Uppskeruhátíð Skákakademíunnar í Ráðhúsinu á sunnudaginn!

- Skákmaraþon og áheitasöfnun barna
- Krakkarnir skora á forsetaframbjóðendur
- Jóhannes Kristjánsson stjórnar Skákuppboði aldarinnar
- Skákflóamarkaður
- Fjöltefli stórmeistara


Skákakademían býður til Uppskeruhátíðar og skákmaraþons í Ráðhúsi Reykjavíkur, sunnudaginn 10. júní kl. 12-18. Fjölbreytt og skemmtileg dagskrá er í boði fyrir alla fjölskylduna.

Tilgangurinn er að kynna starf Skákakademíunnar sl. ár og safna fé til styrktar æskulýðsverkefnum í skák.

Katrín Jakobsdóttir menntamálaráðherra setur hátíðina klukkan 12 og síðan hefst taflmennska krakka úr Úrvalssveitum Skákakademíunnar.

Andstæðingar krakkanna greiða upphæð að eigin vali og er von þeirra að sem allra flestir áskoruninni.

Krakkarnir hafa sett sér það markmið að tefla alls 200 skákir á sunnudaginn, og geta einstaklingar og fyrirtæki heitið á krakkana.

Fjölmargir hafa boðað komu sína, til að tefla við krakkana. Þá hefur öllum forsetaframbjóðendum verið send áskorun og er útlit fyrir að flestir þeirra mæti með bros á vör.

Stórmeistararnir Friðrik Ólafsson, Jóhann Hjartarson og Stefán Kristjánsson tefla fjöltefli við gesti á öllum aldri.

Haldinn verður Skákflóamarkaður, þar sem hægt verður að kaupa skákbækur, taflsett, minjagripi og ýmsa muni sem tengjast skák.

Einn af hápunktum dagsins verður Skákuppboð aldarinnar, en eru boði merkirlegir gripir úr fórum margra bestu skákmanna landsins og hollvina skákarinnar. Meðal þeirra sem gefa gripi á uppboðið eru Friðrik Ólafsson, Jóhann Hjartarson, Helgi Ólafsson, Guðfríður Lilja Grétarsdóttir, Ríkharður Sveinsson, Hrafn Jökulsson, Halldór Blöndal, Jón L. Árnason og Guðni Ágústsson.

Uppboðinu stjórnar enginn annar en Jóhannes Kristjánsson eftirherma og sérlegur vinur skákíþróttarinnar. Hægt verður að skoða uppboðsmunina hér á www.skak.is á næstu dögum, og þar er hægt að senda inn tilboð.

Skákakademía Reykjavíkur hefur á sl. ári staðið fyrir skákkennslu í 30 grunnskólum og hafa á annað þúsund börn notið kennslunnar. Þá hefur Skákakademían staðið fyrir fjölda viðburða, safnað fé til góðra málefna og lagt mikinn metnað og kraft við að útbreiða skákíþróttina sem víðast og gera hana sýnilega.

Úrvalslið Skákakademíunnar á ferð og flugi

Sigrar gegn útgefendum og RÚV, tap gegn firnasterkri sveit Landsbankans.

Úrvalssveit Skákakademíu Reykjavíkur heldur áfram að gera víðreist og heimsækja fyrirtæki og stofnanir. Á síðustu dögum hafa krakkarnir teflt við sveitir bókaútgefenda, Ríkisútvarpsins og Landsbankans.

Með heimsóknunum er Skákakademían að kynna starf sitt og Uppskeruhátíðina sem haldin verður í Ráðhúsinu á sunnudaginn, 10. júní. Á döfinni eru meðal annars einvígi við borgarstjórn Reykjavíkur, Securitas, 365 og Icelandair.

Sveit bókaútgefenda var ekki skipuð neinum aukvisum. Tómas Hermannsson (eini Íslendingurinn sem unnið hefur Judith Polgar í kappskák) fór fyrir sveitinni, og hafði sér til halds og trausts þá Egil Örn Jóhannsson, Björn Þór Sigbjörnsson og Hrafn Jökulsson. Teflt var í rjómablíðu á bryggjunni hjá Víkinni í Sjóminjasafninu. Krakkarnir tefldu af miklu öryggi og unnu 11-5. Hilmir Freyr Heimisson náði bestu árangri Úrvalsliðsins, sigraði í öllum 4 skákum sínum.

Öruggur sigur í Efstaleiti

Næst lá leiðin í höfuðstöðvar RÚV í Efstaleiti, sem löngum hefur verið mikið vígi skáklistarinnar. Nokkuð var um forföll í liði RÚV, sem tefldi þó fram hinum harðsnúna Jóni Guðna Kristjánssyni á efsta borði.

Krakkarnir unnu nokkuð öruggan sigur, þegar upp var staðið, og erfitt að gera upp á milli frammistöðu keppenda Úrvalsliðsins, sem að þessu sinni var skipað Heimi Páli Ragnarssyni, Veroniku Steinunni Magnúsdóttur, Vigni Vatnari Stefánssyni og Felix Steinþórssyni.

 Tap fyrir stórveldinu í Austurstræti

Á þriðjudag heimsóttu krakkarnir aðalútibú Landsbankans í Austurstræti og þar tók sannkallað ofurlið á móti þeim, enda Landsbankinn löngum eitt höfuðvígi skáklistarinnar. Meðal keppenda í 10 manna liði bankans voru m.a. Bergsteinn Einarsson, Ingimundur Sigurmundsson, Ólafur Kjartansson og Gunnar Björnsson, forseti Skáksambandsins.

Úrvalsliðið tapaði fyrri umferðinni með minnsta mun, 4,5 vinningi gegn 5,5 en í seinni hálfleik sýndu bankamennirnir klærnar og unnu 7-3. Lokaúrslit urðu því sigur Landsbankans, sem fékk 12,5 vinning en Úrvalsliðið fékk 7,5. Eftir skemmtilega viðureign var öllum boðið í ljúffengar veitingar, og þar skoraði Úrvalsliðið á Landsbankann í annað einvígi við fyrsta tækifæri.

Krakkarnir sem tefldu í Landsbankanum voru Hilmir Freyr Heimisson, Dagur Ragnarsson, Oliver Aron Jóhannesson, Hrund Hauksdóttir, Svandís Rós Ríkharðsdóttir, Felix Steinþórsson, Leifur Þorsteinsson, Heimir Páll Ragnarsson og Dagur Kjartansson.

Fyrirtæki, félög eða stofnanir sem vilja fá heimsókn frá Úrvalsliðinu eru hvött til að hafa samband við Stefán Bergsson, framkvæmdastjóra Skákakademíunnar í [e-mail]!

Mjóddarmót Hellis fer fram á laugardag

Mjóddarmót Hellis fer fram laugardaginn 9. júní í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Brúðarkjólaleiga Katrínar en fyrir hana tefldi Daði Ómarsson.  Tefldar verða sjö umferðir með sjö mínútna umhugsunartíma.  Skráning fer fram í síma 866-0116 og á heimasíðu Hellis: http://hellir.blog.is.   Upplýsingar um þegar skráða keppendur má nálgast hér.

Þátttaka er ókeypis!

Verðlaun eru sem hér segir:

• 1. 10.000
• 2.   6.000
• 3.   4.000

Skráning:

• Heimasíða Hellis: http://hellir.blog.is
• Sími: 866 0116

Landsmót UMFÍ 50+ - keppt í skák á laugardeginum

Skákmót Landsmót 50+ fer fram á laugardaginn 9. júní og hefst kl. 13 í Varmárskóla (bókasafni barnaskólans).

Tefldar verða 9 umferðir með 10 mínútna umhugsunartíma.

Hægt er að skrá sig til þátttöku á netinu en einnig á mótstað.

Æskilegt að mæta tímanlega til tafls, a.m.k. hálftíma fyrir keppni.

Umsjón mótsins er í höndum RIDDARANS  - skákklúbbs eldri borgara á höfuðborgarsvæðinu -  og Einar S. Einarsson, verður skákstjóri.

Nánar á http://www.umfi.is/umfi09/50plus/

Þátttökugjald mótsins kr. 3.500-  gildir fyrir allar keppnisgreinar, margvíslega afþreyingu, heilsurækt, fyrirlestra og fleira.

Krakkarnir skora á forsetaframbjóðendur í skák!

Krakkarnir í Úrvalssveit Skákakademíunnar, sem þessa dagana tefla við fulltrúa fyrirtækja og stofnana, bjóða öllum forsetaframbjóðendunum að mæta á Uppskeruhátíð Skákakademíunnar í Ráðhúsinu á sunnudag og tefla eina skák.

Frambjóðendur til forseta eru Andrea Ólafsdóttir, Ari Trausti Guðmundsson, Hannes Bjarnason, Herdís Þorgeirsdóttir, Ólafur Ragnar Grímsson og Þóra Arnórsdóttir.

Bréf Skákakademíunnar til forsetaframbjóðenda er svohljóðandi:

,,Sunnudaginn 10. júní stendur Skákakademía Reykjavíkur fyrir Uppskeruhátíð í Ráðhúsinu. Þar munu börn úr úrvalssveitum Skákakademíunnar tefla við gesti og gangandi, og safna áheitum til stuðnings æskulýðsstarfi í skák.

Krakkarnir hafa sett sér það markmið að tefla 200 skákir frá klukkan 12 til 18 á sunnudaginn. Það væri okkur mikil ánægja og heiður ef þú sem frambjóðandi til æðsta embættis þjóðarinnar gætir litið við einhverntímann dagsins og tekið eina skák við krakkana. Skák er þjóðaríþrótt Íslendinga og við vonum innilega að þú sjáir þér fært að mæta á sunnudaginn.

Kjörorð skákhreyfingarinnar er: Við erum ein fjölskylda.

Með kærri kveðju,

Stefán Bergsson, framkvæmdastjóri SR."

Val Gardena: Hjörvar og Þorsteinn með jafntefli gegn sterkum andstæðingum

Hjörvar Steinn Grétarsson (2477) og Þorsteinn Þorsteinsson (2248) gerðu báðir jafntefli í 4. umferð alþjóðlega mótsins í Val Gardena á Ítalíu sem fram fór í dag.  Hjörvar við þýska stórmeistarann Arkadij Rotstein (2512) en Þorsteinn við ítalska alþjóðlega meistarann Fabio Bruno (2447).  Hjörvar hefur 3 vinninga og er í 6.-11. sæti en Þorsteinn hefur 2,5 vinning og er í 12.-22. sæti.

Í 5. umferð, sem fram fer á morgun, teflir Hjörvar við pólska stórmeistarann Rafal Antoniewski (2536) en Þorsteinn við ísraelska stórmeistarann Tal Baron (2467). 

56 skákmenn frá 19 löndum taka þátt í þessu móti og þar af eru 14 stórmeistarar og 9 alþjóðlegir meistarar.  Hjörvar er nr. 13 í stigaröð keppenda en Þorsteinn er nr. 28.  

Allar skákir mótsins eru sýndar beint og hefjast umferðir kl. 13.  

• Heimasíða mótsins
• Myndaalbúm (GF)
• Úrslitaþjónusta
• Beinar útendingar (hefjast kl. 13 nema síðasta umferðin kl. 7)

Henrik með jafntefli í lokaumferðinni og endaði í 2.-4. sæti

Stórmeistarinn Henrik Danielsen (2498) gerði jafntefli við danska alþjóðlega meistarann Nikolaj Mikkelsen (2399) í 9. og síðustu umferð alþjóðlega mótsins í Brønshøj í Danmörku.  Henrik hlaut 6 vinninga og endaði í 2.-4. sæti.

Mikkelsen sigraði á mótinu en hann hlaut 6,5 vinning og náði jafnframt stórmeistaraáfanga.  Jafnir Henrik urðu sænski stórmeistarinn Jonny Hector (2560) og danski alþjóðlegi meistarinn Mads Andersen (2432).

Frammistaða Henriks samsvaraði 2559 skákstigum og hækkar hann um 7 stig fyrir hana.

Meðalstigin á mótinu eru 2441 skákstig.   Í flokknum taka 10 skákmenn þátt og þar af 3 stórmeistarar.  Henrik er nr. 3 í stigaröð keppenda.  Eins og svo oft á dönskum mótum er tefldar 2 umferðir á dag.   Umferðirnar hefjast kl. 8 og 13.  

• Heimasíða mótsins 
• Beinar útsendingar

Brønshøj: Henrik vann í næstsíðstu umferð - er í þriðja sæti fyrir lokaumferðina

Stórmeistarinn Henrik Danielsen (2498) vann danska alþjóðlega meistarann Andreas Skytte Hagen (2445) í áttundu og næstsíðustu umferð alþjóðlega mótsins í Brønshøj í Danmörku sem fram fór í dag.  Henrik hefur 5½ vinning og er í 3. sæti.

Dönsku alþjóðlegu meistararnir Nikolaj Mikkelsen (2399)  og Mads Andersen (2432) eru efstir með 6 vinninga.

Henrik mætir Mikkelsen í lokaumferðinni sem hefst nú kl. 13. 

Meðalstigin á mótinu eru 2441 skákstig.   Í flokknum taka 10 skákmenn þátt og þar af 3 stórmeistarar.  Henrik er nr. 3 í stigaröð keppenda.  Eins og svo oft á dönskum mótum er tefldar 2 umferðir á dag.   Umferðirnar hefjast kl. 8 og 13.  

• Heimasíða mótsins 
• Beinar útsendingar

Skákuppboð aldarinnar til stuðnings æskulýðsstarfi: Friðrik Ólafsson gefur tvö söguleg skáksett

,,Þið skuluð flýta ykkur út með þetta, áður en mér snýst hugur," sagði Friðrik Ólafsson kímileitur þegar hann afhenti Skákakademíu Reykjavíkur tvö söguleg taflsett, sem hann fékk að gjöf á Piatigorsky-stórmótinu í Los Angeles 1963. Þetta var sterkasta skákmót í Bandaríkjunum síðan 1927 og Friðrik lenti í 3. til 4. sæti, hársbreidd frá sigri.

Friðrik Ólafsson er verndari Skákakademíu Reykjavíkur og hann gefur tvö taflsett, hönnuð af hinum fræga Peter Ganine, myndhöggvara og hönnuði, á Skákuppboð aldarinnar sem haldið er í tilefni af Uppskeruhátíð Skákakademíunnar í Ráðhúsi Reykjavíkur, sunnudaginn 10. júní.

Þá munu börnin, sem notið hafa góðs af kennslu og starfi Skákakademíunnar, tefla maraþon við gesti og gangandi, og safna fé til æskulýðsstarfs í skák.

Á næstu dögum verða munir á Skákuppboði aldarinnar kynntir. Margir bestu skákmenn þjóðarinnar og hollvinir skákarinnar gefa gripi á uppboðið. Þar má nefna Helga Ólafsson, Jóhann Hjartarson, Guðfríði Lilju Grétarsdóttur, Ríkharð Sveinsson, Jón L. Árnason, Hrafn Jökulsson, Guðna Ágústsson, Össur Skarphéðinsson o.fl.

Ef þú lumar á skemmtilegum skákgripum, og vilt láta gott af þér leiða í þágu skákíþróttarinnar, verður tekið við munum á Skákuppboðið, sem og á Skákflóamarkað, sem haldinn verður í Ráðhúsinu samhliða maraþoninu á sunnudaginn. Sendu okkur línu á [e-mail].

Allur ágóði af uppboðinu rennur til barna- og ungmennaverkefna í skák á vegum Skákakademíunnar. Á liðnu skólaári stóð Skákakademían fyrir kennslu í 30 grunnskólum höfuðborgarinnar, og hélt fjölmörg mót og viðburði. Þá hefur Skákakademían unnið, með góðum árangri, með Skáksambandinu, taflfélögum, fyrirtækjum, félögum og einstaklingum.

Helsta markmið Skákakademíunnar er að innleiða skákíþróttina í grunnskólana, svo öll börn á Íslandi fái að læra skák -- svo allir njóti góðs af.

Lægsta boð í hvort taflsett um sig er 50.000 krónur. Tilboð, ásamt símanúmeri, sendist Stefáni Bergssyni, framkvæmdastjóra Skákakademíunnar í [e-mail].

Fleiri munir á Skákuppboði aldarinnar verða kynntir á næstu dögum.

 

 

 

Hjörvar með jafntefli við stórmeistara - Þorsteinn með sigur

Alþjóðlegi meistarinn Hjörvar Steinn Grétarsson (2477) gerði jafntefli við argentíska stórmeistarann Fernando Peralta (2590) í 3. umferð alþjóðlega mótsins í Val Gardena á Ítalíu sem fram fór í dag.   Þorsteinn vann stigalágan andstæðing (2036).  Hjörvar hefur 2,5 vinning en Þorsteinn hefur 2 vinninga.

Í 4 umferð, sem fram fer á morgun, teflir Hjörvar við þýska stórmeistarann Arkadij Rotstein (2512) en Þorsteinn teflir við ítalska alþjóðlega meistarann Fabio Bruno (2447).  

Efstir með fullt hús eru úkraínski stórmeistarinn og Íslandsvinurinn Vladimir Baklan (2612) og ítalski alþjóðlegi meistarinn Federico Manca (2424).

56 skákmenn frá 19 löndum taka þátt í þessu móti og þar af eru 14 stórmeistarar og 9 alþjóðlegir meistarar.  Hjörvar er nr. 13 í stigaröð keppenda en Þorsteinn er nr. 28.  

Allar skákir mótsins eru sýndar beint og hefjast umferðir kl. 13.  

• Heimasíða mótsins
• Myndaalbúm (GF)
• Úrslitaþjónusta
• Beinar útendingar (hefjast kl. 13 nema síðasta umferðin kl. 7)