Sigurður Daði, Þorvarður Fannar, Jóhann Hjörtur og Þór Már efstir á öðlingamóti

Sigurður Daði Sigfússon (2324), Þorvarður Fannar Ólafsson (2225), Jóhann Hjörtur Ragnarsson (2066) og Þór Már Valtýsson (2040) eru efstir og jafnir með fullt hús að lokinni 2. umferð Skákmóts öðlinga sem fram fór í gærkveldi.

Sitthvað var um óvænt úrslit og má þar nefna að Siguringi Sigurjónsson (1959) og Jon Olva Fivelstad (1901) gerðu jafntefli við þá Hrafn Loftsson (2204) og Sævar Bjarnason (2132).

Öll úrslit 2. umferðar má nálgast hér.

Stöðu mótsins má nálgast hér.

Þriðja umferð fer fram nk. miðvikudagskvöld. Þá mætast meðal annars: Þór-Sigurður Daði og Þorvarður-Jóhann.  Pörun 3. umferðar má í heild nálgast hér. 

• Heimasíða TR
• Chess-Results

Gallerý Skák - Gunnar Skarphéðinsson stal senunni

Þrátt fyrir að forstöðumaðurinn væri fjærri góðu gamni var allt til reiðu í Gallerýinu þegar dularfullir og djúpthugsandi skákhyggjumenn leituðu þar inngöngu  til hjaðningavíga í síðustu viku. Framundan var annað hvort gleði- eða píslarganga eftir atvikum á hvítum reitum og svörtum.  Allt fyrir ánægjuna engu að síður því þar vega menn hvern annan af góðsemi sinni einni saman eða í gustukaskyni.  Einn ágætur „stórmeistarabani"  úr vesturbænum var þó svo fyrirhyggjusamur að koma með nokkra „vinninga" með sér í bílnum enda ekki á vísan að róa sagði hann.  Ekki gekk það þó alveg eftir.

Þá er sest var að tafli sló í brýnu all harða og mátti vart á milli sjá hverjum veitti betur og hverjum verr, en tefldar voru 11 umferðir í striklotu með stuttu matarhléi, en kaffi og kruðerí gættu menn sér á meðfram og milli skáka til hressingar.  Mótið fór hið besta fram og í góðum anda.

Að leikslokum kom í ljós að hinn magnaði magister og geysigóði skákmaður Gunnar Skarphéðinsson hafði stolið senunni og orðið efstur með 8.5 vinninga, aðeins leyft þrjú jafntefli.  Vóg þar þyngst að honum tókst að leggja tvo helstu keppinauta sína að velli, Gunnar Gunnarsson nafna sinn og frænda sinn unga Vigni Vatnar Stefánsson, sem fylgdu fast á hæla honum með 8 vinninga hvor.

Það var til tíðinda að sveinninn Óskar Víkingur Davíðsson aðeins 7 ára  freistaði gæfu sinnar gegn sér mun eldri mönnum og sýndi að þar fer mikið efni þó hann stæðist þeim ekki öllum snúning að þessu sinni. En framtíðin er hans og þeirra beggja ungu keppenda sem eru að heyja sér dýrmætrar reynslu með þátttöku sinni á þessum vettvangi.

Sjá má nánari úrslit á meðf. mótstöflu hér að neðan og á www.gallery.net.

 

 

PÁSKAMÓT GALLERÝ SKÁKAR fer fram  þegar degi hallar fimmtudaginn 21. mars nk. ( í kvöld) og  hefst kl. 18.  Þar verða til verðlauna myndarleg páskaegg og körfur auk þess að efnt verður til vinningahappdrættis fyrir þá sem ekki ná á verðlaunapall. Allir velkomnir. Lagt er í púkk fyrir mat- og veisluföngum.

ESE-skákþankar 20.3.2013

Björgvin vann Ofuratskákmótið

Björgvin Smári Guðmundsson var öruggur sigurvegari Ofuratskákmót Skákfélags Selfoss og nágrennis sem fram fór í gærkvöldi. Sjö keppendur mættu að borðunum og tefldu 10 mínútna skákir. Björgvin Smári fór mikinn og lagði alla andstæðinga sína af öryggi og höfðu áhorfendur orð á að þvílík og önnur vinnubrögð hefðu ekki sést í Selinu í háa tíð.

Mótið þess utan nokkuð jafnt að vanda og sannaðist hið fornkveðna að enginn er annars vinur í leik auk þess sem í ljós kom að hinir fyrstu munu síðastir verða þegar sigurvegari síðasta móts lenti í neðsta sæti í kvöld.

Lokastaðan:
1. Björgvin Smári  6v
2. Páll Leó            4,5
3. Úlfhéðinn          3,5
4. Ingimundur       3
5. Grantas             2
6. Magnús             2
7. Erlingur J          0

Næstkomandi miðvikudagskvöld fer fram hið  árlega Páskaeggjamót þar sem teflt verður eftir punktakerfi formanns sem gengur í meginatriðum út á að menn fá þeim mun fleiri stig fyrir vinning í skák eftir því sem tíminn sem þeir ákveða á skákina er minni.

Heimasíða SSON

Fjögur hörkujafntefli í London

Öllum skákum fimmtu umferðar áskorendamótsins lauk með jafntefli í dag. Í öllum tilfellum var þó um að ræða hörskuskákir. Carlsen (2872) sýndi mikla seiglu þegar hann hélt jafntefli eftir mjög erfitt tafl gegn Ivanchuk (2757). Aronian (2809) sýndi einnig mikla útstjónarsemi þegar hann hélt jafntefli gegn Kramnik (2810) þar sem margir höfðu afskrifað hann. Carlsen og Aronian eru efstir með 3,5 vinning en Svidler (2747) er þriðji með 3 vinninga.

Í sjöttu umferð, sem fram fer á morgun, mætast meðal annars: Svidler-Carlsen og Radjabov-Aronian.

Rétt er að benda á beinar útsendingar frá London þar sem gæðin er afar mikil.

Úrslit 5. umferðar:

Ivanchuk Vassily	2757	½ - ½	Carlsen Magnus	2872
Svidler Peter	2747	½ - ½	Gelfand Boris	2740
Kramnik Vladimir	2810	½ - ½	Aronian Levon	2809
Grischuk Alexander	2764	½ - ½	Radjabov Teimour	2793

Staðan:

• 1.-2. Carlsen (2872) og Aronian (2809) 3,5 v.
• 3. Svidler (2747) 3 v.
• 4.-5. Kramnik (2810) og Radjbov (2793) 2,5 v.
• 6. Grischuk (2764) 2 v.
• 7.-8. Gelfand (2740) og Ivanchuk (2757) 1,5 v.

Tenglar:

• Heimasíða mótsins
• Chessbomb (beinar útsendingar með tölvuskýringum)

Páskamót Goðans fer fram á laugardagskvöld

Páskaskákmót Goðans verður haldið laugardagskvöldið 23. mars og hefst það kl 20:20 !! Mótið fer fram í sal Framsýnar að Garðarsbraut 26 á Húsavík. Tefldar verða 7 umferðir og verða tímamörkin 10 mín á mann, auk 5 sek viðbótartíma fyrir hvern leik.

Í verðlaun verða páskaegg fyrir þrjá efstu í fullorðinsflokki og handa öllum keppendum í flokki 16 ára og yngri. Vinningahæsti keppandinn fær nafnbótina Páskaskákmeistari Goðans-Máta 2013

Skráning í mótið er hjá formanni í síma 4643187 og 8213187 eða á [e-mail]

Páskaeggjamót Hellis fer fram á mánudag

Páskaeggjamót Góu og Hellis verður haldið mánudaginn 25. mars 2013, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráning í mótið verður á heimasíðu Hellis: http://hellir.blog.is/  

Ókeypis er fyrir félagsmenn í Helli en fyrir aðra er þátttökugjald kr. 500. Fyrirkomulagið verður kynnt síðar

Páskaeggjamótið verður haldið í félagsheimili Hellis að Álfabakka 14a í Mjóddinni. Inngangurinn er milli Subway og Fröken Júlíu og salur félagsins er á þriðju hæð hússins.

Ögmundur skákmeistari Ása

Æsir héldu sitt meistaramót í Ásgarði í dag. Yngsti þátttakandinn Ögmundur Kristinsson vann mótið en hann fékk 7½ vinning af 9 mögulegum. Ögmundur er nýlega genginn til liðs við heldri skákmenn enda verður hann 60 ára á þessu ári og á ábyggilega eftir að láta að sér kveða í þeim hóp á næstu árum.

Skákkempurnar Jóhann Örn Sigurjónsson og Guðfinnur R Kjartansson urðu svo jafnir í öðru til þriðja sæti með 7 vinninga. Jóhann  var hærri á stigum og fékk silfrið og Guðfinnur bronsið.

Þór Valtýsson varð efstur í hópnum 60-70 ára en hann fékk 6 vinninga. Í hópnum 70-80 ára varð Þorsteinn Guðlaugsson efstur með 5½ vinning. Í elsta hópnum 80 ára og eldri varð Haraldur Axel Sveinbjörnsson efstur með 5½ vinning.

Þess má geta að samkvæmt töflunni er Birgir Sigurðsson efstur í elsta aldurshópnum en hann afsalaði sér verðlaunum vegna þess að hann fékk sér aðstoðar mann til þess að tefla seinni helming mótsins fyrir sig vegna heilsubrests. Friðgeir Hólm leit við á skákstað og tók það að sér.

Skákstjórinn Finnur náði því að verða neðstur í þetta sinn en það hefur honum ekki tekist áður.

Myndaalbúm (ESE)

Þrjátíu skákkempur mættu til leiks í dag.

Sjá meðfylgjandi töflu:

 

 

 

Carlsen efstur ásamt Aronian eftir sigur á Grischuk

Magnus Carlsen (2852) vann Grischuk (2764) í fjórðu umferð áskorendamótsins sem fram fór í dag í London. Öðrum skákum lauk með jafntefli. Carlsen náði þar með Aronian (2809) að vinningum. Svidler (2747) er hálfum vinningi á eftir þeim.

Í fimmtu umferð, sem fram fer á morgun, mætast meðal annars: Ivanchuk (2757) og Carlsen og Kramnik (2810) og Aronian.

Staðan:

• 1.-2. Carlsen (2872) og Aronian (2809) 3 v.
• 3. Svidler (2747) 2,5 v.
• 4.-5. Kramnik (2810) og Radjbov (2793) 2 v.
• 6. Grischuk (2764) 1,5 v.
• 7.-8. Gelfand (2740) og Ivanchuk (2757) 1 v.

Tenglar:

• Heimasíða mótsins
• Chessbomb (beinar útsendingar með tölvuskýringum)

Páskaæfing skákdeildar Fjölnis 23. mars kl. 11:00

Skákdeild Fjölnis heldur páskaæfingu sína n.k. laugardag 23. mars og hefst hún í Rimaskóla kl. 11:00. Allir sem mæta fá afhent páskaegg nr. 1 með málshætti. Einnig verður boðið upp á snakk með ísköldu vatni.

Öll verðlaun verða að þessu sinni misstór páskaegg, en öll jafn girnileg.

Öllum áhugasömum skákkrökkum er boðið að vera með og tefla til vinnings. Tefldar verða fimm umferðir með 7 mínútna umhugsunartíma. Skákkennsla á staðnum. Gengið er inn um íþróttahús. Þátttakendur eru hvattir til að mæta tímanlega.

• Æskilegt er að yngstu skákkrakkarnir (2005 - 2007) séu í fylgd foreldra á æfingunni.

KR-rimma: Ingi Tandri fagnaði sigri

Mánudagskvöldin eru átakamikil í Vesturbænum. Þá mætast stálinn stinn í Frostaskjólinu þar sem Kristján Stefánsson hersir ríkir í ríki sínu og hvetur menn til tafls. Afgreiddi aðalfundinn Skákdeildarinnar á 5 mínútum og ekkert mas áður en sest var að skákleikum fyrir viku síðan.  Guðfinnur Err og Einar Ess hlutu náð að nýju sem hirðmenn hans.

Harkan sex eins og fyrri daginn. Stundum ber keppnisskapið suma ofurliði svo lítið fer fyrir íþrótta- og ungmennafélagsandanum. Sama virðist vera upp á teningnum hjá stóru klúbbunum - engin miskun hjá Magnúsi ef hægt er að vinna skákina eða viðureignina á skák- eða lagatæknilegum bellibrögðum, sama hver á í hlut.

Nú bar svo við að gestur einn í mótinu krafðist vinnings fallinn á tima þar sem mótherji hans hafði leikið peði í dauðan og upp í borð án þess að tilkynna um drottningu og ýtt á klukkuna.  "Ólöglegur leikur" var hrópað svo hátt að undirtók í húsinu. Það er vissulega vandlifað þessa daganna, klækjabrögð í fyrirrúmi hvert sem litið er, ekki bara snertur maður hreyfður og allt það eins og vera ber. Á meira en hálfrar aldar skákferli hefur undirritaður ekki orðið vitni að öðru eins. .

En hvað sem öllu argaþrasi af þessi tagi og öðru líður verða menn að leitast við að láta ekki "sálrænabráðaáfallahugbrigðapersónuleikastreyturöskun" ná tökum á sér og forðast að gerast melankólískir úr hófi og missa trúna á mannkynið. Áfram kristmenn krossmen á hverju sem gengur.

Þegar moldviðrinu slotaði og upp var staðið kom ljós að ljúflingurinn Ingi Tandri Traustason, hinn slyngi liðsmaður Vinja, hafði reynst vera í feiknalegu banastuði og skotið öllum öðrum keppendum og þar með tveimur sigursælum Gunnurum ref fyrri rass. Ingi Tandri stóð einn uppi sem sigurvegari með 11.5 vinning af þrettán mögulegum. Flott hjá honum. Gunnar Birgisson varð  að sætta sig við annað sætið að þessu sinni með 11v. og Gunni Gunn við það þriðja með 10v.  Hinir skeinuhættu skákmenn Stefán Þormar og Sigurður Grétarsson urðu í 4.5.sæti  9.5v. Annars var mótið nokkuð jafnt  eins og sjá má á meðf. mótstöflu.

 

 

Næst verður tekist á í KR-heimilinu í kvöld kl.19.30 þó sumir verði fjarri góðu gamni eins og gengur, en aðrir fylla skörð.

ESE- Skákþankar 18.03.2013