Skáknámskeið fyrir stúlkur í Stúkunni í Kópavogi.

Skáknámskeið fyrir stúlkur í Kópavogi og nágrenni verður haldið í Stúkunni  á Kópavogsvelli á laugardögum í vetur. 

Kynningaræfing verður laugardaginn 14. febrúar kl. 10.30 og verður hún ókeypis.

Námskeiðið hefst laugardaginn 21. febrúar kl. 10.30 – 12.00.  10 skipti kosta kr. 10.000.-

Kennarar verða Hallgerður Helga Þorsteinsdóttir og Tinna Kristín Finnbogadóttir.

Skráning  verður á kynningaræfingunni og á netfanginu [e-mail]

 

Rimaskóli Reykjavíkurmeistari grunnskólasveita

Það var líf og fjör í skákheimili Taflfélags Reykjavíkur mánudaginn 9.febrúar er Reykjavíkurmót grunnskólasveita var haldið með pompi og prakt. Skóla- og frístundasvið Reykjavíkurborgar hélt mótið í samstarfi við Taflfélag Reykjavíkur og var mótið hið 37. í röðinni. Hátt í 130 vaskir sveinar og stúlkur á grunnskólaaldri reimuðu á sig skákskóna þennan mánudagseftirmiðdag og tefldu fyrir hönd skóla sinna. Tefldar voru 7 umferðir með 10 mínútna umhugsunartíma á mann. Liðsstjórar skólanna höfðu í nógu að snúast og foreldrar og aðrir ættingjar fylgdust af ákafa með framgöngu sinna barna.

 

28 skáksveitir frá 16 grunnskólum tefldu í mótinu að þessu sinni og var mótið því einkar vel sótt, líkt og í fyrra. Flestar sveitanna komu frá Rimaskóla eða sex talsins. Þá tefldi Ingunnarskóli fram fjórum skáksveitum. Heildarfjöldi skáksveita var sá sami og árið áður, en þó jókst fjöldi grunnskóla sem sendu fulltrúa sína í mótið um einn, samanborið við í fyrra, sem er ánægjuefni.

 

Fyrirfram þótti Rimaskóli sigurstranglegastur í opnum flokki enda hefur skólinn orðið Reykjavíkurmeistari undanfarin tvö ár. Auk þess mætti Rimaskóli með þaulreynda skákmenn í hlutverkum liðsstjóra, þar á meðal nýkrýndan hraðskákmeistara Reykjavíkur, Dag Ragnarsson. Skáksveitir Ölduselsskóla, Laugalækjarskóla og Árbæjarskóla mættu einnig sterkar til leiks og þóttu líklegar til þess að blanda sér í baráttuna um gullið. Í stúlknaflokki tefldu fimm nokkuð jafnar skáksveitir og var búist við spennandi keppni þeirra á milli. Athygli vakti að bæði Melaskóli og Breiðholtsskóli sendu aðeins stúlknasveit til leiks, en þessar tvær stúlknasveitir hafa ávallt tekið þátt í skólaskákmótum undanfarin misseri. Þá hafa Rimaskóli og Ingunnarskóli einnig sent stúlknasveitir í þessi mót undanfarið með góðum árangri. Sveit Rimaskóla var þó líklegust til afreka að þessu sinni enda höfðu Grafarvogsstúlkur unnið mótið undanfarin fjögur ár.

 

Í opnum flokki varð fljótlega ljóst í hvað stefndi. A-sveit Rimaskóla vann fyrstu fjórar viðureignir sínar 4-0 á meðan keppinautar þeirra töpuðu skákum. A-sveit Ölduselsskóla fylgdi Rimaskóla eftir sem skugginn og mættust sveitirnar loks í 5.umferð. Þar vann Rimaskóli sannfærandi sigur og því var A-sveit Laugalækjarskóla eina sveitin sem átti raunhæfa möguleika á því að velta Rimaskóla úr sessi í 1.sæti. Þegar sveitirnar mættust í 6.umferð munaði aðeins einum vinning á sveitunum og var viðureignin æsispennandi. Svo fór að lokum að Rimaskóli vann með minnsta mun. Rimaskóla urðu svo ekki á nein mistök í síðustu umferð og sigurinn í mótinu var gulltryggður. A-sveit Rimaskóla hlaut 25 vinninga í efsta sæti –jafn marga vinninga og sigursveitin árið áður. Tapið gegn Rimaskóla í 6.umferð virtist sitja eilítið í sterkum skákmönnum Laugalækjarskóla –enda annálaðir keppnismenn sem ætluðu sér ekkert annað en sigur í mótinu- því þeir steinlágu fyrir Ölduselsskóla í síðustu umferð, 3-1. Þar með skaust hin efnilega A-sveit Ölduselsskóla í 2.sætið með 22 vinninga og var hún vel að því komin eftir góðan endasprett og heilsteypta taflmennsku í úrslitaviðureigninni um silfrið í síðustu umferð. A-sveit Laugalækjarskóla sat hins vegar eftir í 3.sæti með 20,5 vinning.

 

Í stúlknaflokki var mikil spenna frá upphafi til enda því úrslit réðust ekki fyrr en að lokinni síðustu skák. Fyrir síðustu umferðina voru stúlknasveitir Rimaskóla og Melaskóla efstar og jafnar í 1.sæti með 11 vinninga. Minnti þessi staða óneitanlega á stöðuna fyrir síðustu umferð sama móts í fyrra þegar þessir sömu skólar börðust um efsta sætið. Fast á hæla þeirra voru stúlknasveitir Breiðholtsskóla og Ingunnarskóla með 10 vinninga. Svo fór að lokum að Melaskóli vann sína viðureign með minnsta mun en Rimaskóli náði aðeins einu jafntefli í sinni viðureign. Á sama tíma unnu stúlknasveitir Ingunnarskóla og Norðlingaskóla stóran sigur og Breiðholtsskóli vann sína viðureign með minnsta mun. Melaskóla tókst því hið ómögulega, að velta Rimaskóla úr sessi sem sterkasta stúlknasveit Reykjavíkur. Melaskólastúlkur hlutu 13,5 vinning en stúlknasveit Ingunnarskóla fékk 13 vinninga sem dugði þeim í 2.sætið. Í 3.sæti varð Breiðholtsskóli með 12,5 vinning. Norðlingaskóli fékk 12 vinninga í 4.sæti og loks fékk Rimaskóli 11,5 vinning.

 

Reykjavíkurmóti grunnskólasveita í skák árið 2015 er því lokið. Það sem stendur upp úr er að Rimaskóli er Reykjavíkurmeistari grunnskólasveita annað árið í röð. Skólinn er afar vel að því kominn enda skákstarf þar á bæ gróskumikið og glæsilegt. Til marks um það er vert að geta þess að af sjö efstu skáksveitum mótsins átti Rimaskóli fjórar. Til hamingju Rimaskóli! Einnig stendur upp úr frábær frammistaða hinna glaðlyndu og samheldnu stúlkna í Melaskóla sem unnu stúlknaflokkinn eftir æsispennandi lokaumferð. Er það mjög vel af sér vikið, sérstaklega sé litið til þess að Rimaskóli hefur unnið stúlknaflokkinn undanfarin fjögur ár. Til hamingju Melaskóli!

 

Mótið í heild sinni heppnaðist afar vel og gekk framkvæmd þess eins og í sögu. Taflfélag Reykjavíkur vill koma á framfæri þökkum til allra keppenda, liðsstjóra, foreldra og annarra sem áttu leið í skákheimilið og áttu þátt í því að skapa hið magnaða og skemmtilega andrúmsloft sem ávallt ríkir á þessu móti. Sérstakar þakkir fær Skóla- og frístundasvið Reykjavíkurborgar fyrir ánægjulegt og árangursríkt samstarf. Einnig fá Skákakademía Reykjavíkur sem og Skákskóli Íslands góðar þakkir fyrir þeirra aðkomu og aðstoð. Hlökkum til að sjá alla –og fleiri til- á næsta ári!

• Myndir frá mótinu

Þriðja mót Bikarsyrpu TR hefst á föstudaginn

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Þriðja mótið í syrpunni hefst föstudaginn 13. febrúar og stendur til mánudagsins 16. febrúar. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (13. febrúar)
2. umferð 10.30 á laugardegi (14. febrúar)
3. umferð 14.00 á laugardegi (14. febrúar)
4. umferð 10.30 á sunnudegi (15. febrúar)
5. umferð 14.00 á sunnudegi  (15. febrúar). (Lokaumferð + verðlaunaafhending).

Sigurvegari fyrsta móts Bikarsyrpunnar var TR-ingurinn Mykhaylo Kravchuk og TR-ingurinn Aron Þór Mai sigraði á öðru mótinu.

Skráning fer fram á heimasíðu Taflfélags Reykjavíkur.
Vinsamlegast skráið þátttakendur sem fyrst, það hjálpar við undirbúning mótsins!  Skráðir keppendur.

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju
 móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

• Bikarsyrpa #1
• Bikarsyrpa #2

Össur efstur hjá Ásum í gær

Össur Kristinsson varð efstur í gær hjá Ásum í Stangarhyl 4. Það var óvenju lágt vinninga skor hjá toppnum í gær. Menn voru óvenju nægjusamir á vinninga. Sumir af okkur hefðu örugglega þegið fleiri vinninga, en það er nú eins og það er. Össur Kristinsson fékk 8 vinninga af 10 mögulegum. Kristinn Bjarnason varð í öðru sæti með 7½ vinning. Síðan komu þeir jafnir með 7 vinninga þeir Gunnar Finnsson og Jóhann Örn Sigurjónsson.

Næsta þriðjudag verður svo skemmtilegt mót. Eðalskákmót Magga P þá fá þeir einir vinninga sem náð hafa 75 ára aldri eða verða það á árinu.

Garðar formaður sat við stjórnvölinn í gær. 

Sjá nánari úrslit og myndir frá ESE

Skákþing Skagafjarðar - Landsbankamótið hefst í kvöld

Skákþing Skagafjarðar – Landsbankamótið, hefst miðvikudaginn 11. febrúar klukkan 20. Teflt verður í Safnaðarheimili Sauðárkrókskirkju, Aðalgötu 1 á Sauðárkróki. Tefldar verða 5 umferðir samkvæmt svissnesku kerfi.* 

Dagskrá:

• 1. umf. miðvikudagur 11. febrúar kl. 20
• 2. umf. laugardagur 14 febrúar kl. 10
• 3. umf. miðvikudag 18. febrúar kl. 20
• 4. umf. laugardag 21. febrúar kl. 10
• 5. umf. miðvikudag 25. febrúar kl. 20

Öllum er heimil þáttaka í mótinu og hlýtur sigurvegarinn sæmdarheitið „Skákmeistari Skagafjarðar 2015“.**

Heimilt verður að sitja hjá eina umferð (að undanskilinni síðustu umferð) og taka ½ vinning fyrir það. Ósk um yfirsetu þarf að berast mótsstjórn í síðasta lagi við upphaf umferðarinnar á undan.

Umhugsunartími verður 90 mín á skákina auk þess sem 30 sek bætast við tímann fyrir hvern leik (90 mín + 30 sek á leik). Mótið verður reiknað til íslenskra og alþjóðlegra skákstiga. Skráning er á netfangið [e-mail] og á skákstað eigi síðar en 15 mín fyrir upphaf fyrstu umferðar.

* Mótsstjórn áskilur sér rétt til þess að gera breytingar á auglýstu fyrirkomulagi þegar fjöldi þátttakenda liggur fyrir. Endanlegt fyrirkomulag verður tilkynnt keppendum fyrir upphaf fyrstu umferðar.

** Skákmeistari Skagafjarðar getur aðeins sá orðið sem er búsettur í Skagafirði og/eða er fullgildur félagi í Skákfélagi Sauðárkróks eða Skákfélagi Siglufjarðar.

• Heimasíða Skákfélags Sauðárkróks
• Chess-Results

Skákkkeppni vinnustaða fer fram í kvöld

 

Taflfélag Reykjavíkur býður öllum vinnustöðum að taka þátt íSkákkeppni vinnustaða 2015 sem fram fer í félagsheimili T.R., Skákhöllinni Faxafeni 12, miðvikudaginn 11. febrúar og hefst kl. 19.30.  Mótið, sem er styrktarmót Taflfélags Reykjavíkur,  er kjörið fyrir hinn almenna skákáhugamann þar sem vinnufélagar geta myndað lið og spreytt sig gegn skákmönnum annarra vinnustaða.

Dagsetning

Miðvikudagur 11. febrúar kl. 19.30

Staður

Taflfélag Reykjavíkur, Faxafeni 12

Keppnisfyrirkomulag

Þriggja manna lið með 1-2 varamönnum
Vinnustaður getur sent nokkur lið til keppni sem verða þá auðkennd sem A-lið, B-lið o.s.frv.
Svissneskt pörunarkerfi og flestir vinningar gilda
7-11 umferðir (bundið þátttöku)
Umhugsunartími er 10 mínútur á mann

Verðlaun

1. Eignabikar fyrir vinnustaðinn og farandbikar til vörslu í 1 ár auk verðlaunapeninga fyrir keppendur
2. Eignabikar fyrir vinnustaðinn auk verðlaunapeninga fyrir keppendur
3. Eignabikar fyrir vinnustaðinn auk verðlaunapeninga fyrir keppendur

Þátttökugjald

15.000 kr fyrir hvert lið

Nánari upplýsingar

Ríkharður Sveinsson, stjórnarmaður í Taflfélagi Reykjavíkur. Netfang:[e-mail] gsm: 7722990.

Skráning og staðfesting þátttöku

Skráning fer fram á heimasíðu Taflfélags Reykjavíkur

Þátttökugjaldið greiðist inn á reikning Taflfélags Reykjavíkur. Reikningsnúmer: 0101-26-640269. Kennitala: 640269-7669. Vinsamlegast setjið í skýringu: VINNUST

Verið velkomin að taka þátt í Skákkeppni vinnustaða 2015 – hlökkum til að sjá ykkur!

Dagur Ragnarsson hraðskákmeistari Reykjavíkur

Dagur Ragnarsson kom sá og sigraði á vel sóttu Hraðskákmóti Reykjavíkur sem fór fram síðastliðinn sunnudag.  Alls tóku 40 skákmenn þátt í mótinu, allt frá reyndum meisturum niður í kornunga keppendur sem mæta orðið á öll skákmót sem eru í boði.

Omar Salama byrjaði mótið með látum og var efstur með fullt hús eftir fimm umferðir en tapaði í þeirri sjöttu fyrir Degi.  Baráttan á toppnum var geysihörð og menn skiptust á að leiða mótið í lokaumferðunum. 

Fyrir 11. og síðustu umferð stóð Ólafur B. Þórsson með pálmann í höndunum og leiddi með með 8.5 vinning.  Ólafur sem tvisvar hefur hampað titlinum, fyrst fyrir akkúrat 20 árum mætti Oliver Aron Jóhannessyni í lokaumferðinni meðan Dagur sem var í öðru sæti með 8 vinninga tefldi við menntaskólakennarann knáa Eirík K. Björnsson.  Dagur sigraði örugglega og því varð Ólafur helst að vinna Oliver.  Það gékk þó ekki eftir og Oliver sigraði og rétti því félaga sínum úr gamla Rimaskólagenginu hjálparhönd á ögurstundu.

Dagur er vel að sigrinum kominn og hefur farið mikinn við skákborðið að undaförnu. Hann endaði í 3.-8. sæti á Skákþingi Reykjavíkur á dögunum og tapaði þar einungis einni skák, gegn sigurvegara mótsins alþjóðameistaranum Jóni Viktori Gunnarssyni. Dagur er einnig að gera mjög vel á Nóa Síríusmótinu sem nú stendur yfir og situr þar sem stendur í þriðja sæti með 4 vinninga eftir 5 umferðir.  Þar hefur hann lagt að velli ekki minni spámenn en alþjóðameistarann Karl Þorsteins og stórmeistara kvenna Lenku Ptácníkovu.

Ólafur B. Þórsson náði öðru sætinu á stigum þrátt fyrir tapið í síðustu umferð en þriðji varð Omar Salama.  Báðir hlutu þeir átta og hálfan vinning.

Ýmis óvænt úrslit litu dagsins ljós í mótinu og voru ungu skákmennirnir þar oft í aðalhlutverki.  Sérstaklega ber þar að nefna glæsilegan sigur Arons Þórs Mai (1262) á stórmeistara kvenna Lenku Ptácníkovu (2270) en þar munar heilum 1008 skákstigum! Aron hefur verið gríðarlega duglegur að sækja æfingar Taflfélagsins,  mætir á öll mót og er í hraðri framför.   Björgvin Kristbergsson (1165) lagði síðan Kjartan Maack (2115) að velli í sjöttu umferð.  Kjartan féll á tíma með koltapað tafl og virtist brugðið.  Honum til happs var gert stutt hlé eftir þá umferð og náði hann þá aftur vopnum sínum vann fimm síðustu skákirnar og endaði í 6.-8. sæti með sjö vinninga.

Tvíburabræðurnir ungu Björn Hólm og Bárður Örn vöktu einnig athygli en þeir tefldu báðir lengi móts uppi á pallinum og fengu þar dýrmæta reynslu gegn sér miklu reyndari skákmönnum.  Þeir virtust þó báðir saddir í lokaumferðunum og fengu samanlagt einungis ½ vinning í þremur seinustu umferðunum.  Björn endaði með 6 vinninga og Bárður með hálfum vinning minna.

Enginn virtist koma sjálfum sér meira á óvart en Pirc sérfræðingurinn Kristján Örn Elíasson sem var kominn alla leið upp á annað borð í áttundu umferð.  „Gaman að þessu“ kom að sjálfsögðu í upphafi skákar hans þar gegn Degi Ragnarssyni.  Hann tapaði örugglega og hvarf svo fljótt af pallinum!

Heildarúrslit: http://chess-results.com/tnr161147.aspx?lan=1&art=1&rd=11&fed=ISL&wi=821

 Eftir verðlaunaafhendingu fyrir Hraðskákmót Reykjavíkur voru veitt verðlaun fyrir Skákþing Reykjavíkur.  Eins og komið hefur fram í fréttum sigraði alþjóðlegi meistarinn Jón Viktor Gunnarsson á skákþinginu og er því Skákmeistari Reykjavíkur 2015.  Þar vakti glæsileg frammistaði hins unga Mikaels Jóhanns Karlssonar sérstaka athygli en hann endaði í öðru sæti eftir öruggan sigur á stórmeistaranum Stefáni Kristjánssyni í lokaumferðinni. 

Veitt voru verðlaun í fjölda stigaflokka og hér á eftir fylgja úrslit í þeim.

Skákmeistari Reykjavíkur 2015

 

1. Jón Viktor Gunnarsson Skákmeistari Reykjavíkur 2015 7.5
2. Mikhael Jóhann Karlsson Silfur 7.0

3.-8. Stefán Kristjánsson Brons 6.5

Dagur Arngrímsson

Guðmundur Gíslason

Dagur Ragnarsson

Björn Þorfinnsson

Jón Trausti Harðarsson

 

Undir 2000

1. Þórir Benediktsson Gull 5.5
2. Hallgerður Helga Þorsteinsdóttir Silfur  5.5
3. Vignir Vatnar Stefánsson Brons 5.5

 

Undir 1800

1. Dagur Kjartansson Gull   5.5
2. Jón Úlfljótsson Silfur 5.0
3. Felix Steinþórsson Brons 5.0

Undir 1600

1. Hörður Jónasson Gull 5.0
2. Héðinn Briem Silfur  5.0
3. Heimir Páll Ragnarsson Brons 4.5

 

Undir 1400

1. Aron Þór Mai Gull 4.5
2. Robert Luu Silfur 4.5
3. Óskar Einarsson Brons 4.0

 

Undir 1200

1. Jón Þór Lemery Gull 3.5
2. Stefán Orri Davíðsson Silfur 3.5
3. Arnar Milutin Heiðarsson Brons 3.5

 

Stigalausir

1. Atli Mar Baldursson Gull   3.5
2. Alexander Ragnarsson Silfur 2.5
3. Axel Ingi Árnason Brons 2.0

Taflfélag Reykjavíkur óskar öllum vinningshöfum til hamingju með árangurinn og þakkar öllum þeim sem tóku þátt í Skákþingi Reykjavíkur og Hraðskákmóti Reykjavíkur!

Heimasíða TR (myndskreytt frásögn)

Carslen sigraði á GRENKE-mótinu

Heimsmeistarinn í skák, Magnus Carlsen (2866), sigraði á GRENKE-mótinu í Baden Baden sem lauk í gær. Norðmaðurinn kom jafn í mark og heimamaðurinn Arkadij Naiditsch (2706). Þeir háðu atskákeinvígi um titilinn sem lauk 1-1. Að því loknu var teflt hraðskákeinvígi sem lauk einnig 1-1. Þá kom til bráðabanaskák (Armageddon) og þar hafði Carlsen hvítt og 6 mínútur gegn 5 mínútum. Þjóðverjanum dugði hins vegar jafntefli Þar hafði Carlsen sigur og þar með sigur á mótinu.

Lokastaða mótsins

Rg.	SNr		Name	Elo	FED	1	2	3	4	5	6	7	8	Pkte	Sieg
1	6	GM	Carlsen Magnus	2865	NOR	*	0	1	½	½	½	1	1	4½	3
2	5	GM	Naiditsch Arkadij	2706	GER	1	*	½	½	½	½	½	1	4½	2
3	4	GM	Adams Michael	2738	ENG	0	½	*	½	½	½	1	1	4	2
4	1	GM	Caruana Fabiano	2811	ITA	½	½	½	*	1	½	½	½	4	1
5	3	GM	Aronian Levon	2777	ARM	½	½	½	0	*	½	1	½	3½	1
6	2	GM	Bacrot Etienne	2711	FRA	½	½	½	½	½	*	½	½	3½	0
7	8	GM	Anand Viswanathan	2797	IND	0	½	0	½	0	½	*	1	2½	1
8	7	GM	Baramidze David	2594	GER	0	0	0	½	½	½	0	*	1½	0

 

• Heimasíða mótsins
• Beinar útsendingar (Chess24)

 

Reykjavíkurmót grunnskólasveita fer fram í dag

Reykjavíkurmót grunnskólasveita í skák 2015 fer fram mánudaginn 9. febrúar n.k. og hefst kl.17.

Tefldar verða 7 umferðir með 10 mín. umhugsunartíma á skák. Allar sveitirnar keppa í einum opnum flokki, og veitt verða verðlaun fyrir þrjár efstu sveitirnar sem og þrjár efstu stúlknasveitirnar. Hver sveit skal skipuð fjórum nemendum frá hverjum skóla auk 1-4 varamanna.

Hverjum skóla er heimilt að senda fleiri en eina sveit til þátttöku og skal þá sterkasta sveitin nefnd A, sú næststerkasta B, o.s.frv. Sigursveitin verður Reykjavíkurmeistari grunnskólasveita 2015 og hlýtur farandbikar til vörslu í eitt ár. Mótið hefst, sem áður segir, kl. 17 og lýkur um kl. 20. Verðlaunaafhending verður strax að móti loknu.

Sveitakeppni grunnskóla í Reykjavík er haldin í samvinnu Taflfélags Reykjavíkur og Skóla-og frístundasviðs Reykjavíkur og fer keppnin fram í félagsheimili Taflfélags Reykjavíkur að Faxafeni 12.

Mikilvægt er að skólarnir sendi fylgdarmann með sínu liði, keppendum til halds og trausts.

Þátttaka tilkynnist til skrifstofu Skóla og frístundasviðs eða á[e-mail] Einnig er hægt að senda skráningu á [e-mail] eigi síðar en föstudaginn 6. febrúar.

Ekki verður hægt að skrá lið á mótsstað.

Þátttökurétt hafa eingöngu nemendur í grunnskólum Reykjavíkur.

Norðurorkumótið - Skákþing Akureyrar: Jón Kristinn með fullt hús

Í dag hófst 5. umferð Norðurorkumótsins, Skákþings Akureyrar 2015. Tveimur skákum var frestað og verða þær tefldar á miðvikudaginn kl. 16.30.  

Það bar hæst að þriðju skákina í röð fékk Jón Kristinn verri stöðu út úr byrjuninni en tókst að snúa á andstæðinginn og sigra. Nú var það vinur hans og æfingafélagi, Símon Þórhallsson sem þurfti að bíta í hið súra epli.

Úrslit urðu:

 

• Símon-Jón          0-1
• Haraldur-Karl     1-0
• Logi-Jakob          0-1
• Hreinn-Andri     0-1
• Sigurður-Sveinbjörn      1-0
• Hjörleifur – Eymundur  0-1
• Oliver-Gabríel   +/-

 

Skákum Smára og Áskells annarsvegar og Ólafs og Haka hinsvegar var frestað til miðvikudags.

Staðan er þannig

Jón 5 vinningar af 5 mögulegum

Áskell 3,5 + frestuð skák

Símon 3,5

Smári og Ólafur 3 + frestuð skák

Haraldur, Jakob og Andri 3

Haki 2,5 + frestuð skák

Sigurður E og Ulker2,5

Karl Egill, Logi, Eymundur, Hreinn og Benedikt 2

Sveinbjörn, Oliver og Kristján 1,5

Hjörleifur 1

Gabriel 0,5

• Heimasíða SA
• Chess-Results