Íslandsmót kvenna hefst á föstudag

Íslandsmót kvenna hefst föstudaginn 19. október í húsnæði Skáksambands Íslands, Faxafeni 12, Reykjavík.  Teflt verður í einum flokki, þ.e. mótið opið öllum konum/stúlkum.

Nú þegar eru 9 skákkonur skráðar til leiks en nálgast má keppendalistann á Chess-Results. Búast má við að það bætist vel við á keppendalistannfram að móti.

Tímamörk:   90 mín. + 30 sek. á leik.

Dagskrá:         

• Föstud., 19. okt., kl. 19, 1. umferð
• Mánud., 22. okt., kl. 19, 2. umferð
• Miðvikud., 24. okt., kl. 19, 3. umferð
• Föstud., 26. okt., kl. 19, 4. umferð
• Sunnud., 28. okt., kl. 13, 5. umferð
• Mánud., 29. okt., kl. 19, 6. umferð
• Miðvikud., 31. okt., kl. 19, 7. umferð

Verðlaun:       

• 1. 40.000.-
• 2. 25.000.-
• 3. 15.000.-

Skráning fer fram hér á Skák.is.  

• Heimasíða mótsins
• Chess-Results

KR-pistill: Birgir Berndsen í banastuði

Skæður skákbakteríu faraldur geisaði grimmt í gærkvöldi á Alþjóðlega handþvottadeginum vestur í KR-heimili. Hvað sem öllum handþvotti leið í eiginlegum skilningi þvoðu menn þar hendur sínar af öllu misjöfnu.   Könnuðust ekki við nein brögð í tafli og hvítþvoðu sig af öllum jafnteflistilhneigingum. Allir vinningar væru velfengnir, byggðust á hreinum snilldartöktum og lævísum brellum eða með hjálp andstæðingsins.    

Í síðustu viku var það alþjóðlegi geðheilbrigðisdagurinn sem haldinn var hátíðlegur en nú dagur tileinkaður mikilvægi handþvottar í tíma og ótíma. Þetta vekur vissulega upp hugleiðingar um hreinlæti við skákborðið. Er nægilega vel að því hugað. Óvíða komast menn í jafn beina handsnertingu og við skákiðkun. Bæði takast menn í hendur áður en skákin hefst og  tefla síðan oft á tíðum með óhreinum taflmönnum sem þeir skiptast á að snerta og á skítugum skákdúkum. Algengt er að  keppendur snæði með höndunum milli skáka án þess að hugsa um að sápuþvo sér um hendurnar áður, sem þó væri líklega æskilegt að teflendur,  sérstaklega  ungmenni,  myndu að temja sér. 

Mikilvægi handþvottar í sóttvarnarskyni uppgötvaðist aðeins fyrir 700 árum, sem helsta vörn til að koma í veg fyrir smit milli manna og  nú ekki síst hvað varðar fjölónæmar bakteríur auk farsótta.  Áður fyrr var handþvottur aðallega iðkaður í tengslum við trúarlegar athafnir.  Nú til dags er ónæmiskerfi mannsins og almenn sýkingarhætta mjög ofarlega á baugi og því kannski ekki úr vegi að leiða hugann aðeins að þessum málum líka við skákborðið. Hvernig væri að hafa sótthreinsunarkrem og klúta tiltæka á skákstöðum. Svo mætti þvo taflmennina með þeim líka og dúkanna af og til.  

Það var þröng á þingi í Frostaskjólinu þegar ýtt var á klukkurnar upp úr klukkan hálf átta. Hátt á þriðja tug spenntra keppenda mættir til tafls, sem tilbúnir voru til að leggja allt í sölurnar til að máta mótherjann eða falla með sæmd ella.  Sú varð líka  raunin því sjaldan þessu vant vannst mótið með  aðeins 9½ vinningi af 13 mögulegum. Allir urðu að bíta í það súra epli að að lúta í gras, tapa  nokkrum skákum að þessu sinni vegna stórra eða smárra yfirsjóna eða þá á tíma. Vikuna áður hafði hinn ungi meistari Hjörvar Steinn Grétarsson heiðrað KR-inga með þátttöku sinni og unnið með fullu húsi og jafnað þar með vallarmet Róberts Hess frá því í fyrra enda þar skáksnillingar á ferð.   

Allra snjallastur eftir harða og tvísýna baráttu efstu manna varð að þessu sinni hinn afar snjalli  og fagureygði  Birgir Berndsen, sem sýndi það enn og sannaði að fáir standast  honum snúning á góðum degi.  Úrslitin réðust ekki fyrr en í síðustu umferð með hjálp annarra.  Birgir vann einnig mótið fyrir hálfum mánuði og stal þá senunni frá Gunnarunum þremur, Birgissyni, Gunnarssyni og Skarphéðinsyni, sem títt erið hafa í toppbaráttunni að undanförnu, ásamt Jóni G. Friðjónssyni, þá er hann mætir til leiks.  Næst komu þeir Gunnar Birgisson og Jón G. Friðjónsson með 9 vinninga og hinn síungi og eitilharði altmeister Gunnar Gunnarsson með 8. 5.

Önnur úrslit má sjá á meðf. mótstöflu og myndum.

 

 

Meira á www.kr.net

Myndaalbúm (ESE)

 

Skákbúðir að Úlfljótsvatni - helgina 20. og 21. október

Áhugasömum skákkrökkum á barna-og unglingsaldri sem æfa með íslenskum skákfélögum stendur til boða tveggja daga æfinga- og skemmtiferð á vegum Skákdeildar Fjölnis, Skákakademíu Reykjavíkur og Skákskóla Íslands. Skákbúðirnar verða í útilífsmiðstöð skáta við Úlfljótsvatn. Í skákinni skiptir aldur litlu máli.

Umsjón og fararstjórn verður á höndum þeirra Helga Árnasonar formanns Skákdeildar Fjölnis, Stefáns Bergssonar framkvæmdastjóra Skákakademíunnar og Andreu Margrétar Gunnarsdóttur frá Skákfélagi fjölskyldunnar.

Fjöldi skákkennara og leiðbeinenda verða til staðar og halda utan um alla skákkennslu og skákmót sem boðið verður upp á.

Verð á hvern þátttakenda er 8.000 kr fyrir þessa tvo daga. Innifalið i gjaldinu er allur matur, kennsla, skálaleiga, námsgögn, þátttökugjald í skákmóti og rútuferð fram og til baka. Þátttakendurur eiga ekki að hafa með sér nesti né peninga til ferðarinnar.

Aðstaða öll við Úlfljótsvatn telst einstök fyrir skákbúðir og þar er umhverfið fallegt. Svefnskálar, matsalur og hópherbergi eru til staðar fyrir samstilltan hóp. Í frjálsum tíma er boðið upp á frábæra aðstöðu á skipulögðu útivistarsvæði sem höfðar til allra þátttakenda. Reglur eru í gildi í ferðinni líkt og um skólaferðalag væri að ræða. Brjóti nemandi alvarlega af sér verður hann við fyrsta tækifæri sendur heim á kostnað foreldra.

Skákbúðir við Úlfljótsvatn eru einstakt tækifæri fyrir áhugasama skákkrakka til að fá góða skákkennslu og efla samfélag við aðra skákkrakka. Dagskrá skákbúðanna er í samræmi við skákbúðir Fjölnis í Vatnaskógi apríl 2011 sem heppnuðust mjög vel. Skráning fer fram á skrifstofu Skáksambands Íslands s. 568 9141 netfang [e-mail] og hjá Skákakademíu Reykjavíkur netfang [e-mail]. Upplýsingar veitir Helgi Árnason s. 6648320

Heppilegt er að hafa meðferðis:

- Svefnpoka eða sængurfatnað

- Fatnað til skiptanna (nærföt, sokka, buxur, skyrtu, peysu)

- Lopapeysu, vettlinga, ullarsokka, trefil og húfu

- Vindheldan galla

- Stígvél og inniskó                                                                          

- Íþróttafatnað

- Handklæði, tannbursta og tannkrem

- Skemmtileg spil

- Myndavél / Ipod (ekki tekin ábyrgð á þessum tækjum)

 

Dagskrá skákbúða 20. - 21. okt. 2012:

laugardagur : 20. okt.                                                            

                                                                       

kl. 10:00          Brottför frá BSÍ                                              

-    10:15          Brottför frá N1 Ártúnsbrekku             

-    11:00          Móttaka við Úlfljótsvatn                     

-    11:30          Frjáls tími úti og inni                          

-    12:30          Hádegisverður                                    

-    13:15          Skákkennsla (hópar)                               

-    15:00          Kaffi.                                                                  

-    15:30      Frjáls tími - göngutúr

-    17:00          Skákkennsla (hópar)   

-    19:00          Kvöldverður.                                      

-    19:30          Frjáls tími                                

-    20:30          Kvöldvaka,  tvískák og spilatími                                               

-    22:00          Kvöldhressing og spjall á herbergjum

-    23:15          Hljóð komið á í herbergjum

 

sunnudagur : 21. okt.

kl. 09:00          Morgunmatur

kl. 09:30          Frjáls tími úti og inni

kl. 11:30          Hádegismatur

kl. 12:30          Einstaklings hraðskákmót

kl. 14:30          Verðlaunaafhending - 

kl. 15:00          Heimferð frá Úlfljótsvatni   

kl. 16:00          Ferðarlok við BSÍ       

Dagskrárlok

Friðrik með jafntefli í 2. umferð í Álaborg

Friðrik Ólafsson (2431) gerði jafntefli við svissneska alþjóðlega meistarann Andreas Dückstein (2208) í 2. umferð minningarmóts um Bent Larsen sem nú fer fram í Álaborg.  Friðrik hefur 1 vinning.

Á morgun teflir Friðrik við Svíann Kaj Andersson (2051)

61 skákmaður tekur þátt í mótinu og þar á meðal 4 stórmeistarar.  Það eru auk Friðriks; Miso Cebalo (2416), Króatíu, Oleg Chernikov (2415), Rússlandi og þýska goðsögnin Wolfgang Uhlmann (2325). Tefldar eru 7 umferðir.

• Heimasíða mótsins 
• Beinar útsendingar (hefjast kl. 9)

Stefán Þormar og Guðfinnur efstir í Ásgarði.

Stefán Þormar og Guðfinnur R. Kjartansson urðu efstir og jafnir í Ásgarði í dag með 9 vinninga af 10 mögulegum. Stefán reiknaðist aðeins hærri á stigum og varð því Hrókur dagsins. Þorsteinn Guðlaugsson varð svo í þriðja sæti með 8 vinninga.

Það má segja að tuttugu og einn og hálfur skákmaður hafi teflt í dag því að þeir félagar Birgir Sigurðsson og Finnur Kr. Finnsson skiptu deginum á milli sín og náðu sjöunda sæti.

Nánari úrslit:

• 1-2       Stefán Þormar Guðmundsson                                     9
•             Guðfinnur R Kjartansson                                            9
• 3          Þorsteinn Guðlaugsson                                               8
• 4          Valdimar Ásmundsson                                               6.5
• 5-8       Magnús V Pétursson                                                   5.5
•             Jón Víglundsson                                                         5.5
•             Birgir Sig. 2.5 / Finnur Kr  3                                       5.5
•             Jón Steinþórsson                                                         5.5
• 9-12     Magnús V Pétursson                                                   5
•             Haraldur Axel Sveinbjörnsson                                    5
•             Gísli Árnason                                                              5
•             Jónas Ástráðsson                                                         5
• 13-18   Egill Sigurðsson                                                          4.5
•             Hermann Hjartarson                                                    4.5
•             Baldur Garðarsson                                                      4.5
•             Gísli Sigurhansson                                                      4.5
•             Óli Árni Vilhjálmsson                                                  4.5
•             Friðrik Sófusson                                                          4.5
• 19        Hlynur Þórðarson                                                        4
• 20        Viðar Arthúrsson                                                        3
• 21        Eiður Á Gunnarsson                                                   1.5

 

Henrik endaði með jafntefli og tapi

Henrik Danielsen (2524) fékk ½ vinning í skákum dagsins á BSF Cup sem fram fóru í Brønshøj í Danmörku. Henrik gerði jafntefli við danska alþjóðlega meistarann Andreas Skytte Hagen (2416) en tapaði hins vegar fyrir Mads Andersen (2461).

Henrik hlaut 3½ vinning og endaði í 9. sæti. Frammistaða hans samsvaraði 2373 skákstigum og lækkar hann um 16 stig fyrir hana.

Andersen sigraði á mótinu en hann hlaut 6½ og náði jafnframt áfanga að stórmeistaratitli. 

10 skákmenn tóku þátt í a-flokknum og voru meðalstigin 2467 skákstig. Henrik var næststigahæstur keppenda.

Tefldar voru tvær skákir á dag alla daga nema fyrsta keppnisdag. 

• Heimasíða mótsins
• Beinar útsendingar

 

Bjarni og Valgarð efstir á skákæfingu á Skaganum

Í gær þann 15. október fór fyrsta skákæfingin hjá Taflfélagi Akraness fram eftir sumarhlé í húsnæði Fjölbrautarskólans á Akranesi. Það mættu 7 keppendur og þar á meðal 2 nemendur úr Brekkubæjarskóla. Eftir að allir höfðu teflt við alla voru efstir þeir Bjarni Sæmundsson og Valgarð Ingibergsson  með 5 vinninga af 6 mögulegum en næstir á eftir þeim voru Gunnar Magnússon og  Kristinn Jens Sigurþórsson.

 

 

Skákakademían: Vikulegar heimsóknir í Hringinn -- safnað fyrir leikstofu barnaspítalans

Skákakademían byrjaði fyrir nokkru vikulegar heimsóknir í Barnaspítala Hringsins, svo nú er teflt í leikstofunni á fimmtudögum klukkan 13. Leikstofan er sannkallaður griðastaður og þar er einstaklega vel hugsað um börnin og ungmennin í Hringnum.

Hrafn Jökulsson og Róbert Lagerman sinna skákstarfinu í Hringnum, jafnframt því sem góðum gestum verður boðið í heimsókn.

Samhliða skákstarfinu hefur Skákakademían sett af stað söfnun á bókum, leikjum, DVD-diskum og öðru afþreyingarefni fyrir börnin, enda getur tíminn stundum verið lengi að líða. Í dag afhentu fulltrúar Skákakademíunnar fyrstu gjafirnar á leikstofunni og kenndi þar margra skemmtilegra grasa.

Ólafur Guðmundsson framkvæmdastjóri Bergvíkur gaf úrval af DVD-diskum með fræðslu- og skemmtiefni fyrir börn og ungmenni.

Guðrún Vilmundardóttir hjá bókaforlaginu Bjarti lagði til barna- og unglingabækur eftir íslenska og erlenda höfunda.

Jóhann Friðrik Ragnarsson hjá Sögum útgáfu gaf splunkunýjar barnabækur, DVD-diska og fótboltabækur.

Sibba og Gróa, sem starfað hafa á leikstofu Hringsins um árabil, veittu gjöfunum viðtöku og báðu fyrir þakkir og kveðjur til þeirra sem með þessu móti auðga tilveruna fyrir krakkana á Barnaspítalanum.

Skákakademían mun halda áfram að safna skemmtilegu, fróðlegu og uppbyggilegu afþreyingarefni fyrir Barnaspítala Hringsins. Forsvarsmenn fyrirtækja sem vilja leggja þessu góða máli lið eru hvattir til að senda línu á [e-mail].

Stundatafla skákíþróttarinnar á höfuðborgarsvæðinu: Fjölmargar æfingar og mót í boði

Fjölmargar skákæfingar fyrir börn og fullorðna eru í boði hjá skákfélögunum á höfuðborgarsvæðinu. Í langflestum tilvikum eru æfingarnar ókeypis eða mjög hóflega verðlagðar. Hér er listi yfir þær skákæfingar og föstu mót sem í boði er.

Mánudagur kl. 13-15: Skákæfing í Vin, athvarfi Rauða krossins fyrir fólk með geðraskanir. Hverfisgötu 47.

Mánudagur kl. 17.15-18.45: Skákæfing fyrir börn og ungmenni hjá Taflfélaginu Helli, Álfabakka 14a.

Mánudagur kl. 19.30: Hraðskákmót í KR, Frostaskjóli.

Þriðjudagur kl. 13: Æfingar hjá Skákfélagi eldri borgara, Stangarhyl 4.

Þriðjudagur kl. 17-19: Skákdeild Hauka á Ásvöllum (5000 kr. veturinn).

Miðvikudagur kl. 13-17: Riddarinn, skákklúbbur aldraðra í Hafnarfirði, vikuleg skákmót, 10 umferðir með 10 mínútna umhugsunartíma. Strandbergi, safnaðarheimili Hafnarfjarðarkirkju. (300 kr. innifelur kaffi og meðlæti.)

Miðvikudagur kl.14.10-15.10. Taflfélag Garðabæjar með æfingar fyrir börn og ungmenni í Hofstaðaskóla. (5000 kr. veturinn).

Miðvikudagur kl. 15.10-16.10. Taflfélag Garðabæjar með æfingar fyrir börn og ungmenni (lengra komin) í Hofstaðaskóla. (5000 kr. veturinn).

Miðvikudagur kl. 17.30-18.30: Æfing fyrir börn og fullorðna hjá skákdeild Breiðabliks, Stúkunni, Kópavogsvelli.

Miðvikudagur kl. 17.30-18.30: Æfing fyrir börn og ungmenni í KR, Frostaskjóli.

Fimmtudagur kl. 14-15: Taflfélag Garðabæjar með æfingar fyrir börn og ungmenni í Flataskóla.

Fimmtudagur kl. 15.30-16.30: Taflfélag Garðabæjar með æfingar fyrir börn og ungmenni í Sjálandsskóla.

Fimmtudagur kl. 18: Gallerí Skák, Bolholti 6. Skákmót með 10 mínútna umhugsunartíma. (1000 kr., veitingar innifaldar).


Föstudagur kl. 14.30: Æfing fyrir börn og ungmenni á vegum Skákskólans og Skákakademíu Kópavogs, Stúkunni, Kópavogsvelli.

Laugardagur kl. 11-12.30: Skákæfingar fyrir börn og unglinga á vegum skákdeildar Fjölnis, Rimaskóla.

Laugardagur kl. 12.30-13.45: Skákæfingar fyrir stelpur / konur á öllum aldri á vegum Taflfélags Reykjavíkur, Faxafeni 12.

Laugardagur kl. 14-16: Skákæfingar fyrir börn og fullorðna á vegum Taflfélags Reykjavíkur, Faxafeni 12.

Forráðamenn skákfélaga og klúbba eru hvattir til að hafa samband ef villur eru í þessum lista eða ef einhverjar æfingar vantar.

Skákbúðir Fjölnis fara fram 20. og 21. október

Skákdeild Fjölnis, í samstarfi við Skákakademíu Reykjavíkur og Skákskóla Íslands, býður öðru sinni áhugasömum skákkrökkum upp á tveggja daga skákbúðir yfir eina helgi. Í fyrra tókst einstaklega vel til þegar Fjölnir stóð fyrir skákbúðum í sumarbúðum KFUM í Vatnaskógi. Nú verða skákbúðirnar í sumarbúðum skáta að Úlfljótsvatni helgina 20. - 21. október sem er vetrarleyfishelgi í flestum grunnskólum Reykjavíkur.

Boðið verður upp á skákkennslu á laugardegi og skákmót með fjölda vinninga á sunnudegi. Góður tími verður til leikja og frjálsan tíma í ævintýraveröldinni að Úlfljótsvatni og kvöldvöku með spilum og leikjum. Skákbúðirnar eru ætlaðar grunnskólakrökkum á öllum aldri sem búnir eru að nú undirstöðuatriðum skáklistarinnar.

Fyrir skákkennslunni fara þeir Helgi Ólafsson skólastjóri Skákskóla Íslands og Stefán Bergsson framkvæmdarstjóri Skákakademíunnar. Skákbúðastjórar verða þau Helgi Árnason formaður skákdeildar Fjölnis og Andrea Margrét Gunnarsdóttir frá Skákakademíu Reykjavíkur. Nemendum skákbúðanna verður skipt í flokka eftir getu og aldri og ætti því hver þátttakandi að fá kennslu við hæfi. Þátttökugjald verður 8000 kr og er fullt fæði, rútuferðir, skákkennsla, þátttaka í skákmóti og gjafir innifalið í verðinu.

Dagskrá og skipulag skákbúðanna liggur nú fyrir og verður kynnt á Íslandsmóti skákfélaga nú um helgina í Rimaskóla, á skak.is og Facebook auk þess sem tölvupóstur verður sendur til allra sem æfa skák með skákfélögum og skákskólum. Skráning fer fram á skrifstofu Skáksambandsins Faxafeni 12 í síma 568 9141 eða með tölvupósti [e-mail].