Baráttan heldur áfram á Skákþingi Reykjavíkur

Nokkuð var um óvænt úrslit í 2.umferð Skákþings Reykjavíkur sem fram fór síðastliðið miðvikudagskvöld. Bar þar hæst sigur hins efnilega TR-ings Arons Þórs Mai (1262) á stjórnarmanni Skáksambands Íslands, Óskari Long Einarssyni (1619). Sterkur sigur hjá Aroni sem er til alls líklegur við skákborðið um þessar mundir. Þá gerði Bjarni Sæmundsson (1895) jafntefli við annan stjórnarmann Skáksambandsins, skákdómarann geðþekka Omar Salama (2282). Þriðji stjórnarmaður Skáksambandsins lenti einnig í kröppum dansi því akademíuforinginn Stefán Bergsson (2085) varð að gera sér að góðu jafntefli með hvítu mönnunum gegn John Ontiveros (1810). Gárungarnir velta því nú fyrir sér hvort það hafi mögulega veikjandi áhrif á skákstyrkleika að taka sæti í stjórn Skáksambandsins. Ekki verður um það fullyrt hér.

Í þriðju umferð sem tefld verður á sunnudag klukkan 14 eru nokkrar athygliverðar rimmur. Á efsta borði glímir Þorvarður Fannar Ólafsson (2245) við stórmeistarann Stefán Kristjánsson (2492), á öðru borði stýrir fyrrum Íslandsmeistarinn Jón Viktor Gunnarsson (2433) hvítu mönnunum gegn Rimaskólaprinsinum Oliver Aroni Jóhannessyni (2170) og á þriðja borði mætast alþjóðlegu meistararnir og samfélagsrýnarnir Sævar Bjarnason (2114) og Björn Þorfinnsson (2373) í fyrstu skák mótsins á milli tveggja titilhafa.

Nú þegar titilhafarnir eru farnir að mætast innbyrðis þá harðna átökin og línur taka að skýrast í toppbaráttunni. Nær einhver að stöðva stórmeistarann? Hver hækkar mest á stigum? Hver mun koma mest á óvart? Hvor mun fórna fleiri mönnum í mótinu, Björn Þorfinnsson eða Stefán Bergsson? Gerir Sævar Bjarnason atlögu að sínum fyrsta sigri á Skákþinginu í 21 ár? Munu stjórnarmenn Skáksambandsins rétta sinn hlut? Ekki missa af fjörinu í húsakynnum TR að Faxafeni 12. Allir velkomnir!

• Úrslit, staða og pörun
• Dagskrá og upplýsingar
• Myndir
• Skákþing Reykjavíkur 2014
• Skákmeistarar Reykjavíkur
• Mótstöflur

Gallerý Skák flytur um sig set á ný

Ekki verður framhald á starfsemi Gallerý Skákar í Faxafeninu þar sem haldin hafa verið skákkvöld á hennar vegum á fimmtudögum undanfarna mánuði eftir að hún missti húsnæði sitt til margra ára í Bolholtinu. Viðburðir á hennar vegum halda þó áfram - nú í samvinnu Skákdeild KR í Frostaskjóli  -fyrst um sinn meðan leitað er eftir nýjum skáksal miðsvæðis í borginni. 

Á mánudaginn kemur  hefst þar mótaröðin „KAPPTEFLIÐ UM FRIÐRIKSKÓNGINN“ sem nú fer fram í fjórða sinn og kynnt verður nánar um sérstaklega. Við Grallararnir í Gallerýinu þökkum TR fyrir ánægjulegt samstarf og húsaskjól síðan í haust og óskum félaginu, forstöðumönnum þess og skákmönnum alls hins besta. /ESE

Viðamikil dagskrá framundan hjá TR

 

 

Öflugri dagskrá Taflfélags Reykjavíkur síðastliðið haust verður fylgt eftir af krafti á nýju ári. Þegar er hafið hið sögufræga Skákþing Reykjavíkur sem nú er haldið í 84. sinn. Meðal þátttakenda eru einn stórmeistari og fjórir alþjóðlegir meistarar en þegar þetta er skrifað er einungis tveimur umferðum af níu lokið svo snúið er að spá fyrir um framvindu mála. Skákþingið í ár er haldið til heiðurs Friðriki Ólafssyni sem verður áttræður meðan á mótinu stendur. Fylgist með gangi mála á Skákþinginu hér.

 

Skákþingið er aðeins toppurinn á ísjakanum því alls eru hátt í tuttugu viðburðir á döfinni hjá TR á komandi vetrar- og vormánuðum ásamt öflugum barna-og unglingaæfingum í viku hverri. Skemmtikvöld félagsins verða á sínum stað en þau hafa vakið stormandi lukku og þá má nefna hið sívinsæla Öðlingamót sem hefst í lok mars. Nýtt Vormót félagsins verður haldið öðru sinni og þá heldur Bikarsyrpan fyrir börnin áfram ásamt því að blásið verður til leiks í Nóa Síríusar Páskaeggjasyrpunni um miðjan mars.

 

Hér hefur ekki allt verið talið upp en starfsárinu lýkur með glæsibrag í maí með uppskeruhátíð fyrir yngri kynslóðina og síðan allsherjar úrslitakvöldi Skemmtikvöldanna en ítarlega dagskrá má finna í starfsáætlun félagsins þar sem að auki er útlistað nánar fyrirkomulag barna- og unglingastarfsins.

• Starfsáætlun TR vorið 2015

Afmælisbörn heiðruð - Ólafur H. og Bragi sjötugir

Bragi Kristjánsson og Ólafur H. Ólafsson urðu báðir sjötugir í dag. Af því tilefni var þeim boðið í morgunverð í húsnæði Skáksambands Íslands þar sem nokkrir vinir og vandamenn tóku á móti þeim og óskuðu þeim til hamingju með áfangann og þeim þökkuð störf í þágu skákhreyfingarinnar. 

Skáksambandið færði þeim báðum gjafir með þökkum fyrir fórnfúst starf í um hálfa öld. Helgi Ólafsson, skólastjóri Skákskóla Íslands, þakkaði þeim kærlega fyrir þeirra framlag til skáklistarinnar með snjallri ræðu.

Bragi Kristjánsson var um árabil í stjórn TR og SÍ og er margreyndar fararstjóri á vegum SÍ þar sem hann meðal annars fararstjóri á Ólympíuskákmótinu og áður fyrr með TR. Hann var og oftsinnis skákstjóri á mótum og áður fyrr voru þeir Bragi og Ólafur iðulega saman skákstjórar á skólamótum á vegum TR. 

Ólafur H. Ólafsson er heiðursfélagi SÍ og var í stjórn SÍ og TR um áratugaskeið og formaður TR um tíma. Óli H. var fyrsti skákkennari margra núverandi landsliðsmanna og er það skoðun þess sem þetta ritar að sumar kynslóðir skákmanna væru umtalsvert fámennari hefði elju Óla H. við unglingasarf ekki notið við.

Til hamingju með afmælið heiðursmenn!

Nóa Síríus mótið hefst í kvöld

Nóa Síríus mótið, Gestamót Hugins og Skákdeildar Breiðabliks, hefst á dag í Stúkunni á Kópavegsvelli.

Mótið er afar vel skipað en mótið í fyrra var sterkasta innlenda mót sem haldið hefur hérlendis.

Meðal keppenda nú eru tveir stórmeistarar, einn stórmeistari kvenna, fimm alþjóðlegir meistarar og fjórir FIDE-meistarar. Alls hafa um 35 keppendur meira en 2.000 skákstig!

Aðstæður í Stúkunni í einstakar – sennilega þær bestu á landsvísu til skákiðkunar. Hér má sjá nokkar myndir frá skákstað en skáksalurinn var settur upp í fyrradag. 

Fyrsta umferð hefst kl. 19:30. Gestir og gangandi eru sérstaklega boðnir velkomnir en boðið verður upp á kaffi og konfekt frá Nóa Síríusi!

Heimasíða mótsins

 

FIDE-þjálfara námskeið hefst kl. 17 - afar góð þátttaka

FIDE-þjálfara námsekið hefst kl. 17 í dag. Þátttaka hefur farið framúr björtustu vonum aðstandanda en 18 hafa skráð sig til leiks. Enn er opið fyrir skráningu fyrir þá sem hafa áhuga. 

 

Skákskóli Íslands og Skáksamband Íslands kynna:

FIDE trainer námskeið 8.-11. janúar 2015

Haldið í samvinnu við FIDE, FIDE trainers commision (TRG ) og Evrópska skáksambandinu (ECU)

Síðustu árin hafa sífellt fleiri komið að skákkennslu- og þjálfun barna og unglinga. Áhugasamt og hæft fólk er á hverju strái en til að auka enn þekkingu og hæfni til kennslu efnir Skákskóli Íslands og Skáksambandið til FIDE trainer námskeiðs. Eftir setu á námskeiðinu og próf að því loknu öðlast þátttakendur mismunandi gráður eftir árangri á prófinu, reynslu, ELO-stigum og öðrum þáttum.

Eftir áramót mun hefjast stefnumótun um menntun kennara og þjálfara, hvaða réttindi gráður fela í sér o.s.frv. Sú vinna mun tengjast inn í hugmyndir innan stjórnar SÍ um að hanna leyfiskerfi eins og er til staðar í öðrum íþróttum. Til dæmis yrðu félögum í efstu deild skylt að hafa ákveðið marga innan sinna raða með tiltekin réttindi til þjálfunar og kennslu.

Rétt er að geta þess að mót á vegum FIDE greiða götu þjálfara sem eru með FIDE– þjálfara gráðu. Mót sem FIDE stendur fyrir gera kröfu til þess að þjálfarar og liðsstjórar hafi gráðu af þessu tagi. 

Einnig má þess FIDE-trainer gráðu geta gefið mönnum tækifæri á að þjálfa á erlendri grundu stefni hugurinn þangað.

Umsjónarmaður:

Helgi Ólafsson stórmeistari og skólastjóri Skákskóla Íslands. Hann er FIDE senior trainer (FST) og á sæti í stjórn FIDE trainers commision. Helgi er eini Íslendingurinn sem hefur réttindi  til að halda námskeið af þessu tagi sem veitir full réttindi.

Dagsetning:

8.–11. janúar 2015

Lengd: 

16 klst.

Tilhögun:

Námskeiðið stendur í 16 klst og verður gert stutt hlé eftir eftir hverja kennslustund. Það hefst:

Fimmtudaginn 8. janúar kl. 17-21

Föstudaginn 9. janúar kl. 17-21.

Laugardaginn 10. janúar kl. 14-18.

Sunnudaginn 11. janúar kl. 14-18.  

Í lok námskeiðsins taka þátttakendur próf sem samanstendur af 30 spurningum upp úr því námsefni sem þátttakendur hafa undir höndum.

Standist þátttakandi próf  og hefur haft fulla viðveru út námskeiðið mun viðkomandi fá útnefningu og diploma sem FIDE trainer eða samkvæmt nánari skilgreiningu:

Þær gráður sem eru boði eru. Nánari skýringar eru í viðauka á ensku.

• FIDE Trainer (FT) – Þjálfarar hafi kunnáttu og getu til að þjálfa skákmenn sem hafa vilja til að ná langt.
• FIDE Instructor (FI) – Þjálfarar kunni grundvallaratriði í miðtafli og endatafli. Geti aðstoðað við að byggja upp byrjunarkerfi.
• National Instructor (NI) – Þjálfarar geti aðstoðað skákmenn til að ná góðri getu og geti kennt nemendum upp að 1.700 skákstigum.
• Developmental Instructor (DI) – Þjálfarar sem geta aukið áhuga krakka á skák og komið þeim á næsta stig. Leiðbeinendur fyrir byrjendur og þá sem eru skemmra komnir. Tilvalið fyrir kennara í skólum. .

Innifalin eru kennslugögn og verður prófað upp úr þeim kennslugögnum sem þátttakendur fá.

Efni sem notað er á námskeiðinu kemur frá TRG.

Þátttökugjald er kr. 39.000. 

Innifalið í þátttökugjöldum er námskeiðsgjald til FIDE (€100), gjald til FIDE fyrir þjálfaragráðuna í tvö ár (allt að €200) sem og öll kennslugögn.

Bent er á að flest verkalýðsfélög taka þátt í greiðslu námskeiðsgjalda af þessari tegund.

Ítarupplýsingar: http://www.fide.com/images/stories/NEWS_2014/Trainers/FTS-REY_2015-Prospectus.pdf

Skráning fer fram á Skák.is (guli kassinn efst). 

Viðauki

FIDE Trainer (FT)

Introducing the trainee to important aspects of chess, such as the concept of and preparation for competitive success. This is necessary for trainees who wish to reach a high level of play or seek competitive success in any form.

FIDE Instructor (FI)

Teach the trainee the theory of the middlegame and the endgame. He will work closely with the trainee towards the creation of the trainee's personalized opening repertoire, which he will also help enrich with new ideas.

National Instructor (NI)

1. Raising the level of competitive chess players to a national level standard.
2. Training trainees with rating up to 1700.
3. School teacher.

Developmental Instructor (DI) 

1. Spread the love for chess among children and methodically bring them to a competitive level.
2. Instructor for beginners, elementary, intermediate and recreational level players.
3. School teacher. 

Íslandsmót barna fer fram á laugardaginn

Íslandsmót barna í skák fer fram í Rimaskóla laugardaginn 10. janúar og hefst klukkan 12. Þátttökurétt hafa börnfædd 2004 og síðar og sigurvegarinn fær sæmdarheitið Íslandsmeistari barna 2015 og keppnisrétt á Norðurlandamótið í skólaskák sem haldið verður í Færeyjum um miðjan febrúar.
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Peðaskákmót verður haldið samhliða mótinu og hefst klukkan 13:00. Það er ætlað fyrir leikskólabörn og þau allra yngstu í grunnskólum sem eru ekki tilbúin fyrir Íslandsmótið.

Skákdeild Fjölnis verður með veitingasölu á meðan mótinu stendur.

Þetta er í 22. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Vignir Vatnar Stefánsson. 
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst hér á Skák.is. Fram þarf að koma fullt nafn, grunnskóli og fæðingarár. Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf umferðar. 

Veitt eru sérstök verðlaun fyrir bestan árangur í hverjum árgangi.

Upplýsingar um þegar skráða keppendur má finna hér.

Sigurvegarar á Íslandsmóti barna frá upphafi:
 

• 1994 Sigurður Páll Steindórsson
• 1995 Hlynur Hafliðason
• 1996 Guðjón H. Valgarðsson
• 1997 Dagur Arngrímsson
• 1998 Guðmundur Kjartansson
• 1999 Víðir Smári Petersen
• 2000 Viðar Berndsen
• 2001 Jón Heiðar Sigurðsson
• 2002 Sverrir Þorgeirsson
• 2003 Hjörvar Steinn Grétarsson
• 2004 Svanberg Már Pálsson
• 2005 Nökkvi Sverrisson
• 2006 Dagur Andri Friðgeirsson
• 2007 Kristófer Gautason
• 2008 Kristófer Gautason
• 2009 Jón Kristinn Þorgeirsson
• 2010 Jón Kristinn Þorgeirsson
• 2011 Dawid Kolka
• 2012 Nansý Davíðsdóttir
• 2013 Vignir Vatnar Stefánsson
• 2014 Vignir Vatnar Stefánsson

Janúarmót Hróksins og Stofunnar á fimmtudagskvöld

Hrókurinn og Café Stofan standa saman að skákmóti á fimmtudagskvöld klukkan 20. Tefldar verða 8 umferðir með 5 mínútna umhugsunartíma.

 

Verðlaun eru gjafabréf frá Stofunni, auk þess sem tilboð verður á veitingum fyrir keppendur og gesti mótsins.

 

Stofan er á Vesturgötu 3 (áður Fríða frænka) og þar er blómlegt skáklíf alla daga.

Bragi Halldórsson sigraði á jólahraðskákmóti Ása

Í gær á þrettándanum tefldu Æsir sitt jólahraðskákmót. Mótið átti að fara fram 16 desember sl. en því var frestað vegna veðurs. Þrjátíu og tveir kappar mættu til leiks í dag. Tefldar voru ellefu umferðir með 7 mínútna umhugsunar tíma.

Það gekk að vísu dálítið brösótt með fyrstu umferðirnar vegna þess að laumukommi hafði séð sér leik á borði og vildi vera með í leiknum. Skákstjórinn hafði sett óþarfa kommu með einu nafninu þegar hann sló inn gestalistann og þetta ruglaði niðurröðun fyrstu þrjár umferðirnar. Það var þarna eins og alltaf þegar draugar komast í spilið að þá er gott að hafa menn sem kunna eitthvað fyrir sér.Guðfinnur sá fjölhæfi snillingur sýndi að hann er góður í fleiru en að tefla skák, náði að kveða draugsa niður í þriðju tilraun.

Þetta var mjög sterkt mót og hart barist á  í mörgum umferðum. Bragi Halldórsson sigraði að lokum með 10 vinninga, hann gerði aðeins tvö jafntefli, við Björgvin og Magnús V Pétursson, þann óútreiknanlega skákmann. Björgvin Víglundsson varð síðan í öðru sæti með  9½ vinning. Guðfinnur var sá eini sem náði að vinna hann í dag. Í þriðja til fimmta sæti komu svo þrír jafnir með 7½ vinning. Það voru þeir Sæbjörn Larsen,Þór Valtýsson og Guðfinnur R Kjartansson. Sæbjörn var hæstur á stigum og fékk bronsið.

Kaffikonan okkar hún Hallfríður framreiddi kaffi og tertu fyrir okkur og kunnum við henni bestu þakkir fyrir.

Finnur Kr Finnsson og Garðar Guðmundsson sáu um skákstjórn.

Ég minni þá sem eiga heimangengt að Riddarar tefla í dag í Hafnarfirði. 

Sjá nánari úrslit í meðfylgjandi töflu og myndir frá ESE. 

 

Frábær frammistaða Guðmundar - hársbreidd frá stórmeistaraáfanga

Alþjóðlegi meistarinn Guðmundur Kjartansson (2451) vann enska stórmeistarann Mark Hebden (2523) í níundu og síðustu umferð Hastings-mótsins sem fram fór í dag. Guðmundur hlaut 7 vinninga og endaði í 2.-4. sæti. Frábær frammistaða.

Guðmundur var afar nálægt stórmeistaraáfanga. Til þess hefðu meðalstigin þurft að vera 2379,50 en voru 2379,44. Það munar því aðeins 0,06 stigum. Það hefði dugað Gumma ef einn andstæðinga hans hefði verið einu stigi hærri.

Gummi heldur áfram að hækka á stigum og hækkar um 17 stig. Hann er kominn með 2485 skákstig og vantar aðeins 15 stig til að ná tilskyldum 2500 skákstigum. 

Einstök úrslit Gumma má nálgast hér.

Alls tóku 110 skákmenn frá 29 löndum þátt í þessu fornfræga móti. Þar af voru 14 stórmeistarar og 9 alþjóðlegir meistarar. Guðmundur var nr. 15 í stigaröð keppenda.

• Heimasíða mótsins
• Chess-Results 
• Beinar útstendingar (hefjast kl. 14:15)
• ChessBomb