Kínversku ungmennin heimsóttu Rimaskóla

Í tilefni af landskeppni Íslands og Kína sem fram fer í Arion banka um helgina þá heimsóttu þrír af efnilegustu skákmönnum heims Rimaskóla, sem alið hefur upp margan skáksnillinginn á síðasta áratug. Með í för voru þeir Gunnar Björnsson forseti SÍ og Stefán Bergsson framkvæmdarstjóri Skákakademíu Reykjavíkur.

Efnt var til hraðskákmóts í hátíðarsal skólans í tilefni heimsóknarinnar með þátttöku Norðurlandameistara Rimaskóla, þeirra Dags Ragnarssonar, Jóns Trausta Harðarsonar, Olivers Arons Jóhannessonar og Nansýjar Davísðdóttur. Bekkjarsystkinum meistaranna var sérstaklega boðið að horfa á mótið sem reyndist  hörkuspennandi.

Íslensku Norðurlandameistararnir sýndu kínversku skáksnillingunum enga miskunn. Það var Gunnar forseti Skáksambands Íslands lék fyrsta leikinn fyrir Tan Zhongyi sem varð heimsmeistari stúlkna á árunum 2000 - 2002.

Eftir fimmtu og síðustu umferð mótsins reyndist Yu Yangyi, sem í dag er 3. sterkasti skákmaður Kínverja,  sigurvegari mótsins en þau Dagur Ragnarsson og heimsmeistarinn fyrrverandi Zhongyi urðu í 2. - 3. sæti, hálfum vinning á eftir Yangyi. Þau gerðu innbyrðis jafntefli í skák þar sem Dagur hafði lengstum betri stöðu. Geta má þess að Oliver Aron sem er í 9. bekk Rimaskóla vann eitt kínverska undrabarnið nokkuð örugglega og hlaut að launum mikið lófaklapp frá skólafélögum sínum.

Það var Helgi Árnason skólastjóri sem tók á móti kínversku gestunum, stýrði skákmótinu og veitti Kínverjunum barmmerki Rimaskóla til minningar um heimsóknina. Davíð Hallsson pabbi Nansýjar fylgdi gestunum og átti auðvelt með að ræða þá á kínversku. (HÁ)

 

Vignir Vatnar vann hraðkvöld

Vignir Vatnar Stefánsson sigraði á hraðkvöldi Hellis sem fram fór 11. febrúar sl. Vignir Vatnar sem fékk 6 vinninga í sjö skákum var þarna að vinna sitt annað hraðkvöld með stuttu millibili. Hann gerði jafntefli við Jón Úlfljótsson og Gunnar Nikulásson en vann aðra. Í öðru og þriðja sæti með 5 vinninga voru Elsa María Kristínardóttir og Sigurður Ingason. Vignir Vatnar dró svo Jón Úlfljótsson í happdrættinu og báðir fengu þeir gjafabréf á Saffran. 

Skákkvöldi hjá Helli falla niður meðan á Reykjavíkurskákmótinu stendur og fram yfir Íslandsmót skákfélaga þannig að næsta skákkvöld í Hellisheimilinu verður mánudaginn 11. mars kl. 20. 

Röð   Nafn                       Feder   M-Buch. Buch. Progr.

  1   Vignir Vatnar Stefánsson,    6       20.0  28.0   25.5
 2-3  Elsa María Kristínardóttir,  5       17.5  25.0   20.0
      Sigurður Ingason,            5       15.5  22.0   18.0
 4-5  Vigfús Ó. Vigfússon,         4.5     20.0  28.5   18.0
      Jón Úlfljótsson,             4.5     19.0  25.5   21.0
  6   Gunnar Nikulásson,           4       18.5  25.0   15.5
 7-8  Andri Steinn Hilmarsson,     3.5     19.0  26.5   13.5
      Sverrir Sigurðarson,         3.5     16.5  23.0   11.0
  9   Finnur Kr. Finnsson,         3       20.0  25.5   14.5
 10   Björgvin Kristbergsson,      2       18.0  23.5    6.0
 11   Pétur Jóhannesson,           1       17.0  23.5    5.0

Kínversku meistararnir tefldu við börn í Reykjavík og Kópavogi: Landskeppni Ísland og Kína á morgun!

• Heimsóttu grunnskóla í Reykjavík og Kópavogi í morgun
• Landskeppni Kína og Íslands hefst á morgun, laugardag, klukkan 13 í Arion banka við Borgartún
• Friðrik Ólafsson teflir með íslenska liðinu

Kínversku skáksnillingarnir er komnir til Íslands og munu tefla landskeppni við Íslendinga nú um helgina í höfuðstöðvum Arion banka við Borgartún. Kínverska sveitin er skipuð tveimur ofurstórmeisturum, tveimur skákdrottningum og tveimur undrabörnum. Í morgun, föstudag, heimsóttu þau Rimaskóla og Salaskóla þar sem efnt var til mikilla skákhátíða.

Þá kynntu kínversku meistararnir sér aðstæður í Arion banka, heimsóttu höfuðstöðvar CCP og tefldu sundlaugarskák í Laugardalslaug. Síðdegis voru þau gestir hr. Ólafs Ragnars Grímssonar, forseta Íslands.

Landskeppnin um helgina verður án efa mjög fjörleg. Keppt verður laugardag og sunnudag, milli 13 og 17 og eru áhorfendur velkomnir. Kínverska liðið er mjög ungt að árum. Yngsti liðsmaður þeirra er hinn 13 ára gamli Wei Yi, sem er yngsti alþjóðameistari í heimi og kominn með tvo stórmeistaraáfanga. Wei Yi er stigahæstur allra í heiminum, 14 ára og yngri, með 2501 skákstig. Aldursforsetinn í kínverska liðinu er Bu Xiangzhi, 26 ára, sem varð stórmeistari 13 ára og er nú einn af bestu skákmönnum heims.

Ekki verður síður gaman að fylgjast með Yu Yangyi, 19 ára, sem varð stórmeistari 15 ára. Hann er nú þriðji stigahæsti skákmaður Kínverja og gríðarlega efnilegur. Skákdrottningarnar Huang Qian (fædd 1986) og Tan Zhongyi (fædd 1991) eru báðar stórmeistarar kvenna, og hafa unnið til fjölda verðlauna á einstaklingsmótum og með kínverska landsliðinu. Sjötti keppandinn í kínverska liðinu er svo hinn 14 ára gamli Wang Yiye, sem er meðal efnilegustu skákmanna Kínverja.

Landskeppnin verður sett í höfuðstöðvum Arion banka í Borgartúni klukkan 13 á morgun, laugardag. Ávörp flytja Ma Jisheng sendiherra Kína, Höskuldur Ólafsson bankastjóri Arion banka og Össur Skarphéðinsson utanríkisráðherra.

Tefldar verða atskákir með 20 mínútna umhugsunartíma, 12 umferðir og eru alls 72 vinningar í pottinum.

Davíð Ólafsson skákmeistari er landsliðseinvaldur í keppninni við Kínverja. Meðal íslensku liðsmannanna eru stórmeistarnir Friðrik Ólafsson, Helgi Ólafsson, Stefán Kristjánsson og Þröstur Þórhallsson, alþjóðlegu meistararnir Hjörvar Steinn Grétarsson, Guðmundur Kjartansson, Jón Viktor Gunnarsson og Lenka Ptacnikova. Þá munu nokkur börn og ungmenni fá tækifæri til að spreyta sig með íslenska liðinu.

Landskeppnin er haldin í tilefni af 60 ára afmæli Kínversk-íslenska menningarfélagsins sem stendur að viðburðinum ásamt Skáksambandi Íslands í samvinnu við Skáksamband Kína, og með stuðningi Arion banka, CCP, Promens, Icelandic og Elkem Ísland.

Áhorfendur eru hjartanlega velkomnir í Arion banka um helgina, til að fylgjast með viðureign Íslands og Kína. Keppni hefst báða daga klukkan 13 og stendur til 17.

Vetrarleyfisskákmót Fjölnis og Gufunesbæjar

Hið árlega vetrarleyfisskákmót skákdeildar Fjölnis og frístundamiðstöðvarinnar Gufunesbæjar verður haldið í Hlöðunni Gufunesbæ föstudaginn 22. febrúar frá kl. 12:30 - 14.30.

Allir grunnskólanemendur í 1.-7. bekk mega taka þátt í mótinu og teflt verður um fjölmörg verðlaun, m.a. bíómiðar og pítsugjafabréf.

Tefldar verða 5 umferðir og umhugsunartími er 6 mínútur á skák. Vetrarleyfisskákmótið er upplagt tækifæri fyrir alla grunnskólanemendur í Grafarvogi að taka þátt í. 

Þátttaka er ókeypis og keppendur eru hvattir til að mæta tímanlega til skráningar.

Hægt er að kaupa veitingar a staðnum. 

Kínverskir snillingar á Íslandi

Kínversku skáksnillingarnir, sem tefla við Íslendinga um helgina, komu til landsins síðdegis á fimmtudag. Fulltrúar Skáksambands Íslands og Kínversk íslenska menningarfélagsins tóku á móti þeim á flugvellinum, og í kjölfarið var þeim haldið kvöldverðarboð á Sólon Íslandus.

Hinir kínversku gestir þökkuðu boð Íslendinga, og létu í ljós ósk um að landskeppnin yrði skemmtileg og spennandi. Einn af kínversku meisturunum hefur áður teflt á Íslandi, ofurstórmeistarinn Bu Xiangzhi sem tefldi á Reykjavíkurskákmótinu 2000. Við kvöldverðinn á Sólon rifjaði kínverski ofurstórmeistarinn jafnframt upp að hann hefði telft á Afmælismóti Illuga Jökulssonar á Grandrokk, 13. apríl 2000, en þar urðu stórmeistararnir Ehlvest og Helgi Ólafsson í efsta sæti.

 Kínversku skákmeistararnir kváðust hlakka mjög til landskeppninngar við Kína. Stórmeistarar þeirra reyndust kunna góð skil á skákum Friðriks Ólafssonar, Jóhanns Hjartarsonar og Hannesar H. Stefánssonar, en útlit er fyrir að aðeins sá fyrsttaldi verði í íslenska liðinu sem mætir Kínverjum í Airon banka laugardag og sunnudag.

Liðsmenn Kína:

Bu Xiangzhi, fæddur 1985 (2675). Varð stórmeistari aðeins 13 ára, einn af allra bestu skákmönnum heims.

Yu Yangyi, fæddur 1994 (2688). Varð stórmeistari 15 ára, er nú 3. sterkasti skákmaður Kínverja og næst stigahæsti skákmaður heims 20 ára og yngri.

Wei Yi, fæddur 1999 (2501). Aðeins 13 ára, efstur allra í heiminum 14 ára og yngri. Hann er yngsti alþjóðameistari í heimi og hefur þegar náð tveimur stórmeistaraáföngum.

Huang Qian, fædd 1986 (2478). Stórmeistari kvenna. Varð heimsmeistari með kínverska liðinu árið 2007.

Tan Zhongyi, fædd 1991. (2466) Stórmeistari kvenna. Varð í tvígang heimsmeistari stúlkna 10 ára og yngri, 2000 og 2001. Heimsmeistari 12 ára og yngri árið 2002.

Skákir Friðriks Ólafssonar

Á vef Morgunblaðsins má sjá rúmlega 1400 skákir Friðriks Ólafssonar sem tefldar voru á árunum 1950-2012. 90 þeirra eru með skýringum. Eyjólfur Ármannsson færði hluta skákanna inn, en hluti er úr ChessBase-gagnagrunninum.

Skákirnar eru birtar í tilefni af Skákdegi Íslands, sem haldinn er hátíðlegur á afmælisdegi Friðriks og helgaður framlagi hans til íslenskrar skáklistar. Að Skákdeginum stóðu Skáksamband Íslands, Skákakademía Reykjavíkur, Skákskóli Íslands og taflfélög um allt land, í samvinnu við skóla, íþróttafélög, sveitarfélög, fyrirtæki og einstaklinga.

Skákirnar má allar nálgast á vef Morgunblaðsins.

Gallerý Skák - Friðrikskóngurinn: Gunnar Birgisson með sigurinn í hendi sér

Það var ekki laust við að heimspekilegar pælingar tækju völdin í skáksmiðjunni í Bolholtinu á fimmtudagskvöldið var þegar þriðja mótið af fjórum í Kappteflinu um Taflkóng Friðriks Ólafssonar, stórmeistara, var um það bil að hefjast.

Spaklegar og djúpar umræður um æðri og lægri víddir manntaflsins og annað í þeim dúr héldu mönnum hugföngnum áður en sest var að tafli.  Skerjafjarðarskáldið og verðandi fílosóf Kristján Hreinsson var nefnilega mættur til leiks, hress að vanda með kviðlinga á vörum um lífið og tilveruna og  nánast allt milli himins og jarðar. Hann mætir annað slagið til að sýna sig og sjá aðra. Að gera mönnum óskunda og  skráveifu á skákborðinu eru hans ær og kýr.  Nær jafnan að setja sinn svip á samkomuna og strik í reikning margra í mótinu, sem líta á hann sem skyldupunkt.   

Í upphafi móts var 10 ára afmælissbarni dagsins, ungstirninu undraverða, Vigni Vatnari Stefánssyni, fagnað sérstaklega og  árnað heilla í tilefni dagsins um leið  og honum var óskað góðs gengis á skákferlinum sem er rétt að hefjast. Hann fékk líka Fischerbol og skákbókina Tango (Rf6 og Rc6 gegn d4 og c4) í  afmælisgjöf frá Gallerýinu og var óskað fyrirfram til hamingju með Norðurlandameistaratitilinn í skólaskák 11 ára og yngri en NM-mótið  í skólaskák átti að hefjast daginn eftir upp í Bifröst í Borgarfirði.   Það gekk líka eftir hlaut 5½ af 6 og sigraði glæsilega.  Nú er sveinninn ungi ekki bara bestur í sínum aldurflokki meðal 300 þúsund mörlanda á eyjunni bláu við ysta haf heldur meðal allra  þeirra 30 milljóna hræða sem byggja Norðurlönd. Frækilegt frammistaða það. 

Hinn ungi sveinn stóð sig líka með frábærlega vel í móti kvöldsins þó við ramman reip væri að draga.  Var þar í sérflokki ásamt hinum dimmraddaða dánumanni Gunnari Inga Birgissyni (Deep throat)  af Kópavogshæðum sem vann mótið með 10.5 vinningi af 11 mögulegum.  Vignir varð annar með 9 vinninga. Nokkurt bil var síðan í næstu menn með mun færri vinninga. Margir máttu muna sinn fífil fegri eins og sjá má á meðf. mótstöflu, þar á meðal Jon Olav frá Fífilbrekku, sem er afar harðskeyttur og skemmtilegur skákmaður af norskum meiði. 

 

   

 

Með þessu endurtekna sigri sínum má segja að Gunnar Ingi hafi þegar tryggt sér sæmdartitilinn í Kappteflinu um FriðriksKónginn, enda þótt eitt mót sé eftir. Hann er með tvær tíur og enn fjarka og enginn hefur fræðilegan möguleika á að ná honum úr þessu.  Loka mótið fer fram í þessari viku og það verður gaman að sjá hvort hann nær að tryggja sér sigursætið með fullu húsi, en þrjú bestu mót hvers keppenda telja til vinningsstiga.

ESE-skákþankar 12/13  - 13.02.13

Mundi og Palli efstir Öskudagsmóti

Ingimundur Sigurmundsson og Páll Leó Jónsson urðu jafnir og efstir á Öskudagsmóti Skákfélags Selfsso í gærkvöldi þar sem tefldar voru 10 mín skákir, venju samkvæmt.

Sjö keppendur mættu til leiks og tóku skákina fram yfir tuðruspark í sjónvarpinu og meira að segja Suðurlandsslag í handboltanum, þar sem vel að merkja Selfyssingar slógu út fjölnota lið ÍBV í bikarkeppni HSÍ.

Páll Leó leiddi mótið fram að síðustu umferð þar sem hann mætti Ingimundi sem eins og alkunna er hampar titlinum atskákmeistari SSON, Mundi sýndi hvað í honum býr og hafði góðan sigur á Páli og tryggði sér þar með deilt efsta sæti á mótinu.

Ingvar Örn, sem verður fulltrúi félagsins á Reykjavík Open sem hefst í næstu viku, stóð sig einnig vel og varð í þriðja sæti á eftir þeim kumpánum með 4 vinninga.  Miklar vonir eru bundnar við Ingvar á Reykjavíkurmótinu, þótt hann eigi líklega ekki möguleika á sigri er það krafa stjórnar SSON að hann nái að minnsta kosti 50% vinningshlutfalli og hækki um 30 skákstig, auk þess sem hann verði þekktur fyrir hugprýði, manngæsku og háttvísi í bland við flóíska keppnishörku.

Lokastaða Öskudagsmóts:
1. Ingimundur    5v
2. Páll Leó         5v
3. Ingvar Örn    4v
4. Grantas        2v
5. Úlfhéðinn      2v
6. Magnús        2v
7. Björgvin       1v

Heimasíða SSON

 

Barna-og unglingameistaramót Reykjavíkur/Stúlknameistaramót Rvk

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 17. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir Monrad-kerfi með umhugsunartímanum 15 mín. á skák. Teflt verður í einum flokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2013, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2013, sé hún búsett í Reykjavík eða félagi í reykvísku taflfélag.

Til viðbótar verða veitt verðlaun fyrir þrjú efstu sætin í aldursflokknum 12 ára og yngri (fædd 2000 og síðar).

Mótið er opið öllum krökkum 15 ára og yngri (fædd 1997 og síðar).

Skráning fer fram á [e-mail] (vinsamlegast gefið upp nafn, fæðingarár, símanúmer, skóla og taflfélag (ef við á)) og einnig er hægt að skrá sig á mótsstað sunnudaginn 17.  febrúar frá kl. 13.30- 13.45. Skákmótið hefst kl. 14.

Aðgangur á mótið er ókeypis.

Landskeppni Íslands og Kína í Arion banka um helgina: Stórviðburður í íslensku skáklífi

Landskeppni í skák milli Íslands og Kína verður haldin í höfuðstöðvum Arion banka við Borgartún helgina 16. til 17. febrúar. Kínverska liðið er eitt hið sterkasta sem sótt hefur Ísland heim, en framfarir Kínverja á skáksviðinu undanfarin ár hafa verið með ólíkindum. Lið þeirra er skipað ofurmeisturum, skákdrottningum og undrabörnum.

Íslenska liðið verður skipað stórmeisturum, alþjóðlegum meisturum og sumum efnilegustu ungmennum landsins. Aldursforsetinn í íslenska liðinu verður Friðrik Ólafsson fyrsti stórmeistari Íslendinga og fv. forseti FIDE.
 
Skáksamband Íslands (SÍ) og Kínversk íslenska menningarfélagið (KÍM) standa að landskeppninni í samvinnu við Skáksamband Kína, og með stuðningi Arion banka, CCP, Promens, Icelandic og Elkem Ísland.
 
Tefldar verða atskákir í landskeppninni með 20 mínútna umhugsunartíma og verður hvort lið skipað sex skákmönnum. Allir tefla við alla og því eru alls 72 vinningar í pottinum. Búast má við gríðarlega skemmtilegri taflmennsku, enda eru Kínverjar ein fremsta skákþjóð heims og hvert undrabarnið á fætur öðru hefur komið fram á síðustu árum. Yngsti liðsmaður Kínverja í glímunni við Íslendinga er hinn 13 ára gamli Wei Yi, sem er stigahæstur allra í heiminum 14 ára og yngri.

Davíð Ólafsson verður landsliðseinvaldur í keppninni og meðal þeirra sem munu keppa fyrir Íslands hönd eru, auk Friðriks, stórmeistararnir Helgi Ólafsson, Stefán Kristjánsson og Þröstur Þórhallsson, alþjóðlegu meistararnir Hjörvar Steinn Grétarsson, Guðmundur Kjartansson og Jón Viktor Gunnarsson, og Lenka Ptacnikova stórmeistari kvenna. Þá fá nokkur efnilegustu ungmenni okkar tækifæri til að spreyta sig gegn kínversku snillingunum.

Höskuldur Ólafsson bankastjóri Arion banka mun setja landskeppnina og Össur Skarphéðinsson utanríkisráðherra leika fyrsta leikinn fyrir Íslands hönd.

Áhorfendur eru hjartanlega velkomnir í Arion banka um helgina, til að fylgjast með viðureign Íslands og Kína. Keppni hefst báða daga klukkan 13 og stendur til 17.

Kínversku meistararnir:

Bu Xiangzhi, fæddur 1985 (2675). Varð stórmeistari aðeins 13 ára, einn af allra bestu skákmönnum heims.

Yu Yangyi, fæddur 1994 (2688). Varð stórmeistari 15 ára, er nú 3. sterkasti skákmaður Kínverja og næst stigahæsti skákmaður heims 20 ára og yngri.

Wei Yi, fæddur 1999 (2501). Aðeins 13 ára, efstur allra í heiminum 14 ára og yngri. Hann er yngsti alþjóðameistari í heimi og hefur þegar náð tveimur stórmeistaraáföngum.

Huang Qian, fædd 1986 (2478). Stórmeistari kvenna. Varð heimsmeistari með kínverska liðinu árið 2007.

Tan Zhongyi, fædd 1991. (2466) Stórmeistari kvenna. Varð í tvígang heimsmeistari stúlkna 10 ára og yngri, 2000 og 2001. Heimsmeistari 12 ára og yngri árið 2002.

WaWang Yiye, fæddur 1998. (2226) Einn efnilegasti skákmaður Kína.