Davíð og Sævar efstir á Meistaramóti Hugins

FIDE-meistarinn Davíð Kjartansson (2331) og alþjóðlegi meistarinn Sævar Bjarnason (2095) eru efstir með fullt hús á Meistaramóti Hugins að lokinni fjórðu umferð sem fram fór í gærkveldi. 

Þeim fylgja svo eftir sex skákmenn sem allir eru með 3 vinninga. Í kvöld vann Davíð Stefán á efsta borði og á öðru borði vann Sævar Jón Eggert. Af öðrum athyglisverðum úrslitum má nefna að Bárður vann Sigurð, Felix vann Óskar Long og Þorsteinn vann Heimir.

Fjórða umferð fer fram í kvöld og hefst kl. 19.30. Þá mætast m.a. Sævar og Davíð í uppgjöri efstu manna og á öðru borði tefla Vigfús og Stefán

 

• Heimasíða Hugins
• Chess-Results

Æsir byrja að tefla í dag eftir sumarfrí

Æsir byrja að tefla aftur eftir sumarfrí á næsta þriðjudag í Stangarhyl 4. Sumir eldri skákmenn hafa sennilega tekið sér frí frá skákiðkun þessa þrjá mánuði síðustu. Margir hafa samt verið duglegir að mæta hjá Riddurunum í Hafnarfjarðarkirkju á miðvikudögum og eru þess vegna í fantaformi.

Hinir þurfa að fara að liðka skákfingurna og rifja upp einhverjar nothæfar byrjanir. Allir skákmenn 60 +  og skákkonur 50+ alltaf velkomin.

Við byrjum að tefla kl. 13.00 og teflum 10 mínútna skákir 9-10 umferðir eftir því hvernig liggur á okkur.

Barna- og unglingastarf Hauka hefst í dag

Barna- og unglingastarf Skákdeildar Hauka hefst þriðjudaginn 2. september. Skákæfingar í vetur verða á þriðjudögum frá kl. 17-19 í forsal Samkomusalarins. Þjálfari verður Páll Sigurðsson, s: 860 3120, netfang: [e-mail]

Reikna má með að æfingarnar verði tvískiptar þ.e. byrjendur og ungir skákmenn (yngsta stig grunnskóla) frá 17-18 og eldri keppendur frá 18-19.

Ný alþjóðleg skákstig

Ný alþjóðleg skákstig komu út í dag 1. september. Fremur litlar breytingar eru á listanum enda ekkert innlent mót reiknað til skákstiga að þessu sinni. Jóhann Hjartarson er sem fyrr stigahæstur íslenskra skákmanna. Lárus H. Bjarnason er eini nýliði listans og Hallgerður Helga Þorsteinsdóttir hækkar mest allra frá ágúst-listanum eftir góða frammistöðu á Ólympíuskákmótinu.

Topp 20

Jóhann Hjartarson (2571) er sem fyrr stigahæstur íslenskra skákmanna. Hannes Hlífar Stefánsson (2549) endurheimtir annað sæti eftir góða frammistöðu á Ólympíuskákmótinu og félagi hans er Ólympíuliðinu, Hjörvar Steinn Grétarsson (2548) er þriðji. Næstir eru Helgi Ólafsson (2543) og Héðinn Steingrímsson (2536).

 

No.	Name	Tit	sep.14	Gms	Diff.
1	Hjartarson, Johann	GM	2571	0	0
2	Stefansson, Hannes	GM	2549	9	13
3	Gretarsson, Hjorvar Steinn	GM	2548	9	5
4	Olafsson, Helgi	GM	2543	7	-12
5	Steingrimsson, Hedinn	GM	2536	0	0
6	Arnason, Jon L	GM	2502	0	0
7	Kristjansson, Stefan	GM	2490	0	0
8	Danielsen, Henrik	GM	2488	0	0
9	Gretarsson, Helgi Ass	GM	2456	0	0
10	Thorsteins, Karl	IM	2456	0	0
11	Kjartansson, Gudmundur	IM	2439	7	-9
12	Thorhallsson, Throstur	GM	2437	8	11
13	Thorfinnsson, Bragi	IM	2437	0	0
14	Gunnarsson, Arnar	IM	2435	0	0
15	Gunnarsson, Jon Viktor	IM	2426	0	0
16	Olafsson, Fridrik	GM	2397	0	0
17	Thorfinnsson, Bjorn	IM	2389	0	0
18	Ulfarsson, Magnus Orn	FM	2380	0	0
19	Arngrimsson, Dagur	IM	2376	0	0
20	Johannesson, Ingvar Thor	FM	2371	0	0

Nýliðar

Aðeins einn nýliði er á listanum nú en það Lárus H. Bjarnason (1650) sem var meðal þátttakenda á Politiken Cup.

 

No.	Name	Tit	sep.14	Gms	Diff.
1	Bjarnason, Larus H		1650	14	1650

Mestu hækkanir

Hallgerður Helga Þorsteinsdóttir (26) hækkar mest frá ágúst-listanum eftir mjög góða frammistöðu á Ólympíuskákmótinu. Í næstu sætum eru Hannes Hlífar Stefánsson (13) og Þröstur Þórhallsson (11) einnig eftir góða frammistöðu á Ólympíuskákmótinu.

 

No.	Name	Tit	sep.14	Gms	Diff.
1	Thorsteinsdottir, Hallgerdur		2008	10	26
2	Stefansson, Hannes	GM	2549	9	13
3	Thorhallsson, Throstur	GM	2437	8	11
4	Bjornsson, Eirikur K.		1949	10	10
5	Kristinardottir, Elsa Maria		1847	6	8
6	Finnbogadottir, Tinna Kristin		1922	8	7
7	Gretarsson, Hjorvar Steinn	GM	2548	9	5

Heimslistann má nálgst hér. 

Bikarsyrpa Taflfélags Reykjavíkur hefst á föstudaginn

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Fyrsta mótið í syrpunni hefst föstudaginn 5. september og stendur til sunnudagsins 7.september. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á "alvöru mótum" einungis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar.  Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:

1. umferð 17.30 á föstudegi (5. september)

2. umferð 10.30 á laugardegi (6. september)

3. umferð 14.00 á laugardegi (6. september)

4. umferð 10.30 á sunnudegi (7. september)

5. umferð 14.00 á sunnudegi. (Lokaumferð + verðlaunaafhending) (7. september).

Skráning fer fram á heimasíðu Taflfélags Reykjavíkur www.taflfelag.is. Vinsamlegast skráið þátttakendur sem fyrst, það hjálpar við undirbúning mótsins!

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju móti, en auk þess verða veitt sértök verðlaun fyrir samanlagðan árangur á mótunum. 

Hlökkum til að sjá ykkur!

Æfingar skákdeildar Fjölnis hefjast 17. september. Nýr æfingatími er á miðvikudögum

Vikulegar skákæfingar Skákdeildar Fjölnis fyrir börn og unglinga hefjast miðvikudaginn 17. september og verða þær í vetur alla miðvikudaga frá kl. 17:00 - 18:30. Æfingarnar verða í Rimaskóla og er gengið inn um íþróttahús skólans.

Árangur þeirra sem reglulega hafa mætt á skákæfingar Fjölnis hefur verið mjög góður og skákdeildin hlotið mörg verðlaun og viðurkenningar fyrir árangursríkt og fjölbreytilegt starf. Þetta er 11. starfsár skákdeildarinnar og eru foreldrar áhugasamra barna í Grafarvogi hvattir til að nýta sér skákæfingar Fjölnis sem eru ókeypis.

Æfingarnar eru ætlaðar þeim krökkum sem hafa lært mannganginn og farnir að tefla sér til ánægju. Áhersla er lögð á að hafa æfingarnar fjölbreyttar og skemmtilegar, þjálfun og skákmót til skiptis. Veitt eru verðlaun og viðurkenningar í lok æfinga auk þess sem boðið er upp á veitingar. Meðal leiðbeinenda í vetur verða okkar efnilegustu  unglingar í skáklistinni sem á síðustu árum hafa sótt kennslu og æfingar í úrvalsflokki Skákskóla Íslands og unnið til fjölda verðlauna jafnt á Íslandi sem erlendis.

Skákdeild Fjölnis heldur líkt og fyrri ár vegleg skákmót svo sem Torgmót Fjölnis, páskaeggjaskákmót og sumarskákmót Fjölnis í byrjun maí. Skákdeildin hefur einnig skipulagt og haldið utan um Skákmót Árnamessu í Stykkishólmi og æfingbúðir yfir eina helgi. Umsjón með skákæfingum Fjölnis verður sem fyrr í höndum Helga Árnasonar formanns skákdeildarinnar.

Caruana vann fimmtu skákina í röð! - Carlsen vann Aronian

Fabiano Caruana (2801) er óstöðvandi á Sinquefield Cup-mótinu en í gær vann hann sína fimmtu skák í röð er hannvann Nakamura (2787). Toplaov (2772) vann svo MVL (2768). Í hálfleik, eftir 5 umferðir, er því sú ótrúlega staða að Caruana hefur fullt hús vinninga en Toplaov (2772) og Carlsen (2877) eru næstir með 50% vinningshlutfall. 

Frídagur er í kvöld en fjörið heldur áfram á morgun.  Þá mætast Caruana-Topalov, Carlsen-MVL og Nakamura-Aronian.

Staðan:

• 1. Caruana (2801) 5 v.
• 2.-3. Topalov (2772) og Carlsen (2877) 2,5 v.
• 4. Vachier-Lagrave (2768) 2 v.
• 5.-6. Nakamura (2787) og Aronian (2805) 1,5 v.

Séu lifandi skákstig (live chess ratings) skoðuð er Caruana nú kominn upp í 2826 skákstig en Carlsen hefur þar 2864 skákstig. Aronian hangir þar í þriðja sætinu með 2793 skákstig þannig að það er orðið u.þ.b. jafnlangt fyrir Caruana að ná fyrsta sætinu og detta niður í þriðja.

Fína umfjöllun um fjórðu umferð má lesa á Chess24.com.

• Heimasíða mótsins
• Beinar útsendingar

Skákþjálfun hjá Skákakademíu Kópavogs

Skákakademía Kópavogs

Skákþjálfun veturinn 2014-15

Viltu æfa skák af alvöru og ná afreksmörkum Skáksambands Íslands ?

Skákakademía Kópavogs í samstarfi við Skákdeild Breiðabliks, Skákfélagið Huginn og Skákskóla Íslands býður í vetur upp á öfluga skákþjálfun með það að markmiði.

Boðið er upp á æfingatíma í Stúkunni við Kópavogsvöll þriðjudaga til föstudaga frá 16:00 - 17:30 og á mánudögum uppi í Mjódd frá kl 17:15 - 19:00.

 

 

Aðalþjálfari í Stúkunni verður Birkir Karl Sigurðsson og Vigfús Óðinn Vigfússon í Mjóddinni.  Þeim til aðstoðar verður einvala lið þjálfara frá Skákskóla Íslands, Skákfélaginu Huginn og Skákdeild Breiðabliks.

Í þjálfuninni verður stuðst við námsefni frá ChessSteps, stig 3 til 6.

Æfingarnar henta skákkrökkum sem hafa náð grunnfærni í skák, hafa mikinn áhuga og vilja æfa af alvöru til að stefna að því að verða í fremstu röð á Íslandi og  að standa sig með sóma á alþjóðlegum barna- og unglingaskákmótum.

Æfingarnar verða klæðskerasaumaðar fyrir hvern og einn. Bæði hvað varðar æfingatíma, námsefni og þjálfun. Hver iðkandi velur sér þrjár æfingar í viku, en frjálst verður að hafa þær fleiri eða færri. Einnig verður hægt að velja um að mæta seinna og fara fyrr ef tíminn t.d. rekst á aðrar tómstundir. Við búumst við að kjarninn í hópnum verði á aldrinum 11-15 ára og glími við stig 3 og 4 í vetur.

Yngri og eldri sem og iðkendur utan Kópavogs og í hvaða taflfélagi sem er, eru líka velkomnir. Sterkari ungmenni fá einnig þjálfun við hæfi. Í september geta allir mætt til að prófa án æfingagjalds.

 

Æfingagjald veturinn 2014-15: 15.000kr  (er styrkhæft sem tómstundastyrkur)

Fyrsta æfing: Þriðjudaginn 2.september

Skráning: https://docs.google.com/forms/d/14KROgVdFyvPxsXrxjFmjBDU7sdVA_AOQnFGWzxtIvg8/viewform

 

Afreksmörk SÍ: http://skaksamband.is/?c=webpage&id=487

Chess Steps námsefnið:  http://www.chess-steps.com/

Skóli vikunnar: Vættaskóli

Skóli vikunnar: Vættaskóli í Grafarvogi

Gamlir nemendur: Vættaskóli er sameinaður skóli Engjaskóla og Borgaskóla sem eru tiltölulega ungir skólar miðað við marga skóla borgarinnar en þeir komu til eftir miðjan tíunda áratuginn. Þekktasti skákmaður skólans er Elín Nhung sem hefur teflt fyrir Íslands hönd á Norðurlandamóti stúlkna en nemur nú við Menntaskólann við sund.

Íslandsmót barnaskólasveita: Jóhann Stefánsson fyrrum námsráðgjafi við skólann hélt uppi skákkennslu og öflugu skákstarfi við skólann um árabil. Sérstaka athygli hefur skólinn vakið fyrir sterkar stelpusveitir sem komust oft á verðlaunapall í sveitakeppnum. Til dæmis náðist silfur á Íslandsmóti stúlkna árið 2011 en þá sveit leiddi áðurnefnd Elín.

Síðustu ár: Jóhann hætti störfum við skólann fyrir fáeinum árum. Eins og hefur svo oft gerst getur skákstarf  í grunnskóla staðið og fallið með þeim einstaklingi innan skólans sem sér um skákstarfið. Það gerðist þó ekki þegar Jóhann hætti þar sem Tómas Hermannson kennari við skólann tók við starfi Jóhanns. Tómas er nú farinn til starfa í öðrum skóla í Reykjavík. Skákakademían tekur því við góðu búi þeirra Jóhanns og Tómas og kennir nú hinn óþreytandi Björn Ívar Karlsson við skólann alla mánudagsmorgna, alls fjórar kennslustundir. Nemendur í þriðja og fjórða bekk fá þá skákkennslu sem eru á stundatöflu þeirra.

Verkefni vetursins: Skólinn mun eins og áður taka þátt í sveitakeppnum á vegum Taflfélags Reykjavíkur og Skáksambands Íslands. Þá mun skólinn taka virkan þátt í Skákdeginum þann 26. janúar næstkomandi.

Sérstaða skólans: Sérstaða skólans er án efa sú mikla skákhefð innan skólans meðal stelpna. Einnig tók skólinn oft þátt í fjögurra skóla keppninni sem hefur verið samstarf Rimaskóla, Hagaskóla, Vættaskóla og Laugalækjarskóla.

Huginn vó Víkinga

Huginsmenn og Víkingaklúbburinn leiddu saman hesta sína í hraðskákkeppni taflfélaga í gærkvöld.

Aflsmunur var allnokkur á liðunum og þrátt fyrir grimmilega báráttu Víkinga lauk viðureigninni með öruggum sigri Hugins, 53 -19.

Hlutskarpastur Huginsmanna var Hjörvar Steinn Grétarsson með 11 vinninga af 12 en næstur kom Stefán Kristjánsson með 9,5 af 12.

Aðrir kappar sem tefldu fyrir Hugin voru Magnús Örn Úlfarsson, Sigurður Daði Sigfússon, Ásgeir Páll Ásbjörnsson og Kristján Ólafur Eðvarðsson.

Flesta vinninga Víkingaklúbbsins hlutu Gunnar Freyr Rúnarsson, 6 vinninga af 11, og Ólafur B. Þórsson, 6 vinninga af 12.

Aðrir Víkingar sem tóku þátt í rimmunni voru Stefán Þór Sigurjónsson, Sigurður Ingason, Sturla Þórðarson og Jón Úflljótsson.

Skákdómari nær og fjær var Gunnar Björnsson og er honum þökkuð yfirveguð dómgæsla í vandasömum úrlausnarefnum.

Búið er að draga hvaða lið mætast í undúrslitum. Það er:

• Skákfélagið Huginn - Skákfélag Reykjanesbæjar
• Taflfélag Reykjavíkur - Taflfélag Bolungarvíkur

Viðureignirnar fara fram fimmtudagskvöldið, 4. september og hefjast kl. 20. Teflt er í félagsheimili Hugins, Álfabakka 14a.

Mótstafla gærdagsins (hægt að stækka):