Jón Þorvaldsson fjallar um Landsmót UMFÍ og sigur Þingeyinga þar

Jón Þorvaldssonar, liðsstjóri sveitar HSÞ (Héraðssamband Þingeyinga), fjallar um Landsmót UMFÍ á heimasíðu Goðans-Máta en það voru liðsmenn þeirra sem skipuðu sveit Þingeyinga á Landsmóti UMFÍ um síðustu helgi. Í pistli hans segir meðal annars:

Þar segir hann meðal annars:

Það var eftirminnileg upplifun að taka þátt í Landsmóti UMFÍ á Selfossi um helgina. Þar skeiðuðum við fram á köflóttan völlinn nokkrir félagar úr Goðanum-Mátum fyrir hönd HSÞ og tókumst á við skemmtilegar og vel mannaðar sveitir annarra ungmennafélaga. Ekki spillti ánægjunni að við höfðum sigur í keppninni, hlutum 27 vinninga af 32 mögulegum og vorum 5,5 vinningum á undan liðinu í 2. sæti, UMSK, en „ungliðarnir" í Fjölni náðu 3. sæti. Sigur HSÞ var reyndar í sjónmáli eftir velgengni fyrri keppnisdaginn þar sem tefldar voru 5 umferðir. Við létum svo kné fylgja kviði síðari daginn þegar stórmeistararnir Þröstur Þórhallsson og Helgi Áss Grétarsson komu til liðs við okkur síðustu 3 umferðirnar. 

Pistil Jóns má finna í heild sinni á heimsíðu Goðans Máta.

Hjörvar með jafntefli í 2. umferð

Alþjóðlegi meistarinn Hjörvar Steinn Grétarsson (2511) gerði í gær jafntefli við enska alþjóðlega meistarann Lawrence Trent (2420) í 2. umferð opna skoska meistaramótsins sem nú er í gangi í Helensburgh. Hjörvar hefur 1,5 vinning.

Í dag mætir hann Skotanum Alan Borwell (2017) og verður skákin sýnd beint á vefsíðu mótsins. Beina slóð á skákina má finna hér. Umferðin hefst kl. 12.

Um það bil 55 skákmenn taka þátt í aðalmótinu. Þar af eru 9 stórmeistarar og 8 alþjóðlegir meistarar. Hjörvar er nr. 5 í stigaröð keppenda. 

• Heimasíða mótsins
• Beinar útsendingar (hefjast almennt kl. 12)

Héðinn með jafntefli í 3. umferð

Héðinn Steingrímsson (2557) gerði jafntefli við serbneska alþjóðlega meistarann Slobodan Kovacevic (2332) í 4. umferð alþjóðlega mótsins í Benasque á Spáni sem fram fór í gær. Guðmundur Kjartansson (2444) tapaði hins vegar fyrir spænska stórmeistaranum Viktor Moskalenko (2529). Báðir hafa 3 vinninga og eru í 33.-95. sæti.

Í fimmtu umferð, sem fram fer í dag, teflir Héðinn við finnska stórmeistarann Heikki Westerinen (2283) en Guðmundur við tékknesku skákkonuna Teresa Olsarova (2203) sem er alþjóðlegur meistari kvenna.

Þátt í mótinu taka 428 skákmenn frá 37 löndum. Þar af eru 36 stórmeistarar og 25 alþjóðlegir meistarar. Héðinn er nr. 15 í stigaröð keppenda en Guðmundur er nr. 44. Tíu skákir eru sýndar beint í hverri umferð.

• Heimasíða mótsins
• Chess-Results
• Beinar útsendingar (hefjast almennt kl. 14)

Karjakin efstur í Beijing

Rússneski stórmeistarinn Sergei Karjakin (2776) er efstur með 3,5 vinning á FIDE Grand Prix-móti sem nú er í gangi í Beijing í Kína. Aserinn Mamedyarov (2761) er annar með 3 vinninga. Grischuk (2780), Wang Yue (2705) og Topalov (2767) koma næstir með 2,5 vinning.

Frí er í dag en mótinu verður framhaldið á morgun.

• Heimasíða mótsins
• Beinar útsendingar (hefjast kl. 07:00)

Íslandsmót skákmanna í golfi

Íslandsmót skákmanna í golfi 2013 verður haldið á Hvaleyrarvelli hjá Golfklúbbnum Keili í Hafnarfirði laugardaginn 10. ágúst n.k.  Keppt verður í tvíkeppni þar sem árangur í golfi og skák erlagður saman. 

Golfmótið er innifalið í Epli.is mótinu og fáum við rástíma þar milli kl 13 og 14.

Eftir að leik líkur verður boðið upp á kvöldverð í golfskálanum og að honum loknum verður 9 umferða hraðskákmót.

Skákdeild Breiðabliks sér um framkvæmd Íslandsmóts skákmanna í golfi.

Núverandi Íslandsmeistari er Helgi Ólafsson.

Upplýsingar um mótið í fyrra er hægt að nálgast á: http://chess.is/golf/chessgolf2012.htm

Þátttökutilkynningar berist til Halldór Grétars ( [e-mail] ) fyrir 8.júlí til að fá öruggan rástíma. Eftir þann tíma erum við í samkeppni við almenna keppendur!

7.júlí er 21 keppandi skráður til leiks.
 
Sjá nánar vefsíðu mótsins.

Sigurður stóð sig vel í Bæjaralandi

Sigurður Eiríksson (1950) stóð sig vel á skákmóti sem lauk í Bæjaralandi í Þýskalandi í gær. Sigurður hlaut 5 vinninga í 9 skákum og endaði í 16.-21. sæti af 55 keppendum. Varð efstur keppenda með minna en 2000 skákstig. Jakob Sævar Sigurðsson (1768) hlaut 4 vinninga og endaði í 32.-37. sæti.

Sigurvegari mótsins varð rússneski stórmeistarinn Evgeny Vorobiov (2583)

Heimasíða mótsins

Skákþáttur Morgunblaðsins: Hemmi Gunn og skákin

Fáir greiddu götu listamanna betur en Hermann Gunnarsson. Það var eins og rauður þráður í starfi hans og kom sennilega best fram í þáttunum „Á tali" þar sem alltaf var opið fyrir nýja og ferska krafta. Við fráfall hans er vert minnast þáttar Hemma við að auka hlut skákarinnar í sjónvarpi. Uppúr 1990 þegar undirritaður var að bera fram hugmyndir um skák-útsendingar hjá RÚV hitti ég Hermann á göngum sjónvarpsins og hann bauð strax fram aðstoð sína. Útsendingar frá úrslitum At-skákmóts Íslands fóru fram árum saman hjá RÚV og einnig á Stöð 2, SÝN og Skjá 1. Með hjálp kostunaraðila voru síðar fengin í sjónvarpssal Garrí Kasparov, Anatolí Karpov, og Judit Polgar. Hermann náði góðu sambandi við þessa höfuðsnillinga skákarinnar og á „Reykjavik rapid 2004" komu fram Magnús Carlsen og Lev Aronjan. Oft var Jón L. Árnason stórmeistari með í þessum útsendingum og Hermann bar snemma fram þá ósk að Egill Eðvarðsson yrði stjórnandi útsendinga. Skáksamband Íslands heiðraði Hermann sérstaklega fyrir framlag hans á þessu sviði.

Hermann var býsna slyngur skákmaður, tefldi stundum fyrir Skattstofuna í Skákkeppni stofnana, tók þátt í fjölmörgum skákmótum með styttri umhugsunartíma. Síðasta mót hans var hraðskákmót Vals sem fram fór í Lollastúku á Valsvellinum í apríl sl. Halldór í Henson vinur hans dró fram „Hrókinn", gamlan grip úr timbri sem fyrst var keppt um árið 1959. Á yngri árum var Hermann stundum meðal áhorfenda á skákmótum í Breiðfirðingabúð. Hann var alvörugefinn og íbygginn þegar hann tefldi. Ef hann vann lék hann á als oddi - og ef hann tapaði þá lék hann líka á als oddi.

Veturinn 1997 efndi greinarhöfundur til skáknámskeiðs fyrir vini og kunningja og Hemmi mætti til leiks. Á námskeiðinu var mikil áhersla lögð á gambíta: kóngsbragð, miðbragð og íslenska gambítinn. Eitt kvöldið var haldið „þema-fjöltefli". Af skákinni sem við tefldum að dæma og birtist í þætti Jóns L. í DV, virðist ákveðin léttúð hafa ríkt og taflmennskan stenst ekki nákvæma skoðun. Hermann tók á móti fórnum í anda „rómantíska tímabilsins" með bros á vör og vann að lokum:

Helgi Ólafsson - Hermann Gunnarsson

Kóngsbragð

1. e4 e5 2. f4 exf4 3. Rf3 g5 4. Bc4 d6 5. 0-0 Bg7 6. d4 Bg4 7. g3 Bh3 8. Bxf7+ Kxf7 9. Rxg5+ Dxg5 10. Hxf4+ Rf6 11. Rc3 Kg6!? 12. Hf5 Dxf5 13. exf5+ Bxf5 14. Re2 Rbd7 15. Rf4+ Kf7 16. c3 Hae8 17. Db3+ Kf8 18. Bd2 Re4 19. Hf1!? Rxd2 20. Re6+ Ke7

Hvítur er búinn að fara alltof geyst og 20. ... Kg8 vinnur létt.

21. Dd1 Rxf1 22. Rxg7 Re3 23. Df3 Hef8 24. Dxe3+ Kf6 25. Dh6+ Bg6 26. d5 Re5 27. Re6 He8 28. Dg7+ Kf5 29. Dxc7 Bf7 30. Rg7+ Kg4 31. Dxd6 Rf3+ 32. Kf2 Re5 33. h3+ Kg5 34. Rxe8??

„Stílbrot," skrifar Jón L. Og það eru orð að sönnu. Eftir 34. h4+! Kg4 35. Kg2! hótar hvítur 36. Db4+ o.s.frv. og á unnið tafl.

34. ... Hxe8 35. c4 Rd3+ 36. Kf3 Re5+ 37. Kg2 Bg6 38. b3 Rd3 39. Dd7 He5 40. Kf1??

Eftir þennan afleik tapast skákin. „Nú verða óvænt endalok," skrifar Jón L.

40. ... He1+ 41. Kg2 Be4+ 42. Kh2 Hh1 mát!

Eftir námskeiðið fengu þátttakendur skákirnar úr fjölteflinu í hendur með skýringum. Á góðri stundu nokkru síðar kom Hermann með plaggið til mín útprentað, rétti fram penna og sagði: „Skrifaðu: Algjör klassi hjá nemanda."

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 30. júní 2013.

Skákþættir Morgunblaðsins

Rúnar sigraði á afmælismóti Áskels Arnar

Afmælisfögnuður Áskels Arnar Kárasonar á Litlu-Laugum þann 5. júlí hófst með skákmóti eins og vera ber. 14 keppendur skráðu sig til leiks og voru tefldar 7 umferðir eftir svissnesku kerfi. Skákstjóri var Hermann Aðalsteinsson, sem fékk frí frá kvöldmjöltum í þetta sinn. 

Úrslit urðu sem hér segir:

1. Rúnar Sigurpálsson                   7
2. Áskell Örn Kárason                  4,5
3. Smári Ólafsson                       4,5
4. Jón Kristinn Þorgeirsson           4,5
5. Kári Arnór Kárason                   4
6. Rúnar Ísleifsson                        4
7. Símon Þórhallsson                    4
8. Karl E. Steingrímsson               4
9. Haki Jóhannesson                     3,5
10. Hermann Aðalsteinsson            3
11. Grétar Eyþórsson                     3
12. Þorgeir Smári Jónsson              2
13. Sigurður A. Þórarinsson            1
14. Örvar Sigurðsson                      0

Að móti loknu var sungið og dansað.

Heimasíða SA

 

Opna skoska: Hjörvar vann í fyrstu umferð

Alþjóðlegi meistarinn Hjörvar Steinn Grétarsson (2511) vann skoska skákmanninn Clement Sreeves (2251) í fyrstu umferð opna skoska meistaramótsins sem hófst í Helensburgh í gær. Í gær mætir hann enska alþjóðlega meistaranum Lawrance Trent (2420). Skák Hjörvars verður sýnd beint á vefsíðu mótsins en skákin hefst kl. 12.

Um það bil 75 skákmenn taka þátt í aðalmótinu. Þar af eru 9 stórmeistarar og 8 alþjóðlegir meistarar. Hjörvar er nr. 5 stigaröð keppenda. 

• Heimasíða mótsins
• Beinar útsendingar (hefjast almennt kl. 12)

Guðmundur og Héðinn unnu í 3. umferð

Guðmundur Kjartansson (2444) og Héðinn Steingrímsson (2557) unnu báðir í 3. umferð alþjóðlega mótsins í Benasque á Spáni sem fram fór í gær. Andstæðingar þeirra voru á stigabilinu (2100-2176).  Guðmundur hefur fullt hús en Héðinn hefur 2,5 vinning.

Í fjórðu umferð, sem fram fer í dag, teflir Guðmundur við spænska stórmeistarann Viktor Moskalenko (2529) en Héðinn við serbneska alþjóðlega meistarann Slobodan Kovacevic (2332).

Þátt taka 428 skákmenn frá 37 löndum. Þar af eru 36 stórmeistarar og 25 alþjóðlegir meistarar. Héðinn er nr. 15 í stigaröð keppenda en Guðmundur er nr. 44. Tíu skákir eru sýndar beint í hverri umferð.

• Heimasíða mótsins
• Chess-Results
• Beinar útsendingar (hefjast almennt kl. 14)