Skákþáttur Morgunblaðsins: Tilþrifamikil viðureign

 

Þegar Dagur Arngrímsson mætti rúmenska stórmeistaranum Mihai Suba í sjöundu umferð opna mótsins í Arad í Rúmeníu og hafði sigur brá svo við að á hinu vinsæla umræðuhorni skákarinnar töldu menn að nú væri þess illa athæfis hefnt er Suba vildi ekki standa við jafnteflistilboð sem hann gerði Ingvari Ásmundssyni meðan á Ólympíumótinu í Buenos Aires 1978 stóð.

 

Skákin hafði farið í bið og liðsmenn Íslands söfnuðust saman til að kryfja stöðuna. Þá hringdi Suba og bauð jafntefli sem Ingvar samþykkti. Þegar Ingvar mætti til leiks morguninn eftir til að undirrita skorblöðin vildi Suba ekki kannast við jafnteflisboðið. Rúmenskir skákmenn höfðu á þessum árum ekki gott orð á sér og átti þeirra fremsti skákmaður, Florin Gheorghiu, mesta sök að máli.

Dagur átti gott mót í Rúmeníu og varð í 2.-7. sæti með 7 vinninga af 9 mögulegum með árangur sem reiknast upp á 2533 elo stig. Íslenskir skákmenn gera víðreist þessa dagana og er skemmst að minnast árangurs Hjörvars Steins Grétarssonar sem náði frábærum árangri á mótinu í Pardubice í Tékklandi og hlaut þar 6 ½ vinning úr 9 skákum með árangur upp á 2598 stig og var hársbreidd frá því að ná lokaáfanga að stórmeistaratitli.

Dagur varð í 3. sæti á Skákþingi Íslands í vor. Hann býr nú í Ungverjalandi og einbeitir sér að skákinni og mótið í Rúmeníu er það þriðja sem hann tekur þátt í á stuttum tíma. Í skákinni við Suba koma bestu eiginleikar hans fram, mikil keppnisharka í flókinni stöðu. Það var einnig merkilegt að Dagur hikaði ekki við að ganga beint inn í afbrigði sem hann vissi að Suba gerþekkti. Mörgum þykir skynsamlegra að sneiða hjá slíkum leiðum en hitt sjónarmiðið á líka sína fylgismenn - að taka slaginn í eftirlætisbyrjunum andstæðingsins. Dagur kom ekki að tómum kofanum hjá Suba og stóð höllum fæti lengi vel. Niðurstaðan varð nú samt ein tilþrifamesta viðureign sem íslenskur skákmaður hefur teflt í seinni tíð:

Mihai Suba - Dagur Arngrímsson

Enskur leikur

1. c4 e5 2. Rc3 d6 3. g3 f5 4. d4 e4 5. h4 Rf6 6. Bg5 c6 7. Db3 Be7 8. e3 O-O 9. Rge2 Rg4 10. Bxe7 Dxe7 11. Rf4 c5 12. Be2 Rc6 13. Hd1 b6 14. Kf1 Bb7 15. Kg2 cxd4 16. c5+ Kh8 17. cxd6 Dd7!

Eftir 17. ... Dxd6 18. Rb5 (eða jafnvel fyrst 18. Bxg4 og síðan 19. Rb5) ásamt 19. Rxd4 er hvíta staðan mun betri.

18.h5!

Hvítur hefur teflt byrjunina af miklum þrótti og hótar nú 19. Bxg4 fxg4 20. Rg6+! og mátar.

18. ... Ra5 19.Db5 Bc6 20. Rg6+ hxg6 21. hxg6+ Rh6 22. De5 Kg8 23. Dxd4?

Hér missti Suba af besta leiknum 22. Rd5! sem setur svartan í afar erfiða stöðu. Eitt afbrigðið er 22. ...Hae8 23. Re7+ Hxe7 24. dxe7 Dxe7 25. Dxe7 Hxe7 26. b4! Rb7 27. Hc1 Be8 28. Hc8 og vinnur.

23. ... De6 24. b4

- Sjá stöðumynd -

24. ... f4!

Gagnsóknin er hafin! Svartur hótar nú 24. ... f3+ og fær auk þess f5-reitinn fyrir riddarann.

25. exf4 Rf5 26. De5 e3+ 27.Rd5 Dxe5 28. fxe5 exf2 29. Kh2?

29. Kh3 var betra.

29. ... Bxd5 30. Hxd5 Rc6 31. Hc5?

Það er eins og að Suba hafi gleymt því að h-línan var lokuð.

31. ... bxc5 32.Bc4+ Kh8 33. Kg2+ Rh6 34. e6

Þó hvítu peðin séu ógnandi þá eru liðsyfirburðir svarts of miklir.

Re5 35. Be2 Hf6 36. bxc5 Hxe6 37. Kxf2 Hf8+ 38. Kg2 Hxg6 39. Hh5 Rd7 40. c6 Hxd6

og Suba gafst upp.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 5. ágúst 2012.

Skákþættir Morgunblaðsins

[Event "PAB Romania Open 2012"] [Site "Arad ROU"] [Date "2012.07.31"] [Round "7.5"] [White "Suba,M"] [Black "Arngrimsson,D"] [Result "0-1"] [WhiteTitle "GM"] [BlackTitle "IM"] [WhiteElo "2428"] [BlackElo "2366"] [ECO "A21"] [Opening "English opening"] [WhiteFideId "1203363"] [BlackFideId "2301288"] [EventDate "2012.07.27"] 1. c4 e5 2. Nc3 d6 3. g3 f5 4. d4 e4 5. h4 Nf6 6. Bg5 c6 7. Qb3 Be7 8. e3 O-O 9. Nge2 Ng4 10. Bxe7 Qxe7 11. Nf4 c5 12. Be2 Nc6 13. Rd1 b6 14. Kf1 Bb7 15. Kg2 cxd4 16. c5+ Kh8 17. cxd6 Qd7 18. h5 Na5 19. Qb5 Bc6 20. Ng6+ hxg6 21. hxg6+ Nh6 22. Qe5 Kg8 23. Qxd4 Qe6 24. b4 f4 25. exf4 Nf5 26. Qe5 e3+ 27. Nd5 Qxe5 28. fxe5 exf2 29. Kh2 Bxd5 30. Rxd5 Nc6 31. Rc5 bxc5 32. Bc4+ Kh8 33. Kg2+ Nh6 34. e6 Ne5 35. Be2 Rf6 36. bxc5 Rxe6 37. Kxf2 Rf8+ 38. Kg2 Rxg6 39. Rh5 Nd7 40. c6 Rxd6 0-1

Skákveisla á Lækjartorgi á Menningarnótt

Skákakademían býður til veislu á Lækjartorgi á Menningarnótt, nk. laugardag, þar sem hver viðburðurinn rekur annan í 8 tíma fjölbreyttri dagskrá. Slegið verður upp tjaldi á torginu, þar sem boðið verður upp á kleinur og kakó.

Dagskráin á laugardaginn hefst á því að Helgi Ólafsson stórmeistari teflir klukkufjöltefli við íslenska kvennalandsliðið, sem undirbýr sig nú fyrir Ólympíumótið í Tyrklandi sem hefst síðar í mánuðinum.

Þá verður efnt til II. Alheimsmótsins í leifturskák, en fyrsta mótið fór fram á Menningarnótt í fyrra og vakti mikla lukku. Þá er umhugsunartími keppenda aðeins 1 mínúta, og því mikill handagangur í öskjunni.

Hjörvar Steinn Grétarsson landsliðsmaður mun tefla fjöltefli við gesti og gangandi, og krakkarnir í Úrvalsliði Skákakademíunnar skora á alla sem þora!

Þá verður nú efnt til fyrsta opinbera mótsins í nýju og æsispennandi keppnisformi, sem kalllað er ,,Heilinn og höndin". Tveir keppendur eru saman í liði og má samanlögð stigatala þeirra ekki fara yfir 4300 stig.  Heilinn mælir fyrir um hvaða gerð af taflmanni á að hreyfa (til dæmis peð, riddara, kóng). Stranglega er bannað að tiltaka HVAÐA mann á að hreyfa og keppendur mega EKKERT samráð hafa. Höndin velur leikinn og ýtir á klukkuna.

Margt fleira verður á dagskránni í skáktjaldinu á Lækjartorgi og verður m.a. dregið um töfluröð á Íslandsmóti skákfélaga.

Skákakademían vonast til að sjá sem allra flesta skákáhugamenn á öllum aldri, enda frábært að skákgyðjan skuli verða í miðpunkti hátíðahaldanna á Menningarnótt.

Dagur vann í sjöundu umferð - er í 2.-5. sæti

Alþjóðlegi meistarinn Dagur Arngrímsson (2375) vann ungverska alþjóðlega meistarann Ervin Toth (2466) í sjöundu umferð First Saturday-mótsins sem fram fór í gær.  Dagur hefur 4 vinninga og er í 2.-5. sæti.

Í áttundu og næstsíðustu umferð, sem fram fer í dag teflir Dagur við alþjóðlega meistarann Bernal Gonzalez (2430) frá Kosta Ríka.

10 skákmenn taka þátt SM-flokki og eru meðalstigin 2430.  Dagur er númer átta í stigaröð keppenda.

• Heimasíða mótsins
• Chess-Results

Stórmót Árbæjarsafns og Taflfélags Reykjavíkur fer fram í dag

Stórmót Árbæjarsafns og Taflfélags Reykjavíkur  fer fram sunnudaginn 12. ágúst. Teflt verður í Árbæjarsafni og hefst  taflið kl. 14. Tefldar verða 7 umferðir með umhugsunartímanum 7 mín. á  skák.

Á undan, eða kl.13, fer fram lifandi tafl, en lifandi taflið er fyrir  löngu orðinn árviss og skemmtilegur viðburður í dagatali skákmanna.

Veitt verða verðlaun fyrir þrjú efstu sætin í Stórmótinu, 12.000 kr., 8.000 kr. og 5.000 kr.

Þátttökugjöld í Stórmótinu eru kr. 1100 fyrir 18 ára og eldri, en ókeypis  fyrir yngri en 18 ára og eru þátttökugjöld jafnframt aðgangseyrir í  safnið. Þeir sem eiga ókeypis aðgang í safnið, t.d menningarkort, þurfa ekki að borga þátttökugjöld í mótið.

Ekkert kostar að taka þátt í Stórmótinu fyrir þá sem taka þátt í lifandi taflinu.

Enn eru laus pláss í lifandi taflinu og leika peð, riddara, biskup,  hrók, kóng eða drottningu.

Áhugasamir hafi samband við Torfa Leósson ([e-mail]), s.697-3974.  Skráningu í lifandi taflið lýkur fimmtudaginn 9. ágúst. Þeir sem taka þátt í lifandi taflinu mæti á Árbæjarsafn þann 12. ágúst kl.12.30 til að fara í búninga.

Minningarmót um Hauk Angantýsson fer fram á morgun

Skákfélag Vinjar heldur mót til minningar um Hauk Angantýsson á mánudaginn klukkan 13:00.  Haukur lést eftir veikindi í byrjun maí sl. en hann leiddi Skákfélag Vinjar seinasta vetur.

Það var mikil hamingja fyrir félagsmenn þegar Haukur settist að borðinu aftur eftir margra ára hlé, gekk til liðs við Vinjarliðið og sýndi að lengi lifir í gömlum glæðum. Haukur var goðsögn í íslensku skáklífi, frægur fyrir baráttu sína og lengi meðal allra sterkustu skákmanna landsins. Fyrrum Íslandsmeistari og sigurvegari á World Open í Bandaríkjunum þar sem hann, ekki enn kominn með alþjóðlegan titil, varð fyrir ofan hvern stórmeistarann á fætur öðrum.

Eftir fráfall Hauks afhentu systkini hans Skákfélagi Vinjar skákborð hans og bækur til varðveislu  og munu bækurnar verða uppi við auk þess sem marmaraborði kappans verður stillt upp á fyrsta borði. Systkini Hauks verða með okkur á þessu móti.

Veitt verða verðlaun í gríð og erg, fimm efstu sætin og aldursflokkaverðlaun, óvæntasti vinningurinn o.s.fr. Þá mun sigurvegari mótsins  hljóta forláta bikar og skákbók úr smiðju Hauks.  Ingibjörg Edda Birgisdóttir verður skákstjóri.

Að sjálfsögðu verður kaffihlé  en tefldar verða sex umferðir með sjö mínútna umhugsunartíma.

Skákfélag Vinjar tekur fagnandi á móti öllum þeim sem koma og heiðra minningu þessa mikla karakters og skáksnillings.

Myndaalbúm tileiknað Hauki (HJ á flestar nýrri myndirnar)

Smá skúr stöðvar skákmenn - golfmóti frestað

Fyrirsögn hér á Skák.is var misvísandi í gær þar sem í ljós hefur komið að smá skúr stöðvar skákmenn. Íslandsmóti skákmanna í golfi sem átti að fara fram í dag hefur verið frestað vegna veðurs. 

Reyndar eru nokkur hraustmenni sem ætla að halda sínu striki og spila Sveinkotsvöll um kl. 13:00-13:30 í dag.

Sjálft Íslandsmótið er fyrirhugað 15. september nk.  

Heimasíða Íslandsmóts skákmanna í golfi

Skáknámskeið í Rimaskóla

Skákakademía Reykjavíkur og Skákdeild Fjölnis efna til skáknámskeiðs fyrir börn á grunnskólaaldri dagana 13.-16. ágúst.

Námskeiðið fer fram í Rimaskóla og er frá 10:00 - 12:00.

Kennarar verða Stefán Bergsson, Björn Ívar Karlsson og fleiri.

Þátttökugjald 4.000 kr.

Skráning á [e-mail].

Borgarskákmótið fer fram á þriðjudag

Borgarskákmótið fer fram þriðjudaginn 14. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa Reykjavíkurfélögin, Taflfélag Reykjavíkur og Taflfélagið Hellir, að mótinu, eins og þau hafa gert síðustu ár.

Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið er öllum opið og er þátttaka ókeypis en skráning fer fram á Skák.is

Einnig er hægt að skrá sig í í síma 866 0116 Vigfús og 862 6290 (Sigurlaug). Tefldar verða 7 umferðir með 7 mínútna umhugsunartíma. Þetta er í 27. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Arnar Gunnarsson, sem þá tefldi fyrir Perluna.

Hægt er að fylgjast með skráningu í mótið í hér.

Verðlaun:

1. 15.000 kr.
2. 10.000 kr.
3. 5.000 kr.

Dagur vann stórmeistara í sjöttu umferð

Alþjóðlegi meistarinn Dagur Arngrímsson (2375) vann ungverska stórmeistarann Zoltan Varga (2476) í sjöttu umferð First Saturday-mótsins sem fór í dag.  Dagur hefur 3 vinninga og er í 5.-7. sæti.

Í sjöundu umferð, sem fram fer á morgun, teflir Dagur við ungverska alþjóðlega meistarann Ervin Toth (2466).

10 skákmenn taka þátt SM-flokki og eru meðalstigin 2430.  Dagur er númer átta í stigaröð keppenda.

• Heimasíða mótsins
• Chess-Results

Smá rigning stöðvar ekki skákmenn

Á morgun fer fram Íslandsmót skákmanna í golfi.  Mótið var upphaflega hluti af Epli.is-mótinu sem var blásið af vegna veðurs.  Skákmenn láta smá rigningu engin áhrif á sig hafa og ætla að halda sínu striki og spila golf á morgun á Hvaleyrarvelli.  Nánar má lesa um Íslandsmótið á Skákhorninu.

Þeir sem hafa áhuga að spila og eru ekki skráðir geta haft samband við Halldór Grétar Einarsson í netfangið [e-mail].

Heimasíða Íslandsmóts skákmanna í golfi