NM stúlkur 2013 - Nansý Norðurlandameistari

Nansý Davíðsdóttir var rétt í þessu að tryggja sér Norðurlandameistaratitilinn í C-flokki.  Nansý gerði jafntefli við Söru Naess frá Noregi í síðustu umferð og endaði jöfn Lisu Fredholm að vinningum.  Nansý vinnur hins vegar á stigum og er því Norðurlandameistari Stúlkna 2013 í yngsta flokki.  Til hamingju Nansý.

 Spennan í A-flokki er gríðarleg.  Jóhanna og Hrund gerðu jafntefli og mun það því ráðast á stigaútreikningi sem ræðst af lokum síðustu tveggja skákanna í flokknum.  Jóhanna nagar nú neglur og bíður.

NM Stúlkur 2013 - Pistill fjórðu umferðar

Úrslit morgunsins:

 

A-flokkur

Jóhanna Björg Jóhannsdóttir - Caroline Lindberg Hansen, Svíþjóð 1-0

Hrund Hauksdóttir - Kaberi Mitra, Svíþjóð 1-0

 

B-flokkur

Monika Machlik, Noregi  - Veronika Steinunn Magnúsdóttir  1-0

Mette Ellegaard  Christensen, Danmörku - Sóley Lind Pálsdóttir 0-1

 

C-flokkur

Nansý Davíðsdóttir - Regine Forsa, Noregi 1-0

Svandís Rós Ríkharðsdóttir - Saida Mamadova, Svíþjóð ½-½

 

Mun betri úrslit í dag, 4,5 vinningar af 6 mögulegum.

 

Í A-flokki vann Jóhanna Karólínu frá Svíþjóð mjög örugglega.  Sú sænska tapaði tíma í byrjuninni og það dugði Jóhönnu sem gjörsamlega yfirspilaði andstæðinginn og vann mjög fljótt.  Hrund tefldi langa og stranga skák gegn Kaberi frá Svíþjóð.  Hrund fékk betri stöðu eftir byrjunina en þurfti að gefa mann fyrir tvö peð en var áfram með betri stöðu og að tefla til vinnings.  Andstæðingurinn féll að lokum á tíma þegar við henn blasti erfitt endatafl með tveimur riddurum og peði gegn riddara og fjórum peðum Hrundar.  Verulega góð úrslit í A-flokki í dag.  Staðan í A-flokki er sú að Jóhanna og Jessica frá Svíþjóð eru efstar og jafnar með 3 vinninga.  Hrund hefur 1,5 vinning eftir sigur í morgun.  Svo óheppilega vill til að Jóhanna og Hrund mætast í síðustu umferð.

 

Í B-flokki tapaði Veronika fyrir Moniku öðrum norska tvíburanum í flokknum.  Veronika fékk fína stöðu úr byrjuninni en tefldi ónákvæmt og tapaði manni.  Þá fór hún að tefla fyrir alvöru, vann peð og var örugglega nánast búin að jafna taflið þegar hún lék af sér í tímahraki og tapaði.  Engu að síður ágætis skák hjá henni í dag.  Við Sóley ræddum það í gær að vonda skákin í mótinu væri búin og nú væri bara að ná inn góðu skákunum.  Sóley tefldi afar vel í dag og afgreiddi andstæðinginn snaggaralega í 20 leikjum.  Verulega góð skák hjá henni.  Staðan í flokknum er nú þannig að Freja frá Danmörku og Rina frá Svíþjóð eru efstar og jafnar með 3,5 vinninga.  Á eftir þeim koma norsku tvíburarnir með 3 vinninga.  Þær efstu mæta norsku tvíburunum í síðustu umferð þannig að ef tvíburarnir vinna báðir þá eru þær efstar og jafnar.  Veronika og Sóley geta rétt sinn hlut í flokknum með sigri í dag.

 

Í C-flokki hélt Nansý uppteknum hætti og vann Reginu frá Noregi örugglega.  Sigur eða jafntefli hjá henni í síðustu umferð tryggir henni Norðurlandameistaratitilinn.  Svandís tefldi langa og stranga skák gegn Saidu frá Svíþjóð.  Svandís var allan tíman að reyna að vinna en sú sænska varðist vel og náði að lokum þráskák með drottningu og peð á móti tveimur hrókum og peði.  Ágætis skák hjá Svandísi sem var afar nærri því að innbyrða sigur í morgun.  Staðan í flokknum er nú þannig að Nansý er ein efst með 3,5 vinninga.  Næstar koma Sara frá Noregi og Lisa frá Svíþjóð með 3 vinninga.  Nansý mætir Söru í síðustu umferð og dugir jafntefli til að sigra flokkinn.

 

Skákir Íslensku keppendanna (hófust klukkan 13:30):

 

A-flokkur

Jóhanna Björg Jóhannsdóttir - Hrund Hauksdóttir

 

B-flokkur

Sóley Lind Pálsdóttir - Alina Legkiy, Svíþjóð

Veronika Steinunn Magnúsdóttir - Mette Ellegaard  Christensen, Danmörku

 

C-flokkur

Nansý Davíðsdóttir - Sara Naess, Noregi

Kajsa Nilsson, Svíþjóð - Svandís Rós Ríkharðsdóttir

 

Skák Jóhönnu og Hrundar og skák Nansýar eru í beinni útsendingu.

 

Beinar útsendingar:

http://www.limhamnssk.se/live/ (flash)

http://www.limhamnssk.se/live/jslive.php 

 

Myndir:

http://www.flickr.com/photos/limhamnssk/sets/72157633191277159/

 

Úrslit og röðun:

A flokkur

B flokkur

C flokkur

 

Skákir (pgn):

Fyrsta umferð

Önnur umferð

Þriðja umferð

Fjórða umferð

 

Davíð Ólafsson

Skákævintýrið í Stykkishólmi heppnaðist mjög vel

Það voru um 60 krakkar á grunnskólaaldri sem skráðu sig til leiks á Skákmót Árnamessu sem haldið var í 4. sinn í grunnskólanum í Stykkishólmi. Tefldar voru sjö umferðir með sjö mínútna umhugsunartíma. Það kom ekki á óvart að langstigahæsti þátttakandinn, Oliver Aron Jóhannesson frá Fjölni, ynni mótið en sigurinn reyndist honum auðveldur. Greinilegt að drengurinn er í fantaformi og hefur notað veturinn vel við stúderingar og taflmennsku.

Í öðru sæti varð Dawid Kolka frá Helli og tapaði hann aðeins fyrir Oliver Aroni í næstsíðustu umferð. Jafnir í 3.-4. sæti komu Fjölnisstrákarnir frá Rimaskóla Kristófer Jóel, bróðir Olivers og Jóhann Arnar Finnsson með 5,5 vinninga. Allir þessir fjórir efstu tefldu í efri flokki mótsins. Sigurvegari yngri flokks varð Haukastrákurinn úr Hraunvallaskóla Brynjar Bjarkason með 5 vinninga. Hann reyndist hærri á stigum en þeir Guðmundur Agnar Bragason TR, Felix Steinþórsson Helli, Kristófer Halldór Kjartansson Fjölni og Helgi Svanberg Jónsson Haukum sem allir fengu líka 5 vinninga. 

Aldrei hefur verið meiri þátttaka í flokki Snæfellinga á Skákmóti Árnamessu en núna og þar varði Kristinn Hrafnsson Snæfellsbæ titil sinn frá síðasta Árnamessumóti. Kristinn hlaut 5 vinninga eftir sigur á félaga sínum Helga Sigtryggssyni í lokaumferðinni. Í 3. sæti í flokki Snæfellinga varð Hólmarinn Ellert Þór Hermundarson með 3 vinninga. 

Skákdrottningar mótsins urðu þær bekkjarsystur úr Rimaskóla Ásdís Birna Þórarinsdóttir og Tinna Sif Aðalsteinsdóttir báðar í Fjölni en þær stóðu sig mjög vel og fengu 4,5 vinninga. Þær stöllur ásamt Kristni í Snæfellsbæ reyndust líka efst stigalausra á mótinu. Stefán Orri Davíðsson hlaut viðurkenningu fyrir að vera yngsti skákmaður mótsins en Stefán Orri sem er í 1. bekk Ölduselsskóla gerði sér lítið fyrir og hlaut 4 vinninga og varð í 18.  sæti mótsins, einu sæti ofar en bróðir sinn Óskar Víkingur. Mótið heppnaðist einstaklega vel og þátttakendur voru til mikillar fyrirmyndar allir sem einn. Vinningar og happadrættisvinningar glöddu alla sem þá hrepptu en rúmlega 2/3 þátttakenda fóru út með verðlaun sem öll voru mjög áhugaverð. Boðið var upp á rútuferð frá Reykjavík þar sem súpermömmurnar Dóra og Þóra sáu um fararstjórn. Veitingar voru í boði fyrir mót og í skákhléi. Páll Sigurðsson var skákstjóri og mótstjóri var Helgi Árnason formaður skákdeildar Fjölnis en deildin sá um alla framkvæmd mótsins líkt og áður.

Heiðursgestur mótsins var Lárus Ástmar Hannesson forseti bæjarstjórnar Stykkishólmsbæjar sem bauð skákmeistarana velkomna í Hólminn, minntist Árna Helgasonar heiðursborgara Stykkishólms og bindindisfrömuðar og lék fyrsta leikinn fyrir Heiðrúnu Önnu Hauksdóttur Fjölni.

Lokastöðu mótsins má nálgast á Chess-Results.

Myndaalbúm (HÁ)

 

Hannes Hlífar hefur tryggt sér sigur - sex berjast um Norðurlandsmeistaratitilinn

Stórmeistarinn Hannes Hlífar Stefánsson (2513) vann Sveinbjörn Sigurðsson (1802) í sjöttu umferð Skákþings Norðlendinga sem fram fór í gær í Safnahúsinu á Króknum. Hannes hefur fullt hús og hefur tryggt sér sigur á mótinu. Hafnfirðingarnir Þorvarður F. Ólafsson (2237) og Sverrir Örn Björnsson (2135) eru í 2.-3. sæti með 4,5 vinning eftir jafntefli í innbyrðisviðureign. 

Úrslit fimmtu umferðar má finna hér.

Mikil barátta er Norðurlandsmeistaratitilinn en sex skákmenn geta hampað titlinum. Stefán Bergsson (2139) er efstur Norðanmanna en hann hefur 4 vinninga. Áskell Örn Kárason (2224) og Jón Kristinn Þorgeirsson (1812) hafa 3,5 vinning en Rúnar Sigurpálsson (2240), Hjörleifur Halldórsson (1936) og Sveinbjörn Ó. Sigurðsson (1802) hafa 3 vinninga.

Stöðu mótsins má nálgast hér.

Í sjöundu og síðustu umferð, sem fram fer í dag og hefst kl. 10:30 mætast meðal annars: Hannes-Stefán, Þorvarður-Áskell, Jón Kristinn-Sverrir Örn og Vigfús-Sveinbjörn. Pörun lokaumferðirnar má finna hér.

Hraðskákmót Norðlendinga hefst fljótlega að lokinni síðustu umferð eða um eða uppúr kl. 14.

• Heimasíða Skákfélags Sauðárkróks
• Chess-Results
• Myndaalbúm (GB)

NM stúlkur 2013 - Pistill þriðju umferðar

Úrslit dagsins;

 

A-flokkur

Jessica Bengtson, Svíþjóð - Jóhanna Björg Jóhannsdóttir ½-½

Thea Nicolajsen, Danmörk - Hrund Hauksdóttir 1-0

 

B-flokkur

Sóley Lind Pálsdóttir - Louise Westin, Svíþjóð 0-1

Veronika Steinunn Magnúsdóttir - Brandy Paltzer, Svíþjóð 1-0

 

C-flokkur

Ellen Fredericia, Danmörk - Nansý Davíðsdóttir 0-1

Polina Legkiy, Svíþjóð - Svandís Rós Ríkharðsdóttir 1-0

 

Það hefði mátt ganga betur í dag! 

 

Í A-flokki er Jóhanna á góðu skriði og gerði jafntefli við Jessicu Bengtson frá Svíþjóð í flókinni skák.  Hún var orðin mjög þreytt síðdegis í dag og vanmat aðeins stöðu sína í lok skákarinnar því hún gat mögulega forðað drottningaruppskiptum og reynt að tefla til sigurs með heldur þægilegri stöðu.  Hrund var heillum horfin í skákinni í dag og lék illa af sér peði og komst í rauninni aldrei almennilega í takt við skákina þrátt fyrir góða baráttu.

 

Staðan í A-flokki er afar spennandi.  Efst er Erle frá Noregi með 3,5 vinninga eftir afar skrautlegan sigur í umferðinni í dag eftir að hafa haft tapað tafl lengi.  Næstar koma svo Jóhanna, Jessica frá Svíþjóð og Thea frá Danmörku með 3 vinninga.  Ljóst er að morgundagurinn verður afar spennandi.  Hrund hefur hálfan vinning í þessum flokki sem er langt undir getu.  Ég vona svo sannarlega að hún nái sér á strik á morgun.

 

Í B-flokki tapaði Sóley illa í sinni verstu skák á mótinu gegn Louise frá Svíþjóð.  Hún tapaði skiptamun strax eftir byrjunina og náði sér ekki á strik eftir það sjokk.  Ég er handviss um að hún geri miklu betur á morgun.  Veronika tefldi mjög vel í dag gegn hinni sænsku Brandy.  Að þessu sinni vantaði ekkert á úrvinnsluna og full einbeiting allan tíman skilaði góðum sigri.

 

Efstar í B-flokki eru Freja frá Danmörku og Rina frá Svíþjóð með 3 vinninga.  Veronika hefur 1,5 vinning og þarf að eiga góðan dag á morgun til að ná verðlaunasæti.  Sóley hefur hálfan vinning en ætti að lyfta sér vel upp töfluna á morgun.

 

Í C-flokki sigraði Nansý dönsku stelpuna Ellen í afar góðri skák.  Nansý er að tefla afar vel á mótinu og með góðum degi á morgun getur hún sigrað flokkinn.  Svandís tapaði gegn Polinu frá Svíþjóð.  Þarna má að stórum hluta kenna reynsluleysi um en hún lét hraða taflmennsku andstæðingsins hafa áhrif á sig og tefldi byrjunina of hratt sem kostaði skiptamun.  Eftir það hægði hún á og tefldi síðari hluta skákarinnar mun betur en því miður of seint og því fór sem fór. 

 

Í C-flokki er staðan þannig að Nansý og Regina frá Noregi eru efstar og jafnar með 2,5 vinninga og tefla saman í fyrramálið.  Svandís er með hálfan vinning sem er of lítið miðað við getu.  Líkt og Hrund og Sóley þá hefur Svandís allt að vinna á morgun og ætti að geta lyft sér vel upp töfluna með góðum degi.

 

Umferðin í fyrramálið hefst klukkan 8:00 að Íslenskum tíma.  Við verðum því mætt fersk í strætó klukkan 7:30. 

 

 

 

Viðureignirnar hjá okkar stelpum í fyrramálið eru:

 

A-flokkur

Jóhanna Björg Jóhannsdóttir - Caroline Lindberg Hansen, Svíþjóð

Hrund Hauksdóttir - Kaberi Mitra, Svíþjóð

 

B-flokkur

Monika Machlik, Noregi  - Veronika Steinunn Magnúsdóttir 

Mette Ellegaard  Christensen, Danmörku - Sóley Lind Pálsdóttir

 

C-flokkur

Nansý Davíðsdóttir - Regine Forsa, Noregi

Svandís Rós Ríkharðsdóttir - Saida Mamadova, Svíþjóð

 

Jóhanna, Veronika og Nansý verða í beinni útsendingu.

 

Beinar útsendingar:

http://www.limhamnssk.se/live/ (flash)

http://www.limhamnssk.se/live/jslive.php 

 

Myndir:

http://www.flickr.com/photos/limhamnssk/sets/72157633191277159/

 

Úrslit og röðun:

A flokkur

B flokkur

C flokkur

 

Skákir (pgn):

Fyrsta umferð

Önnur umferð

Þriðja umferð

 

Davíð Ólafsson

Hannes efstur á Skákþingi Norðlendinga - átta hafa möguleika á Norðurlandsmeistaratitlinum

Stórmeistarinn Hannes Hlífar Stefánsson (2513) er efstur með fullt hús að lokinni fimmtu umferð Skákþings Norðlendinga sem fram fór í dag. Úrslit fimmtu umferðar má nálgast hér.Í 2.-3. sæti með 4 vinninga eru Hafnfirðingarnir Þorvarður F. Ólafsson (2237) og Sverrir Örn Björnsson (2135). Gríðarleg barátta er um hver verður Skákmeistari Norðlendinga - þar eru fjórir skákmenn efstir og jafnir með 3 vinninga og fjórir skammt undan með 2,5 vinninga

Efstir í baráttunni um titilinn eru þeir Rúnar Sigurpálsson (2240), Stefán Bergsson (2139), Hjörleifur Halldórsson (1936) og Sveinbjörn Sigurðsson (1802) en sá síðastnefndi hefur farið mikinn og unnið 3 skákir í röð og teflir við Hannes Hlífar. Fulltrúi Þingeyinga, Áskell Örn Kárason (2224), sem og ungu ljónin Andri Freyr Björgvinsson (1620) og Jón Kristinn Þorgeirsson (1812) og Skagfirðingurinn Jón Arnljótsson (1915) eru svo skammt undan með 2,5 vinning. Það eru semsagt átta norðlenskir skákmenn sem berjast um titilinn skákmeistari Norðlendinga. Stöðu mótsins má nálgast hér.

Sjötta og næst síðasta umferð hófst nú kl. 16:30. Þá mætast meðal annars: Sveinbjörn-Hannes, Sverrir-Þorvarður, Rúnar-Stefán, Jón Kristinn-Hjörleifur, Áskell-Andri Freyr og Jón-Vigfús.

 

• Heimasíða Skákfélags Sauðárkróks
• Chess-Results
• Myndaalbúm (GB)

NM stúlkur 2013 - pistill annarar umferðar

A-flokkur

Jóhanna Björg Jóhannsdóttir - Erle Andrea Marki Hansen, Noregi ½-½

Hrund Hauksdóttir - Caroline Lindberg Hansen, Svíþjóð ½-½

 

B-flokkur

Rina Weinman, Svíþjóð - Veronika Steinunn Magnúsdóttir  1-0

Brandy Paltzer, Svíþjóð - Sóley Lind Pálsdóttir ½-½

 

C-flokkur

Nansý Davíðsdóttir - Saida Mamadova, Svíþjóð 1-0

Svandís Rós Ríkharðsdóttir - Charlotte Helsen Neerdal, Danmörku ½-½

 

Mun betra gengi í dag en í gær.  Stelpurnar fengu 3 vinninga af 6 en miðað við stöðurnar hefðum við átt að geta fengið 4 til 4,5 vinninga.  Þetta er þó allt á réttri leið og vonandi uppskerum við enn betur.

 

Við fengum fína heimsókn í dag, en auk Davíðs pabba Nansýar og Margrétar mömmu Sóleyar mætti hinn gamlakunni skákmaður, Gunnar Finnlaugsson á svæðið.  Alltaf gaman að hitta kappann.

 

Í A-flokki fékk Jóhanna mjög vænlega stöðu gegn norsku stúlkunni með langa nafnið sem hún hefur oft teflt spennandi skákir við.  Jóhanna fann hins vegar ekki réttu leiðina (gegnumbrot með c5) og andstæðingurinn náði mótspili sem dugði til jafnteflis.  Byrjanaval Jóhönnu hefur verið til fyrirmyndar á mótinu og á hún æ betur með að lesa andstæðingana, auk þess sem almenn byrjanaþekking hennar hefur batnað mikið.  Hrund telfid langa og stranga skák við hina sænsku Karólínu.  Allt annað að sjá til Hrundar í dag sem snéri á andstæðinginn í miðtaflinu og fékk gjörunna stöðu.  Hún gleymdi sér afar illa í endataflinu og lék af sér heilum hrók afar slysalega.  Staða hennar var hins vegar svo góð að hún hélt auðveldlega jafntefli þrátt fyrir hróksmissinn.

 

Úrslitin í B-flokki voru okkur ekki hagstæð í dag.  Andstæðingur Veroniku, hin sænska Rina, tefldi byrjunina ónákvæmt sem ruglaði Veroniku í rímínu.  Í stað þess að fá fínustu stöðu, þá hélt Veronika áfram að leika teoríuleikjunum miðað við venjulega teoríu.  Þetta leiddi til þess að andstæðingurinn hafði allt í einu sparað mikinn tíma og skiptamunstap varð ekki umflúið.  Þrátt fyrir góða baráttu tapaðist skákin.  Veronika er staðráðin í að rétta sinn hlut í dag.  Sóley tefldi afar vel í dag gegn sænsku stúlkunni Brandy og fékk mjög vænlega stöðu.  Hún missti hins vegar af réttu leiðinni í mátsókn og andstæðingurinn slapp með jafntefli.  Sóley hefur verið að tefla vel og á mikið inni.

 

Í C-flokki tefldi Nansý við sænsku stúlkuna Saidu  sem varð á að tapa tempói í miðtaflinu og meira þurfti Nansý ekki og kláraði skákina með snaggaralegri mátsókn.  Flott skák hjá Nansý.  Svandís tefldi fína skák við Charlotte frá Danmörku.  Hvorug gaf nokkurt færi á sér niðurstaðan því jafntefli.  Það eru því ákveðin tímamót hjá Svandísi að vera komin á blað á Norðurlandamóti þannig að nú getur hún einbeitt sér að því að fjölga vinningunum.

 

Þriðja umferð er tefld núna klukkan 14 að íslenskum tíma.  Jóhanna, Hrund og Nansý eru í beinni útsendingu.

 

Skákir þriðju umferðar:

 

A-flokkur

Jessica Bengtson, Svíþjóð - Jóhanna Björg Jóhannsdóttir

Thea Nicolajsen, Danmörk - Hrund Hauksdóttir

 

B-flokkur

Sóley Lind Pálsdóttir - Louise Westin, Svíþjóð

Veronika Steinunn Magnúsdóttir - Brandy Paltzer, Svíþjóð

 

C-flokkur

Ellen Fredericia, Danmörk - Nansý Davíðsdóttir

Polina Legkiy, Svíþjóð - Svandís Rós Ríkharðsdóttir 

 

Beinar útsendingar:

http://www.limhamnssk.se/live/ (flash)

http://www.limhamnssk.se/live/jslive.php 

 

Myndir:

http://www.flickr.com/photos/limhamnssk/sets/72157633191277159/

 

Úrslit og röðun:

A flokkur

B flokkur

C flokkur

 

Davíð Ólafsson

Allt á fullu hjá Taflfélagi Reykjavíkur

Þórir Benediktsson hefur skrifað pistil um það sem er í gangi hjá félaginu um þessar mundir. Í pistlinum segir meðal annars:

Nú þegar líður að lokum skákvertíðarinnar er lokaspretturinn í fullum gangi hjá Taflfélagi Reykjavíkur og er alls ekki úr vegi að líta á það helsta sem er að gerast hjá elsta og stærsta skákfélagi landsins.  

Pistilinn má nálgast í heild sinni á heimasíðu TR.

Hannes efstur á Skákþingi Norðlendinga

Stórmeistarinn Hannes Hlífar Stefánsson (2513) er efstur með fullt hús að loknum fjórum fyrstu umferðum Skákþings Norðlendinga sem fram fóru í kvöld á Sauðárkróki. Fjórir skákmenn hafa 3 vinninga en það eru þeir Þorvarður F. Ólafsson (2237), Sverrir Örn Björnsson (2135), Rúnar Sigurpálsson (2240) og Stefán Bergsson (2139).

Í kvöld voru tefldar atskákir en á morgun verða tefldar umferðir 5 og 6. Þá verða tefldar kappskákir. Í upphafi umferðar var Haraldur Hermannsson heiðraður en hann verður níræður á mánudaginn.

• Heimasíða Skákfélags Sauðárkróks
• Chess-Results

NM stúlkur 2013 - Pistill fyrstu umferðar

A-flokkur

Thea Nicolajsen, Danmörk - Jóhanna Björg Jóhannsdóttir 0-1

Jessica Bengtson, Svíþjóð - Hrund Hauksdóttir 1-0

 

B-flokkur

Veronika Steinunn Magnúsdóttir - Annie Nylen, Svíþjóð ½-½

Sóley Lind Pálsdóttir - Ellen Kakulidis, Danmörk 0-1

 

C-flokkur

Charlotte Nelsen Neerdal, Danmörk - Nansý Davíðsdóttir  ½-½

Svandís Rós Ríkharðsdóttir - Lisa Fredholm, Svíþjóð 0-1

 

Ekki nógu góð úrslit í fyrstu umferð, 2 vinningar af 6 mögulegum. 

 

Í A-flokki vann Jóhanna í fremur skrautlegri skák.  Byrjunin heppnaðist vel og Jóhanna fékk afar vænlega stöðu.  Í framhaldinu valdi hún ekki nægilega nákvæma áætlun var komin með afar hæpna stöðu eftir vafasama peðsfórn.  Andstæðingurinn var í miklu tímahraki og lék af sér þannig að Jóhanna vann mann og endataflið síðan auðveldlega.   Hrund tapaði afar illa í dag.  Henni voru afar mislagðar hendur í byrjuninni og fékk afar slæma stöðu sem hún komst aldrei út úr og tapaði illa.  Slæm byrjun en Hrund er seig og mun ekki láta þetta koma fyrir aftur. 

 

Úrslitin í B-flokki ullu vonbrigðum.  Ég var farinn að sjá einn og hálfan vinning í þessum flokki.  Veronika þjarmaði að andstæðingi sínum og var gjörsamlega búin að ganga frá henni en þetta er eins og í stangveiðinni, andstæðingurinn spriklar mest rétt þegar verið er að draga hann á land.  Veronika var aðeins og bráð að hirða mann og andstæðingur hennar náði þráskák.  Slæmur endir á annars góðri skák.  Sóley tefldi mjög vel framan af og fékk vænlega stöðu.  Eftir smá ónákvæmni tapaði hún peði en fékk góðar bætur og hefði átt að landa jafntefli en missti af krítískum leik og því fór sem fór. 

 

Í C-flokki tefldi Nansý með svörtu við hina dönsku Charlotte.  Nansý tefldi stíft til sigurs en teygði sig heldur langt og lenti í erfiðri stöðu.  Sú stutta er þó mjög seig og úrræðagóð og bjargaði góðu jafntefli.  Hún er afar ákveðin í að vinna á morgun.  Svandís fékk erfitt verkefni í dag.  Ekki nóg með að hún hafi verið að tefla sína fyrstu skák á norðulandamóti, heldur fékk hún norðurlandameistara síðasta árs að auki.  Svandís tefldi vel framan af og fékk góða stöðu.  Andartaks óaðgætni kostaði hana þó hrók og skákina.  Hún kemur örugglega til baka á morgun reynslunni ríkari eftir að hafa séð að hún átti í fullu tré við sjálfan norðurlandameistarann í þessum flokki.

 

Á morgun er prógrammið eftirfarandi:

 

A-flokkur

Jóhanna Björg Jóhannsdóttir - Erle Andrea Marki Hansen, Noregi

Hrund Hauksdóttir - Caroline Lindberg Hansen, Svíþjóð

 

B-flokkur

Rina Weinman, Svíþjóð - Veronika Steinunn Magnúsdóttir

Brandy Paltser, Svíþjóð - Sóley Lind Pálsdóttir

 

C-flokkur

Nansý Davíðsdóttir - Saida Mamadova, Svíþjóð

Svandís Rós Ríkharðsdóttir - Charlotte Helsen Neerdal, Danmörku

 

Skákir Jóhönnu og Veroniku ættu að vera í beinni útsendingu.

 

Beinar útsendingar:

http://www.limhamnssk.se/live/ (flash)

http://www.limhamnssk.se/live/jslive.php 

 

Myndir:

http://www.flickr.com/photos/limhamnssk/sets/72157633191277159/

 

Úrslit og röðun:

A flokkur

B flokkur

C flokkur 

 

Davíð Ólafsson