Eitt lítið skákmót fer fram í dag

Verkís mótið hefst kl: 16 í dag í Tjarnarsal Ráðhússins.

Á vefsíðunni:
http://chess-results.com/tnr72440.aspx?art=32&lan=1&turdet=YES
Er hægt að fylgjast með skráningu í Fjölnismótinu. Við hvetjum sem flesta að mæta í Ráðhúsið, en einnig verður hægt að fylgjast með genginu í mótinu í beinni á þessari síðu.

Lið eru hvött til að senda inn loka liðskipan fyrir kl: 12 í dag. Loka liðsskipan þarf að hafa borist mótinu í síðasta lagi kl: 15:30. Þá rennur einnig út skráningarfrestur. Við beinum þó þeim tilmælum til liða að skrá sig sem allra fyrst þ.a. hægt sé að slá liðsmenn inn í tölvuna.

Athygli er vakin á því að fyrirtæki sem að vill senda tvenn lið í keppnina greiðir einungis 30 þús. kr. fyrir seinna liðið.

Lið eru hvött til að mæta tímanlega í Ráðhúsið, helst kl. 15:45.
Tefldar verða sjö umferðir með tíu mínútna umhugsunartíma. Fríar veitingar eru í boði og verður gert hlé á taflmennsku eftir fjórar umferðir.

Notast er við Swiss Manager forritið til að ákveða pörun og einnig sjálfvirkt aðalverðlaunin bæði í liða- sem og einstaklingskeppni.

Fyrir fyrstu umferðina mun forritið ákveða töfluröðina með slembi-aðferð.
Verðlaun (sjá nánar http://firmakeppnin.blog.is/blog/firmakeppnin/entry/1237817/?preview=1):

a) Liðsverðlaun - verða eftir vinningafjölda og ef lið verða jöfn að vinningum þá gilda hin svokölluðu liðsstig (e. match points), en lið fær tvö slík fyrir sigur í viðureign og eitt fyrir jafntefli. Ef enn er jafnt þá gilda innbyrðis viðueignir.
b) Einstaklingsverðlaun - eru miðuð við árangur (e. performance) samkvæmt íslenskum stigum, með austurísku afbrigði til að koma í veg fyrir óeðlilega 100% árangurs útkomu.

Treyst verður á mannlegt innsæi við að ákveða önnur verðlaun, sérstaklega liðsbúningsverðlaunin.

Athygli er vakin á því að hver keppandi getur einungis hlotið ein verðlaun. Ef að 1. verðlaun í bæði mótinu og einstaklingskeppni vinnast, þá þarf að velja á milli GSM símans og flugsins. Flugið fer þá í 2. verðlaun í einstaklingskeppninni. Útfærist nánar á skákstað.

Athygli er vakin á því að verðlaunum kann að fjölga og eða þau verða enn veglegri.

Sjáumst í Ráðhúsinu í dag tímanlega ef hægt er kl: 15:45!

 

Haraldur Axel efstur í Ásgarði

Tuttugu og þrír eldri skákmenn mættu til leiks í gær hjá Ásum í Ásgarði. Haraldur Axel Sveinbjörnsson varð efstur með 8 vinninga af 9 mögulegum og styrkti mjög stöðu sína sem næsti Vetrarhrókur.   Í öðru sæti varð Þór Valtýsson með 7.5 vinninga. Þriðja sæti náði Kristján Guðmundsson með 6.5 vinninga.

Áður en byrjað var að tefla í gær þá minntist  Einar S Einarsson Hauks Angantýssonar sem horfinn er af skákborði lífsins  fyrir aldur fram  eins og Einar komst að orði Haukur byrjaði að tefla í Ásgarði í október í haust og mætti á flesta skákdaga þar til í byrjun mars. Á þessu tímabili varð hann fimm sinnum í efsta sæti, vann meðal annars Jólahraðskákmótið, skákmenn minntust Hauks með þögn og bjöllu hljómi áður en þeir byrjuðu að tefla.

Nánari úrslit:

• 1        Haraldur Axel                         8
• 2        Þór Valtýsson                         7.5
• 3        Kristján Guðmundsson           6.5
• 4-5    Kári Sólmundarson                 6
•           Þorsteinn Guðlaugsson           6
• 6        Ari Stefánsson                         5.5
• 7-10  Birgir Sigurðsson                    5
•           Leifur Eiríksson                       5
•           Viðar Arthúrsson                    5
•           Eiður Á Gunnarsson               5
• 11-14 Jónas Ástráðsson                     4.5
•           Jón Víglundsson                      4.5
•           Magnús V Pétursson               4.5
•           Einar S Einarsson                             4.5

Næstu níu skákmenn urðu að sætta sig við aðeins færri vinninga í þetta skipti.

Elsa María sigraði enn og aftur á hraðkvöldi Hellis

Elsa María Kristínardóttir sigraði á hraðkvöldi Hellis sem fram fór 7. maí sl. Elsa María fékk 6v í 7 skákum og bar það helst til tíðinda að hún tapaði skák í fyrsta skipti í marga mánuði á þessum hraðkvöldum. Það var Sverrir Sigurðarson sem náði að leggja Elsu að velli í fjörugri skák. Annar á hraðkvöldinu var Vigfús Ó. Vigfússon með 5,5v og jafnir í 3. og 4.sæti með 5v voru Sverrir Sigurðarson og Gunnar Nikulásson. 

Lokastaðan: 

Röð   Nafn                       Vinn.    M-Buch. Buch. Progr.

  1   Elsa María Kristínardóttir, 6        22.0  30.0   25.0
  2   Vigfús Ó. Vigfússon,        5.5      19.0  27.5   21.0
 3-4  Sverrir Sigurðarson,        5        21.0  29.5   20.0
      Gunnar Nikulásson,          5        20.0  27.5   21.0
  5   Jón Úlfljótsson,            4.5      19.5  26.0   20.0
 6-7  Jakob Alexander Petersen,   4        22.0  31.0   18.0
      Bárður Örn Birkisson,       4        17.0  23.5   12.0
 8-9  Björn Hólm Birkisson,       3.5      16.0  22.5   14.5
      Óskar Víkingur Davíðsson,   3.5      16.0  21.5   12.5
10-13 Kristófer Ómarsson,         3        19.5  25.5   15.0
      Guðmundur Agnar Bragason,   3        18.0  25.5   12.0
      Alec Elías Sigurðarson,     3        17.0  23.5   11.0
      Pétur Jóhannesson,          3        15.0  21.0    7.0
 14   Bragi Thoroddsen,           2        14.5  20.0    8.0
 15   Sindri Snær Kristófersson,  1        15.5  21.5    7.0

 Næsta hraðkvöld verður haldið mánudaginn 14. maí nk.

Búdapest: Dagur með jafntefli í 3. umferð

Dagur Arngrímsson (2381) er í mikum jafnteflisgír á First Saturday-mótinu í Búdapest.  Í 3. umferð, sem fram fór í gær, gerði hann jafntefli við austurríska alþjóðlega meistarann Walther Wittman (2276).  Dagur hefur gert jafntefli í öllum sínum skákum.

Í 4. umferð, sem fram fer í dag, teflir Dagur við ungverska FIDE-meistarann Bagi Mate (2335).

12 skákmenn tefla í SM-flokki og eru meðalstigin 2393 skákstig.  Til að fá stórmeistaraáfanga þarf 8,5 vinning.

• First Saturday-mótið
• Chess-Results

Haukur Angantýsson 1948-2012: Skákmenn og félagar minnast meistarans með hlýhug og virðingu

Haukur Angantýsson, alþjóðlegur meistari í skák og Íslandsmeistari 1976, andaðist á lungnadeild Landspítalans í Fossvogi 4. maí síðastliðinn 63 ára að aldri. Skákmenn minnast Hauks með hlýhug og virðingu, enda setti hann sterkan svip á íslenskt skáklíf í áratugi, þótt hann þyrfti löngum að glíma við erfið veikindi.

Haukur fæddist á Flateyri við Önundarfjörð 2. desember 1948. Foreldrar hans voru Angantýr Guðmundsson skipstjóri, f. 1. júlí 1916, d. 21. maí 1964, og Arína Þórlaug Íbsensdóttir ritari, f. 11. september 1923, d. 14. október 1994. Systkini Hauks eru Íbsen, Bára, Auður, Ólafur Óskar og Guðrún. Uppeldissystirin Soffía Jóna Vatnsdal Jónsdóttir er látin.Að loknu stúdentsprófi frá Menntaskólanum í Reykjavík 1968 fór Haukur til Þýskalands og lauk námi í efnafræði frá Georg August Universität í Göttingen 1973. Síðan tók hann skipstjórnarpróf frá Stýrimannaskólanum í Reykjavík 1975.

Haukur vann ýmis störf um ævina, m.a. stundaði hann rannsóknarstörf á sviði efnafræði, kennslu, sjómennsku, bæði innanlands og erlendis, og við netagerð.

Hann tók fyrst þátt í Íslandsmótinu í skák árið 1965 og alls tefldi hann 14 sinnum á Skákþingi Íslands, iðulega með afbragðs góðum árangri. Þá tefldi hann með íslenska landsliðinu á Ólympíumótinu í Siegen 1970.

Blómatími hans var á áttunda áratugnum. Hann varð efstur á Íslandsmótinu 1975 ásamt þremur öðrum, en tók ekki þátt í aukakeppni um titilinn. Árið eftir var stóra stundin runnin upp, þegar Haukur sigraði á Íslandsmótinu með 9 vinningum af 11. Næstir urðu Helgi Ólafsson, Ingvar Ásmundsson og Margeir Pétursson.

Tveimur árum síðar, 1978, varð Haukur efstur á Íslandsmótinu ásamt Helga Ólafssyni. Þeir hlutu 8 vinninga af 11, en meðal annarra keppenda voru Margeir Pétursson, Jón L. Árnason og Jóhann Hjartarson. Haukur og Helgi háðu úrslitaeinvígi um titilinn, þar hafði Helgi betur og hampaði Íslandsmeistaratitlinum í fyrsta sinn. Helgi minnist Hauks sem keppnismanns, sem gat lagt hvern sem er að velli:

,,Haukur Angantýsson var margbrotinn persónuleiki og á þeim árum þegar ég umgekkst hann hvað mest, 1974 til 1978, bar ég alltaf mikla virðingu fyrir honum enda var þar á ferðinni einstaklingur sem virtust allir vegir færir. Hann var ásamt Guðmundi Sigurjónssyni fremstur i flokki kynslóðar skákmanna sem lét til sín taka á skáksviðinu sjöunda ártug síðustu aldar. Í þessum hópi voru menn á borð við Braga Kristjánsson, Jón Hálfdanarson, Trausta Björnsson og Björgvin Víglundsson. Hann var harður í horn að taka við skákborðið og mikill keppnismaður sem gat unnið hvern sem var."

Árið 1978 varð Haukur skákmeistari Reykjavíkur og náði góðum árangri í Lone Pine í Bandaríkjunum og Rilton Cup í Stokkhólmi um áramótin 1978/79. Árið 1979 fagnaði hann glæsilegasta sigri sínum, á World Open í Philadelphiu. Hann varð efstur með 8 vinninga af 10, ásamt sex stórmeisturum – Miles, Browne, Gheorghiu, Bisguier, Zuckerman og Fedorowicz. Haukur var efstur á stigum og var úrskurðaður sigurvegari á þessu fornfræga og merkilega móti. Hann var útnefndur alþjóðlegur meistari 1981.

Jóhann Hjartarson, stigahæsti skákmaður íslenskrar skáksögu, segir að Haukur hafi verið gæddur afburða hæfileikum:

,,Haukur var í flokki þeirra yngri skákmanna sem létu að sér kveða í kjölfar einvígis aldarinnar 1972. Hann komst í hóp bestu skákmanna landsins í lok 8. áratugarins og vann á þeim tíma frækna sigra, innan lands sem utan. Eflaust hefði stórmeistaratitill og frekari frami á alþjólegum vettvangi verið innan seilingar ef ekki hefðu komið til erfið veikindi sem urðu til að enda keppnisferil Hauks fyrr en skyldi. Haukur var öflugur andstæðingur og bæði skemmtilegt og lærdómsríkt var að takast á við hann á hvítum reitum og svörtum."

Sævar Bjarnason, alþjóðameistari, var frændi og vinur Hauks. Þeir mættust í lokaumerðinni á Íslandsmóti skákfélaga á Selfossi í mars, og það var síðasta kappskákin sem Haukur tefldi. Sævar segir að Haukur hafi ekki bara verið frændi og vinur, heldur líka lærimeistari:

,,Haukur var náfrændi minn, móðurafi minn og faðir hans voru bræður.Þegar Haukur var í efnafræðinámi tókst með okkur mikil vinátta. Við urðum nánast eins og bræður um margra ára skeið. Þegar Haukar var að veikjast kynntist ég sjúkdómssögu hans mjög náið og tók mjög nærri mér. Eftir að veikindi hans tóku yfir minnkuðu samskipti okkar mikið. Haukur kenndi mér í raun að tefla og við fórum saman í margar keppnisferðir erlendis. Ég var viðstaddur þegar hann vann sína stærstu sigra í skákinni. Haukur tefldi lítið í nokkra áratugi en snéri þó aftur að taflmennsku með samtökunum Vin. Hann undi sér vel með þessum ágætu samtökum og vil ég þakka Vin fyrir sitt baráttustarf."

Arnar Valgeirsson forseti Skákfélags Vinjar segir að það hafi verið mikill heiður fyrir litla skákfélagið við Hverfisgötu að fá Hauk Angantýsson í liðið:

,,Það var með mikilli gleði sem félagar í Skákfélagi Vinjar tóku á móti Hauki, sem eftir langt hlé vildi æfa sig og rifja upp gamla takta. Hann var auðvitað umsvifalaust signeraður í skákfélagið okkar og leiddi liðið á Íslandsmótinu í vetur, fyrst í Rimaskóla, svo á Selfossi. Haukur sýndi það og sannaði að lengi lifir í gömlum glæðum og átti margar snilldarskákirnar fyrir liðið. Úthaldið var kannski ekki einsog áður, og þegar líða tók á mótið sáust þreytumerki, en viljinn var svo sannarlega til staðar og ekki var hlustað á jafnteflisboð. Það var ótrúlegur heiður að hafa þennan mikla karakter í broddi fylkingar, og við yljum okkur við tilhugsunina um að endurkoma meistarans veitti honum einnig mikið. Hann var fastagestur á mánudagsæfingum okkar í vetur. Við í Skákfélagi Vinjar kveðjum Hauk Angantýsson með mikilli virðingu og þakklæti."

Haukur var meðal keppenda á Vin Open, í tengslum við N1 Reykjavíkurskákmótið í mars, og við upphaf mótsins tefldi hann hraðskák við Ivan Sokolov. Hinn mikli meistari frá Bosníu, sem fyrst kom í heimsókn í Vin sumarið 2003, mátti hafa sig allan við í hörkuskák. Jafntefli var ekki á dagskránni hjá Hauki frekar en fyrri daginn!

Haukur Angantýsson verður jarðsunginn frá Guðríðarkirkju í Grafarholti nk. föstudag klukkan 15.

Atskákeinvígi á RÚV: Hjörvar og Guðmundur tefla á sunnudag

Úrslitaeinvígi Hjörvar Steins Grétarssonar og Guðmundar Gíslasonar fer fram á sunnudag á íslandsmótinu í atskák.  Tefla þeir í beinni útsendingu á RÚV og hefst útsendingin kl. 14:45.  Tefldar verða 2 atskákir og verði jafnt tefla þeir bráðabanaskák (armageddon).

Útsendingin verður í umsjón Helga Ólafssonar og Björns Þorfinnssonar.  

Lokamót Skákakademíu Kópavogs næsta föstudag

Vörönn Skákakademíu Kópavogs og Skákskóla Íslands sem staðið hefur yfir í Stúkunni á Kópavogsvelli lýkur með móti næsta föstudag þann 11. maí.   Mótið hefst kl. 14.30 og eru væntalegir þátttakendur beðnir um að mæta tímalega  Glæsileg verðlaun verða í boði. Allir þeir sem tekið hafa þátt í skakæfingum í Kópvogi þetta vormisseri hafa þátttökurétt.
 
Skákkennarar í Kópavogi eru hvattir til að beina því til nemenda að mæta í Stúkuna á föstudaginn.   
 
Helgi Ólafsson stórmeistari og skólastjóri Skákskóla Íslands hefur haft umsjón með namskeiðahaldinu í Stúkunni á Kópavogsvelli síðustu misseri enda er um að ræða samstarfsverkefni Skákakademíu Kópavogs og Skákskóla Íslands.
 
Ungir skákmenn úr Kópavogi hafa vakið mikla athygli undanfarið fyrir góða frammistöðu sem má ekki síst þakka góðum skákkennurum á borð við Smára Rafn Teitsson, Tómas Rasmus, Gunnar Finnsson, Sigurlaugu Friðþjófsdóttur og Lenku Ptacnikovu sem allir hafa kennt í hinum ýmsu grunnskólum Kópavogs.    

Verkísmótið - umfjöllun um öll skráð lið - hver vinnur hvaða verðlaun?

Það stefnir í góða þátttöku og æsispennandi keppni í Ráðhúsinu kl: 16 á morgun miðvikudag.

Barist er um óvenju vegleg verðlaun, sennilega næst bestu verðlaun í skákmóti hér á landi á eftir Reykjavíkurskákmótinu, m.a. flug báðar leiðir með öllum sköttum og gjöldum með Iceland Express, 100 þús. kr. GSM síma og út að borða á fínustu veitingastöðum bæjarins og ótal margt fleira. Verðlaunin spanna mikla breidd, en m.a. eru veitt verðlaun fyrir bestu frammistöðu liða miðað við styrkleika, bestu frammistöðu einstaklings, besta liðstjórann, óvæntustu úrslitin o.fl.

Hér á eftir verður farið stuttlega yfir liðin sem að þegar hafa tilkynnt þátttöku.

• 1. Eimskip - Lið Eimskipa er skipað tveimur starfsmönnum og svo starfsmanni eða einum lánsmanni sem að tengdur er fyrirtækinu. Jóhann Helgi Sigurðsson (1.993) forstöðumaður framleiðslustýringar leiðir lið Eimskipa. Ingvar Örn Birgisson (1.767) bílstjóri teflir á öðru borði. Ekki hefur fengist endanlega staðfest hver teflir á þriðja borði, en fréttir herma að Eimskip sé ekki með hugann við að komast sem næst stigaþakinu, heldur hafa starfsmenn og fólk sem að tengt er fyrirtækinu í liðinu.
• 2. Síminn - Lið Símans skipa Kristján Halldórsson deildarstjóri (1.795), Vignir Bjarnason fjarskiptaverkfræðingur (1.823), Brynjólfur Bragason (stigalaus) deildarstjóri Internetþjónustu og Sigþór Björgvinsson (stigalaus). Sveit Símans er eingöngu skipuð starfsmönnum. Hún er samtals með 4.618 stig og því nokkuð frá 5.500 stiga þakinu. Að sögn Símamanna er ætlunin að hafa gaman af taflmennsku í mótinu.
• 3. Hafgæði sf. - Landsliðsmaðurinn Hjörvar Stein Grétarsson (2.417) leiðir lið Hafgæða sf. Hjörvar er 60 stigum hærri á alþjóðlega stigalistanum en þeim íslenska. Patrekur Maron Magnússon (1.950) félagi Hjörvars úr Versló teflir á öðru borði. Ólafur Þór Ólafsson (stigalaus) teflir á þriðja borði. Ólafur er starfsmaður Hafgæða sf., en Hjörvar og Patrekur eru svokallaðir lánsmenn. Ólafur hefur teflt á netinu, en er að tefla í sínu fyrsta opinbera skákmóti. Það verður spennandi að fylgjast með þessari sveit.
• 4. Morgunblaðið - teflir eingöngu fram starfsmönnum. Sveitina skipta þeir Jóni Árna Jónsson (2.051), Baldur A. Kristinsson (2.047), Pétur Blöndal (1.270) og Ómar Óskarsson (stigalaus). Sveitin er samtals með 5368 stig og því nær stigaþakinu en sveit Símans.

Jón Árni er íslenskugúru að norðan og teflir með Mátum.

Baldur var mjög virkur skákmaður áður fyrr, en hefur látið sér nægja að tefla á Íslandsmóti Skákfélaga í seinni tið. Baldur hefur reynst skákmönnum betur en margur veit, en hann sér um tæknimálin á blog.is vefjunum, þar með talið fréttavef Skáksambandsins, sem að er á Moggablogginu.

Pétur þekkja skákáhugamenn vel, enda er hann duglegur að skrifa um skák. Hann hefur aðeins einu sinni tekið þátt í opinberu skákmóti.

Ómar er stigalaus og er eftir því sem næst verður komist að tefla á sínu fyrsta skákmóti, en Ómar hefur tekið ófáar ljósmyndir af skákmeisturum.

• 5. Íslandsbanki - Íslandsbanki teflir eingöngu fram starfsmönnum. Lið Íslandsbanka skipa þeir Guðmundur Magnús Daðason(1.974), en hann er jafnframt liðsstjóri, Gunnar Gunnarsson(1.780), Björn Hákonarson (stigalaus) og Jón Sigurður Þórðarson(stigalaus). Guðmundur er ákaflega slyngur liðsstjóri, en hann hefur stýrt sveit Bolvíkinga til sigurs á Íslandsmóti Skákfélaga þrjú síðustu árin.

1. Hugsmiðjan - Sveit Hugsmiðjunnar er eingöngu skipuð starfsmönnum. Enginn þeirra er í hópi svokallaðra stigamanna. Lið Hugsmiðjunnar skipa þeir Margeir Steinar Ingólfsson ráðgjafi, en hann er jafnframt liðsstjóri, Steinn Arnar Jónsson þróunarstjóri hugbúnaðargerðar og Jón Frímannsson. Það er ánægjulegt að sjá sveit Hugsmiðjunnar í mótinu.

• 7. Verkís - Verkís er með sveit.
• 8. Rimaskóli - Rimaskóli er með sveit í mótinu.
• 9. RARIK - RARIK er með sveit í mótinu. Ekki er endanlega komið á hreint hvernig hún er skipuð.
• 10. SS - SS er einnig með sveit, sem að enn er verið að vinna í að skipa.
• 11. Fjölnir - Fjölnir verður með lið í mótinu skipað ungum skákmönnum.
• 12. Íslandsbanki er að safna saman í lið nr. 2 sem að yrði eingöngu skipað stigalausum, ekki 100% staðfest.
• 13. Reykjavíkurborg - verið að vinna að því að senda inn lið, en ekki enn 100% staðfest.
• 14. Þitt lið?

Hver vinnur verðlaunin, sjá http://www.firmakeppnin.blog.is/blog/firmakeppnin/entry/1237817/ ?

Stigaþakið gerir keppnina um aðalverðlaun mótsins óvenju spennandi. Erfitt er að segja fyrir um hvaða tvö lið fara heim með flug til Evrópu fram og til baka með öllum gjöldum inniföldum með Iceland Express.

Einstaklingsverðlaun, þessi verðlaun eru mjög vegleg og setja mótið ekki langt frá Landsbankahraðskákmótinu. Segja má að það sé mót í mótinu.

Hér lítur út fyrir að landsliðs- og Hafgæða maðurinn Hjörvar Steinn Grétarsson muni nánast geta labbað strax út með 100 þús. kr. GSM síma. Önnur verðlaun í þessum flokki eru einnig mjög vegleg og ómöglegt að segja hver hlýtur þau. Þá eru hin þrjú verðlaunin einnig vegleg og mjög spennandi að sjá hverjir hljóta þau. Héðinn er innan raða Fjölnis. Það ber að taka fram að ef að hann verður með í mótinu, þá mun hann og sveitin sem að hann teflir með ekki geta unnið nein verðlaun.

Sama gildir um óvæntustu úrslit mótsins.

Öll liðin eiga möguleika á að vinna til verðlauna fyrir liði sem að kemur mest á óvart m.v. fyrirfram styrkleika. Stigalaus lið hljóta að hafa sterka stöðu hér.

Snjallasti liðsstjórinn, hér hlýtur Íslandsbankamaðurinn Guðmundur Daðason að vera heitur kandidat, enda hokinn reynslu eftir að hafa stýrt liði Bolvíkinga til sigurs þrjú ár í röð á Íslandsmóti Skákfélaga. Það getur þó allt gerst.

Flottasti liðsbúningurinn, hér láta mótshaldarar koma sér á óvart.

 

Skákvakan í Skorradal 2012

SkákvökuMaraþon fór fram að Óðali EinarsEsss  í Skorradal dagana 4.-5. maí og var þetta í 8 sinn sem slík hátíð er þar haldin.  Að þessu sinni voru þátttakendur 6 talsins auk húsráðanda. Matarveisla og ljúfeng drykkjarföng voru með í farangrinum svo enginn þyrfti að líða skort, hvorki þurran né blautan,   á meðan á martröðinni stóð.  Keppt var meistaratitil Skorra þræls Skallgríms,  flottan farandgrip og jafnframt um áletrun Grænlandssteininn gullnu letri.

Kappteflið hófst kl. 17 á föstudag eftir að allir keppendur voru búnir að gíra sig upp og í brók fyrir slaginn.  Því lauk svo ekki  fyrr en klukkan sex árdegis eftir að birta tók  og  morgunroði sólar var farinn að lita Mófellsfjall og Kerlingarhornið handan vatnsins.

Þá höfðu verið tefldar 28 umferðir á  mann x7 eða alls  196 skákir í striklotu, svokallaðar 10 mín. hvatskákir, þar sem vart má á milli sjá hver sé einna snjallastur eða fari með sigur af hólmi, fyrr en í nauðir rekur, svefnhöfgi eða tímahrak lætur að sér kveða, svo alvarlega menn verða að gefa skákina.   

Að lokum kom þó að því að ótvíræð og skýr úrslit fengust, byggð á samanlögðum vinningafjölda eftir 13 klukkustunda harða baráttu og æsilega taflmennsku og  voru þau á þennan veg:

HellisheiðarSeníið (Stefán Þormar Guðmundsson) 23 v  
Viðeyjarundrið (Guðfinnur R. Kjartansson) 21.5 v
RauðagerðisGoðsögnin ( Guðm. G. Þórarinsson)   20 v
Fléttumeistarinn ( Páll G. Jónsson)  15 v.
VonarstjarnaVandamanna (Kristján Stefánsson) 13 v.
BjartastaVonin (Kristinn Bjarnason) 11.5. v.
ErkiRiddarinn ( Einar S. Einarsson) 8 v.

Stefán Þormar var síðan krýndur Skorradalsmeistari við hátíðlega athöfn við FischersSæti, mosavaxinn stein í brekkunni ofan við bústaðinn þar sem meistarinn tyllti sér niður hér um árið til að kasta mæðinni.  Guðfinnur vann hins vegar kappteflið um Grænlandsteininn í fimmta sinn af sex sem um hann hefur verið keppt, en einungis Grænlandsfarar geta unnið hann og þar með til eignar.    

Myndaalbúm (ESE)

Bragi og Ingvar með jafntefli í lokaumferðinni

Bragi Þorfinnsson (2421) og Ingvar Þór Jóhannesson (2331) gerðu báðir jafntefli í lokaumferð bresku deildakeppninnar sem fram fór í dag.  Bragi, sem tefldi á fyrsta borði fyrir Jukes of Kent, gerði jafntefli við alseríska stórmeistarann Aimen Rizouk (2532) og Ingvar gerði jafntefli við enska skákmanninn Alexander Longson (2272).  Sveit Braga og Ingvars vann lokaumferðina 4,5-3,5 og hefur tryggt sér keppnisrétt í EM taflfélaga.

• Breska deildakeppnin
• Beinar útsendingar