Rimaskóli vann Miðgarðsmótið í 8. sinn

Miðgarðsmótið í skák, keppni á milli grunnskólanna í Grafarvogi, fór fram í íþróttahúsi Rimaskóla 2. mars. Átta skáksveitir mættu til leiks þar af fjórar frá hinum nýsameinaða Vættaskóla. Teflt var í tveimur riðlum og efstu sveitir hvors riðils tefldu síðan til úrslita. Liðin í öðru sæti tefldu um 3.og 4. sætið o.s.frv. Keppnin varð hálfgert einvígi á milli Rimaskóla og Vættaskóla og urðu A og B sveitir skólanna í fjórum efstu sætunum.

Svo fór að Rimaskóli vann Miðgarðsmótið líkt og skólinn hefur gert frá upphafi. A sveit Vættaskóla varð í öðru sæti og B sveit Rimaskóla í þriðja sæti. Það er Miðgarður fjölskyldumiðstöð Grafarvogs og Kjalarness sem sér um mótið undir stjórn Heru Hallberu Björnsdóttur. Hún sá til þess að allir þátttakendur fengju hagstæðar veitingar í skákhléi og afhenti Rimaskólakrökkunum verðlaunagripina að launum.

Úrslit mótsins urðu þessi:

• 1.       Rimaskóli A          22 vinninga   + 6
• 2.       Vættaskóli A       20 vinninga   + 2
• 3.       Rimaskóli B          17 vinninga   + 7
• 4.       Vættaskóli B       10 vinninga    + 1
• 5.       Rimaskóli  C          9  vinninga    +7
• 6.       Kelduskóli            6, 5 vinninga  + 1
• 7.       Vættaskóli D       3  vinninga  +7
• 8.       Vættaskóli C       3  vinninga   +1

Myndaalbúm (HÁ)

Skákbúð á netinu

Smári Rafn Teitsson, hefur opnað netverslun með töfl og klukkur fyrir innanlandsmarkað á slóðinni http://www.skakbudin.is/

Tímaritið Skák kemur út eftir viku

Tímaritið Skák kemur út næstu helgi.  Óhætt er að segja að blaðið verði í senn glæsilegt og einkar áhugavert.  Blaðið er meira en 100 síður í glæsilegu broti. 

Meðal efnis má nefna magnaða grein Braga Kristjónssonar um Bobby Fischer.  Áhugasamir eru hvattir til að skrá sig fyrir blaðinu hér að ofan (þeir sem hafa áður skráð sig þurfa ekki að endurskrá sig).

Efnisyfirlit blaðsins má finna hér:

• Ávarp forseta Skáksambands Íslands, bls. 4, Gunnar Björnsson
• Flugdrekanum fylgt úr hlaði, bls. 6, Pálmi Ragnar Pétursson
• Reykjavíkurskákmótið 2011, bls. 8, Stefán Bergsson
• Skákþing Íslands 2011 að Eiðum, bls. 12, Halldór Grétar Einarsson
• Skákfélag Vinjar, bls. 20, Arnar Valgeirsson
• Skákárið í myndum, bls. 22
• Norðurlandamót öldunga í Reykjavík, bls. 24, Bragi Halldórsson
• Skákæskan, bls. 30, Stefán Bergsson
• Skákakademía Reykjavíkur, bls. 35, Hrafn Jökulsson
• Markmið og metnaður, bls. 38, Helgi Ólafsson
• Evrópumót taflfélaga, bls. 40, Björn Þorfinnsson og Guðmundur Gíslason
• Nýtum vísdóm reynslunnar, bls. 48, Jón Þorvaldsson
• EM Landsliða, bls. 50, Gunnar Björnsson
• Íslandsmót kvenna 2011, bls. 60, Davíð Ólafsson
• Tafllok - dæmi, bls. 68, Mátar
• Einkennilegar tilviljanir, bls. 71, Bragi Kristjónsson
• Af valkyrjum og víkingum, bls. 75, Davíð Ólafsson, Guðmundur Kjartansson, Guðmundur Gíslason og Henrik Danielsen
• Um skáklistina og Friðrik okkar Ólafsson, bls. 85, Guðni Ágústsson
• Willard Fiske - faðir skáklífs á Íslandi á, 20. öld, bls. 87, Skákdeginum fagnað í Grímsey, Hrafn Jökulsson
• Miklimeir, bls. 89, Katrín Ólína Pétursdóttir
• Íslandsmót Taflfélaga 2011-2012, bls. 91-100, Áskell Örn Kárason
• Reykjavíkurskákmótið 2012, bls. 101, Gunnar Björnsson

 

Spá ritstjóra um Íslandsmót skákfélaga

Hin árlegu spá ritstjóra um úrslit á Íslandsmóti skákfélaga má finna hér.

Fimm stórmeistarar í landsliðsflokki í apríl - Það er gott að tefla í Kópavogi

Ógnarsterkur landsliðsflokkur fer fram dagana 13.-23. apríl.   Mótið fer fram í Kópavogi.  Fimm stórmeistarar eru skráðir til leiks, Héðinn Steingrímsson, Hannes Hlífar Stefánsson, Henrik Danielsen, Stefán Kristjánsson og Þröstur Þórhallsson.   Enn er tvö sæti laus í mótinu en þau munu falla tveimur efstu mönnum áskorendaflokks, sem fram fer 30. mars - 8. apríl, í skaut en keppendalisti var ákveðin á stjórnarfundi SÍ í kvöld.

Skipan landsliðsflokks:

1. GM Héðinn Steingrímsson (2556)
2. GM Hannes Hlífar Stefánsson (2531)
3. GM Henrik Danielsen (2504)
4. GM Stefán Kristjánsson (2500)
5. IM Bragi Þorfinnsson (2421)
6. IM Björn Þorfinnsson (2416)
7. GM Þröstur Þórhallsson (2398)
8. FM Sigurbjörn Björnsson (2393)
9. IM Dagur Arngrímsson (2361)
10. FM Davíð Kjartansson (2305)
11. Áskorendaflokkur 2012
12. Áskorendaflokkur 2012

Varamenn í flokkinn voru valdir þeir Guðmundur Kjartansson (2357) og Guðmundur Gíslason (2346).

Síðari hluti Íslandsmóts skákfélaga hefst í kvöld

Dagana 2. og 3.  mars nk. fer fram seinni hluti Íslandsmóts skákfélaga 2011-2012. Teflt verður í húsnæði Fjölbrautarskóla Suðurlands á Selfossi.  Verðlaunaafhending verður á skemmtistaðnum Hvíta Húsið og hefst kl. 23.00.

Dagskrá:

• Föstudagur 2. mars                 kl. 20.00          5. umferð
• Laugardagur 3. mars               kl. 11.00          6. umferð
• Laugardagur 3. mars               kl. 17.00          7. umferð

Heimasíða Íslandsmóts skákfélaga

Skærustu stjörnur skákheimsins í Hörpu

Margir af sterkustu skákmönnum heims tefla á alþjóðlega Reykjavíkurskákmótinu sem fram fer í Hörpu 6. til 13. mars. Um 200 keppendur frá um 40 löndum eru skráðir til leiks og hafa aldrei verið fleiri í næstum hálfrar aldar sögu mótsins.

Augu skákheimsins munu beinast að Hörpu, því tvö efnilegustu ungmenni veraldar verða meðal keppenda: Kínverska stúlkan Hou Yifan, 18 ára, sem varð heimsmeistari kvenna aðeins 15 ára, og Fabiano Caruana, sem kominn er í 7. sæti heimslistans, þrátt fyrir að vera aðeins 19 ára.

Caruana er jafnframt stigahæsti skákmaður sem nokkru sinni hefur teflt á Reykjavíkurmótinu.

Af öðrum gestum má nefna Tékkann David Navara, sem er næststigahæstur, og Bosníumanninn Ivan Sokolov sem er sá erlendur meistari sem unnið hefur flesta sigra á Íslandi.

Enn má nefna pólska meistarann  Piotr Dukaczewski sem komist hefur í fremstu röð, þrátt fyrir að vera blindur. Það sannar að skákin er fyrir alla – og íslenski keppendalistinn endurspeglar það.  Flestra augu beinast að Hannesi H. Stefánssyni sem sigrað hefur 5 sinnum á Reykjavíkurmótinu og Hjörvari Steini Grétarssyni efnilegasta skákmanni Íslands. Fjölmargir áhugamenn á öllum aldri etja kappi við meistarana, allt frá grunnskólabörnum til kennara, prentara og lækna.

Skáksamband Íslands stendur að mótinu og er mikil vinna lögð í að umgjörð mótsins verði sem glæsilegust.  Góð aðstaða verður fyrir áhorfendur sem geta fylgst með skákum meistaranna á risaskjá, og stórmeistararnir Jóhann Hjartarson, Jón L. Árnason og Helgi Ólafsson annast skákskýringar.  Í lok hverrar umferðar verða pallborðsumræður í  umsjón stórmeistarans Simon Williams sem þykir einn skemmtilegasti skákskýrandi heims.

Efnt er til fjölda sérviðburða í tengslum við mótið og verður sá fyrsti í Sjóminjasafninu við Grandagarð á sunnudaginn klukkan 15. Þá verður haldinn fyrsti „Stelpuskákdagurinn“ á Íslandi og verður heimsmeistarinn Hou Yifan sérlegur gestur og teflir við efnilegustu stúlkur Íslands. Ennfremur verður haldið opið hraðskákmót í Viðey, málþing um skákkennslu, spurningakeppni um skák, barnaskákmót og fyrirlestrar um skákrannsóknir, svo nokkuð sé nefnt.

Fimmtudagsmót hjá TR í kvöld

Fimmtudagsmót hjá TR 2012 verður í kvöld og hefst að venju kl. 19:30 en húsið opnar kl. 19:10.

Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12. Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

GallerýSkák lokað 1. mars

Ekki verður teflt í Gallerý Skák í kvöld, þann 1. mars, vegna Íslandsmóts Skákfélaga sem hefst á Selfossi daginn eftir.

Skákkennaraklúbburinn stofnaður

Mikill uppgangur hefur verið í æskulýðsstarfi skákhreyfingarinnar síðustu ár. Kemur þar margt til en aukinn fjöldi þeirra sem kenna skák og koma að skákkennslu barna og unglinga er án efa ein helsta ástæðan. Hluti af þessum stóra hóp sem kennir skák kom saman í gærkveldi á sal Skákskóla Íslands og stofnaði Skákkennaraklúbbinn.
 
Stofnfundurinn hófst á því að Stefán Bergsson bauð þá þrjátíu stofnfélaga sem mættir voru velkomna. Stefán hélt svo kynningu þar sem meðal annars var farið yfir mismunandi hlutverk Skákakademíunnar, Skákskólans og Skáksambandsins.  Fór Stefán yfir tilganginn með með stofnun Skákkennaraklúbbsins sem má segja að sé þríþættur:
 
- Vettvangur fyrir þá sem koma að skákkennslu og æskulýðsstarfi skákhreyfingarinnar að koma saman.
- Efla grunnskólakennara í skákkennslu sinni; halda námskeið fyrir þá sem kenna skák.
- Rödd innan skólakerfisins er varðar skákkennslu. Ekki síst um áhrif hennar og ágæti á námsgetu barna.
 
Að erindi Stefáns loknu var kjörin stjórn sem skipa; Björn Ívar Karlsson formaður, Gunnar Finnsson og Ingibjörg Rósa Ívarsdóttir.
 
Björn Ívar kennir hjá Skákakademíu Reykjavíkur og er í kennaranámi, Gunnar er með áratugareynslu af skákkennslu og kennir nú skák í Hörðuvallaskóla og Árbæjarskóla og Ingibjörg er kennari í Lágafellsskóla og hefur kennt skák þar um árabil.
 
Að kosningu lokinni flutti Helgi Ólafsson erindi. Kom Helgi inn á margt varðandi skákkennslu; að góður skákkennari þyrfti ekki endilega að vera góður skákmaður, sagði frá mikilvægi hvata í kennslu eins og t.d. gull, silfur, bronz námsefninu, og að hægt væri að kenna skák á margan hátt og hver þyrfti að finna sína leið í því.
 
Björn Ívar Karlsson sagði frá kennsluaðferðum sínum í þeim mörgu skólum sem hann kennir í. Lagði Björn áherslu á að hann væri sjaldan með sama kennsluefnið fyrir mismunandi nemendahópa en sagðist mikið notast við tölvuforrit, fartölvu og skjávarpa í kennslustofum.
 
Umræður fundarmanna voru svo nokkuð miklar. Meðal annars kom fram.

a) Vangaveltur Lenku Ptacnikovu um að bæta við yngri aldursflokkum á mótum.
b) Sérstakt skákkennaranámskeið fyrir konur þar sem þær eru 90% grunnskólakennara. Jón Páll Haraldsson aðstoðarskólastjóri Laugalækjarskóla.
c) Mikilvægi taflfélaga til að halda börnum og unglingum inn í skákinni. Sigurlaug Regína Friðþjófsdóttir.
d) Vangaveltur um samhæft námsefni. Róbert Lagerman.
 
Skákkennarar og þeir sem koma að æskulýðsstarfi geta gerst stofnfélagar í Skákkennaraklúbbnum fram að laugardeginum 10. mars. Þann dag klukkan 13:00 fer fram Málþing um skákkennslu og skákiðkun barna í Hörpu.
 
Málþingið er haldið samhliða Reykjavíkurskákmótinu og mun meðal annarra bandaríski stórmeistarinn og skákkennarinn Maurice Ashley flytja erindi.
 
Skákkennarar eru hvattir til að gerast stofnfélagar og ekki síst þeir sem á landsbygðinni búa. Listinn yfir stofnfélaga er nú þegar skemmtilega fjölbreyttur og má þar finna unga sem aldna, konur og karla, grunnskólanemendur og grunnskólakennara fyrrverandi og núverandi, stórmeistara og stigalausa. Vantar helst fulltrúa landsbyggðarinnar en skákkennarar eru víða ekki síst á Akureyri, Eyjum og fyrir austan.

Myndaalbúm