Skemmtikvöld Taflfélags Reykjavíkur á föstudag

Á föstudagskvöld kl. 20.00 er komið að þriðja skemmtikvöldi vetrarins!  Í tilefni af einvígi Magnúsar Carlsen og Viswanathan Anand um heimsmeistartitilinn sem hefst í Sochi á laugardag munum við tefla stöður úr innbyrðis viðureignum þessara miklu meistara.  En eins og alltaf á skemmtikvöldum TR þá eru sérreglur varðandi mótið.

Fyrirkomulagið verður eftirfarandi:

1. Tímamörkin eru sótt í smiðju Stefáns Steingríms Bergssonar úðunarsérfræðings og framkvæmdastjóra Skákakademíunnar. 
   • Keppendur skipta milli sín tíu mínútum. Hver 100ELO-stig sem munar á keppendum draga þá í sundur um eina mínútu í hvora átt. 200 stig tvær mínútur í hvora átt. Alveg niður í eina mínútu gegn níu mínútum þegar munurinn er 400 stig eða meir. 1 sekúnda bætist við hvern leik. Sá sem hefur minni tíma á klukkunni í upphafi skákar ræður hvoru megin hún stendur.  
2. Tefldar verða stöður úr skákum Carlsen og Anand
3. Tefldar verða 12 skákir.
4. Keppendur tefla innbyrðis eina skák með hvítt og eina skák með svart. (2. skáka viðureign milli keppenda)
5. Tvær stöður úr skákum Carlsen/Anand verða í boði í hverri viðureign.  Sá sem stýrir svörtu mönnunum í hvorri skák velur hvor staðan er tefld!  Hvítur á alltaf fyrsta leik í stöðunum.
6. Önnur af stöðunum sem hægt er að velja úr í hverri umferð verður gerð opinber á fimmtudag, og keppendur geta því undirbúið sig og valið þá stöðu þegar þeir fá svart, ..eða ekki.
7. Stöðurnar geta bæði verið úr þekktum byrjunum eða þegar þeim sleppir.
8. Gerð verða tvö hlé til Billjardbarsferða meðan á mótinu stendur.
9. Verðlaun:
   1.sæti 8000 króna úttekt á billjardbarnum í formi veitinga.
   2.sæti 5000 króna úttekt á Billjardbarnum í formi veitinga.
   3.sæti 2000 króna úttekt á Billiardbarnum í formi veitinga.
10. Þátttökugjald er 500 krónur sem innheimt verður af festu og ákafa fyrir fyrstu umferð.
11. Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins.
12. Sigurvegarinn hlítur nafnbótina Karlöndin 2014 

Tekið skal fram að í vor verður haldin skemmtikvöldakóngakeppni þar sem Mórinn 2014,Karlöndin 2014, Úlfurinn 2014 (eða 2015) og aðrir sigurvegarar skemmtikvöldanna munu mætast í uppgjöri þeirra bestu.

 Skemmtikvöld Taflfélags Reykjavíkur hafa notið mikilla vinsælda og eru frábær skemmtun!

Björgvin efstur í áttunda sinn hjá Ásum í gær

Það mættu tuttugu og sjö öðlingar til leiks í gær í Stangarhyl. Þetta var níundi skákdagur haustsins.
Björgvin Víglundsson hefur mætt átta sinnum og átta sinnum verið efstur. Það var engin breyting á því í gær, hann tapað þó einni skák og gerði eitt jafntefli, fékk sem sagt 8.5 vinning í fyrsta sæti.

Friðgeir Hólm varð í öðru sæti með 7 vinninga
Þá komu þeir þrír jafnir með 6.5 vinning þeir Stefán Þormar, Valdimar Ásmundsson og Jón Víglundsson. Stefán var efstur á stigum. Jón var í miklu stuði og mátaði hvern kappann á fætur öðrum. Vel gert hjá þeim bræðrum að taka tvö sæti af fimm efstu.

Stjórnarmenn voru nokkuð kátir í dag því að við erum búnir að fá kvenmann í húsverkin eins og þeir ræningjar í Kardemommubænum.

Ágæt kona sem ætlar að sjá um kaffið fyrir okkur næstu vikurnar vonum við. Það truflar einbeitinguna að stússa við kaffið.

Sjá nánari úrslit og myndir frá ESE

 

Andreikin sigraði á Grand Prix-mótinu í Tashkent

Öðru mótinu í Grand Prix-seríunni lauk í fyrradag í Tashkent í Úsbekistan. Rússinn Dmitry Andreikin (2722) kom sá og sigraði en hann hlaut 7 vinninga í 11 skákum. Í 2.-3. sæti urðu Aserinn Mamedyarov (2764) og Kaninn Nakamura (2764) með 6½ vinning.

Caruana (2844) náði sér ekki á strik og endaði í 4.-7. sæti með 4 vinninga. Mótið var haldið skömmu á eftir fyrsta mótinu sem valdi ónægju sumra keppenda og meðal annars Caruna sem lét hafa eftir sér á Twitter:

 

Good to finish on a win, and very glad to be done with this nightmare. Hopefully, FIDE can organize their WC cycle a bit better next time.

— Fabiano Caruana (@FabianoCaruana) November 2, 2014

 

Umfjöllun á Chess24.

Heimasíða mótsins

Unglingameistaramót Íslands (u20) fer fram á föstu- og laugardag í SÍ

Unglingameistaramót Íslands 2014 fer fram í húsnæði SÍ dagana 7.- 8. nóvember nk.  Þátttökurétt eiga þeir sem verða 20 ára á almanaksárinu og yngri.

Athugið að mótið hefur verið flutt úr Rimaskóla yfir í húsnæði SÍ Faxafeni 12. Íslandmót 15 ára og yngri verður engu að síður í Rimaskóla á laugardag og sunnudag. Aðeins er verið að flytja Unglingameistaramótið - ekki bæði mótin.

Sigurvegari á mótinu hlýtur titilinn “Unglingameistari Íslands 2014” og í verðlaun farseðil - að hámarki kr. 50.000.-  á skákmót erlendis.  Farseðilinn gildir í eitt ár.                       

Umferðatafla:            

• Föstudagur 7. nóv.     kl. 20.00                                 3 atskákir
• Laugardagur 8. nóv.:  kl. 17.00                                 4 atskákir

Að móti loknu verður verðlaunaafhending.           

Tímamörk:                  25 mín + 10 sek. viðbótartími á hvern leik   

Þátttökugjöld:            kr. 2.000.-

Skráning:                    http://www.skak.is (guli kassinn efst)

Upplýsingar um þegar skráða keppendur má finna hér.

Skráningu lýkur fimmtudaginn 6. nóvember.

Íslandsmót 15 ára og yngri fer fram á laugardag og sunnudag

Keppni á Íslandsmótinu í skák 2014 - 15 ára og yngri (fædd 1999 og síðar) og 13 ára og yngri (fædd 2001 og síðar) verður haldið í Rimaskóla dagana 8. og 9. nóvember nk. Tefldar verða 9 umferðir eftir svissneska kerfinu og er umhugsunartími 25 mín. + 10 sek. viðbótartími á hvern leik. Teflt verður í einum flokki.

Skráning fer fram á www.skak.is (skráningarform í gula kassanum efst).

Umferðataflan er þannig:

Laugardagur 8. nóvember     

• kl. 12.00 1. umferð
• kl. 13.00 2. umferð
• kl. 14.00 3. umferð
• kl. 15.00 4. umferð
• kl. 16.00 5. umferð

Sunnudagur 9. nóvember      

• kl. 11.00 6. umferð
• kl. 12.00 7. umferð
• kl. 13.00 8. umferð
• kl. 14.00 9. umferð

Þetta eru áætlaðar tímasetningar, en hver ný umferð hefst að þeirri fyrri lokinni.

Að því loknu verðlaunaafhending og mótsslit.

Þátttökugjöld: kr. 1.000.- (hámark kr. 1.500.- fyrir fjölskyldu)

Verðlaun: Verðlaunabikarar fyrir þrjú efstu sætin í hvorum flokki.

Mótið er reiknað til alþjóðlegra atskákstiga.

Þegar skráða keppendur má finna hér. 

Skáksambandið hvetur íslenska ungmenni til að fjölmenna í mótið!

Atskákmót Reykjavíkur fer fram í kvöld

Atskákmót Reykjavíkur sem jafnframt er atskákmót Hugins, suðursvæði fer fram mánudaginn 3. nóvember.

Mótið fer fram í félagsheimili Hugins, Álfabakka 14a í Mjódd. Tefldar verða 6 umferðir með Svissnesku-kerfi og hefur hvor keppandi 15 mínútur á skák. Mótið hefst kl. 19:30.

Verði tveir jafnir í baráttunni um annan hvorn titilinn verður teflt tveggja skáka hraðskákeinvígi.  Verði jafnt að því loknu verður hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani. Verði fleiri en tveir jafnir verður tefld einföld umferð, hraðskák. Verði enn jafnt þá bráðabani.

Núverandi atskákmeistari Reykjavíkur og atskákmeistari GM Hellis er Einar Hjalti Jensson.

Verðlaun:

• 1. 15.000
• 2.   8.000
• 3.   4.000

Þátttökugjöld:

• 16 ára og eldri: 1000 kr
• 15 ára og yngri: 500

Mótið verður reiknað til alþjóðlega atskákstiga.

 

Tómas Veigar atskákmeistari Akureyrar

Atskákmóti Akureyrar lauk í gær þegar fjórar síðustu umferðirnar af sjö voru tefldar.  Toppbaráttan var æsispennandi. Þegar tvær umferðir voru eftir hafði Jón Kristinn enn fullt hús, vinningi á undan Tómasi og Áskatli. Tómas gerði sér lítið fyrir og vann Jón Kristin í næstu umferð og voru þeir þá þrír jafnir. Hann lagði Áskel svo að velli í flókinni skák í lokaumferðinni en Jokko mátti láta sér jafntefli nægja gegn Andra. 

Þar með lágu þessi úrslit fyrir:

 

		1	2	3	4	5	6	7	8	vinn
1	Tómas Veigar Sigurðarson		1	1	1	0	1	1	1	6
2	Jón Kristinn Þorgeirsson	0		1	½	1	1	1	1	5½
3	Áskell Örn Kárason	0	0		1	1	1	1	1	5
4	Andri Freyr Björgvinsson	0	½	0		1	1	1	1	4½
5	Smári Ólafsson	1	0	0	0		1	1	1	4
6	Haraldur Haraldsson	0	0	0	0	0		1	1	2
7	Kristjan Hallberg	0	0	0	0	0	0		1	1
8	Gabríel Freyr Björnsson	0	1	0	0	1	0	0		0

Mótið á Chess-Results.

Skákþáttur Morgunblaðsins: Batumi-bragðið

Það er kunnara en frá þurfi að segja að skákbyrjanir draga oft nöfn sín af þjóðríkjum, borgum eða jafnvel bæjum: spænski leikurinn, ítalski leikurinn, frönsk vörn og íslenski gambíturinn. Og borgarnöfnin: Gautaborgar-afbrigðið, Sevilla-afbrigðið, Berlínarvörn og svo mætti lengi telja. Ég veit ekki til þess að nokkur skábyrjun sé nefnd eftir strandbænum Batumi í Georgíu sem liggur við landamæri Tyrklands en tilheyrði áður Óttóman-veldinu en þessa dagana fer þar fram Evrópumót ungmenna.

„Batumi-bragðið" mætti kannski kalla það háttalag mótshaldarans, sem er því miður ekki með öllu óþekkt í skákheiminum, að rukka fyrirfram fyrir fjögurra eða fimm stjörnu hótel en senda síðan keppendur á óupphitað gistiheimili að kljást þar við sagga, flóabit og kaldar kjötbollur. Helstu meðmælin með vistarverum íslenska hópsins voru þau, að hinn nýi forseti evrópska skáksambandsins, Georgíumaðurinn Zurab Azmaparashvili, hefði dvalist þar í nokkra daga fyrir fáeinum árum og líkað vel. Þeir eru svolítið að kenna hvor öðrum um hvernig þetta gat farið svona, framkvæmdastjórar mótsins, en svo dæmi sé tekið um mismununina þá rúlluðu rússnesku keppendurnir sem koma hingað í stórum hópum beint inn á bestu hótelin og mér er til efs að nokkur þeirra hafi greitt eitthvað svipað því sem íslensku keppendurnir þurftu að reiða fram. Ráfandi um í lobbíi Sheraton eru „utangarðsmennirnir" stöðugt minntir á að þarna hafi nú aldeilis gist höfðingjar á borð við Hillary Clinton, Sting og Pavarotti og fleiri stórlaxar.

Stundum er eins og ekkert hafi breyst hér í Georgíu þó að liðinn sé næstum aldarfjórðungur frá því að Sovétríkin leystust upp; þvergirðingsháttur, „njet" og margefld dyravarsla er gamalkunnur veruleiki. En hver veit nema Eyjólfur hressist.

Aftur að mótinu; eftir fjórar umferðir er Akureyringurinn Símon Þórhallsson sá keppandi sem mest hefur bætt sig miðað við ætlaðan árangur. Aðrir fulltrúar Íslands eru Dagur Ragnarsson, Oliver Aron Jóhannesson og Gauti Páll Jónsson. Í afbrigði hollenskrar varnar sem kennt er við Leningrad sló hann andstæðinginn út af laginu með leik sem ekki er minnst á í nýútkominni bók sem fjallar um refilstigu hollensku varnarinnar:

EM Batumi 2014; 4. umferð:

Símon Þórhallsson - Egor Filipets (Hvíta- Rússland)

Hollensk vörn

1.d4 Rf6 2. g3 Rf6 3. Bg2 g6 4. Rf3 Bg7 5. O-O O-O 6. c4 d6 7. Rc3 De8 8. e4!?

Óvæntur leikur sem Símon hafði áður beitt á Skákþingi Norðlendinga.

8. ... Rxe4?!

Sennilega er 8. ... fxe4 betra - til að eiga leið fyrir biskupinn niður á g4.

9. Rxe4 fxe4 10. Rg5 e5 11. Bxe4 h6 12. Rf3 Rc6

Eftir 12. ... exd4 13. He1! er svartur í vanda.

13. dxe5 Bg4?

Hyggst notfæra sér leppun riddarans en hugmyndin gengur ekki upp. Betra var 13. ... dxe5.

14. Dd5+! Be6 15. Db5!

Snarplega leikið og hótar 16. Dxb7.

15. ... Rxe5 16. Rxe5 Dxb5 17. cxb5 dxe5 18. Be3!

Fer sér að engu óðslega. Svartur getur ekki varið peðin á drottningarvæng.

18. ... Bc4 19. Hfc1 Bxb5 20. Bxb7 Had8 21. Hxc7 Hf7 22. Hac1 Hdd7 23. Hxd7 Hxd7 24. Bc6!

Uppskipti treysta oft yfirburði þess sem meiri hefur liðsafla.

24. ... Bxc6 25. Hxc6 Hd1+ 26. Kg2 Hb1 27. Hxg6 Kh7 28. Ha6 Hxb2 29. Hxa7

- og svartur gafst upp. Brátt brunar a2-peðið af stað.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 25. október 2014

Skákþættir Morgunblaðsins

Atskákmót Reykjavíkur fer fram á morgun

Atskákmót Reykjavíkur sem jafnframt er atskákmót Hugins, suðursvæði fer fram mánudaginn 3. nóvember.

Mótið fer fram í félagsheimili Hugins, Álfabakka 14a í Mjódd. Tefldar verða 6 umferðir með Svissnesku-kerfi og hefur hvor keppandi 15 mínútur á skák. Mótið hefst kl. 19:30.

Verði tveir jafnir í baráttunni um annan hvorn titilinn verður teflt tveggja skáka hraðskákeinvígi.  Verði jafnt að því loknu verður hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani. Verði fleiri en tveir jafnir verður tefld einföld umferð, hraðskák. Verði enn jafnt þá bráðabani.

Núverandi atskákmeistari Reykjavíkur og atskákmeistari GM Hellis er Einar Hjalti Jensson.

Verðlaun:

• 1. 15.000
• 2.   8.000
• 3.   4.000

Þátttökugjöld:

• 16 ára og eldri: 1000 kr
• 15 ára og yngri: 500

 

Afmælismót Einars Ben: Helgi sigraði - Skáksögufélag stofnað

Helgi Ólafsson sigraði á Afmælismóti Einars Benediktssonar sem haldið var á veitingahúsinu Einari Ben við Ingólfstorg, laugardaginn 1. nóvember. Helgi hlaut 6 vinninga af 7 mögulegum. Í 2.-3. sæti urðu Jóhann Hjartarson og Hjörvar Steinn Grétarsson, en alls voru keppendur 39. Í mótslok var Söguskákfélagið stofnað, en því er ætlað að stuðla að rannsóknum og skráningu á íslenskri skáksögu, sem spannar heilt árþúsund.

Afmælismót Einars Benediktssonar var haldið í tilefni af því að föstudaginn 31. október voru 150 ár frá fæðingu skáldsins, sem setti svo sterkan svip á samtíð sína. Guðmundur Andri Thorsson rithöfundur, sem flutti ávarp við setningu mótsins sagði að Einar hefði verið ,,hið síðasta í röð  stórskálda 19. aldar, Hann var líka fyrsta þjóðskáld 20. aldarinnar en um leið hið síðasta. Hann orti ljóð sem rúmuðu allt."

Einar var einn af stofnendum Taflfélags Reykjavíkur um aldamótin 1900 og skák var ein hans helsta skemmtun, eins og fram kemur í endurminningum konu hans, Valgerðar Benediktsson. Einar tefldi að staðaldri við bestu skákmenn Íslands, og notaði einatt líkingamál úr skákinni í skáldskap sínum.

Einar Benediktsson sendiherra, sonarsonur þjóðskáldsins, lék fyrsta leikinn fyrir Friðrik Ólafsson sem hafði hvítt gegn hinum 11 ára gamla Mykhaylo Kravchuk, sem er afar efnilegur.Katrín Einarsdóttir, langafabarn skáldsins, lék fyrsta leikinn fyrir Mykhaylo.

Jóhann Hjartarson byrjaði af miklum krafti og lagði Vigni Vatnar Stefánsson, Róbert Lagerman, Davíð Kjartansson og Hjörvar Stein Grétarsson í fyrstu fjórum umferðunum. Í 5. umferð gerði Jóhann jafntefli við Björn Þorfinnsson og tapaði fyrir Braga bróður hans í næstsíðustu umferð. Bragi var í toppbaráttunni allan tímann en tapaði fyrir Helga í magnaðri úrslitaskák í síðustu umferð.

Helgi Ólafsson hóf mótið með sigri á hinum efnilega Gauta Páli Jónssyni, en tapaði í 2. umferð fyrir Lenku Ptacnikova, bestu skákkonu Íslands. Helgi beit í skjaldarrendur, vann 5 síðustu skákirnar og sigraði á mótinu.

Verðlaunahafar fengu m.a. gjafabréf frá veitingahúsinu Einar Ben, sem stóð að mótinu ásamt Taflfélagi Reykjavíkur og Hróknum.

Við lokaathöfn mótsins var tilkynnt um stofnun Skáksögufélagsins, en því er haldað að stuðla að rannsóknum og fræðslu, sem varða skáksögu Íslands að fornu og nýju. Þá mun félagið beita sér fyrir varðveislju hverskonar skákminja og að saga mestu skákmeistara Íslands verði skráð. Skáksögufélagið mun ennfremur gangast fyrir og styðja útgáfu, málþing og sýningar.

 Einar S. Einarsson fv.  forstjóri, sem gegnt hefur ótal mikilvægum trúnaðarstörfum fyrir skákhreyfinguna, var kjörinn fyrsti forseti Skáksögufélagsins. Aðrir í stjórn eru Jón Þ. Þórsagnfræðingur, Róbert Lagerman forseti Vinaskákfélagsins og stjórnarmaður í SÍ, Guðmundur G. Þórarinsson verkfræðingur og fv. forseti SÍ og  Jón Torfason íslenskufræðingur og skjalavörður.

Chess-Results

Myndir má finna á heimasíðu Hróksins.