Skákmót Árnamessu - Skráning hér á Skák.is

Hún byrjar rólega skráningin á Árnamessu 2013 en skráninguna er að finna hér á Skák.is. Miðað við viðbrögð á Íslandsmóti barnaskólasveita um síðustu helgi mætti ætla að okkar ungu og efnilegu skákmeistarar á barnaskólastigi ætli að fjölmenna á mótið sem hefst eftir þrjá daga, laugardaginn 20. apríl.

-          Rútan leggur af stað frá BSÍ (neðan við Landsspítala) kl. 9:30. Fararstjórar verða til staðar, þær Þóra og Dóra. Heimferð áætluð kl. 16.45 frá Stykkishólmi

-          Rútan kemur við á N1 í Ártúni kl. 9.40 og tekur þar upp þátttakendur

-          Foreldrar geta komið með og eru þeir sem áhuga hafa á því beðnir um að hafa samband við Helga í síma 664 8320

-          Boðið verður upp á pylsur og drykk við komuna í Stykkishólm

-          Skákmót Árnamessu hefst kl. 13:00

-          Skákstjórar verða Páll Sigurðsson og Helgi Árnason

-          Í skákhléi verður boðið upp á veitingar frá Góu, Nettó, Rolf Johansen og Bónus

-          Í skákhléi verður keppt í spurningkeppni skákfélaga um glæsilegan eignarbikar

-          Verðlaun og happadrættisvinningar verða 30 - 40 talsins. Gjafabréf frá ELKÓ, Laugarásbíó, PÍZZAN, Ljósmyndavörum, Sæferðum og ekki síðast en ekki síst myndarleg páskaegg frá GÓU (alveg satt)

-          Eignabikarar fyrir sigurvegara í eldri flokk, yngri flokk og flokki Snæfellinga

-          Verð fyrir þá sem koma með rútu er 2000 kr. Aðrir greiða 500 kr. Boðsgestir eru skákmeistarar Álfhólsskóla, Rimaskóla og Hraunvallaskóla sem urðu í 1. - 3. sæti á Íslandsmóti barnaskólasveita 2013

Áhugasamir skákkrakkar eru hvattir til að skrá sig sem fyrst á www.skak.is og missa ekki af einu skákmóti með öllu.

Skákþing Norðlendinga - afmælismót Haralds Hermannsonar - Hannes Hlífar meðal skráðra keppenda

Skákþing Norðlendinga verður haldið á Sauðárkróki helgina 19-21. apríl n.k.  Samkvæmt venju verða tefldar 7 umferðir. Fjórar atskákir með 25 mín. umhugsunartíma á föstudagskvöldi. Tvær umferðir með umhugsunartímanum 90 mín + 30 sek á leik og lokaumferðin á sunnudegi með sama umhugsunartíma. Á lokinni 7. umferð á sunnudeginum verður  haldið Hraðskákmót Norðlendinga. Kappskákirnar verða reiknaðar til alþjóðlegra stiga.

Allir skákmenn eru velkomnir á Skákþing Norðlendinga, en einungis þeir sem eru með lögheimili á Norðurlandi geta öðlast nafnbótina Skákmeistari Norðlendinga. Heildar verðlaunafé á mótinu verður a.m.k. 160.000 krónur, en fjöldi þátttakenda hefur áhrif á verðlaunafé. Fyrstu verðlaun eru áætluð 65.000 krónur, önnur verðlaun 35.000 og þriðju verðlaun 25.000. Einnig verða veitt peningaverðlaun fyrir þá sem hafa undir 2000 íslensk Elo stig 20.000 krónur og þá sem hafa undir 1800 íslensk Elo Stig 20.000 krónur. Keppendur geta aðeins unnið til aukaverðlauna í einum flokki.  

Hótel Tindastóll, Gistiheimilið Mikligarður og Gistiheimilið Sólarborg gefa þátttakendum í mótinu 10% afslátt af gistingu. Til viðmiðunar er verð fyrir gistingu með morgunverði um 16.000 krónur á mann í gistiheimilunum og er þá miðað við tvo í herbergi í tvær nætur.  Nánari upplýsingar um tilboðið verða sendar í tölvupósti til áhugasamra.

Mótsgjöld eru kr. 2000 en ekkert kostar að taka þátt í hraðskákmótinu. Innifalið í verði er kaffi og meðlæti á stundum.

Skráning fer fram í netfanginu: [e-mail] og er þar hægt að fá nánari upplýsingar um framkvæmd mótsins.

Teflt verður í Safnahúsi Skagfirðinga. Nánari upplýsingar um tímasetningu umferða, þátttakendur o.fl. verða birtar fljótlega hér á heimasíðunni.

Mótsstjóri verður Gunnar Björnsson forseti Skáksambands Íslands.

Nánari upplýsingar um mótsfyrirkomulag o.fl. má finna á heimasíðu Skákfélags Sauðárkróks.

Upplýsingar um þegar skráða keppendur má finna á Chess-Results en meðal þegar skráðra keppenda er stórmeistarinn Hannes Hlífar Stefánsson.

Brynjar Bjarkason og Sóley Lind Pálsdóttir skólaskákmeistarar Hafnarfjarðar 2013

Ágætur fjöldi barna tók þátt í skólaskákmóti Hafnarfjarðar 2013 sem haldið var fyrr í gær. Því miður var keppendaskiptingin ekki alveg hagstæð, því 29 krakkar tefldu í yngri flokki en aðeins 2 í eldri. 

Í eldri flokki vann Sóley Lind Pálsdóttir öruggan 2-0 sigur á skólafélaga sínum úr Hvaleyrarskóla og er því Skákmeistari Hafnarfjarðar 2013 í skólaskák. Þau eru bæði búin að tryggja sér sæti á Kjördæmamóti Reykjaness sem haldið verður í Garðabæ þann 25. apríl næstkomandi. Þar munu keppa skólaskákmeistarar Hafnarfjarðar, Kópavogs, Suðurnesja og af sýslumóti Kjós. (Garðabær, Mosfellsbær, Seltjarnarnes) um laus sæti á Landsmóti í skólaskák sem haldið verður á Patreksfirði í byrjun maí. 

Sóley var vel að sigrinum komin þrátt fyrir litla keppni og má nefna að hún er að fara keppa næstu helgi á Norðurlandamóti stúlkna með Íslenska stúlknalandsliðinu. Mótið verður haldið í Malmö í Svíþjóð.

Í yngri flokki var öllu meiri barátta um efstu sætin. 29 keppendur sem tefldu 6. umferðir. Að lokum stóð einn uppi sem sigurvegari og það var enginn annar en Brynjar Bjarkason Hraunvallaskóla sem endaði með 5,5 vinning af 6 mögulegum. Í 2-3 sæti enduðu svo þeir Bjarni Þór Guðmundsson Víðistaðaskóla og Burkni Björnsson Hraunvallaskóla sem fengu báðir 5 vinninga og tefldu 2 skáka einvígi sem Bjarni vann 2-0. Bjarni varð því í 2 sæti og tryggði sér sæti á kjördæmismóti ásamt Brynjari. 

Brynjar leiddi lið Hraunvallaskóla í 3. sætið á Íslandsmóti barnaskólasveita um síðustu helgi.  

Sjá má öll úrslit með því að smella á eftirfarandi hlekk. 

Myndaalbúm (PS)

Stefán Þormar sigursæll í Stangarhyl í gær

Það mættu tuttugu og fjórir heiðursmenn til leiks  hjá Ásum í dag. Það má segja að þeir hafi verið á öllum aldri, sá yngsti er fæddur 1946 en sá elsti er fæddir 1917! Brynleifur Sigurjónsson mætti á staðinn og tefldi eins og frískur unglingur þótt hann sé kominn á nítugasta og sjötta aldurs ár.

Hann fékk fimm vinninga af tíu eða 50% vinningshlutfall það þótti vel af sér vikið. Móðir Brynleifs var fædd 1877, það er gaman að velta fyrir sér svona ártölum.

Stefán Þormar varð hrókur dagsins hann fékk níu og hálfan vinning, Stefán er 29 árum yngri en Brynleifur þannig að það er skemmtileg aldurs dreifing í þessum hóp og þetta sýnir hvað skákin er frábær íþrótt fyrir fólk á öllum aldri. Jóhann Örn Sigurjónsson varð í öðru sæti með níu vinninga og Ari Stefánsson í þriðja sæti með sjö vinninga.

Sjá nánari mótstöflu:

 

 

.

 

Guðmundur með jafntefli í lokaumferðinni - varð efstur í AM-flokki

Alþjóðlegi meistarinn Guðmundur Kjartansson (2433) gerði jafntefli við bandaríska alþjóðlega meistarann Alexander Battey (2301) í 11. og síðustu umferð AM-flokks First Saturday-mótsins sem fram fór í dag. Guðmundur hlaut 8 vinninga og varð efstur í flokknum. 

Frammistaða Guðmundar samsvaraði 2461 skákstigi og hækkar hann um 3 skákstig fyrir hana.

Meðalstigin í flokki flokki Guðmundar voru 2299 skákstig og var hann næststigahæstur 12 keppenda.

• Heimasíða mótsins
• Chess-Results

Sóley Lind og Brynjar skólaskákmeistarar Hafnarfjarðar

Skólaskákmót Hafnarfjarðar fór fram í dag. Í eldri flokk voru bara 2 keppendur Brynjar Ólafsson Hvaleyrarskóla og Sóley Lind Pálsdóttir Hvaleyrarskóla og komast þau bæði á Kjördæmismót. Í yngri flokk voru 29 keppendur og þar tryggðu sér rétt til að keppa á Kjördæmismóti Reykjaness þeir Brynjar Bjarkason Hraunvallaskóla og Bjarni Þór Guðmundsson Víðistaðaskóla. 

Nánari úrslit má nálgast á Chess-Results.

Vormót Vinjar á mánudaginn: Allir velkomnir!

Skákfélag Vinjar býður skákáhugamönnum á öllum aldri á Vormót Vinjar, mánudaginn 22. apríl klukkan 13. Tefldar verða 6 umferðir með 7 mínútna umhugsunartíma, og í leikhléi verður boðið upp á kaffi og meðlæti.

Skákfélag Vinjar stendur fyrir vikulegum æfingum á mánudögum klukkan 13 og reglulega eru haldin stórmót. Þá náði A-sveit félagsins glæsilegum árangri í 3. deild Íslandsmóts skákfélaga, og mun keppa í 2. deild næsta vetur.

Í júní verður því fagnað að 10 ár eru liðin síðan reglulegt skákstarf hófst í Vin. Skákfélagið Hrókurinn stóð um árabil fyrir skáklífi í Vin, og studdi við bakið á Skákfélagi Vinjar sem nú er eitt af blómlegustu taflfélögum landsins. Skákakademían hefur í vetur lagt Skákfélagi Vinjar lið, og er Róbert Lagerman aðalþjálfari hinna harðsnúnu Vinjarpilta.

Allir eru velkomnir á Vormót Vinjar á mánudaginn. Veitt verða ýmis verðlaun. Þátttaka er ókeypis, eins og jafnan á viðburðum Skákfélags Vinjar. 

Hraðskákmót Víkings fer fram á fimmtudag

Hraðskákmót Víkings verður haldið 18. apríl (fimmtudagur) kl 20.00 í Víkinni.  Tefldar verða 11. umferðir með 5. mínútna umhugsunartíma.  Allir skákmenn velkomnir og þátttaka er ókeypis.  Boðið verður upp á léttar veitingar.  

Víkingaklúbburinn er núna að enda vetrarstarf sitt, en klúbburinn skrifaði sig inn í skáksöguna í vetur þegar liðið var Íslandsmeistari í 1. deild.  Starfið hefur gengið vel í vetur, en mánaðarlegar æfingar hafa verið í skák og Víkingaskák annan hvern miðvikudag í vetur.  Einnig voru vikulegar barnaskákæfingar í Víkinni á miðvikudögum frá 17.00-18.30.  Síðasti viðburður vetrarins er liðakeppni í Víkingaskák miðvikudaginn 15. maí.

Dagskrá fram á vor:

18. apríl (fimmtudagur). Hraðskákmót Víkings. Víkin kl 20.00

1. maí. frí (heimamót í Víkingaskák)

15. maí. Ìslandsmeistaramótið í Víkingaskák (liðakeppni). Víkin kl 20.00

Sumarfrí 

Dagur og Guðmundur með jafntefli í gær - Guðmundur efstur

Dagur Arngrímsson (2392), sem teflir í SM-flokki, og Guðmundur Kjartansson (2433), sem teflir í AM-flokki, gerðu báðir jafntefli á First Saturday-mótinu í umferð gærdagsins. Guðmundur er sem fyrr efstur í sínum flokki en hann hefur 7,5 í 10 skákum og hefur vinningsforskot á næsta mann. Í gær gerði hann jafntefli við bandaríska FIDE-meistarann Adarsh Jayakumar (2294), sem var meðal keppenda á N1 Reykjavíkurskákmótinu í febrúar.

Dagur gerði í gær jafntefli við hvít-rússneska stórmeistarann Andrei Kovalev (2465). Dagur hefur lokið þátttöku en hann hlaut 4 vinninga í 9 skákum og endaði í 6.-7. sæti. Frammistaða Dags samsvaraði 2371 skákstigi og lækkar hann um 2 stig fyrir hana.

Lokaumferðin í AM-flokki fer fram í dag.

Meðalstigin í flokki Dags voru 2412 skákstig. Dagur var nr. 6 í stigaröð 10 keppenda. Meðalstigin í flokki flokki Guðmundar eru 2299 skákstig er hann næststigahæstur 12 keppenda.

• Heimasíða mótsins
• Chess-Results

Halldór Broddi og Hákon Ingi kjördæmismeistarar Norðurlands vestra

Kjördæmismót í skólaskák á Norðurlandi vestra fór fram í Varmahlíðarskóla, laugardaginn 13. apríl.  Sex keppendur mættu til leiks. Sigurvegari í eldri flokki var Halldór Broddi Þorsteinsson með 4,5 vinninga og í yngri flokki  Hákon Ingi Rafnsson með 4 vinninga. Þeir eru báðir úr Árskóla á Sauðárkróki. Í þriðja sæti, á mótinu, varð Auður Ragna Þorbjarnardóttir, úr Grunnskólanum austan vatna, með 3 vinninga, en hún er í 5. bekk.