Köben: Hannes efstur ásamt þremur öðrum

Stórmeistarinn Hannes Hlífar Stefánsson (2516) vann danska FIDE-meistarann Igor Teplyi (2516) í 4. umferð Copenhagen Chess Challenge.  Hannes er efstur með 3½ vinning ásamt alþjóðlegu meisturunum Nicolai Vesterbaek Pedersen (2465), Danmörku, Daniel Semcesen (2461), Svíþjóð, og Helga Dam Ziska (2450), Færeyjum.

Henrik Danielsen (2498) gerði jafntefli við Danann Sandi Stojanovski (2200) og hefur 2½ vinning.

Kjartan Maack (2133) og Óskar Long Einarsson (1591) unnu en Atli Jóhann Leósson tapaði.  Kjartan hefur 2 vinninga en Atli og Óskar hafa 1 vinning.

Í fimmtu umferð, sem hófst núna kl. 13, teflir Hannes við Vesterbaek.  

66 skákmenn taka þátt og þar af eru 6 stórmeistarar.  Hannes og Henrik eru nr. 3 og 4 í stigaröð keppenda.   Mótið er 9 umferðir en er aðeins teflt á 5 dögum.  Tefldar eru 2 skákir alla daga nema fyrsta daginn.  Skákirnar hefjast kl. 8 og 13 á íslenskum tíma.

• Heimasíða mótsins
• Chess-Results
• Beinar útsendingar (borð 1-15)
  

 

Tómas sigursæll fyrir Norðan

Tómas Veigar Sigurðarson er iðinn við kolann þessa dagana og sigursæll. Í gær, fimmtudag var að vanda opið hús í Skákheimilinu og slegið upp hraðskákmóti. Tómas vann þar öruggan sigur, hlaut 12 vinninga í 14 skákum. Annar varð Sigurður Arnarson með 10,5 vinning og nafni hans Eiríksson þriðji með 10. Karl Egill Steingrímsson fékk 8,5 vinning í fjórða sæti, en aðrir minna.

Bikarmóti SA lauk nú í vikunni.  Mótið er teflt með útsláttarfyrirkomulagi á þann hátt að keppendur falla út eftir 3 töp (jafntefli= 1/2 tap). Tefldar eru atskákir.

12 keppendur hófu keppni á mótinu sl. sunnudag og urðu umferðirnar 10 áður en yfir lauk. eftir 8 umferðir voru þeir tveir eftir, Tómas og Jón Kristinn Þorgeirsson. Jón vann fyrri skák þeirra félaga, en 10 og síðustu skákinni lauk með sigri Tómasar. Þar með var mælirinn fullur hjá Jóni. Tómas hafði nokkra fyirburði á mótinu, tapaði aðeins 1,5 vinningi, hlaut 8,5 vinning í 10 skákum. Þriðji á mótinu varð Sigurður Eiríksson.  

Næsta mót hja félaginu verður 15. mínútna mót sunnudaginn 6. maí og hefst kl. 13

Skákþing Norðlendinga fer fram um Hvítasunnuhelgina

Skákþing Norðlendinga 2012

Akureyri 25.-28. maí 2012

150 ára afmælismót Akureyrarkaupstaðar

100 ára afmælismót Júlíusar Bogasonar skákmeistara

Skákþingið hefur verið haldið árlega frá 1935 og er nú háð í 78. sinn.  Sérstaklega verður vandað til mótshaldsins nú í tilefni af því að 150 ár eru liðin frá því Akureyrarbær öðlaðist kaupstaðaréttindi. Þá er með mótshaldinu þess minnst að í ár eru 100 ár liðin frá fæðingu Júlíusar Bogasonar skákmeistara. Júlíus varð skákmeistari Akureyrar 19 sinnum og  5 sinnum skákmeistari Norðlendinga.

Teflt verður í félagsheimili Skákfélags Akureyrar, Íþróttahöllinni við Skólastíg (gengið inn að vestan).  

Dagskrá:

Tefldar verða 7 umferðir eftir svissnesku kerfi, 3 atskákir og 4 kappskákir.  

Föstudagur 25. maí kl. 20.00: 1.-3. umferð. Atskák, 25 mín/mann.
Laugardagur 26. maí kl. 10.00: 4. umferð. Kappskák, 90 mín + 30 sek/leik.
Laugardagur 26. maí kl. 16.00: 5. umferð. Kappskák, 90 mín + 30 sek/leik.
Sunnudagur 27. maí kl. 13:00: 6. umferð. Kappskák, 90 mín + 30 sek/leik.
Mánudagur 28. maí kl. 10.00: 7. umferð. Kappskák, 90 mín + 30 sek/leik.

Mánudagur 28. maí kl. 14.30: Hraðskákmót Norðlendinga.

Mótið verður reiknað til íslenskra skákstiga og til FIDE-skákstiga.

Keppni í kvennaflokki fer fram laugardaginn 26. maí og hefst kl. 10.00. Þetta að því tilskildu að næg þátttaka fáist. Lágmark er 6 keppendur svo mótið fari fram. Tefldar verða atskákir, 5-7. umferðir.  

Þátttökugjald:   kr. 4000 fyrir 17 ára og eldri, kr. 2000 fyrir 16 ára og yngri.  Þátttaka í hraðskákmótinu er innifalin. Þeir sem einungis tefla í hraðskákmótinu greiða kr. 500 fyrir þátttökuna.  Þátttökugjald í kvennaflokki kr. 1000.

Verðlaun: Verðlaunafé verður að lágmarki kr. 150.000, þar af kr. 40.000 í fyrstu verðlaun. 

Öllum er heimil þátttaka á mótinu, en aðeins þátttakendur með lögheimili á Norðurlandi geta unnið þá meistaratitla sem teflt verður um, þ.e. Skákmeistari Norðlendinga, (í meistaraflokki, kvennaflokki og unglingaflokki) og Hraðskákmeistari Norðlendinga.  

Skráning:  í netfangið [e-mail] og er skráningarfrestur til miðnættis 24. maí. Þeir sem mæta til leiks eftir að skráningarfrestur er liðinn geta ekki verið vissir um að fá sæti á mótinu. 

Bobby Fischer kemur heim - útgáfuhóf í Iðnó í hádeginu

 

Helgi Ólafsson stórmeistari í skák og náinn vinur Bobby Fischer heimsmeistara í skák hefur sent frá sér bók um kynni sín af bandaríska snillingnum sem varð íslenskur ríkisborgari og dó í Reykjavík fyrir fjórum árum. Útgáfu bókar Helga verður fagnað í Iðnó í dag, föstudag, milli klukkan 12 og 13.

Bobby Fischer comes home - The Final Years in Iceland, a Saga of Friendship and Lost Illusions er heiti bókarinnar sem hollenska útgáfufyrirtækið New in Chess hefur gefið út eftir Helga Ólafsson. Bókin fjallar um síðustu ár Bobby Fischers á Íslandi en hann lést í ársbyrjun 2008.

Helgi Ólafsson, sem sex sinnum hampaði Íslandsmeistaratitlinum í skák, tók virkan þátt í baráttunni fyrir lausn Fischers úr japönsku fangelsi og kynntist heimsmeistaranum vel eftir að Fischer kom til Reykjavíkur sem íslenskur ríkisborgari í mars 2005.

Helgi fjallar ennfremur um feril Fischers á árunum kringum 1970 og leitast við að fanga stemmningu ,,einvígis aldarinnar" sem fram fór í Laugardalshöll sumarið 1972 og vakti heimsathygli en þar lagði Fischer Boris Spasskí að velli, varð heimsmeistari og rauf þar áratuga einokun Sovétmanna á skáksviðinu. Ýmsar kunnar persónur koma við sögu í bók Helga, og atburðir Íslandssögunnar, t.a.m.eldgosið í Vestmannaeyjum 1973, fléttast inn i frásögnina. Eftir standa nokkrar áleitnar spurningar um líf þessa sérstæða manns sem afsalaði sér bandarísku ríkisfangi og dó íslenskur ríkisborgari.

Skáksamband Íslands og Skákakademía Reykjavíkur standa í sameiningu að útgáfuhófinu í Iðnó. Gunnar Björnsson forseti SÍ stjórnar þinginu en setningarávarp flytur Guðni Ágústsson fv. ráðherra, sem m.a. hefur beitt sér fyrir því að skáksetur verði sett á laggirnar til að minnast einvígis aldarinnar á Íslandi. Helgi Ólafsson mun segja frá tilurð bókarinnar og kynnum sínum af Bobby Fischer, sem að margra áliti er sterkasti skákmaður allra tíma.

 

Boðið verður uppá ljúffenga súpu og brauð fyrir 1400 krónur. Gestir eru hvattir til að mæta tímanlega.

Köben: Hannes með 2,5 vinning eftir 3 umferðir

Hannes Hlífar Stefánsson (2516) hefur 2,5 vinning eftir 3 umferðir á alþjóðlegu móti í Kaupmannahöfn og er í 3.-11. sæti.  Í 2. umferð vann hann danska FIDE-meistarann Jacob Carstensen (2305) en í 3. umferð gerði hann jafntefli við danska alþjóðlega meistarann Jens Ove Fries-Nielsen (2363).  

Henrik Danielsen (2498) vann Danann Jacob Sylvan (2310) í 2. umferð en í 3. umferð tapaði hann fyrir færeyska alþjóðlega meistaranum Helga Dam Ziska (2450).  

Kjartan Maack (2133), Atli Jóhann Leósson (1715) hafa 1 vinning en Óskar Long Einarsson (1591) er enn ekki komin á blað.

Danski alþjóðlegi meistarinn Nicolai Vesterbaek Pedersen (2465) og Helgi Dam eru efstir með fullt hús.

Fjórða umferð hefst kl. 8 í fyrramálið og rétt er að vekja athygli á því allar skákir mótsins má horfa á í beinni útsendingu!

66 skákmenn taka þátt og þar af eru 6 stórmeistarar.  Hannes og Henrik eru nr. 3 og 4 í stigaröð keppenda.   Mótið er 9 umferðir en er aðeins teflt á 5 dögum.  Tefldar eru 2 skákir alla daga nema fyrsta daginn.  Skákirnar hefjast kl. 8 og 13 á íslenskum tíma.

• Heimasíða mótsins
• Chess-Results
• Beinar útsendingar (borð 1-15)
  

 

Öðlingamót: Pörun lokaumferðar

Eggert Ísólfsson (1891) vann Bjarna Hjartarson (2038) í frestaðri skák úr sjöttu og næstsíðustu umferð öðlingamóts TR sem fram fór í kvöld.  Eggert er annar einum vinningi á eftir Þorvarði F. Ólafssyni.  Lokaumferðin fer fram á miðvikudagskvöld og þá mætast Eggert og Þorvarður.

Stöðu mótsins má finna hér.

Röðun lokaumferðirnar má finna hér.

• Heimasíða mótsins 
• Chess-Results

 

Verkísmótið í skák fer fram á miðvikudag

Ágæti skákunnandi!

Skákdeild Fjölnis býður til spennandi Firmamóts í skák, í Tjarnarsal Ráðhússins miðvikudaginn 9. maí kl: 16-19.

Þegar hafa skráð sig sjö lið og nokkur önnur eru heit og undirbúa þátttöku. 

• Síminn
• Eimskip
• Morgunblaðið
• Fjölnir
• Icelandic Excursions 
• Verkís

Þau eru öll skipuð „venjulegum" skákmönnum og starfsmönnum fyrirtækjanna. Enn sem komið er hafa sterkustu skákmenn landsins ekki verið meðal liðsmanna. Sum lið eru nálægt stigaþakinu, en önnur tefla eingöngu fram eigin starfsmönnum og eru ekki að spá í stigaþök, heldur langar þeim að vera með og hafa gaman af. Þáttökugjald er 50 þúsund krónur, en heildarverðlaun mótsins eru varlega áætluð að verðmæti yfir 750 þúsund krónur, sem að gerir mótið eitt það allra veglegasta sem að haldið er hér á landi.

Verkís er aðalstyrktaraðili mótsins. Verkís fangar 80 ára afmæli í ár, en verkfræðistofan rekur uppruna sinn til ársins 1932 og er því elsta verkfræðistofa landsins.

Við hvetjum þig til að hafa frumkvæði í málinu og vekja athygli á keppninni innan þíns fyrirtækis eða félags og gjarnan hafa samband við okkur þ.a. við getum unnið saman að því að sannfæra fyrirtækið þitt til að senda lið!

Helgi Árnason, formaður skákdeildar Fjölnis, gsm 664-8320
Héðinn Steingrímsson, stórmeistari og Íslandsmeistari í skák 

Þátttökutilkynning og fyrirspurnir: [e-mail]

Nánari upplýsingar:  http://www.firmakeppnin.blog.is/

Facebook: http://www.facebook.com/profile.php?id=100003387882089

Mbl-sjónvarp: Áhugi á einvígi aldarinnar vex

Mbl.is fjallaði fyrr í dag um sölu á munum úr Einvígi aldarinnar.  Viðtal er haft við Guðmund G. Þórarinsson, fyrrverandi forseta SÍ.

Viðtalið í heild sinni

 

Bylgjan: Í Bítið - Hefur skákáhugi Íslendinga minnkað? Umfjöllun um Firmakeppni Verkís

Í bítinu í Bylgjunni í morgun var skákumfjöllun.  Þar var viðtal við Héðin Steingrímsson stórmeistara í skák.   Fjallað er ítarlega um Firma- og félagakeppni Fjölnis, sem fram fer í Ráðhúsi Reykjavíkur, miðvikudaginn, 9. maí.  

Umfjöllun Bylgjunnar

 

Keppendalisti Landsmótsins í skólaskák

Þá er keppendalisti landsmótsins í skólaskák 2012, sem hefst í Stórutjarnaskóla í Þingeyjarsveit á morgun kl. 16:00 klár.  Hann lítur svona út.

Eldri flokkur:

Dagur Ragnarsson             RVK
Oliver Aron Jóhannesson   RVK
Jón Trausti Harðarson        RVK
Hrund Hauksdóttir             RVK  (kom inn auka)
Dagur Kjartansson            RVK (kom inn auka)
Birkir Karl Sigurðsson         Reykjanes
Andri Freyr Björgvinsson    Norðurland-Ey
Snorri Hallgrímsson           Norðurland-Ey
Hlynur Snær Viðarsson      Norðurland-Ey
Gísli Geir Gíslason              Norðurland-Ve
Mikael Máni                        Austurland
Emil Sigurðsson                  Suðurland

Yngri flokkur:

Nansý Davíðsdóttir              RVK
Hilmir Hrafnsson                  RVK
Gauti Páll Jónsson               RVK
Kristófer Jóel Jóhannesson RVK (kom inn auka)
Hilmir Freyr Heimisson         Reykjanes (kom inn auka)
Vignir Vatnar Stefánsson     Reykjanes
Jón Kristinn Þorgeirsson      Norðurland-Ey
Símon Þórhallsson               Norðurland -Ey
Tinna Ósk Rúnarsdóttir        Norðurland-Ey
Halldór Broddi Þorsteinsson Norðurland-Ve
Wiktor Tómasson                 Austurland
Haraldur Halldórsson           Suðurland

Engir keppendur koma af Vesturlandi né af Vestfjörðum í þetta skiptið. Kristófer, Hilmir Freyr, Hrund og Dagur koma inn í mótið í þeirra stað.

• Heimasíða Goðans
• Chess-Results (eldri flokkur)
• Chess-Results (yngri flokkur)