Búdapest: Dagur með annað jafntefli gegn stórmeistara

Alþjóðlegi meistarinn Dagur Arngrímsson (2366) gerði jafntefli við ungverska stórmeistarann Ivan Farago (2489) í 2. umferð First Saturday-mótsins, sem fram fór í dag.   Hans annað jafntefli gegn stórmeistara á mótinu. 

10 skákmenn tefla í SM-flokki og er Dagur næststigalægstur keppenda.  Meðalstig í flokknum eru 2428 skákstig. 

• Heimasíða mótsins
• Chess-Results

 

Karjakin heimsmeistari í atskák

Rússinn Sergey Karjakin (2779) varð í dag heimsmeistari í atskák en mótið hefur fram síðustu 3 daga í Astana í Kasakstan.  Rússinn ungi, sem tefldi reyndar lengi vel fyrir Úkraínu, hlaut 11,5 vinning í 15 skákum.  Annar varð stigahæsti skákmaður heims, Magnus Carlsen (2837),  sem hafði góða forystu fyrir lokadag mótsins en hlaut aðeins 2 vinning í 5 skákum í dag.  Topalov (2752) og Mamedyarov (2726) urðu jafnir í 3.-4. sæti.

Á morgun hefst Heimsmeistaramótið í hraðskák.  Þar taka þátt meðal annars: Carlsen, Radjabov (2784) og Karjakin (2779).  Mótinu lýkur á þriðjudag.

Taflmennskan hefst kl. 9 í fyrramálið og er meðal annars hægt að fylgjast með henni á Chessbomb og á heimasíðu mótsins.

Lokastaðan:

1	GM	Karjakin, Sergey	RUS	11.5
2	GM	Carlsen, Magnus	NOR	10.5
3	GM	Topalov, Veselin	BUL	9.5
4	GM	Mamedyarov, Shakhriyar	AZE	9.5
5	GM	Grischuk, Alexander	RUS	9
6	GM	Gelfand, Boris	ISR	8
7	GM	Ivanchuk, Vassily	UKR	7.5
8	GM	Svidler, Peter	RUS	7.5
9	GM	Radjabov, Teimour	AZE	7.5
10	GM	Dreev, Aleksey	RUS	7
11	GM	Morozevich, Alexander	RUS	6.5
12	GM	Bologan, Viktor	MDA	6
13	GM	Kurnosov, Igor	RUS	6
14	GM	Kazhgaleyev, Murtas	KAZ	6
15	GM	Tkachiev, Vladislav	FRA	4.5
16	GM	Ismagambetov, Anuar	KAZ	3.5

Heimsmeistaramótið í atskák og hraðskák

Búdapest: Dagur með jafntefli í fyrstu umferð

Alþjóðlegi meistarinn Dagur Arngrímsson (2366) gerði jafntefli við serbneska stórmeistarann Zlatko Ilinic (2441) í fyrstu umferð SM-flokks First Saturday-mótsins, sem hófst í dag í Búdapest. 

10 skákmenn tefla í SM-flokki og er Dagur næststigalægstur keppenda.

Heimasíða mótsins

 

Opna skoska: Hjörvar, Bragi, Nökkvi og Óskar Long unnu í fyrstu umferð

Hjörvar Steinn Grétarsson (2507), Bragi Þorfinnsson (2465), Nökkvi Sverrisson (1973) og Óskar Long Einarsson (1571) unnu allir í fyrstu umferð opna skoska meistaramótsins í skák, sem fram fór í dag í Glasgow.

Hjörvar Steinn vann ungversku skákkonuna Boglarka Bea (2178), sem er FIDE-meistari kvenna en Bragi vann Skotann Alan Grant (2155).  Óskar Long vann mun stigahærri andstæðing (1900).  Róbert Lagerman (2315) og Birkir Karl Sigurðsson (1719) gerðu jafntefli.  Sá síðarnefndi við stigahærri andstæðing (1918).  Mikael Jóhann Jóhann Karlsson (1929), Emi Sigurðarson (1808) og Jón Trausti Harðarson (1774), sem á 15 ára afmæli í dag, töpuðu. 

Skákir Hjörvars og Braga verða sýndar beint á morgun.  Hjörvar teflir við skoska FIDE-meistarann Philip Giulian (2285) en Bragi við Maltverjann David Vincenti (2091).  Umferðin hefst kl. 12.

116 skákmenn taka þátt í mótinu og þar af eru 9 stórmeistarar og 13 alþjóðlegir meistarar.  Hjörvar er nr. 8 í stigaröð keppenda, Bragi nr. 13 og Róbert nr. 25.

• Heimasíða mótsins
• Beinar útsendingar (umferðir hefjast kl. 12, nema 7. umferð hefst kl. 11:30)
• Úrslitaþjónusta

Björn Ívar Grænmetismeistari - hver verður blómameistarinn?

Grænmetismótið 2012 var heldur betur vel mannað - fyrrum landsliðsmenn og núverandi landsliðskonur voru mætt til leiks í Sumarskákhöllina í gær til að berjast um grænmetiskörfur sem Sölufélag garðyrkjumanna lagði til mótshaldsins. Fyrir mótið mátti telja þá fyrrum félaga úr Ólympímeistaraliði Íslands frá 1995, Björn Þorfinsson og Jón Viktor Gunnarsson sigurstranglegasta.

Jóni Viktori gekk ágætlega framan af en Björn var týndur og tröllum gefinn um miðjan hóp enda margir sterkir skákmenn meðal þátttakenda. Fór svo að Jón Viktor komst á fyrsta borð fyrir fimmtu og síðustu umferðina. Þar mætti hann ofjarli sínum í Eyjamanninum Birni Ívari Karlssyni, sem veitti Jón þó grið er hann þrálék með unnið tafl. Jafnteflið dugði Birni til sigurs og fékk hann veglega grænmetiskörfu að launum.

Bestum árangri barna náði Hilmir Freyr Heimisson sem hlaut þrjá vinninga. Landsliðskonan Jóhanna Björg Jóhannsdóttir var svo dreginn út úr hópi keppenda að móti loknu og fékk einnig grænmetiskörfu. Á meðan á mótinu stóð gæddu keppendur sér á ljúffengum og andoxandi tómötum; hvoru tveggja kirsuberja tómötum sem og hinum hefðbundnu.

Næsta mót í Grænu seríunni fer fram í hádeginu næsta föstudag klukkan 12:00 og verður þá teflt um veglega blómvendi.

Heildarúrslit:

Rk.	Name	Pts.	TB1
1	Björn Karlsson	4,5	14,5
2	Jón Viktor Gunnarsson	4	15,5
3	Elsa María Kristínardóttir	4	14,5
4	Stefán Már Pétursson	4	13
5	Stefán Bergsson	4	12
6	Hrafn Jökulsson	3	16
7	Rúnar Berg	3	15,5
8	Jóhanna Björg Jóhannsdóttir	3	15
9	Hilmir Freyr Heimisson	3	13
10	Vignir Vatnar Stefánsson	3	12
11	Björn Þorfinnsson	3	11
	Gauti Páll Jónsson	3	11
13	Svandís Rós Ríkharðsdóttir	2	13
14	Jakob Petersen	2	12,5
15	Jón Birgir Einarsson	2	12
16	Hjálmar Sigurvaldason	2	11,5
17	Gunnlaugur Karlsson	2	11
18	Arnar Valgeirsson	2	10,5
19	Bjarni Þór Guðmundsson	2	8,5
20	Þorvarður F. Ólafsson	1,5	15
21	Óskar Víkingur Davíðsson	1	11,5
22	Hjálmar Skarphéðinsson	1	10
23	Númi Sigfússon	1	10

 

Myndaalbúm (ÁHS)

Hjörvar og Bragi í beinni frá fyrstu umferð opna skoska meistaramótsins

Níu íslenskir skákmenn taka þátt í opna skoska meistaramótinu sem hófst á hádegi í dag í Glasgow í Skotlandi.  Meðal þeirra eru alþjóðlegu meistararnir Hjörvar Steinn Grétarsson (2507) og Bragi Þorfinnsson (2465) og FIDE-meistarinn Róbert Lagerman (2315).  

Skákir Hjörvars og Braga í fyrstu umferð eru báðar sýndar beint. Hjörvar teflir við ungversku skákkonuna Boglarka Bea (2178), sem er FIDE-meistari kvenna en Bragi við Skotann Alan Grant (2155).  Beinar útsendingar má nálgast hér.

Aðrir íslenskir skákmenn sem taka þátt eru: Nökkvi Sverrisson (1973), Mikael Jóhann Karlsson (1929), Emil Sigurðarson (1808), Jón Trausti Harðarson (1774), Birkir Karl Sigurðsson (1709) og Óskar Long Einarsson (1571).

114 skákmenn taka þátt í mótinu og þar af eru 10 stórmeistarar og 13 alþjóðlegir meistarar.  Hjörvar er nr. 8 í stigaröð keppenda og Bragi nr. 13.  

• Heimasíða mótsins
• Beinar útsendingar (umferðir hefjast kl. 12, nema 7. umferð hefst kl. 11:30)
• Úrslitaþjónusta

"Svindlmálið" skekur norskt skáklíf

Á helsta skákvef Noregs, heimasíðu Bergens Schakklub, má finna ýmiss gögn um "svindlmálið" svokollaða sem kom upp á N1 Reykjavíkurskákmótinu.

Norska skáksambandið sendi frá sér yfirlýsingu 2. júli þar sem fram kemur að sambandið hafi ákveðið að áfrýja málinu ekki til FIDE.  Jafnframt eru birt úrskurðir sambandsins.  Á síðunni má finna yfirlýsingu frá Øystein Brekke, skákdómara, sem gagnrýnir að nöfn sakborninga hafi verið birt. 

Lokaniðurstaða málsins var sú að sonurinn var sýknaður en faðirinn fékk eins árs bann.

Áhugasamir geta lesið meira um málið á heimasíðu Bergens Schakklub og geta kynnt sér ýmiss gögn málsins.

 

Skákhátíð á Ströndum 2012: Frábær veisla við ysta haf

Skákhátíð á Ströndum hefur unnið sér fastan sess í íslensku skáklífi og hefur nú verið haldin þriðju vikuna í júní fimm ár í röð. Margir hafa kynnst undraheimi Strandasýslu í fyrsta sinn, aðrir njóta þess að endurnýja kynni sín af einstakri náttúru og mannlífi. Það er einkenni á hátíðinni að þar tefla jafnt meistarar sem byrjendur, heimamenn og gestir úr öllum landsfjórðungum.

Að þessu sinni byrjaði hátíðin á Hólmavík föstudaginn 22. júní, þegar Róbert Lagerman tefldi fjöltefli við 24 andstæðinga. Róbert var heiðursgestur hátíðarinnar, enda hefur hann tekið þátt í skipulagningu hennar frá upphafi, og auk þess margoft heimsótt Strandamenn og tekið þátt í ótal skákviðburðum.

Óhætt er að segja að fáir meistarar hafi mætt jafn sterkum hópi í fjölteflinu, enda margir af gestum hátíðarinnar sem notuðu tækifærið til að liðka fingurna í skák á móti Róbert. Fjölteflið var nýhafið þegar Róbert fékk símtal um veikindi í nánustu fjölskyldu, en hann beit á jaxlinn og tefldi áfram einsog sannur herforingi. Hann stóð að lokum uppi öruggur sigurvegari, en varð þó að játa sig sigraðan í nokkrum skákum, m.a. á móti hinum bráðefnilegu Hilmi Frey Heimissyni og Jóni Kristni Þorgeirssyni.

Gauti Páll og Inga sigruðu í Djúpavík

Frá Hólmavík lá leiðin í Djúpavík, þar sem Eva Sigurbjörnsdóttir og Ásbjörn Þorgilsson hafa í rúmlega aldarfjórðung rekið eitt skemmtilegasta hótel landsins. Sú var tíð að síldarverksmiðjan í Djúpavík var sú stærsta á landinu, en nú er hún safn og minnisvarði um veröld sem var. Eva og Ásbjörn hafa frá upphafi tekið virkan þátt í Skákhátíð á Ströndum. Árin 2008, 2009 og 2010 voru haldin stórmót í gömlu verksmiðjunni. Helgi Ólafsson sigraði fyrstu tvö árin en Jóhann Hjartarson sigraði 2010 á 75 ára Afmælismóti Friðriks Ólafssonar.

Í Djúpavík hafa líka frá upphafi verið haldin tvískákarmót, sem tvímælalaust verða að teljast með allra skemmtilegustu mótum ársins. Að þessu sinni voru 10 lið skráð til leiks og var leikgleðin allsráðandi.

Að lokum stóðu þau Gauti Páll Jónsson og Ingibjörg Edda Birgisdóttir uppi sigurvegarar, en ,,Forsetalið" Gunnars Björnssonar og félaga varð að gera sér annað sætið að góðu. Í þriðja sæti urðu félagarnir Halldór Blöndal og Hilmir Freyr Heimisson.

Glæsileg verðlaun á Afmælismóti Róberts

Laugardaginn 23. júní var stóra stundin runnin upp: Afmælismót Róberts Lagerman í samkomuhúsinu í Trékyllisvík. Keppendur voru 44 og í þeim hópi voru m.a. stórmeistararnir Jóhann Hjartarson og Helgi Ólafsson, Bolvíkingurinn knái Guðmundur Gíslason, afmælisbarnið Róbert, Gunnar Björnsson forseti SÍ, Stefán Bergsson framkvæmdastjóri SÍ og grúi skákmanna af öllum stærðum og gerðum, og voru í þeim hópi sum efnilegustu börn og ungmenni landsins.

Þar var keppt um sérlega vegleg verðlaun: Forláta sérsmíðaðan hrók eftir handverksmanninn og snillinginn Valgeir Benediktsson í Árnesi. Valgeir og fjölskylda hans hafa á síðustu árum byggt upp Minja- og handverkshúsið Kört í Trékyllisvík, en þar er varðveitt saga Árneshrepps og boðið upp á handverk eftir íbúa sveitarinnar. Óhætt er að segja að Kört sé einstakt í íslenskri safnaflóru, og Valgeir er frægur fyrir stórkostlega muni sem hann smíðar. Að auki fékk sigurvegarinn sérsmíðaðan silfurhring eftir silfursmiðinn Úlfar Daníelsson. Á hringinn er letrað, með rúnaletri, kjörorð skákhreyfingarinnar: Við erum ein fjölskylda.

Einsog við mátti búast stóð keppnin um efsta sætið milli stórmeistaranna, og Helgi virtist ætla að sigra með fullu húsi eftir að leggja Jóhann í innbyrðis viðureign. Gunnar Björnsson sýndi þó hvað í honum býr með því að sigra Helga, svo stórmeistararnir sigldu að lokum jafnir í mark. Þeir deildu því efsta sætinu og titlinum Trékyllisvíkurmeistarinn 2012. Báðir fengu þeir silfurhring að launum, en hrókurinn góði mun hafa árleg vistaskipti hjá þeim félögum. Hér verður að koma fram að það var Áróra Hrönn Skúladóttir, skákmamma með meiru, sem lét gera þrjá silfurhringa í tilefni hátíðarinnar og gaf þá til mótshaldsins. Þriðji hringurinn kom vitanlega í hlut afmælisbarnsins Róberts. Hafi Áróra djúpa þökk fyrir framlag sitt!

Meðan á mótinu stóð var Ingólfur Benediktsson bóndi í Árnesi heiðraður fyrir óþreytandi stuðning við framkvæmd Skákhátíðar á Ströndum. Hann hefur á liðnum árum verið boðinn og búinn við að hjálpa í smáu sem stóru, og sama er að segja um hans góða heimilisfólk. Ingólfur hlaut, sem örlítinn viðurkenningarvott flugmiða fyrir tvo með Flugfélaginu Ernir, sem heldur uppi áætlunarflugi á Gjögur, sem er ,,millilandaflugvöllur" Árneshrepps, en Ernismenn hafa líka frá upphafi stutt við bakið á Skákhátíð á Ströndum með ráðum og dáð.

Þá var að vanda valinn best klæddi keppandi mótsins, og að þessu sinni kom sá heiðurstitill í hlut Hrannars Jónssonar. Í umsögn dómnefndar Hrannar hrós fyrir að vera í senn einsog amerísk filmstjarna og rammíslenskur töffari. Verðlaunin voru ekki af lakari endanum: silkiklútur frá Samarkand í Úsbekistan, sem Jóhanna Kristjónsdóttir ferðafrömuður gaf af þessu tilefni.

 Háttvísasti keppandinn var valinn Gunnar Finnsson fyrrverandi skólastjóri í Trékyllisvík og víðar, en hans er minnst í Árneshreppi af miklum hlýhug enda hélt hann uppi skáklífi í sveitinni á níunda áratugnum.

Leikar fóru því svo að Jóhann og Helgi fengu 8 vinninga af 9 mögulegum, en næstur kom Guðmundur Gíslason. Meðal þeirra sem náðu 6,5 vinningi var hinn ungi og bráðefnilegi Akureyringur, Jón Kristinn Þorgeirsson, sem sýndi og sannaði að hann á framtíðina fyrir sér. Ingibjörg Edda Birgisdóttir varð efst kvenna og feðgarnir Ingólfur Benediktsson og Númi Fjalar Ingólfsson náðu bestum árangri heimamanna.

Eftir frábært Afmælismót Róberts var slegið upp stórfenglegri grillveislu með þátttöku gesta og heimamanna. Þar flutti Jóhann Hjartarson bráðskemmtilega ræðu til heiðurs afmælisbarninu og rifjaði upp óborganlegar sögur frá skólaárum þeirra. Róbert þakkaði með tölu, sem sýndi að hann er ekki síðri ræðumaður en skákmaður.

Um kvöldið var svo blásið til sannkallaðs stórleiks á íþróttavellinum í Trékyllisvík. Þar mættust lið Gesta og Ungmennafélagsins Leifs heppna, og er óhætt að segja að áhorfendur hafi fengið að fylgjast með mest spennandi knattspyrnuleik sumarsins. Eftir miklar sviptingar urðu lokatölur 8-8!

 

Jóhann Krumlumeistari í Norðurfirði

Sunnudaginn 24. júní var komið að síðasta viðburðinum á Skákhátíð á Ströndum 2012: Hraðskákmóti í Kaffi Norðurfirði.

Þar sýndi Jóhann Hjartarson mátt sinn og megin og sigraði í öllum 6 skákum sínum, en Guðmundur Gíslason hreppti silfrið.

Verðlaunin voru að sönnu stórfengleg: Skúlptúr úr rekaviði eftir Guðjón Kristinsson frá Dröngum, en hann er einn helsti hleðslu- og útskurðarmeistari landsins.

Eftir frábært mót í Norðurfirði héldu svo sumir keppendur í sundlaugina í fjörunni í Krossnesi -- og voru að sjálfsögðu með sundlaugarsett með sér, svo nú er hægt að tefla í þessari einstöku laug, við undirleik Norður-Atlantshafsins.

Fjölmargir lögðu sitt af mörkum svo hægt væri að halda Skákhátíð á Ströndum 2012, og má nefna útgerðarfélagið Brim, menntamálaráðuneytið, Skáksamband Íslands, Flugfélagið Erni, Hótel Djúpavík, Kaupfélag Steingrímsfjarðar, Forlagið, Sögur útgáfu, Henson, Securitas, Steinegg o.fl.

Þakkir til heimamanna, sem tóku gestum tveim höndum! Sjáumst á Ströndum að ári: Næsta hátíð verður 21. til 23. júní 2013!

MYNDAALBÚM

Fjöltefli á Hólmavík (HJ)

Tvískákmót í Djúpavík (HJ o.fl.)

Afmælismót Róberts í Trékyllisvík (HJ o.fl.)

Krumlumótið í Kaffi Norðurfirði (HJ og Elísa Ösp Valgeirsdóttir)

 

Græna serían: Ingvar Þór Ávaxtameistarinn -- hver sigrar á Grænmetismótinu á föstudaginn?

Ingvar Þór Jóhannesson sigraði með glæsibrag á Ávaxtamótinu í Sumarskákhöllinni á föstudag. Þetta var fyrsta mótið í Grænu seríunni, sem Skákakademían heldur til að fagna sól og sumri. Í hádeginu nú á föstudaginn er röðin komin að Grænmetismótinu og svo tekur Blómaskákmótið við í næstu viku.

Hraðskákmótin í Grænu seríunni eru öllum opin og á fyrsta mótinu voru á fjórða tug keppenda á öllum aldri. Vignir Vatnar Stefánsson fékk verðlaun fyrir besta árangur barna á Ávaxtaskákmótinu, en hann hlaut 4 vinninga af 5, og tapaði ekki skák.

Þá er Græna sería haldin til að vekja athygli á Sumarskákmótum SR sem nú standa sem hæst, við frábærar aðstæður að Þingholtsstræti 47, í hátíðarsal Kvennaskólans. Gengið er inn beint á móti þýska og breska sendiráðinu.

Skákáhugamenn á öllum aldri eru hvattir til að mæta í hádeginu á föstudaginn, taka skák og gæða sér á hnossgætinu frá Sölufélagi garðyrkjumanna!

Myndir frá Ávaxtamótinu 2012 (HJ)

Grænmetismót í sumarskákhöllinni á föstudaginn!

Í sumar mun Skákakademían standa fyrir hraðskákmótum í hádeginu á föstudögum, sem kallast Græna serían. Ávaxtamótið var það fyrsta í röðinni. Mótið var nú haldið í annað sinn eftir góða frumraun í fyrra. Rétt eins og þá var keppendum boðið upp á dýrindis ávexti frá Banönum ehf. Aukin heldur kepptu þeir 34 keppendur sem mættir voru til leiks um þrjár veglegar áxaxtakörfur. Tefldar voru fimm umferðir með 5 mínútna umhugsunartíma.

Áður en að mótið hófst fór Hjörvar Steinn Grétarsson yfir eina af ótal skákum sem hann hefur teflt að undanförnu. Hlýddu margir á fyrlesturinn sem heppnaðist vel enda Hjörvar góður skákkennari. Hjörvar var sigurstranglegastur fyrir mótið, en Ávaxtakóngurinn frá því í fyrra, Ingvar Þór Jóhannesson, var staðráðinn í að verja titilinn. Fór svo að það tókst og Ingvar Þór því unnið bæði Ávaxtmótin sem haldin hafa verið. Hjörvar varð annar og Vignir Vatnar Stefánsson þriðji og hlaut fyrir það barnaverðlaunin og stóra ávaxtakörfu rétt eins og Ingvar. Ein karfa var dregin út og hana fékk Jóhann Arnar Finnsson Fjölnispiltur.  

Í hádeginu næsta föstudag mun svo fara fram Grænmetismótið 2012. Taflið hefst 12:00 og og eru keppendur beðnir um að mæta tímanlega. Tefldar verða 5 umferðir með 5 mínútna umhugsunartíma. Dýrindis grænmeti í boði frá Sölufélagi garðyrkjumanna. Sumarskákhöllin er staðsett í Þingholtsstrætinu, beint á móti þýska og breska sendiráðinu.