Hraðskákmót öðlinga fer fram í kvöld

Hraðskákmót öðlinga fer fram miðvikudaginn 16. maí kl. 19.30 í félagsheimili T.R. að Faxafeni 12.

Mótið er opið fyrir alla 40 ára og eldri (f. 1972 og síðar).

Tefldar verða 7 umferðir með 7 mín. umhugsunartíma.

Í lok mótsins fer fram verðlaunaafhending fyrir Hraðskákmótið sem og Skákmót öðlinga sem lauk s.l. miðvikudagskvöld.

Þátttökugjald er kr. 500 og er í því innifalið kaffi og góðgæti.

Skákmenn 40+ eru hvattir til að fjölmenna!

Bobby Comes Home - vinsælasta bókin hjá New in Chess

Bókin Bobby Comes Home, eftir Helga Ólafsson, er vinsælasta bókin hjá New in Chess eins og sjá má á heimasíðu New in Chess.  Bókin hefur fengið afar góðar viðtökur bæði hérlendis sem erlendis. 

Í öðru sæti er svo nýjasta tímarit New in Chess en þess má geta að 20 blaðsíður í því riti eru tileinkaðar N1 Reykjavíkurskákmótinu.

Hvorug tveggja má nálgast á hjá Sigurbirni "bóksala" Björnssyni á afar góðu verði.  Hægt er að nálgast Sigurbjörn í síma 695 1680 eða í netfangið [e-mail].  Heimasíðu bóksölunnar má nálgast hér. 

Svo má geta að afar góða umfjöllun um N1 Reykjavíkurskákmótið má einnig finna í Chess Life Magazine.  Það tímarit verður komið í dreifingu á Íslandi innan skamms.  

Búdapest: Dagur tapaði í næstsíðustu umferð

Dagur Arngrímsson (2381) tapaði fyrir ungverska stórmeistarann Attila Czebe (2475) í 10. og næstsíðustu umferð First Saturday-mótsins, sem fram fór í dag í Búdapest.  Dagur hefur 5 vinninga og er í 5.-7. sæti.

Í 11. og síðustu umferð sem fram fer á morgun teflir Dagur við spænska alþjóðlega meistarann Lopez Rafael Rodriguez (2265).

12 skákmenn tefla í SM-flokki og eru meðalstigin 2393 skákstig.  Til að fá stórmeistaraáfanga þarf 8,5 vinning.

• First Saturday-mótið
• Chess-Results

KR-pistill: Þungaviktarmaðurinn Gunnar Birgisson

Þröng er jafnan á þingi í Frostaskjólinu þegar mótsklukkan glymur á mánudagskvöldum. Svo var einnig í þessari viku þegar gengið var þar til tafls, 23 skákkempur mættar með forkólfinn sjálfan Kristján Stefánsson, „VonarstjörnuVandamanna", í broddi fylkingar.  Æ fleiri mektarmenn af öllum þjóðfélagsstigum hafa slegist í hópinn að undanförnu og veigra sér ekki við að tefla 13 umferðir í striklotu án kaffihlés. Sú fullyrðing „að skák sé átakalaus leikur"  hefur þar verið afsönnuð rækilega.

Framganga „KópavogsStórveldisins" Gunnars Birgissonar, á skákkvöldum KR að undanförnu  hefur vakið verðuga athygli og ekki laust við að nokkurn beyg setji að mönnum sem setjast á móti honum. Ekki er Gunnar bara mikill velli heldur setur að mönnum eilítinn skrekk að heyra dimman róm hans og þegar rymur í honum þá er hann heggur mann og annan og þyrmir engu.  Greinilega eitilharður og vægðarlaus  keppnismaður þar á ferð, harðnaður úr bæjarmálapólitíkinni, garpur sem má ekkert aumt sjá eins og vesælt peð án þess að ryðja því úr vegi til að bæta stöðu sína og létta sér endataflið enda sigurinn vís.

KópavogsStórveldið - GB hefur unnið hvorki meira en minna en 7 af þeim 12 mótum sem hann hefur verið með það sem af er ári, flest með yfirburðum eins nú síðast með 11.5 vinningum af 13. Er það í fjórða sinn sem hann nær að sigra með 11.5, einu sinni með 11v og tvisvar með 10 vinningum. Glæsilegt það. 

Aðrir sem náð hafa að tilla sér á toppinn að undanförnu í forföllum Gunnars eru Ellert Berndsen, sem vann mótið í síðustu viku einnig með 11.5 v. , 2.5 v. fyrir ofan næsta mann, flott hjá honum,  og bróðir hans Birgir Berndsen, sem vann mótið 10. apríl sl. með 12 vinningum einnig með 2.5 v. á undan næsta manni, frábær árangur.    Þeir Sigurður A. Herlufsen, Ingimar Jónsson og Stefán Þormar Guðmundsson, HellisheiðarSéní, hafa einnig reynst sigursælir að undanförnu, jafnan með efstu mönnum, auk Gunnar Skarphéðinssonar, hins djúpúðga og Gunnars Gunnarssonar, fléttukóngs, þegar hann mætir á annað borð.

Ekkert sumarhlé er gert á taflmennskunni í KR-heimilinu, þar keppast menn við að máta hvern annan á mánudagskvöldum allar ársins hring.  Rimman hefst kl. 19.30 og allir velkomnir. 

 

 

Þorsteinn og Kári efstir í Ásgarði í dag

Tuttugu og einn skákmaður mættu til leiks í dag í Ásgarði. Þorsteinn Guðlaugsson og Kári Sólmundarson urðu efstir og jafnir með sjö vinninga af níu mögulegum, og jafnir í þriðja til fjórða sæti urðu Kristján Guðmundsson og Ari Stefánsson með sex og hálfan vinning. Þorsteinn og Kristján voru hærri á stigum en félaginn.

Næsta þriðjudag halda Æsir sitt meistara mót, þá verða tefldar ellefu umferðir með tíu mín. umhugsunartíma.

Allir skákmenn 60 ára og eldri velkomnir til leiks.

Vetrarstarfinu líkur svo með hraðskákmóti þann 29 maí, þá verða afhent verðlaun fyrir heildarárangur vetrarins.

Það er rangt sem stendur í morgunblaðinu í dag að síðasti skákdagurinn væri í dag.

Biðjum eldri skákmenn að athuga það að það eru tvö  mót eftir þann 22. og 29. maí.

Nánari úrslit dagsins:

1-2    Þorsteinn Guðlaugsson                     7 v.    39 stig

          Kári Sólmundarson                           7        38

3-4    Kristján Guðmundsson                     6.5     39

          Ari Stefánsson                                  6.5     38

5-6    Haraldur Axel                                   6

          Egill Sigurðsson                                6

7-10  Finnur Kr Finnsson                          5

          Gísli Sigurhansson                                     5

          Jón Víglundsson                               5

          Magnús V Pétursson                         5

11      Baldur Garðarsson                                     4.5

Hinir voru með örlítð færri vinninga.

HM-einvígi: Jafntefli í 4. skák - staðan er 2-2

Gelfand og Anand gerðu jafntefli í 4. skák heimsmeistaraeinvígis þeirra sem nú fer fram í Moskvu.  Alls tefldu þeir 34 leiki.  Fimmta skákin fer fram á fimmtudag og hefst kl. 11.  

Henrik Danielsen er með myndbandsskýringar frá hverri skák sem finna má á Chessdom. 

Alls tefla þeir 12 skákir. 

• Heimasíða einvígisins
• ChessBomb
• Myndbandsskýringar Henriks
  

Skákhátíð á Ströndum haldin í fimmta sinn: Afmælismót til heiðurs Róbert Lagerman

Fjórir skákviðburðir á 3 dögum. Teflt á Hólmavík, Djúpavík, Trékyllisvík og Norðurfirði.

Skákhátíð á Ströndum verður haldin 22. til 24. júní, og er efnt til skákviðburða á Hólmavík, Djúpavík, Trékyllisvík og Norðurfirði. Þetta er fimmta árið í röð sem sumarhátíð er haldin í Árneshreppi.

Meðal keppenda eru stórmeistarar og óðalsbændur, undrabörn og áhugamenn úr öllum áttum. Hátíðinni er ekki síst ætlað að kynna töfraheim Strandasýslu, einstætt mannlífið og hrífandi náttúruna.

Skákhátíðin hefst á Hólmavík föstudaginn 22. júní og um kvöldið er hið árlega tvískákarmót í Hótel Djúpavík. Þar eru tveir saman í liði, og fjörið allsráðandi.

Laugardaginn 23. júní er svo komið að Afmælismóti Róberts Lagerman, en meistarinn verður fimmtugur síðar í sumar.

Róbert er sá skákmeistari sem oftast hefur heimsótt Árneshrepp, og hann hefur tekið þátt í fjölmörgum skákviðburðum í sveitinni. Róbert hefur um árabil verið meðal sterkustu skákmanna landsins, en hefur ekki síður unnið þrekvirki við að útbreiða fagnaðarerindi skáklistarinnar á Íslandi og Grænlandi.

Verðlaunafé á mótinu er:

 1. verðlaun 30.000 kr.

2. verðlaun 15.000 kr.

3. verðlaun 10.000 kr.

Sérstök verðlaun:

Besti árangur kvenna 10.000 kr.

Besti árangur heimamanns (lögheimili í Strandasýslu) 10.000 kr.

Besti árangur 18 ára og yngri 10.000 kr.

Besti árangur 12 ára og yngri 10.000 kr.

Besti árangur 0-2000 stiga skákmanna 10.000 kr.

Fjölmörg önnur verðlaun verða veitt, meðal annars handverk og listmunir úr Árneshreppi.

Sunnudaginn 24. júní liggur leiðin í Kaffi Norðurfjörð. Þar verður nú í fimmta sinn teflt um hinn eftirsótta titil Norðurfjarðameistarans. Meðal fyrri handhafa eru Jóhann Hjartarson og Róbert Lagerman. Ríkjandi Norðurfjarðarmeistari er Gúnnar Björnsson, forseti Skáksambands Íslands.

Margir gistimöguleikar eru í boði, auk þess sem tjaldstæði eru á nokkrum stöðum í Árneshreppi: Hótel Djúpavík gerir gestum Skákhátíðar á Ströndum gott boð: Gisting í 2 nætur í tveggja manna herbergi, tveir kvöldverðir og tveir morgunverðir fyrir 16.000 krónur. Netfang: [e-mail] Sími: 451 4037   Gistiheimilið í Norðurfirði býður uppá svefnpokapláss eða uppábúin rúm í vistlegum húsakynnum. Netfang: [e-mail] Sími: 554 4089    Gistiheimilið Bergistanga býður upp á svefnpokapláss fyrir einstaklinga og hópa, með eldunaraðstöðu. Einnig notaleg herbergi með uppábúnum rúmum. Sími: 451 4003   Finnbogastaðaskóli. Svefnpokapláss fyrir einstaklinga og fjölskyldufólk. Skákhátíð á Ströndum hefur stofnað Facebook-síðu, en einnig er hægt að skrá sig hjá Hrafni  [e-mail] og Andreu  [e-mail], sem einnig veita frekari upplýsingar um ævintýraferð á Strandir.

Hraðskákmót á vegum Vinjar í Mosfellsbæ í dag

Skákfélag Vinjar heldur hraðskákmót í húsnæði Kjósarsýsludeildar Rauða kross Íslands, Þverholti 7 í Mosfellsbæ, þriðjudaginn 15. maí klukkan 13:15.

Tefldar verða sex umferðir með sjö mínútna umhugsunartíma og boðið verður upp á kaffi og léttar veitingar í hléi.

Bókavinningar fyrir efstu sætin sem og happadrætti. Þetta verður huggulegt og kostar ekki krónu.  Endilega mæta tímanlega.

Einvígisnefndin hefur hafið störf

Nefnd sem stjórn Skáksambands Íslands skipaði varðandi muni úr einvígi aldarinnar hóf formlega störf í dag með sínum fyrsta fundi.  Í nefndinni eru Brynjar Níelsson, lögmaður, sem er formaður nefndarinnar, Lilja Árnadóttir, fagstjóri munasafns Þjóðminjasafns Íslands, og Helgi Ólafsson, stórmeistari í skák.  Gunnar Björnsson, forseti SÍ, sat einnig þennan fyrsta fund nefndarinnar.

 

 

Búdapest: Dagur með jafntefli í 9. umferð

Dagur Arngrímsson (2381) gerði jafntefli við bandaríska FIDE-meistarann Alexander Battey (2403) í 9. umferð First Saturday-mótsins sem fram fór í dag.  Dagur hefur 5 vinninga og er í 5.-6. sæti. 

Í 10. og næstsíðustu umferð sem fram fer á morgun teflir Dagur við ungverska stórmeistarann Attila Czebe (2475).

12 skákmenn tefla í SM-flokki og eru meðalstigin 2393 skákstig.  Til að fá stórmeistaraáfanga þarf 8,5 vinning.

• First Saturday-mótið
• Chess-Results