Skákdagurinn á Héraði

Ritstjóra barst eftirfarandi póstur frá Sverri Gestssyni skólastjóra Fellaskóla á Héraði:

Þá er skákdegi lokið hér fyrir austan.

Í Fellaskóla var þátttakan mjög góð og tóku 75 nemendur skólans þátt í taflmennsku dagsins (tvær myndir) undir stjórn undirritaðs.

Þá afhenti ég Hreini Halldórssyni, forstöðumanni Íþróttamistöðvarinnar "sundtaflið" frá ykkur (sjá mynd). Ég var búinn að skora á hann að taka við mig skák í heita pottinum og hann tók áskoruninni með því skilyrði að ef hann tapaði, þá færum við í sjómann! Við tókum skák í heita pottinum (sjá mynd við upphaf skákar). Það er skemmst frá því að segja að Hreinn vann örugglega þótt sigurinn virtist koma honum nokkuð á óvart ef marka má myndina. Ég slapp samt við sjómann við "Strandamanninn sterka"!

Læt þetta duga!

Sverrir Gestsson

Jóhann tefldi fjöltefli við Alþingismenn

Stórmeistarinn Jóhann Hjartarson lagði sitt af mörkum á Skákdaginn. Um morguninn fór hann fyrir heimsókn nemenda í Ölduselsskóla sem heimsóttu leikskólann Seljaborg. Mikil skákiðkun er á Seljaborg en nemendur þaðan fara í Ölduselsskóla og því heimsóknin afar sniðugt tiltæki. Heimsóknin var sérstaklega vel mönnuð en Bolvíkingurinn geðþekki Guðmundur Daðason slóst í lið með Jóhanni.

Í hádeginu þáði Jóhann svo boð Ólafs Ragnar að Bessastöðum.

Um eittleytið var Jóhann mættur í þinghúsið. Erindið var fjöltefli við þingmenn úr öllum flokkum. Atkvæðagreiðsla var á næsta leyti svo umhugsunartími var stilltur í samræmi við það. Jóhann hafði því einungis 15 mínútur gegn 5 þingmönnum; Gunnari Braga Sveinssyni og Vigdísi Hauksdóttur, Framsóknarflokki, Guðlaugi Þór Þórðarsyni Sjálfstæðisflokki, Sigmundi Erni Rúnarssyni Samfylkingu og Guðfríði Lilju Grétarsdóttur VG.

„Skákin er engin mömmuleikur" sagði Jóhann við þingmenn þegar hann hafði mátað þá alla á nokkuð stuttum tíma og uppskar mikinn hlátur þingmannanna. Skemmtileg stemning og rokna hlátur einkenndi fjölteflið og sannaðist það enn að skákin sameinar fólk enda eru kjörorðin jú;

VIÐ ERUM EIN FJÖLSKYLDA

Myndir teknar af Malínu Brand.

Stefán Kristjánsson vann maraþoneinvígíð

Stefán Kristjánsson vann maraþoneinvígið gegn Braga Þorfinnssyni í Kringlunni í dag.  Lokatölur eru 35,5-30,5.  Bragi byrjaði betur og leiddi lengi vel en Stefán seig yfir þegar á leið.   Drengirnir voru vel þreyttir að 66 skákum loknum.  En upphafalega var markið sett á 100 skákir.   Sjálfsagt verða teknar 100 skákir á næsta skákdegi.   

Vel að verki staðið hjá félögunum og skemmtu áhorfendur sem kíktu á meistarana sér vel.

 

Skákdagurinn í fullum gangi

Það er mikið um vera á Skákdaginn.  Í morgun tefldi Björn Þorfinnsson fjöltefli í Laugardagslaug og eins og áður hefur komið fram tefla Bragi Þorfinnsson og Stefán Kristjánsson maraþoneinvígi í Kringlunni.  Þar leiddi Bragi 10,5-9,5 þegar síðast var vitað.  Forseti Íslands hélt mótttöku á Bessastöðum þar sem heiðursgesturinn var Friðrik Ólafsson og keppendur á NM skólaskák.  Friðrik tefldi við Nansý og gerðu þau jafntefli.

Núna klukkan 13 tefldi Jóhann Hjartarson fjöltefli við Alþingismenn.  Minningarskákmót um Björn Sigurjónsson hófst í Vin og Toyota-skákmótið heldri skákmanna hófst í höfuðstöðvum Toyota.  

Myndaalbúm Skákdagsins (myndir væntanlegar)

Maraþonhraðskákeinvígi Stefáns og Braga hafið

Maraþonhraðskákeinvígi Stefáns Kristjánssonar og Braga Þorfinnssonar hófst kl. 10 í Kringlunni.  Þegar þetta hefur verið ritað er tveimur skákum lokið.  Stefán vann fyrstu skákina en Bragi jafnaði metin.  Hægt er að fylgjast með taflmennskunni á Skák.is en útsendingin er eitthvað skrykkjótt þar sem hratt er teflt!

Skákáhugamenn eru hvattir til að koma í Kringlu og horfa á meistarana tefla.

Um skáklistina og Friðrik okkar Ólafsson

Grein Guðna sem var aðgengileg hér í gær hefur verið tekin úr birtingu.  Hún verður endurbirt, lítið breytt, í Tímaritinu Skák í marsbyrjun.

Skákdagur Íslands - teflum okkur til ánægju í dag!

Skákdagur Íslands er haldinn í fyrsta sinn í dag.  Það er engin tilviljun að 26. janúar er fyrir valinu þar sem þetta er afmælisdagur Friðriks Ólafssonar, okkar sigursælasta skákmeistara.  Mannsins sem lagði fjóra heimsmeistara að velli, þá Fischer, Karpov, Tal og Petrosian.

Í tilefni dagsins eru Íslendingar hvattir til að taka upp taflið sem víðast.  Flest taflfélög landsins, alls staðar um landið, ætla að hafa starfsemi þennan dag.  Margir skólar verða með skákmót og fjöltefli.  Íslandsmót í ofurhraðskák fer fram á netinu.  Alþjóðlegi meistarinn Björn Þorfinnsson teflir fjöltefli í Laugardagslaug.  Öldungar tefla, unglingar tefla, mót verður í Vin, athvarfi fólks með geðraskanir.  Stórmeistarinn Stefán Kristjánsson og alþjóðlegi meistarinn Bragi Þorfinnsson tefla hraðskákeinvígi í Kringlunni og landsliðsmaðurinn Hjörvar Steinn Grétarsson teflir við þjóðina í gegnum netið.  Þar geta allir tekið þátt!  Teflt er ýmsum fyrirtækjum þennan dag. 

Skák göfgar hugann og rannsóknir hafa sýnt að skák eflir rökhugsun og námsárangur barna. 

Skákhreyfingin hvetur skákáhugamenn um allt land að taka upp taflið og tefla við fjölskyldumeðlimi , vinnufélaga, vini eða kunningja!

Og ef menn vilja taka þátt í opinberum skákviðburðum eða fylgjast með því sem er í gangi er hægt að nálgast allar upplýsingar hér á Skák.is. 

Teflum okkur til ánægju í dag - skák er skemmtileg!

Gunnar Björnsson

Höfundur er forseti Skáksambands Íslands

Dagskrá Skákdagsins

Á Skákdaginn verður teflt um allt land og í fjölmörgum skólum meðal annars Laugalækjarskóla, Salaskóla, nemendur Ölduselsskóla verða með skákkynningu á leikskólanum Seljaborg, Unnsteinn Sigurjónsson mun tefla fjöltefli við nemendur í grunnskóla Bolungarvíkur og teflt verður í fjölda leikskóla.

Skákhreyfingin hvetur alla Íslendinga til að taka þátt í Skákdeginum, til heiðurs Friðrik, með einum eða öðrum hætti. Allir geta verið með: í sundlaugum, kaffihúsum, fjölteflum, hraðskákmótum - eða í stofunni heima. Kjörorð dagsins er: Upp með taflið!

Athugið er að hér ekki um tæmandi viðburðalista að ræða. Út um allt land - og víða um heim - leggja Íslendingar á ráðin um Skákdaginn 26. janúar 2012.

Hægt er að fylgjast með fréttum og viðburðum á skakdagurinn.blog.is og auðvitað hér á Skák.is.

07:30 Skákdagurinn hefst klukkan hálfátta á fimmtudagsmorgun með fjöltefli Björns Þorfinnssonar alþjóðlegs skákmeistara ofan í Laugardalslaug. Þátttakendur eru Hilmir Freyr Heimisson, Heimir Páll Ragnarsson, Donika Kolica, Hrund Hauksdóttir og Kristján Örn Elíasson.

07:30 Viðtal við Friðrik Ólafsson á Rás 2.

08:00 Á Akureyri verður sundlaugarskáksett vígt í Akureyrarlaug klukkan átta. Gestum laugarinnar býðst að tefla við Akureyrarmeistarann Smára Ólafsson.

08:10 Ötulasti skákkennari landsins hefur sinn daglega rúnt milli grunnskóla í Reykjavík. Björn Ívar Karlsson kennir í 15 skólum í viku hverri og þennan fimmtudaginn verða þeir þrír; Húsaskóli, Korpuskóli og Hlíðaskóli.

09:00 Skákhátíð hefst í Grímsey og stendur allan daginn.

09:30 Þröstur Þórhallsson stórmeistari teflir fjöltefli við nemendur Víkur- og Korpuskóla.

10:00   Alþjóðlegi meistarinn Björn Þorfinnson teflir annað fjöltefli sitt og nú við nemendur Laugarnesskóla.

11:00 Skákgleði hefst á leikskólanum Marbakka í Kópavogi. Skákgleði og söngvar meðal elstu leikskólabarna stjórnað af stórmeistara kvenna Lenku Ptáčníková.

10:00 Hjörvar Steinn Grétarsson teflir kappskák við íslensku þjóðina gegnum netið. Hægt verður að velja milli þriggja leikja og koma valmöguleikarnir fram á http://www.skak.is/  Hjörvar lagði nýlega Shirov, sem hefur teflt hefur um heimsmeistaratitilinn. Getur þjóðin sigrað Hjörvar?

10:00 Skáksamband Austurlands annast kennslu fyrir börn í Egilsstaðaskóla mestallan daginn.

10:00 Hraðskákeinvígi stórmeistarans Stefáns Kristjánssonar og alþjóðlega meistarans Braga Þorfinnssonar hefst í Kringlunni. Landsliðsmennirnir munu ekki hætta að tefla fyrren annar þeirra sigrar í 50 skákum. Skákir einvígisins verða í beinni á skák.is

11:00 Skákmót fyrir börn og fullorðna í Finnbogarstaðaskóla Trékyllisvík.

11:00 Skákgleði hefst á leikskólanum Marbakka í Kópavogi. Skákgleði og söngvar meðal elstu leikskólabarna stjórnað af stórmeistara kvenna Lensku Lenka Ptáčníková.

12:00 Starfsmenn Vodafone halda skákdaginn hátíðlegan í hádeginu með hraðskákum og tefla svo fram eftir degi.

12:00 Starfsmenn Íslandsbanka grípa í tafl.

13:00 TOYOTA-skákmót heldri skákmanna hefst í höfuðstöðvum TOYOTA. Friðrik Ólafsson leikur fyrsta leikinn.

13:00 Mikið skákstarf er unnið í Lágafellsskóla Mosfellsbæ og ber mót dagsins hina skemmtilegu nafngift Litla Friðriksmótið.

13:00 Ungstirnin í Grafarvogi tefla um meistaratitil Rimaskóla. Hjörvar Steinn Grétarsson sigraði á mótinu mörg ár í röð en núverandi meistari er Jón Trausti Harðarson.

13:00 Minningarmót um Björn Sölva Sigurjónsson FIDE-meistarann verður haldið í VIN, Hverfisgötu 47. Björn var einn af sterkustu mönnum Skákfélags Vinjar og heiðra nú minningu fyrrum félaga.

14:00 Þröstur Þórhallsson teflir sitt þriðja fjöltefli um daginn. Í þetta skiptið við leikskólabörn á Laufásborg.

14:00 Friðrik heimsækir Ríkisútvarpið og teflir fjöltefli við starfsmenn. Árið 1956 sat íslenska þjóðin límd við útvarpstækin og fylgdist með beinum útsendingum frá skákum Friðriks Ólafssonar á stórmótinu í Hastings. Þar vann Friðrik glæstan sigur, sem sýndi að hann var kominn í hóp þeirra allra bestu.

16:00 Helgi Ólafsson teflir fjöltefli á Hyrnutorgi í Borgarnesi. Helgi hefur í mörg ár heimsótt Borgarnes og staðið fyrir kennslu í Borgarfirði. Upp úr þeirri kennslu kom meðal annars landsliðskonan Tinna Kristín Finnbogadóttir sem hefur  ásamt móður sinni forgöngu fyrir vígslu skáksundlaugarsetts í Borgarnesi í tilefni dagsins.

16:00 Um miðjan daginn mæta kaffihúsaskákmenn miðborgarinnar á Cafe Haíti sem er sívaxandi skákmiðstöð. Skák og pönnukökur! Allir velkomnir.

16:30 Skákmeistari Landsbankans. Fyrsti leikurinn verður leikinn fyrir eitt af afmælisbörnum dagsins, fyrrum ólympíumeistarann Bergstein Einarsson.

17:00  Hinn ungi meistari Jón Kristinn Þorgeirsson teflir við gesti og gangandi í Pennanum-Eymundsson á Akureyri. Jón verður með 1 mínútu gegn fimm!

18:00 Heldri skákmenn Reykjavíkur standa fyrir öðru stórmóti sínu þennan dag að þessu sinni verða þeir í Gallerí Skák Bolholti. Fyrsta kappteflið af fjórum um Friðrikskónginn. Friðrik mætir um áttaleytið og áritar Taflkónginn. Skákmenn á öllum aldri velkomnir.

19:00 Víkingaklúbburinn býður skákmönnum á Dubliners í miðbæ Reykjavíkur þar sem fram fer Víkingaskákmót.

19:00 Skákfélag fjölskyldunnar verður stofnað í húsakynnum Skáksambands Íslands, Facafeni 12. Að stofnun félagsins stendur kraftmikið fólk, sem kemur með nýja sýn á heim skákarinnar. Foreldrar skákbarna, sem og afar og ömmur og aðrir ættingjar, eru hvattir til að fylgjast með starfi félagsins. Þátttaka er ókeypis og án skuldbindinga.

19:30 Krakkaskákmót á vegum Taflfélags Garðabæjar í gamla betrunarhúsinu.

19:30 Fimmtudagsmót hjá TR í félagsheimili þeirra að Faxafeni 12. Allir velkomnir.

20:00 Hraðskákmót, "Friðriksmót", verður haldið fimmtud. að Koltröð 4, Egilsstöðum.

20:00 Þriðja umferð hefst í Gestamóti Goðans Faxafeni 12. Gestamót Goðans er skemmtileg nýjung í hinn mikla skákmánuð janúar. Á mótinu tefla fyrrum Íslandsmeistarar, fyrrum Ólympíumeistarar og fjölmargir titilhafar.

20:00 Goðinn hefur tvær starfsstöðvar og á heimavellinum í Húsavík verður opið hús og kynning á félaginu. Hermann Aðalsteinsson fer fyrir sínum mönnum.

20:00 Mátar halda skákmót í húsakynnum sínum að Garðatorgi. Hefur félagsmönnum verið tilkynnt um leynigest og spennandi að sjá hver það verður.

20:00 Skákæfing í Dvalarheimilinu Barmahlíð Reykhólasveit. Hlynur Þór Magnússon sér um æfinguna og von er á góðum gestum og ber að nefna sjálfan Jón Kristinsson fyrrverandi Íslandsmeistara í skák.

20:00 Skákmenn á Siglufirði hittast í Safnaðarheimili staðarins. Skák hefur verið kennd í Grunnskólanum í vetur og mælst vel fyrir.

20:00 Opið hús hjá Skákfélagi Akureyrar. Skákfélagsmenn fara yfir perlur með Friðrik. Hann sigraði fleiri heimsmeistara en nokkur annar Íslendingur.

20:00 Atskákmót Sauðárkróks í Safnahúsi staðarins. Allir velkomnir.

22:30 Hellismenn standa fyrir Íslandsmótinu í ofurhraðskák á ICC en umhugsunartíminn er aðeins 2 mínútur á hverja skák. Eru netverjar hvattir til að fylgjast með þeim sviptingum.

Krakkaskákmót hjá TG í kvöld

Krakkaskákmót verður á vegum Taflfélags Garðabæjar í gamla betrunarhúsinu frá kl. 19.30 til 20.30 . sjá. https://docs.google.com/spreadsheet/viewform?formkey=dG10cDItUW96TkVrT1p2NUtTUWF1RkE6MQ

Mótið er opið en aðallega hugsað fyrir krakka í Garðabæ og Hafnarfirði.  Þátttaka takmarkast við um 30 keppendur. 

Fimmtudagsmót hjá TR í kvöld - Skákdaginn

Fimmtudagsmót hjá TR 2012 verður í kvöld á íslenska skákdaginn og hefst að venju kl. 19:30 en húsið opnar kl. 19:10.

Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12. Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.