundi Vinafélagsins hefst stórmót sem Skákfélag Vinjar heldur, í samvinnu við TR, Helli, Skákakademíu Reykjavíkur og fleiri. Forlagið gefur glæsilega vinninga og má lofa skemmtilegu móti.

Tekið verður við skráningum í Vinafélagið á staðnum. Einnig tekur Björn Ívar Karlsson við skráningum í póstfanginu [e-mail]. Fólk er hvatt til að gerast stofnfélagar í Vinafélaginu og sýna þannig gestum Vinjar stuðning.

Ljóst er að málstaður Vinjar nýtur víða samúðar og stuðnings. Meðal þeirra sem gefa kost á kröftum sínum eru Magnús Matthíasson kennari og skákfrömuður, Styrmir Gunnarsson ritstjóri, Vigdís Grímsdóttir rithöfundur, Jón Kristjánsson fv. heilbrigðisráðherra, Þráinn Bertelsson rithöfundur og fleiri.

Vonandi munu sem flestir gerast stofnfélagar í Vinafélaginu, sem starfar undir kjörorðinu: Allir saman!

Karpov í RÚV

Heimsókn Karpovs í síðustu viku tókst ljómandi vel og skipuleggjendunum; Taflfélagi Reykjavíkur, CCP og MP banka til mikils sóma.  Töluvert var um heimsókn fjallað í fjölmiðlum, aðallega í RÚV og í Mogganum.   Eftirfarandi fréttir voru birtar í RÚV á meðan heimsókn meistarans stóð.

• http://dagskra.ruv.is/sjonvarpid/4604103/2011/10/06/17/  Fréttir
• http://dagskra.ruv.is/sjonvarpid/4604104/2011/10/07/16/ Fréttir
• http://dagskra.ruv.is/sjonvarpid/4604105/2011/10/08/9/  Fréttir
• http://dagskra.ruv.is/sjonvarpid/4605457/2011/10/10/2/  Kastljósið

Fimmtudagurinn þrettándi - stórmót í TR

Í tilefni Alþjóðlegs geðheilbrigðisdags verður blásið til móts í sal TR við Faxafen klukkan 19:30, fimmtudaginn 13. okt. Skráning hefst strax uppúr klukkan 19:00.  Taflfélagið Hellir,  Taflfélag Reykjavíkur og Skákfélag Vinjar sameina krafta sína, líkt og í fyrra og þá varð úr magnað kvöld með 79 þátttakendum.

Tefldar verða sex umferðir með sjö mínútna umhugsunartíma og skákstjóri er Gunnar Björnsson, forseti Skáksambandsins með dyggri aðstoð Sigurlaugar Regínu Friðþjófsdóttur, formanns TR.

Forlagið gefur glæsilega vinninga og veitt verða níu verðlaun. Allir þátttakendur eiga möguleika á bókaverðlaunum auk verðlaunapenings um háls en verðlaun verða veitt fyrir:

• 3 efstu sætin og efsta sætið  í flokkunum:
• 60 ára og eldri
• Kvenna
• 13-18 ára (fædd 1993-98)
• 12 ára og yngri (fædd 1999 of eftir)
• Stigalausir
• Auk þess  er bókavinningur fyrir óvæntasta vinningin að mati skákstjóra.

Þetta er í sjöunda skipti sem mót í tilefni Alþjóðlegs geðheilbrigðisdags (sem reyndar er haldinn hátíðlegur um allan heim þann 10. okt) er haldið og hefur þátttaka aukist ár frá ári og algjört met sl ár þegar þessi þrjú félög sameinuðust um mótshaldið. En áður hefur mótið farið fram í Ráðhúsinu, Perlunni og í Mjódd. 

Félögin hvetja allt skákáhugafólk, á öllum aldri, að vera með því gott er að muna að það er engin heilsa án geðheilsu. Og svo er ekkert þátttökugjald.

Skemmtilegar myndir frá Íslandsmóti skákfélaga

Mikill fjölda mynda hefur verið birtar frá Íslandsmóti skákfélaga.  Myndirnar hafa verið teknar af Helga Árnasyni, Einari S. Einarssyni og Halldóri Grétari Einarssyni.  Í dag bættust við einkar skemmtilegar myndir teknar af Uros Matovic.

Uros þessi er serbneskur sjálfboðaliði í Vin, athvarfi Rauða kross Íslands. Hann hefur engan áhuga á skák en sækir mannfagnaði og myndar sem enginn sé morgundagurinn. Hann semsagt kíkti við í Rimaskóla á laugardeginum og komst í feitt, hafði lítinn áhuga á stöðum og flækjum en myndaði einbeitt andlit og augu á stilkum. Uros hefur komist að því að Ísland er nafli alheimsins, hér hefur hann hitt Kofi Annan, Yoko Ono og Sean Lennon. Hann er miður sín að hafa misst af Karpov en er að fara á tónleika með Björk.

Myndaalbúm Íslandsmóts skákfélaga

Sigfús Jónsson óstöðvandi í Stangarhyl

Sigfús Jónsson var í stuði í Stangarhylnum í dag.  Hann vann alla sína andstæðinga og endaði með fullt hús, eða 9 vinninga.  Haraldur Axel varð í öðru sæti með 7 vinninga og jafnir í 3.-4. sæti urðu Þorsteinn Guðlaugsson og Valdimar Ásmundsson með 6 vinninga.

Tuttugu og þrír mættu til leiks í dag.

 

 

Heildarúrslit:

• 1          Sigfús Jónsson                                                      9 vinningar
• 2          Haraldur Axel Sveinbjörnsson                                  7
• 3-4       Þorsteinn Guðlaugsson                                              6
•             Valdimar Ásmundsson                                              6
• 5-7       Leifur Eiríksson                                                         5.5
•             Finnur Kr Finnsson                                                   5.5
•             Bragi G Bjarnarson                                                   5.5
• 8-10     Einar S Einarsson                                                      5
•             Halldór Skaftason                                                     5
•             Eiður Á Gunnarsson                                                  5
• 11-14   Ásgeir Sigurðsson                                                     4.5
•             Jón Bjarnason                                                            4.5
•             Gísli Sigurhansson                                                     4.5
•             Jón Steinþórsson                                                       4.5
• 15-19   Hálfdán Hermannsson                                                          4
•             Óli Árni Vilhjálmsson                                                           4
•             Jónas Ástráðsson                                                       4
•             Gísli Árnason                                                            4
•             Baldur Garðarsson                                                    4
• 20-22   Viðar Arthúrsson                                                       3
•             Grímur Jónsson                                                         3
•             Friðrik Sófusson                                                        3
• 23        Hrafnkell Guðjónsson                                              1.5

Myndaalbúm (ESE)

Carlsen sigraði í Bilbao eftir sigur á Ivanchuk í hraðskák

Carlsen (2823) og Ivanchuk (2765) komu jafnir og efstir í mark á Alslemmumótinu sem lauk í Bilbao í dag.  Þeir gerðu báðir jafntefli í lokaumferðinni en Anand (2817) vann Vallejo (2716) og tókst því að forða sér úr neðsta sætinu. Carlsen vann svo Ivanchuk í einvígi 2,5-1,5 og telst því sigurvegari mótsins.

Staðan:

• 1.-2. Carlsen (2823) og Ivanchuk (2765) 15 stig
• 3.-5. Nakamura (2753), Aronian (2807) og Anand (2817) 12 stig
• 6. Vallejo (2716) 10 stig

Tefld er tvöföld umferð.  Fyrri hlutinn fer fram í Sao Paulo í Brasilíu en sá síðari í Bilbao á Spáni.   Veitt eru 3 stig fyrir sigur en 1 fyrir jafntefli.  

• Heimasíða mótsins
• Beinar útsendingar (hefjast kl. 14:30 í Bilbao)
  
• ChessBomb

 

Áskrift að Tímaritinu Skák

Stjórn Skáksambands Íslands hefur til athugunar þann möguleika að endurvekja Tímaritið Skák. Hugmyndin er að gefa út árstímarit í mars þar sem farið væri yfir liðið ár og fjallað um helstu viðburði eins og Reykjavíkurskákmótið, Ólympíuskákmótið, Skákþing Íslands, Íslandsmót skákfélaga, unglingastarf o.s.frv. Vandað yrði til verka í alla staði þar sem andi gamla blaðsins svifi yfir vötnum. Gengið er út frá því að blaðið verði 90-100 bls. í fallegu broti.

Slík útgáfa er mjög dýr og því ljóst að grundvöllur hennar næst eingöngu ef áhugi meðal skákmanna fyrir því að kaupa blaðið er umtalsverður. Áætlað er að blaðið muni kosta um kr. 2.000. Til að kanna útgáfugrundvöll fyrir slíku ársriti stendur Skáksambandið fyrir könnun meðal skákmanna á því hvort þeir muni kaupa slíkt rit.

Þeir sem eru tilbúnir að styðja málefnið og kaupa Tímaritið Skák árlega á 2.000 kr. eru vinsamlegast beðnir að skrá sig hér.

Fleiri pistlar um Íslandsmót skákfélaga

Það fjölgar pistlinum frá Íslandsmóti skákfélaga.  Guðmundur M. Daðason hefur skrifað pistil á heimasíðu Taflfélags Bolungarvíkur og Þorsteinn Þorsteinsson hefur skrifað pistil á heimasíðu TV.   Áður voru komnir nokkrir pistlar.

Nýir pistlar

• Bolapistill
• Eyjapistill (tengill lagfærður)

Eldri pistlar

• Ritstjórapistill
• Goðapistill
• Krókspistill
• SSON-pistill

Ritstjórapistill

Hefðbundin pistill ritstjóra Skák.is um Íslandsmót skákfélaga má finna á bloggsíðu ritstjórans, sem er tileinkuð pistlaskrifum um Íslandsmótið.

Bloggsíða ritstjóra