Suðurlandsmótið fer fram í dag

Suðurlandsmótið í skák fer fram á Selfossi næstkomandi laugardag.  Tefldar verða atskákir, 7 umferðir.

Mótið er öllum opið ein einungis þeir sem lögheimili hafa í Suðurkjördæmi geta orðið Suðurlandsmeistarar.

Mótið hefst kl 10:00 og ætla má að því ljúki um kl 17:00

Veitt verða peningaverðlaun og verðlaunagripir fyrir 3 efstu sætin auk þess sem sérstök verðlaun verða í flokki skákmanna með minna 1600 skákstig

Verðlaun:
1. sæti 10.000.-kr
2. sæti 7.500.-kr
3.sæti 5.000.-kr

Besti árangur undir 1600 skákstig 5.000.-kr

Teflt verðu í Selinu á Selfossi.

Þátttökugjald: 1.500.- kr. (kaffi, svaladrykkir og léttar veitingar innifalið)

Sitjandi Suðurlandsmeistari er Björn Ívar Karlsson

Skráðir keppendur 15. apríl:

 

SNo.	Name	NRtg	Club
1	Jónsson Páll Leó	2043	SSON
2	Sverrisson Nökkvi	1968	TV
3	Unnarsson Sverrir	1907	TV
4	Sigurðarson Emil	1821	SFÍ
5	Ingimundur Sigurmundsson	1791	SSON
6	Úlfhéðinn Sigurmundsson	1770	SSON
7	Ingvar Örn Birgisson	1767	SSON
8	Erlingur Jensson	1750	SSON
9	Sigurður H. Jónsson	1746	SR
10	Grantas Grigoranas	1729	SSON
11	Kjartan  Másson	1715	SAUST
12	Dagur Kjartansson	1652	SFÍ
13	Þórainn Ingi Ólafsson	1621	TV
14	Magnús Matthíasson	1616	SSON
15	Ingibjörg Edda Birgisdóttir	1564	SSON
16	Gauti Páll  Jónsson	1410	TR
17	Erlingur Atli Pálmarsson	1405	SSON
18	Jakob Alexander Petersen	1185	TR
19	Arnar  Erlingsson	0	SSON
20	Michael Starosta	0	TV

 

Heimasíða SSON

Skólaskákmót Akureyrar fer fram í dag

Skólaskákmót Akureyrar fer fram laugardaginn 21. apríl. Teflt er í tveimur flokkum, yngri flokki 1.-7. bekk og eldri flokki 8.-10. bekk. Hámarksfjöldi er 24 keppendur í hvorum flokki. Í skólum þar sem skólamót hafa farið fram eiga 2 efstu menn í hvorum flokki sjálkrafa keppnisrétt, en fulltrúar annarra skóla eru velkomnir, svo og aðrir áhugasamir keppendur þar til hámarksfjölda er náð.

Mótið hefst kl. 13.00 í skákheimilinu í Íþróttahöllinni. Þeir sem ekki eru þegar skráðir í mótið skulu gera vart við sig á skáksatð ekki síðar en 10 mínútum fyrir upphaf móts.

Umhugsunartími er 7 mínútur á skák og verða tefldar 7 umferðir í hvorum flokki, en fjöldi umferð getur þó ráðist af þátttöku.

Tveir efstu menn í hvorum flokki vinna sér keppnisrétt á kjördæmismóti og keppendur í 3-4. eru þar varamenn.

Norðurlandamót stúlkna 2012 - Pistill fyrstu umferðar

Fyrsta umferð Norðurlandamóts stúlkna var tefld í kvöld.  Íslensku keppendurnir byrjuðu mjög vel í mótinu og var niðurstaða kvöldsins fjórir vinningar af 6 mögulegum.

A-flokkur:
Louise Segerfelt - Jóhanna Björg Jóhannsdóttir 0-1
Jessica Bengtsson - Sigríður Björg Helgadóttir  1-0

Skák Jóhönnu sem var í beinni útsendingu reyndist vera frekar þægileg fyrir Jóhönnu.  Ekki það að andstæðingur hennar tefldi mjög illa, en eyddi hins vegar mjög miklum tíma í byrjuninni og það kann ekki góðri lukku að stýra þegar tímamörkin eru 90 mínútur á skákina + 30 sekúndur á leik.  Andstæðingurinn lenti semsagt í miklu tímahraki sem endaði með því að hún lék illa af sér og tapaði heilum hrók.  Jóhanna gerði sér þetta þó óþarflega erfitt með því að leika af sér manni til baka en vann engu að síður mjög örugglega.

Sigríður tefldi mjög langa og þunga skák gegn hinni sænsku Jessicu.  Eftir ágætis byrjun fór hins vegar að halla á hana sem endaði með því að hún tapaði skákinni eftir langa og stranga baráttu.  Hún á örugglega eftir að koma til baka á morgun.

B-flokkur:
Hanna B Kyrkjebö – Hrund Hauksdóttir 0-1
Veronika Steinunn Magnúsdóttir – Maud Rödsmoen ½-½

Hrund tefldi með svörtu gegn hinni norsku Hönnu sem er önnur af Kyrkjebö tvíburunum sem við þekkjum vel frá fyrri mótum.  Hrund tefldi byrjunina aðeins ónákvæmt og fékk verri stöðu eftir að hafa tapað peði.  Þeir sem þekkja Hrund vita hins vegar að það er síður en svo auðvelt að vinna hana.  Andstæðingur hennar fékk sannarlega að kenna á því í kvöld.  Þrátt fyrir að vera peði undir tefldi Hrund bara rólega eins og hún gerir best og bætti stöðu sína jafnt og þétt.  Að lokum fór svo að Hrund mátaði andstæðing sinn pent án þess að hún kæmi nokkrum vörnum við.  Hrund sýndi þarna sannarlega flottan karakter með því að leggja ekki árar í bát þó að staðan væri heldur verri en halda bara ótrauð áfram að finna bestu leikina sem að lokum skilaði henni góðum sigri.

Veronika fékk það erfiða hlutverk að tefla við hina norsku Maud sem við vitum vel að er alveg grjóthörð.  Skákin var að mestu í jafnvægi allan tíman og endaði að lokum með því að sú norska neyddist til að þráskáka.  Gott jafntefli hjá Veroniku gegn stigahæstu stelpu flokksins.

C-flokkur:
Regine Forså - Sóley Lind Pálsdóttir ½-½
Nansý Davíðsdóttir – Hanna Jacobsen 1-0

Sóley tefldi með svörtu á móti hinni norsku Regine sem við höfum ekki séð á mótum áður en við þekkjum hins vegar vel til systkina hennar sem teflt hafa á fjölmörgum norðurlandamótum.  Sóley fékk fína stöðu úr byrjuninni en var full kurteis við andstæðingin og gaf aðeins eftir.  Sóley lék svo af sér skiptamun og fékk tapaða stöðu.  Sóley tefldi síðan framhaldið mjög vel og náði að lokum góðu jafntefli eftir mikla baráttu.

Nansý hafði hvítt á móti hinni færeysku Hönnu sem við höfum hitt áður á norðurlandamótum og vitum vel að getur teflt feikilega vel.  Nansý átti hins vegar frábæran dag og valtaði algjörlega yfir þá færeysku.  Frábær skák hjá Nansý sem byrjar glæsilega í mótinu.

Á morgun eru eftirfarandi viðureignir hjá íslensku stelpunum: 

A-flokkur:
Jóhanna Björg Jóhannsdóttir – Jessica Bengtsson (Svíþjóð)
Sigríður Björg Helgadóttir – Amalia Heiring Lindestrom (Danmörk) 

B-flokkur:
Hrund Hauksdóttir – Edit Machlik (Noregur)
Sif Tylvad Linde (Danmörk) – Veronika Steinunn Magnúsdóttir 

C-flokkur:
Elisa Sjöttem Jacobsen (Noregur) – Nansý Davíðsdóttir
Sóley Lind Pálsdóttir – Linnea Holmboe Bårregård (Danmörk)  Mótstöflur, skákir og bein útsending:

A-flokkur
B-flokkur
C-flokkur
Bein útsending
Skákir 
 
Davíð Ólafsson

Þröstur jafn Henrik á Íslandsmótinu: Æsispennandi lokaumferðir

Þrír skákmeistarar eiga raunhæfa möguleika á Íslandsmeistaratitlinum, þegar þremur umferðum er ólokið á Íslandsmótinu í skák, sem fram fer í Stúkunni í Kópavogi.

Þröstur Þórhallsson er nú efstur ásamt Henrik Danielsen, eftir sigur á Davíð Kjartanssyni í 8. umferð. Henrik þurfti hinsvegar að berjast fyrir jafntefli gegn Guðmundi Kjartanssyni í lengstu skák Íslandsmótsins til þessa. Þeir glímdu í 132 leiki áður en sæst var á skiptan hlut. 

Þröstur og Henrik hafa 6 vinninga af 8 mögulegum, þegar 3 umferðir eru eftir. Bragi Þorfinnsson er í þriðja sæti með 5,5 vinning, eftir sigur á Birni Þorfinnssyni í hörkuskák.

Sem fyrr einkennist Íslandsmótið af mikilli baráttu og er teflt til þrautar í hverri einustu skák, að kalla. Undantekning 8. umferðar var þó skák stórmeistaranna Stefáns Kristjánssonar og Hannesar Hlífars Stefánssonar. Þeir gerðu jafntefli í aðeins 10 leikjum, en hvorugur hefur staðið undir væntingum á Íslandsmótinu að þessu sinni.

Einar Hjalti Jensson lagði Sigurbjörn Björnsson í 60 leikjum, og þeir Guðmundur Gíslason og Dagur Arngrímsson gerðu jafntefli í hörkuskák.

Þröstur, Henrik og Bragi munu á næstu þremur dögum keppa um hver kemur fyrstur í mark á Íslandsmótinu. Henrik hefur einu sinni orðið Íslandsmeistari, en hvorki Braga né Þresti hefur ennþá auðnast að hampa titlinum. Það er því mikið í húfi, og útlit fyrir æsispennandi lokaumferðir á Íslandsmótinu 2012.

9. umferð hefst klukkan 16 í Stúkunni á Kópavogsvelli og þá mætast:

Þröstur Þórhallsson - Björn Þorfinnsson

Sigurbjörn Björnsson - Davíð Kjartansson

Guðmundur Kjartansson - Einar Hjalti Jensson

Dagur Arngrímsson - Henrik Danielsen

Hannes H. Stefánsson - Guðmundur Gíslason

Bragi Þorfinnsson - Stefán Kristjánsson

• Heimasíða mótsins
• Chess-Results
• Beinar útsendingar
• Myndaalbúm mótsins (HJ)

Norðurlandamót stúlkna hafið: Jóhanna Björg í beinni útsendingu

Norðurlandamót stúlkna 2012 er nú nýhafið í Stavanger Noregi.  Aðstæður hér í Noregi eru algjörlega til fyrirmyndar.  Gist og teflt er á hótel Scandic í Stavanger sem er mjög nýlegt hótel og ekki skemmir það fyrir að þrír starfsmenn hótelsins eru Íslendingar!

Fyrir Íslands hönd tefla og andstæðingar þeirra í fyrstu umferð:

A-flokkur:
Jóhanna Björg Jóhannsdóttir sem hefur svart á móti Louise Segerfelt (Svíþjóð) og er sú skák í beinni útsendingu.
Sigríður Björg hefur hvítt á móti Jessicu Bengtsson (Svíþjóð).

B-flokkur:
Hrund Hauksdóttir hefur svart á móti Hönnu B Kirkjebö (Noregur).
Veronika Steinunn Magnúsdóttir hefur hvítt á móti Maud Rödsmoen (Noregur).

C-flokkur:
Sóley Lind Pálsdóttir hefur svart á móti Regine Forså (Noregur).
Nansý Davíðsdóttir hefur hvítt á móti Hönnu Jacobsen (Færeyjar).

Við setningu mótsins stal skákstjórinn algjörlega senunni.  Auk þess að buna út úr sér bröndurum er hann frábærlega vel merktur í skákvestinu sínu (sjá mynd).

Auk undirritaðs eru þeir Davíð Hallsson, faðir Nansýar, og Páll Sigurðsson með í för.

Heimasíða mótsins: http://turneringsservice.sjakklubb.no/standings.aspx?TID=Nordicforgirls2012-StavangerSjakklubb 

Jóhanna í beinni: http://stavangersku.no/live/tfd.htm

Davíð Ólafsson

Íslandsmótið í skák: Áttunda umferðin hefst nú kl. 16 - hvaða gera toppmennirnir í lokaumferðunum?

Áttunda umferð Íslandsmótsins í skák hefst nú kl. 16 í Stúkunni á Kópavogsvelli.  Nú er svo komið að fjórir keppendur berjast um Íslandmeistaratitilinn og mætast ekkert innbyrðis í umferð dagsins.   Þeir þurfa því að ná góðum úrslitum gegn "minni spámönnum".  

Forystusauðurinn Henrik Danielsen teflir við Guðmund Kjartansson, Þröstur Þórhallsson, sem fylgir Henriki eins og skugginn, mætir Davíð Kjartanssyni.  Bragi sem er þriðji, hálfum vinningi þar á eftir mætir bróður sínum, Birni, og Dagur Arngrímsson, sem er einum hálfum vinningi þar á eftir, teflir við Guðmund Gíslason. 

Þess fyrir utan er stórmeistaraslagur Stefáns Kristjánssonar og Hannesar Hlífars Stefánssonar.  Sigurbjörn Björnsson mætir Einar Hjalta Jenssyni.  

Skákskýringar í boði sterkustu skákmanna þjóðarinnar, sem ekki taka þátt, munu hefjast um kl. 18.    Hjörvar Steinn Grétarsson hefur boðið komu sína sem skákskýrandi. 

Viðureignir dagsins:

• Henrik Danielsen (5,5) - Guðmundur Kjartansson (3,0)
• Davíð Kjartansson (3,5) - Þröstur Þórhallsson (5,0)
• Björn Þorfinnsson (2,5) - Bragi Þorfinnsson (4,5)
• Guðmundur Gíslason (2,5) - Dagur Arngrímsson (4,0)
• Stefán Kristjánsson (3,5) - Hannes Hlífar Stefánsson (2,5)
• Einar Hjalti Jensson (2,0) - Sigurbjörn Björnsson (3,5)

Beinar útsendingar úr 8. umferð má nálgast hér.

• Heimasíða mótsins
• Chess-Results
• Beinar útsendingar
• Myndaalbúm mótsins (HJ)

Enn vinnur Oliver - fimmti sigurinn í röð - kominn í 3.-9. sæti

Oliver Aron Jóhannesson (1677) vann sína fimmtu skák í röð á HM áhugamanna er hann lagði Grikkjann Ioannis Minas (1930) í 6. umferð sem fram fór í Porto Carras í Grikklandi í morgun.  Oliver er í 3.-9. sæti með 5 vinninga. 

Í sjöundu umferð, sem nú er í gangi, teflir Oliver við Rússann Alaxender Liberman (1988). 

Úrslit Olivers má nálgast hér.  

Mótið er einungis opið fyrir skákmenn með 2000 skákstig eða minna.  Oliver er nr. 82 í stigaröð keppenda.

• Heimasíða mótsins
• Chess-Results

Suðurlandsmótið í skák fer fram á morgun

Suðurlandsmótið í skák fer fram í Selinu á Selfossi á morgun.  Tefldar verða atskákir, 7 umferðir.  Mótið er öllum opið en einungis þeir sem lögheimili hafa í Suðurkjördæmi geta orðið Suðurlandsmeistarar.  Mótið hefst kl 10:00 og ætla má að því ljúki um kl 17:00

Veitt verða peningaverðlaun og verðlaunagripir fyrir 3 efstu sætin auk verðlauna í flokki skákmanna undir 1600 sem og verðlaun fyrir bestan árangur miðað við skákstig (rating performance)

Verðlaun:

• 1. sæti 10.000.-kr
• 2. sæti 7.500.-kr
• 3.sæti 5.000.-kr
• U 1600 skákstig 5.000.-kr
• Besti árangur miðað við stig 5.000.-kr

Þátttökugjald: 1.500.- kr. (kaffi, gos og léttar veitingar innifalið)

Nánari upplýsingar: http://sudurskak.blog.is/blog/sudurskak/

Æsispennandi kynslóðakeppni í Kópavogi

Í gær fór fram æsispennandi kynslóðakeppni í Stúkunni á Kópavogsvelli.  Keppnin var á milli skákmanna úr hinum sáluga Taflfélagi Kópavogs gegn ungum og upprennandi skákmönnum úr Kópavogi.   Fljótlega virtust sem hinir "öldnu" ætlaðu að hafa auðveldan sigur, enda mjög vanir hraðskákmenn en hinir ungu meira fyrir lengri skákir.   Hinir eldri leiddu með 6 vinningum í hálfleik. 

En þegar leið á viðureignina fóru hinir yngri heldur betur í gang.  Unnu hverja viðureignina á fætur annarri og þegar upp var staðið fóru leikar þannig að hinir eldri unnu sigur með minnsta mun 36,5-35,5.  Einum úr eldri liðinu var að orði:  "Þessi keppni hefði ekki mátt fara mikið síðar fram"

Hlíðar Þór Hreinsson var bestur eldri skákmannanna en hann hlaut 9 vinninga í 12 skákum, Haraldur Baldursson fékk 8 vinninga og Hafliði Þórsson 7 vinninga.  Atli Aðalsteinsson, Sigurður E. Kristjánsson og Sigurjón Haraldsson voru einnig í liði TK.

Hjá hinum yngri fékk Vignir Vatnar Stefánsson flesta vinninga eða 9.  Birkir Karl Sigurðsson fékk 8 vinninga og Hilmir Freyr Heimisson 7 vinninga.  Dawid Kolka, Felix Steinþórsson og Hildur Berglind Jóhannsdóttir voru einnig í yngra liðinu.

Að lokinni viðureign fengu allir keppendur Tímaritið Skák að gjöf frá Skáksamband Íslands og var vel klappað fyrir liðunum.  Það er ljóst að framtíð Kópavogs er björt á skáksviðinu.

Myndaablúm (ÁHS)

Sundlaugarmótið í Breiðholtslaug - á Sumardaginn fyrsta

Margt er um að vera og sér til gamans gert til að fagna sumri. Sjá mátti dæmi þess um alla borg á sumardaginn fyrsta þar sem fólk kom saman til að viðra sig og sjá aðra.  Sumir spruttu úr spori í víðavangshlaupi en aðrir létu sér nægja að taka þátt í skrúðgöngum eða fengu sér ís í góða veðrinu, enda dagur barna á öllum aldri.

Í Breiðholtslaug var annað upp í teningnum. Skákakademína Reykjavíkur með Stefán Bergsson, framkvæmdastjóra í broddi fylkingar ásamt Hrafni Jökulssyni, hirðljósmyndara, var mætt á vatnasvæði laugarinnar færandi hendi ásamt vaskri sveit skákgarpa af eldri kynslóðinni.

Minnstu munaði að Lúðrasveit verkalýðsins væri mætt og blési í herlúðra, slíkur var fögnuðurinn, en það verður að bíða 1. maí. 

Vígsla sjálffljótandi sundlaugarskáksetts var í uppsiglingu en  sams konar afþreygingarbúnaður hafði áður verið settur upp í Laugardalslaug, Grafarvogslaug  og víðar, nú nýlega í  Salalaug í Kópavogi og meira segja út í  Grímsey. Jafnframt stóð fyrir dyrum að halda áskorendamót í skák þar sem Bjarni Hjartarson, Breiðhyltingur, hafði skorað á Magnús V. Pétursson, milliríkjadómara, Fremristekk, í einvígi í sundlaugardskák, að dæmi  þeirra Bobby Fischers og Larry Evans, sællar minningar í Laugardalslaug 1972.

Þegar menn höfðu hreiðrað um sig í heita pottinum var ekki til seturnar boðið.  Einar S. Einarsson (IA) fenginn til þess að leika fyrsta leikinn eftir að hafa látið keppendurdraga um liti í tveimur þrepum, svo ekki vaknaði grunur um samráð eða brot á samkeppnislögum.  Allmargir sundlaugargestir höfðu safnast að ásamt sundlaugarvörðum, sem fögnuðu þessari tilbreytni og menningarauka mjög.

Að velheppnuðum fyrsta leik loknum klöppuðu laugargestir Skákakademíunni lof í lófa.  Leikar fóru svo að Bjarni hafði sigur í báðum einvígisskákunum, þrátt fyrir glæsileg tilburði Magnúsar, sem teldi fyrir áhorfendur og til að hafa gaman af.  Var Maggi Pé að vonum hálfsvekktur yfir útkomunni, hafði ekki fyllilega áttað sig á að Bjarni kynni svo mikið fyrir sér í skák, eins og kom á daginn. Keppendur skildust þó sáttir að kalla, hugsuðu báðir gott til glóðarinnar að hittast aftur fljótlega og taka fleiri rimmur í heitapotti Breiðholtslaugarinnar enda fastagestir þar og skáksetið komið til að vera. 

Í framhaldi af þessu upphófst kappaslagur af vestfirskum sið, þar sem sigurvegarinn situr kyrr og hefur svart.   Synti þá fyrstur fram til tafls Sæbjörn Larsen, sem borið hafði sigur úr bítum fyrr í vikunni í hópi Æsa í Ásgarði. Brutust þá út mikil átök á skákbrettinu með stórum ágjöfum og skvettum. Mátti lengi vart milli sjá hvor stæði betur eða verr, ekki fyrr "sjóriðu" varð vart í liði Bjarna á drottningarvæng, sem Sæsi nýtti sér til sigurs um síðir.

 Var þá komið að "Viðeyjarundrinu" hinum sigursæla KR-ingi og fyrrum hárprúða riddara Guðfinni R. Kjartanssyni að etja kappi gegn Sæbirni Bolvíkingakappa.  Öllum til undrunar og mest honum sjálfum missté Gussi sig illilega í byrjuninni svo biskup hrökk fyrir borð í atganginum.  Að hætti sannra bardagakappa lét hann sér fátt um finnast og kvaðst hvergi láta sér bregða - hvorki við sár né bana og blés í þess stað til sóknaraðgerða með fléttuívafi og blandaðri tækni.   Fór svo að hann að lokum að  vann skákina óvænt og með nokkrum tilþrifum er  enduruppvakin drottning hans fór á stjá og þrengdi óþrymilega að kóngi andstæðingsins, sem hann mátti sig vart hræra öðruvísi en að verða mát.  Gaf Sæsi þá skákina með þungum ekka.

Að lokum tefldu þeir Einar Ess og Maggi Pé eina skák fyrir áhorfendur um áskorunaréttinn á næsta fórnarlamb, þar sem Einar bar glæstan sigur úr bítum.  Hann tefldi síðan við “ókunna skákmanninn” í heita pottinum og slapp með skrekkinn með jafntefli, eftir að hafa verið pattaður.

Hið lofsverða framtak Skákakademíunnar að  gefa fljótandi skáksett í hverja sundlaugina á fætur annarri er mikill fengur fyrir skákunnendur og í raun alla sundlaugagesti  – jafnt innlenda sem útlenda, sem sést hafa taka sundskák undir beru lofti í mögnuðu ylvolgu umhverfi.

Mynddalbúm (HJ og ESE)