NM pistill nr. 3

NM í skólaskák pistill nr. 3

Það gekk upp og niður í 3. umferð NM í skólaskák sem fram fór í morgun. Fimm vinningar komu í hús og erum við í 3.-4. sæti í landskeppninni 2,5 vinningi á eftir Norðmönnum sem eru efstir. Dagur Ragnarsson er í banastuði og vann sína þriðja skák í röð. Mjög góður hjá sigur á Degi sem er kominn 2260 „lifandi skákstig“ . Fjórða umferð hófst nú kl. 16.

A-flokkur

Dagur vann glæsilegan sigur með hollensku vörninni. Frábær taflmennska hjá drengnum á mótinu hingað til. Mikael gerði jafntefli eftir að hafa fengið heldur verra útúr byrjunni. Dagur hefur 3 vinninga en Mikki hefur 1,5 vinning.

B-flokkur

Jón Kristinn var nærri því að kreista fram sigur en það tókst ekki. Oliver vann góðan sigur. Þeir hafa báðir tvo vinninga og eru að tefla innbyrðis.

C-flokkur.

Hilmir Freyr og Björn Hólm lentu báðir í erfiðleikum og þrátt fyrir hetjulega vörn tókst hvorugum þeirra að halda sínum hluta. Björn hefur 1,5 vinning an Hilmir hefur 0,5 vinning.

D-flokkur

Micha vann gríðarlegan vandaðan sigur og nýtti tímann sinn vel. Var gríðarlega sáttur í skáklok og sagði sigurinn mér og Stefáni að kenna þar sem við höfðum sagt honum að nýta tímann! Vignir tapaði.

E-flokkur

Óskar Víkingur vann öruggan sigur en Róbert lék af sér manni og tapaði. Óskar hefur 2 vinninga en Róbert hefur 0,5 vinning.

Fimmta umferð hófst kl. 16.

• Heimasíða mótsins
• Chess-Results
• Beinar útsendingar
• Myndaalbúm (GB) 

NM í skólaskák pistill nr. 2

Það gekk prýðilega hjá íslensku skákmönnunum í annarri umferð. 5,5 vinningur kom í hús og á tímabili leit þetta enn betur út. Dagur Ragnarsson er maður ferðarinnar hingað til en árangur Jokko, Björns Hólms og Vignis Vatnar eru einnig mjög góðir. Ánægjulegt er að allir íslensku keppendurnir eru komnir á blað.

A-flokkur

Dagur vann góðan sigur eins og greint var frá í gær. Mikil seigla í drengi sem sannaði að góður árangur hans á Skákþingi Reykjavíkur og Nóa Síríus-mótinu er alls engin tilviljun. Staða Mikka virtist vera afar góða gegn Högna hinum færeyska. Högni sýndi þó að það er engin tilviljun að hann sé skákmeistari Færeyja og kominn í landslið þeirra og snéri á Mikka í eigin tímahraki með öflugri gagnsókn. Dagur hefur 2 vinninga en Mikki hefur 1 vinning.

B-flokkur

Jón Kristinn er greinilega í miklu stuði. Fórnaði mann og innbyrti vinninginn skömmu síðar. Oliver Aron tapaði hins vegar eftir mikla baráttu.  Jón Kristinn hefur 1,5 vinning og Oliver hefur 1 vinning. Hef trú á þeir verði báðir í toppbaráttu flokksins.

C-flokkur.

Hilmir Freyr og Björn Hólm gerðu báðir jafntefli í fyrstu umferð. Þeir skiptust nú á andstæðingum og reyndust skiptin betri fyrir Björn sem vann öruggan sigur. Hilmir lagði e.t.v. fullmikið á stöðuna og tapaði. Björn hefur 1,5 vinning en Hilmir hefur 0,5 vinning.

D-flokkur

Vignir Vatnar var afar nærri því að leggja andstæðing sinn að velli en þurfti að sætta sig við jafntefli fyrir rest. Micha vann sína skák eftir hróksendatafl. Vignir hefur 1,5 en Micha hefur 1 vinning.

E-flokkur

Óskar Víkingur vann Róbert í innbyrðis skák. Óskar hefur 1 vinning en Róbert hefur 0,5 vinning.

Samantekt

Norðmennirnir eru efstir í landskeppninni með 14 vinninga, Svíar aðrir með 12 vinninga og Íslendingar þriðju með 11,5 vinning.

Umferðin hefst kl. 10. Hægt að fylgjast með þráðbeint. 

• Heimasíða mótsins
• Chess-Results
• Beinar útsendingar
• Myndaalbúm (GB) 

Dagur með fullt hús

Annarri umferð NM í skólaskák lauk rétt uppúr miðnætti. Dagur Ragnarsson átti síðustu skák umferðarinnar þegar hann vann Danann Viktor Nielsen með mikilli seiglu. Lauk skákinni þannig að Daninn tapaði endatafli með hrók á móti hróki og biskupi. Auk Dags unnu Jón Kristinn Þorgeirsson, Björn Hólm Birkison, Mykhaylo Kravchuk og Óskar Víkingur Davíðsson sínar skákir. Vignir Vatnar Stefánsson gerði jafntefli en aðrar skákir töpuðust.

Dagur hefur fullt hús í a-flokki, Jón Kristinn hefur 1,5 (b-flokkur), Björn Hólm (c-flokkur) og Vignir Vatnar (d-flokkur) eru allir í hópi efstu manna í sínum flokkum. 

Allir íslensku krakkarnir eru komnir á blað eftir fyrsta dag mótsins. 

Norðmennirnir eru efstir í landskeppninni með 14 vinninga, Svíar aðrir með 12 vinninga og Íslendingar þriðju með 11,5 vinning.

Þriðja umferð mótsins hefst kl. 10 í fyrramálið.

• Heimasíða mótsins
• Chess-Results
• Beinar útsendingar
• Myndaalbúm (GB) 

Skráning á sérstaka "tabula gratulatoria" - síðu í ritið Saga Reykjavíkurmótsins í 50 ár eftir Helga Ólafsson.

Eins og kunnugir vita hefur Skáksamband Íslands ráðist í ritun bókar um sögu Reykjavíkurskákmótsins. Helgi Ólafsson, stórmeistari, rithöfundur og skólastjóri Skákskóla Íslands, er höfundur bókarinnar. Ljóst má vera að fáir valda því hlutverki eins vel. Helgi er hafsjór fróðleiks um mótið og var sjálfur staddur í hringiðu þess um 30 ára skeið.

Saga Reykjavíkurmótsins er jafnframt saga skáklistarinnar á Íslandi, þar sem mótið hefur myndað þungamiðju skáklífs og veitt íslenskum skákmönnum tækifæri til þess að etja kappi við erlenda skákmeistara á heimavelli og þjóðinni ánægju af því að geta fylgst með skák á heimsmælikvarða úr návígi. Reykjavíkurmótið er elsti viðburður sem ber í titli nafn höfuðborgarinnar og er enn starfræktur og haldinn reglulega. Sagan er einnig aldarspegill, þar sem Helgi hefur ekki einatt næmt auga fyrir því sem gerist á skákborðinu heldur einnig utan þess. 

Verkið verður gefið út í tveimur bindum. Hið fyrra segir sögu mótanna frá 1964 til 1990 og kemur út nú í mars fyrir Opna Reykjavíkurskákmótið í umsjón Sagna útgáfu, en Menningarfélagið Mátar sá um yfirlestur ritsins. Sú ákvörðun hefur einnig verið tekin að fresta útgáfu tímaritsins Skákar en leggja þess í stað áherslu á Sögu Reykjavíkurskákmótsins í 50 ár. Seinna bindið kemur út að ári.

Það er von Skáksambands Íslands að bókin hljóti góðar viðtökur. Í því skyni býður SÍ skák- og skákáhugamönnum að fá skráð nafn sitt á sérstakan þakkarlista, tabula gratulatoria, gegn bindandi samningi um kaup á bókinni, en hvort bindi mun kosta 4.900 kr. Skákmenn eru hvattir til þess að skrá nafn sitt á þennan lista sem fyrst og ekki síðar en 19. febrúar 2015.

Hægt er að skrá sig hér.

NM í skólaskák: Pistill nr. 1

Dagurinn hjá íslensku landsliðsmönnunum hófst snemma í dag. Mæting á BSÍ kl. 7:45 og svo haldið til Keflavík og þaðan til flugvöllinn í Vágum. Að því loknu rútuferð til Klaksvíkar. Mæting þar kl. 14:45 og svo sest að tafli kl. 15!

Engin miskunn hjá Færeyingum sem þó frestuðu umferðum dagsins til að við gætum tekið beint flug í stað þess að fljúga degi fyrr í gegnum Kaupamannahöfn. Skákin er harður skóli og eftir að hafa hespað í sig samlokum settust landsliðsmennirnir okkar að skákborðunum.

Uppskeran í fyrstu umferð var nokkuð góð eða 6 vinningar í 10 skákum.

Í a-flokki unnu Mikki og Dagur báðir örugga sigra. 

Í b-flokki vann Oliver Aron öruggan sigur og Jón Kristinn gerði jafntefli við stigahæsta keppenda flokksins Lars Oskar Hauge sem m.a. tefldi með Norðmönnum á EM landsliða í Varsjá 2013.

Spennan var mest í c-flokki.  Björn og Hilmir reyndust gríðarlega seigir og héldu báðir jafntefli eftir erfiðar stöðu. Björn við stigahæsta keppenda flokksins, Eyvind Djurhuus, son stórmeistarans Rune Djurhuus.

Í d-flokki vann Vignir Vatnar örugglega en Micha tapaði hins vegar fullt fljótt. Á það til að tefla heldur hratt strákurinn en er gríðarlega útsjónarsamur skákmaður.

Í e-flokki lenti Óskar Víkingur í beyglu og andstæðingar hans vann með býsna laglegri biskupsfórn. Róbert Luu var heppinn að ná jafntefli – var með tapað í lokastöðunni.

Sex vinningar í hús sem þýðir þriðja sætið í óformlegri landskeppni.

Önnur umferð er nýhafin. Hægt að fylgjast með henni beint hér.

Aðstæður á skákstað eru fínar. Allar skákir, eða svo til, sýndar beint. Fín aðstaða fyrir fylgimenn upp á efri hæð þar sem keppendum mega ekki koma. Hluti hópsins býr í húsi rétt hjá hótelinu en eldri keppendurnir búa á sjálfu hótelinu. Boðið var upp á ljúffengt lasagna og gaman að hitta gamla kunningja eins og Finnbjörn Vang, forseta færeyska skáksambandsins, og Hjalta Skaale, sem var meðal dómara á síðasta Ólympíumóts og mikill vinur íslenska hópsins.

Myndaalbúm má finna á Facebook en því miður er ekki nógu gott til að setja myndaalbúm á Skák.is.

Hægt er að fylgjast með skákunum beint á heimasíðu mótsins auk þess sem íslenskir skákmenn fylgjast vel með skákunum á Facebook á milli þess sem þeir ræða um skráningar starfheita í símaskrám landsmanna. 

NM í skólaskák hafið

Norðurlandamótið í skólaskák hófst nú kl. 15 í Klaksvík í Færeyjum. Tíu íslenskir skákmenn, sem tefla í fimm flokkum, taka þátt.

Hægt er að fylgjast með flestum skákum mótsins beint á vef mótsins.

• Heimasíða mótsins
• Chess-Results
• Beinar útsendingar
• Myndaalbúm (GB) - myndir væntanlegar

Bikarsyrpa TR hefst í dag

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Þriðja mótið í syrpunni hefst föstudaginn 13. febrúar og stendur til mánudagsins 16. febrúar. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (13. febrúar)
2. umferð 10.30 á laugardegi (14. febrúar)
3. umferð 14.00 á laugardegi (14. febrúar)
4. umferð 10.30 á sunnudegi (15. febrúar)
5. umferð 14.00 á sunnudegi  (15. febrúar). (Lokaumferð + verðlaunaafhending).

Sigurvegari fyrsta móts Bikarsyrpunnar var TR-ingurinn Mykhaylo Kravchuk og TR-ingurinn Aron Þór Mai sigraði á öðru mótinu.

Skráning fer fram á heimasíðu Taflfélags Reykjavíkur.
Vinsamlegast skráið þátttakendur sem fyrst, það hjálpar við undirbúning mótsins!  Skráðir keppendur.

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju
 móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

• Bikarsyrpa #1
• Bikarsyrpa #2

Actavis sigraði í Skákkeppni vinnustaða!

Það hefur verið mikið um að vera hjá Taflfélagi Reykjavíkur undanfarið eins og ætíð.  Á mánudag fór fram fjölmennt Reykjavíkurmót grunnskólasveita í skákhöllinni og í gærkvöld var röðin komin að hinni skemmtilegu Skákkeppni vinnustaða.  Ellefu sveitir voru mættar til leiks og margar þeirra afar sterkar.  Actavis sem hafði titil að verja mættu gráir fyrir járnum með hvorki meira né minna en fjórar sveitir.  A sveit fyrirtækisins var skipuð sigurvegurunum frá því í fyrra, FIDE meisturunum Sigurbirni Björnssyni , Sigurði Daða Sigfússyni og Davíð Ólafssyni. 

Skákakademía Reykjavíkur sem margsinnis hefur unnið keppnina tefldi fram Birni Ívari Karlssyni á fyrsta borði, framkvæmdastjóranum Stefáni Steingrím Bergssyni á öðru borði og Siguringa Sigurjónssyni á þriðja borði. 

ION Luxury Adventure Hotel tók nú þátt í fyrsta sinn og með fyrnasterka sveit. Hótelstjórinn og FIDE meistarinn Davíð Kjartansson fór að sjálfsögðu fyrir sínum mönnum, á öðru borði var íþróttamaður Fjölnis 2013 hinn efnilegi Oliver Aron Jóhannesson og á því þriðja tefldu Patrekur Maron Magnússon og Birkir Karl Sigurðsson til skiptis.

Landspítalinn tefldi fram öflugri sveit sem kraftajötuninn og Víkingurinn Gunnar Freyr Rúnarsson fór fyrir og leiddi sú sveit mótið framan af.  Myllan sem margsinnis hefur tekið þátt tefldi fram þéttri sveit, þeirri sömu og vann bronsið í fyrra með þá Þorvarð Fannar Ólafsson, Einar Valdimarsson og John Ontiveros innanborðs.  Icelandair tók nú þátt með hinn öfluga FIDE meistara úr Áss skákfjölskyldunni Andra Áss Grétarsson  á fyrsta borði.  Eiríkur Kolbeinn Björnsson fór fyrir sveit Verzlunarskóla Íslands sem nú tók þátt aftur eftir eins árs hlé en skólinn varð í 6. sæti árið 2013.  Betware tók nú þátt í fyrsta sinn og veðjaði á að óþekkt en þegar til kastanna kom nokkuð sterk sveit þeirra gæti gert fastagestum annarra sveita skráveifu. B,  C og D sveitir Actavis voru skipaðar skemmtilegum skákmönnum sem kunnu ýmislegt fyrir sér þótt þeir hafi ekki allir sést reglulega á skákmótum. 

Þessi fjölbreitta flóra sterkra meistara og minni spámanna setti skemmtilegan svip á keppnina og nokkur óvænt úrslit litu dagsins ljós.

Landspítalinn byrjaði keppnina mjög vel, vann tvær fyrstu viðureignir sínar 3-0, vann mikilvægan 2-1 sigur í þriðju umferð gegn Ion Luxury Adventure Hotel og leiddi að henni lokið keppnina.  A sveit Actavis var þó skammt undan og þegar þessar sveitir mættust í fjórðu umferð steinlá Landspítalinn 0-3.  Skákirnar voru þó mun jafnari en úrslitin gefa til kynna.

Actavis tók því forystuna og lét hana aldrei af hendi .  Sveitin fékk 8 vinninga af 9 mögulegum í þremur seinustu umferðunum og sigraði örugglega með 18.5 vinninga. Skákakademía Reykjavíkur sem fór frekar rólega af stað tók  annað sætið „frá hlið“ með því að leggja Verzlunarskólann 3-0 í lokaumferðinni og skjótast þar með upp fyrirLandspítalann á stigum.  Báðar þessar sveitir luku leik með 14.5 vinninga.  ION Luxury Adventure Hotel sem mætti Myllunni í seinustu umferði og sættist á skiptan hlut 1.5-1.5 endaði í fjórða sæti með 13.5 vinninga líkt og Icelandair en ofar á stigum.

Heildarúrslit:

Taflfélag Reykjavíkur vill þakka þeim vinnustöðum sem tóku þátt og öllum þeim fjölda skákmanna sem kepptu fyrir hönd þeirra.  Sjáumst að ári!

 

Skákveislan heldur svo áfram á morgun en þá hefst þriðja mótið í Bikarsyrpu Taflfélagsins sem  stendur yfir helgina.  Þar gefst yngstu kynslóðinni okkar gullið tækifæri til að keppa sín á milli á alvöru kappskákmóti sem reiknað er bæði til íslenskra og alþjóðlegra skákstiga.  Verið velkomin!

Myndskreytt frásögn á heimasíðu TR

Skáknámskeið fyrir stúlkur í Stúkunni í Kópavogi.

Skáknámskeið fyrir stúlkur í Kópavogi og nágrenni verður haldið í Stúkunni  á Kópavogsvelli á laugardögum í vetur. 

Kynningaræfing verður laugardaginn 14. febrúar kl. 10.30 og verður hún ókeypis.

Námskeiðið hefst laugardaginn 21. febrúar kl. 10.30 – 12.00.  10 skipti kosta kr. 10.000.-

Kennarar verða Hallgerður Helga Þorsteinsdóttir og Tinna Kristín Finnbogadóttir.

Skráning  verður á kynningaræfingunni og á netfanginu [e-mail]

 

Rimaskóli Reykjavíkurmeistari grunnskólasveita

Það var líf og fjör í skákheimili Taflfélags Reykjavíkur mánudaginn 9.febrúar er Reykjavíkurmót grunnskólasveita var haldið með pompi og prakt. Skóla- og frístundasvið Reykjavíkurborgar hélt mótið í samstarfi við Taflfélag Reykjavíkur og var mótið hið 37. í röðinni. Hátt í 130 vaskir sveinar og stúlkur á grunnskólaaldri reimuðu á sig skákskóna þennan mánudagseftirmiðdag og tefldu fyrir hönd skóla sinna. Tefldar voru 7 umferðir með 10 mínútna umhugsunartíma á mann. Liðsstjórar skólanna höfðu í nógu að snúast og foreldrar og aðrir ættingjar fylgdust af ákafa með framgöngu sinna barna.

 

28 skáksveitir frá 16 grunnskólum tefldu í mótinu að þessu sinni og var mótið því einkar vel sótt, líkt og í fyrra. Flestar sveitanna komu frá Rimaskóla eða sex talsins. Þá tefldi Ingunnarskóli fram fjórum skáksveitum. Heildarfjöldi skáksveita var sá sami og árið áður, en þó jókst fjöldi grunnskóla sem sendu fulltrúa sína í mótið um einn, samanborið við í fyrra, sem er ánægjuefni.

 

Fyrirfram þótti Rimaskóli sigurstranglegastur í opnum flokki enda hefur skólinn orðið Reykjavíkurmeistari undanfarin tvö ár. Auk þess mætti Rimaskóli með þaulreynda skákmenn í hlutverkum liðsstjóra, þar á meðal nýkrýndan hraðskákmeistara Reykjavíkur, Dag Ragnarsson. Skáksveitir Ölduselsskóla, Laugalækjarskóla og Árbæjarskóla mættu einnig sterkar til leiks og þóttu líklegar til þess að blanda sér í baráttuna um gullið. Í stúlknaflokki tefldu fimm nokkuð jafnar skáksveitir og var búist við spennandi keppni þeirra á milli. Athygli vakti að bæði Melaskóli og Breiðholtsskóli sendu aðeins stúlknasveit til leiks, en þessar tvær stúlknasveitir hafa ávallt tekið þátt í skólaskákmótum undanfarin misseri. Þá hafa Rimaskóli og Ingunnarskóli einnig sent stúlknasveitir í þessi mót undanfarið með góðum árangri. Sveit Rimaskóla var þó líklegust til afreka að þessu sinni enda höfðu Grafarvogsstúlkur unnið mótið undanfarin fjögur ár.

 

Í opnum flokki varð fljótlega ljóst í hvað stefndi. A-sveit Rimaskóla vann fyrstu fjórar viðureignir sínar 4-0 á meðan keppinautar þeirra töpuðu skákum. A-sveit Ölduselsskóla fylgdi Rimaskóla eftir sem skugginn og mættust sveitirnar loks í 5.umferð. Þar vann Rimaskóli sannfærandi sigur og því var A-sveit Laugalækjarskóla eina sveitin sem átti raunhæfa möguleika á því að velta Rimaskóla úr sessi í 1.sæti. Þegar sveitirnar mættust í 6.umferð munaði aðeins einum vinning á sveitunum og var viðureignin æsispennandi. Svo fór að lokum að Rimaskóli vann með minnsta mun. Rimaskóla urðu svo ekki á nein mistök í síðustu umferð og sigurinn í mótinu var gulltryggður. A-sveit Rimaskóla hlaut 25 vinninga í efsta sæti –jafn marga vinninga og sigursveitin árið áður. Tapið gegn Rimaskóla í 6.umferð virtist sitja eilítið í sterkum skákmönnum Laugalækjarskóla –enda annálaðir keppnismenn sem ætluðu sér ekkert annað en sigur í mótinu- því þeir steinlágu fyrir Ölduselsskóla í síðustu umferð, 3-1. Þar með skaust hin efnilega A-sveit Ölduselsskóla í 2.sætið með 22 vinninga og var hún vel að því komin eftir góðan endasprett og heilsteypta taflmennsku í úrslitaviðureigninni um silfrið í síðustu umferð. A-sveit Laugalækjarskóla sat hins vegar eftir í 3.sæti með 20,5 vinning.

 

Í stúlknaflokki var mikil spenna frá upphafi til enda því úrslit réðust ekki fyrr en að lokinni síðustu skák. Fyrir síðustu umferðina voru stúlknasveitir Rimaskóla og Melaskóla efstar og jafnar í 1.sæti með 11 vinninga. Minnti þessi staða óneitanlega á stöðuna fyrir síðustu umferð sama móts í fyrra þegar þessir sömu skólar börðust um efsta sætið. Fast á hæla þeirra voru stúlknasveitir Breiðholtsskóla og Ingunnarskóla með 10 vinninga. Svo fór að lokum að Melaskóli vann sína viðureign með minnsta mun en Rimaskóli náði aðeins einu jafntefli í sinni viðureign. Á sama tíma unnu stúlknasveitir Ingunnarskóla og Norðlingaskóla stóran sigur og Breiðholtsskóli vann sína viðureign með minnsta mun. Melaskóla tókst því hið ómögulega, að velta Rimaskóla úr sessi sem sterkasta stúlknasveit Reykjavíkur. Melaskólastúlkur hlutu 13,5 vinning en stúlknasveit Ingunnarskóla fékk 13 vinninga sem dugði þeim í 2.sætið. Í 3.sæti varð Breiðholtsskóli með 12,5 vinning. Norðlingaskóli fékk 12 vinninga í 4.sæti og loks fékk Rimaskóli 11,5 vinning.

 

Reykjavíkurmóti grunnskólasveita í skák árið 2015 er því lokið. Það sem stendur upp úr er að Rimaskóli er Reykjavíkurmeistari grunnskólasveita annað árið í röð. Skólinn er afar vel að því kominn enda skákstarf þar á bæ gróskumikið og glæsilegt. Til marks um það er vert að geta þess að af sjö efstu skáksveitum mótsins átti Rimaskóli fjórar. Til hamingju Rimaskóli! Einnig stendur upp úr frábær frammistaða hinna glaðlyndu og samheldnu stúlkna í Melaskóla sem unnu stúlknaflokkinn eftir æsispennandi lokaumferð. Er það mjög vel af sér vikið, sérstaklega sé litið til þess að Rimaskóli hefur unnið stúlknaflokkinn undanfarin fjögur ár. Til hamingju Melaskóli!

 

Mótið í heild sinni heppnaðist afar vel og gekk framkvæmd þess eins og í sögu. Taflfélag Reykjavíkur vill koma á framfæri þökkum til allra keppenda, liðsstjóra, foreldra og annarra sem áttu leið í skákheimilið og áttu þátt í því að skapa hið magnaða og skemmtilega andrúmsloft sem ávallt ríkir á þessu móti. Sérstakar þakkir fær Skóla- og frístundasvið Reykjavíkurborgar fyrir ánægjulegt og árangursríkt samstarf. Einnig fá Skákakademía Reykjavíkur sem og Skákskóli Íslands góðar þakkir fyrir þeirra aðkomu og aðstoð. Hlökkum til að sjá alla –og fleiri til- á næsta ári!

• Myndir frá mótinu