Skák.is

Færsluflokkur: Spil og leikir

18.2.2013 | 00:02

Rúnar hraðskákmeistari Akureyrar

Þegar í upphafi Hraðskákmóts Akureyrar sem háð var í Skákheimilinu í dag var ljóst að við ramman yrði reip að draga þar sem fór Rúnar Sigurpálsson, margkrýndur Norðurlandsmeistari og nýkrýndur Íslandsmeistari í ofurhraðskák. Fór Rúnar fram hæglátlega en vann þó flestar sínar skákir. Fráfarandi meistari hafði svipaðan hátt á en var þó full friðsamur í upphafi móts og var því ávallt skrefinu á eftir Rúnari.

Samhliða þeim í baráttunni um hinn eftirsótta titil var svo ungstirnið margherta, Jón "Jokko" Þorgeirsson, sem var fjarri afhuga sigri á mótinu. Ýmsir fleiri virtust hér líklegir til að skipta sköpum og má þar ekki síst nefna öldungardeildarmanninn Ólaf Kristjánsson sem sýndi mörgum meistaranum í tvo heimana. Ekki er hér rúm til að telja upp fleiri afrek en þó verður að geta grimmilegra örlaga hins harðsnúna baráttumanns Sveinbjarnar Sigurðssonar sem fann í þetta sinn enga náð fyrir augum skákgyðju og örlaganorna og hafnaði óverðskuldað í 13. sæti, sem er ekki hans háttur. Hann mun mæta tvíefldur til leiks í næstu rimmu.

Röð efstu manna:

Rúnar Sigurpálsson 11 v. af 12
Áskell Örn Kárason 10,5 v.
Jón Kristinn Þorgeirsson 10 v.

Sjá nánar á vefsíðu SA.

Spil og leikir | Slóð | Facebook | Athugasemdir (0)

17.2.2013 | 20:14

Kínversku snillingarnir sigruðu: Íslenska liðinu boðið til Kína

Landskeppni Kína og Íslands í skák sem haldin var í Arion banka um helgina lauk með öruggum sigri kínversku snillinganna 47,5 vinningum gegn 24,5 vinningum, þrátt fyrir góð tilþrif íslenska liðsins á köflum. Kínverjar eru sannkallað risaveldi í skákheiminum, og þriðja besta skákþjóð heims. Kínverska liðið var skipað tveimur ofurstórmeisturum, tveimur skákdrottningum og tveimur undrabörnum. Sendiherra Kína bauð íslenska landsliðinu formlega í heimsókn til Kína á næsta ári, í hátíðarkvöldverði í sendiráðinu á laugardagskvöld.

Viðureign liðanna var gríðarlega skemmtileg, og lögðu margir leið sína í Borgartúnið til að fylgjast með. Ísland og Kína höfðu áður mæst 7 sinnum, og er þetta annar sigur Kínverja. Bestum árangri í kínverska liðinu náði Yu Yangyi sem fékk ótrúlega 11,5 vinninga af 12 mögulegum. Aðrir í liðinu voru ofurstórmeistarinn Bu Xiangzhi, landsliðskonurnar Huang Qian og Tan Zhongyi og undrabörnin Wei Yi og Wang Yiye.

Bestum árangri Íslendinganna náði Hjörvar Steinn með 5,5 af 12 en aðrir liðsmenn voru Helgi Ólafsson, Þröstur Þórhallsson, Guðmundur Kjartansson, Jón Viktor Gunnarsson, Lenka Ptácníková, Hannes Hlífar Stefánsson, Mikael Jóhann Karlsson,Oliver Aron Jóhannesson, Dagur Ragnarsson, Jón Trausti Harðarson og Sigurbjörn Björnsson.

Verðlaunaafhending í kjölfar mótsins var í senn hátíðleg og skemmtileg. Össur Skarphéðinsson utanríkisráðherra flutti ræðu, og fagnaði sívaxandi samstarfi kínverska og íslenska skáksambandsins. Ma Jisheng sendiherra Kína á Íslandi þakkaði góðar móttökur kínverska skáklandsliðsins og sagði skákíþróttina mikilvæga í hinum góðu samskiptum Íslands og Kína. Þá afhenti Jón L. Árnason öllum keppendum og sendiherranum gjafir, en Jón sem er einn af sem er einn starfsmaðurmaður Arion banka varð heimsmeistari unglinga í skák árið 1977.

Gunnar Björnsson forseti Skáksambandsins þakkaði kínversku gestunum fyrir skemmtilega keppni, sem og Kínversk-íslenska menningarfélaginu sem nú fagnar 60 ára afmæli. Þá þakkaði Gunnar kínverska sendiráðinu og kínverska skáksambandinu fyrir frábæra samvinnu. Landskeppnin var haldin í tilefni afmælis KÍM og skipulögð í samvinnu við Skáksamband Íslands, með stuðningi Arion banka, CCP, Promens, Icelandic og Elkem á Íslandi.

Spil og leikir | Breytt s.d. kl. 22:42 | Slóð | Facebook | Athugasemdir (1)

17.2.2013 | 20:00

Skákþáttur Morgunblaðsins: Hugsaði lengi í þekktri stöðu

Ekki veit ég hvaðan Jóhann Hjartarson fékk skákhæfileikana en það nægir kannski að nefna að Þórarinn Sigþórsson tannlæknir er frændi hans. Forfeður þeirra í Borgarfirðinum voru bændur góðir og miklir spilamenn. Þegar Jóhann, sem varð fimmtugur þann 8. febrúar, tók sín fyrstu skref í skákinni í TR þótti nú ekkert fyrirtak hve drengurinn grautaði í mörgum byrjunum. Ingvar Ásmundsson var hins vegar fljótur að benda á að pilturinn hefði gott handbragð og að stíll hans væri í mótun. Jóhann varð Íslandsmeistari 17 ára gamall vorið 1980 og var yfirburðamaður á unglingamótum heima og erlendis. Í ársbyrjun 1984 var hann búinn að ná utan um hina miklu „efnisskrá" sína og frábærar hugmyndir streymdu fram. Hann byrjaði það ár með því að vinna alþjóðlegt mót Búnaðarbankans, síðan efstur við þriðja mann á Reykjavíkurskákmótinu og Íslandsmeistari um haustið. Minnisstætt atvik úr síðustu umferð Reykjavíkurskákmótsins 1984: Efim Geller, þessi samanrekni hnefi frá Odessa, hugsaði lengi í þekktri stöðu Spænska leiksins: nú hikaði hann við að leika því sem fræðin mæltu með. Næm skynjun eða eðlislæg tortryggni? Altént vék Geller frá alfaraleið og jafntefli varð niðurstaðan. Jóhann var raunar vopnaður áætlun sem kollvarpaði hugmyndum manna um þessa stöðu. Eftir mótahrinu þessa árs kom stórmeistaratitillinn af sjálfu sér árið 1985, glæsileg taflmennska í London og á ÓL í Dubai haustið 1986, síðan fleytti annað sæti á svæðamóti í Gausdal í vetrarbyrjun 1987 honum á millisvæðamótið í Szirak með millilendingu á sterku móti í Moskvu.

„Hann tefldi frábærlega í Szirak," sagði Tal. Jóhann hlaut 12 ½ v. af 17 og varð í 1.-2. sæti ásamt Valeri Salov. Án efa mesti mótasigur íslenska skákmanns. Einvígi hans við Kortsnoj í Saint John í Kanada í ársbyrjun 1988 bauð upp á eitt mesta fjölmiðlafár íslenskrar skáksögu, hersing blaðamanna og beinar útsendingar. Sigur Jóhanns var verðskuldaður en margir sáu Kortsnoj í nýju ljósi eftir þá rimmu.

Á Evrópumóti landsliða í Ungverjalandi árið 1992 vann Jóhann silfur fyrir frammistöðu sína á 1. borði, hlaut 6 vinninga af átta mögulegum. Sigur hans í keppni við Armena, sem lauk 2:2, er gott dæmi um færni hans í hægfara stöðubaráttu. Tilfæringar riddarans frá b6 eru eftirminnilegur þáttur þessarar vel tefldu skákar:

Rafael Vaganian - Jóhann Hjartarson

Grünfelds-vörn

1. Rf3 Rf6 2. c4 g6 3. d4 Bg7 4. g3 O-O 5. Bg2 c6 6. O-O d5 7. cxd5 cxd5 8. Rc3 Rc6 9. Re5 Bf5 10. Rxc6 bxc6 11. Bf4 Rd7 12. Ra4 Da5 13. b3 Rb6 14. Bd2 Db5 15. Rc3 Da6 16. Be3 Had8 17. Dd2 c5 18. Hfd1 c4 19. b4? Da3!

Skorðar a2-peðið. „Drottningin er lélegur „blokkerari," sagði Nimzowitch - frá því eru undantekningar!

20. b5 a6 21. bxa6 Hd7 22. h3 h5 23. a7 Dxa7 24. a4 Da5 25. Ha2 Hfd8 26. Hda1 Rc8 27. Hb2 Ra7 28. f4 Rc6 29. Bf2 Da7 30. Hd1 Ra5 31. e3 e6 32. De2 Bd3 33. Df3 Hb7 34. Hb5 Hxb5 35. axb5 Rb3 36. g4 hxg4 37. hxg4 Da5 38. Be1

Vaganian var algerlega yfirspilaður, ekki gekk 38. Re2 vegna 38. .... d2 og vinnur.

38. ... Rxd4! 39. Dh3 Rc2 40. Rxd5 Da3! 41. Dh4 Hxd5 42. Bxd5 exd5 43. Dd8+ Bf8 44. Bf2 Db3 45. b6 Rd4 46. Ha1 Db2 47. Ha8 Re6 48. Dh4 c3 49. Df6 De2 50. Ha1 Dxg4+ 51. Kh2 Be4

- og Vaganian gafst upp.

Helgi Ólafsson

helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 10. febrúar 2013.

Skákþættir Morgunblaðsins

Spil og leikir | Breytt 9.2.2013 kl. 11:19 | Slóð | Facebook | Athugasemdir (0)

17.2.2013 | 14:42

Það tókst! Íslenskur sigur í 8. umferð

Íslenska liðið vann langþráðan sigur í 8. umferð landskeppninnar við Kína, en þá fengu okkar menn 3,5 vinning gegn 2,5. Hannes Hlífar Stefánsson, Þröstur Þórhallsson og Guðmundur Kjartansson sigruðu, og Helgi Ólafsson gerði jafntefli.

Kínverjar hafa örugga forystu í heildarkeppninni, 33-15.

Frábærar aðstæður eru í Arion banka, Borgartúni, og vel er tekið á móti áhorfendum. Nú eru fjórar umferðir eftir og er áætlað að keppninni ljúki um klukkan 17.30. Allir velkomnir!

Spil og leikir | Slóð | Facebook | Athugasemdir (0)

17.2.2013 | 14:13

Landskeppnin við Kína í fullum gangi

Landskeppnin við Kína er nú í fullum gangi og áttunda umferð nýhafin. Kínverja leða mjög örugglega. Íslenska liðið fékk óvæntan liðsauka í dag þegar Hannes Hlífar Stefánsson, nýkominn að utan þar sem hann tefldi á tveimur alþjóðlegum mótum. Búast má því við jafnari viðureignum en í gær.

Hægt er að koma í höfuðstöðvar Arion banka, Borgartúni 19, og fylgjast með snildinni.

Spil og leikir | Slóð | Facebook | Athugasemdir (0)

17.2.2013 | 11:48

Seinni hálfleikur í landskeppni Íslands og Kína í skák í dag

Seinni hálfleikur í landskeppni Íslands og Kína í skák hefst klukkan 13 í Arion banka í Borgartúni. Kínversku skáksnillingarnir hafa góða forystu eftir fyrri daginn, enda er lið þeirra gríðarlega vel skipað. Kínverjar leiða með 25,5 vinningi gegn 10,5, en íslensku keppendurnir eru staðráðnir í að breyta þeim tölum í dag.

Áhorfendur eru velkomnir í Arion banka í Borgartúni, en keppnin stendur frá 13 til 17 í dag. Mjög góðar aðstæður eru á keppnisstað, jafnt fyrir skákmeistarana sem gesti, og lögðu fjölmargir leið sína í Borgartúnið í gær til að fylgjast með tilþrifum íslensku og kínversku skákmannanna.

Hjörvar Steinn Grétarsson er að standa best Íslendinganna en hann hefur hlotið 50% vinningshlutfall. Lenka Ptácníková hefur einnig staðið sig vel og lagði meðal annars Bu Xiangzhi (2675) að velli í hörkuskák. Mikael Jóhann Karlsson vann síðustu skák dagsins vann mátaði Wang Yiye í lokaskák dagsins með aðeins einu sekúndu eftir á klukkunni.

Það eru Skáksamband Íslands og KÍM (Kínversk-íslenska menningarfélagið) sem standa að keppninni.

Aðalstyrktaraðilar mótsins eru Arion banki, CCP, Elkem á Íslandi, Icelandic og Promens.

Spil og leikir | Slóð | Facebook | Athugasemdir (0)

17.2.2013 | 07:00

Barna-og unglingameistaramót Reykjavíkur/Stúlknameistaramót Rvk

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 17. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir Monrad-kerfi með umhugsunartímanum 15 mín. á skák. Teflt verður í einum flokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2013, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2013, sé hún búsett í Reykjavík eða félagi í reykvísku taflfélag.

Til viðbótar verða veitt verðlaun fyrir þrjú efstu sætin í aldursflokknum 12 ára og yngri (fædd 2000 og síðar).

Mótið er opið öllum krökkum 15 ára og yngri (fædd 1997 og síðar).

Skráning fer fram á taflfelag@taflfelag.is (vinsamlegast gefið upp nafn, fæðingarár, símanúmer, skóla og taflfélag (ef við á)) og einnig er hægt að skrá sig á mótsstað sunnudaginn 17. febrúar frá kl. 13.30- 13.45. Skákmótið hefst kl. 14.

Aðgangur á mótið er ókeypis.

Spil og leikir | Breytt 11.2.2013 kl. 22:41 | Slóð | Facebook | Athugasemdir (0)

16.2.2013 | 18:44

Kínverjar með örugga forystu í Landskeppninni

Kínverjar hafa örugga forystu gegn Landskeppninni gegn Íslendingum í hálfleik en fyrri hlutinn fór fram í Arion banka í Borgartúni í dag. Hjörvar Steinn Grétarsson er að standa best Íslendinganna en hann hefur hlotið 50% vinningshlutfall. Lenka Ptácníková hefur einnig staðið sig vel og lagði meðal annars Bu Xiangzhi (2675) að velli í hörkuskák. Mikael Jóhann Karlsson vann síðustu skák dagsins vann mátaði Wang Yiye í lokaskák dagsins með aðeins einu sekúndu eftir á klukkunni.

Það eru Skáksamband Íslands og KÍM (Kínversk-íslenska menningarfélagið) sem standa að keppninni.

Staðan er hálfleik er 10,5-25,5. Kínverjar eru engir aukvisar í skáklistinni en þeir hafa á að skipa þriðja sterkasta landsliðið heims í karlaflokki og því sterkasta í kvennaflokki.

Aðalstyrktaraðilar mótsins eru Arion banki, CCP, Elkem á Íslandi, Icelandic og Promens.

Skákirnar frá í dag fylgja með fréttinni.

Nánari fréttir frá Landskeppninni væntanlegar.

Veljið skák (36 alls):

Spil og leikir | Slóð | Facebook | Athugasemdir (0)

16.2.2013 | 15:26

Landskeppnin við í fullum gangi

Landskeppnin við Kína er nú í fullum gangi og þriðja umferð nýhafin. Kínverjar leiða 9-3. Hægt er að fylgjast með skákunum beint.

Hægt er að koma í höfuðstöðvar Arion banka, Borgartúni 19, og fylgjast með snildinni.

Spil og leikir | Slóð | Facebook | Athugasemdir (0)

16.2.2013 | 09:13

Landskeppnin við Kína hefst í Arion banka í dag klukkan 13: Allir velkomnir

Landskeppni Íslands og Kína í skák hefst í dag klukkan 13, í höfuðstöðvum Arion banka við Borgartún. Mikil tilhlökkun ríkir í báðum liðum, og er búist við fjörlegri taflmennsku og spennandi keppni. Kínversku snillingarnir eru stigahærri, en heimavöllurinn getur reynst Íslendingum drjúgur. Áhorfendur eru velkomnir í Borgartún, og er aðgangur ókeypis.

Teflt er á sex borðum og tefla allir við alla, tvöfalda umferð. Alls verða tefldar 72 skákir og er umhugsunartími 20 mínútur á skák.

Ólafur Ragnar Grímsson forseti Íslands hélt í gær, föstudag, móttöku á Bessastöðum til heiðurs kínversku skákmönnunum. Í ræðu sendiherra Kína, Ma Jisheng, kom fram að Íslendingar og Kínverjar hafa sjö sinnum keppt áður, oftast á Ólympíuskákmótum. Íslendingar hafa unnið 5 sinnum, einu sinni fór jafntefli og einu sinni höfðu Kínverjar sigur.

Kínversku gestirnir verða þó að teljast sigurstranglegir. Lið þeirra er skipað kornungum snillingum, sem unnið hafa til fjölda verðlauna.

Yngsti liðsmaður þeirra er hinn 13 ára gamli Wei Yi, sem er yngsti alþjóðameistari í heimi og kominn með tvo stórmeistaraáfanga. Aldursforsetinn er Bu Xiangzhi, 26 ára, sem varð stórmeistari 13 ára og er nú einn af bestu skákmönnum heims. Ekki verður síður gaman að fylgjast með Yu Yangyi, 19 ára, sem varð stórmeistari 15 ára. Hann er nú þriðji stigahæsti skákmaður Kínverja og gríðarlega efnilegur. Skákdrottningarnar Huang Qian (fædd 1986) og Tan Zhongyi (fædd 1991) eru báðar stórmeistarar kvenna, og hafa unnið til fjölda verðlauna á einstaklingsmótum og með kínverska landsliðinu. Sjötti keppandinn í kínverska liðinu er svo hinn 14 ára gamli Wang Yiye, sem er meðal efnilegustu skákmanna Kínverja.

Mikil breidd er í íslenska liðinu, sem teflir fram fjórum stórmeisturum, auk alþjóðlegra meistara og efnilegra ungmenna. Það er mikið ánægjuefni að Friðrik Ólafsson, fyrsti stórmeistari Íslendinga, skuli tefla með íslenska liðinu. Friðrik er 78 ára og varð stórmeistari í skák árið 1958.

Stórmeistararnir Helgi Ólafsson, Stefán Kristjánsson og Þröstur Þórhallsson, ríkjandi Íslandsmeistari, verða allir með. Auk þeirra eru í hópnum alþjóðameistararnir Hjörvar Steinn Grétarsson, Jón Viktor Gunnarsson og Guðmundur Kjartansson og Lenka Ptácníková, stórmeistari kvenna. Þá munu ungmenni fá að spreyta sig með íslenska liðinu.

Landskeppnin er haldin í tilefni af 60 ára afmæli Kínversk-íslenska menningarfélagsins (KÍM) sem stendur að viðburðinum ásamt Skáksambandi Íslands í samvinnu við Skáksamband Kína, og með stuðningi Arion banka, CCP, Promens, Icelandic og Elkem Íslandi.

Áhorfendur eru hjartanlega velkomnir í Arion banka um helgina, til að fylgjast með viðureign Íslands og Kína. Keppni hefst báða daga klukkan 13 og stendur til 17.

Myndir frá móttöku forseta Íslands á Bessastöðum.

Spil og leikir | Breytt s.d. kl. 10:13 | Slóð | Facebook | Athugasemdir (0)

« Fyrri síða | Næsta síða »