Páskaeggjamót Víkingaklúbbsins hefst kl. 17:15

Páskaeggjamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 25. mars. Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og þátttaka er ókeypis. Keppt verður þrem flokkum: Flokki fæddra 1999-2005, flokki fæddra 2006-7 og flokki fæddra 2008 og yngri (þrjú mót).  

Allir fá páskaegg fyrir framistöðu sína og  þátttaka í mótinu er ókeypis.  Barna og unglingaæfingar Víkingaklúbbsins verða vikulega á miðvikudögum fram á sumar.

ATH:  Nauðsynlegt er að skrá sig (nafn og fæðingarár) til að tryggja þátttöku.

Skráning á mótið fer fram á Skák.is (guli kassinn efst)

Heimilisfang hér:

Knattspyrnufélagið Víkingur
Traðarlandi 1, 108 Reykjavík

Stefán og Bárður sigra á öðru móti Páskaeggjasyrpunnar

Páskaeggjasyrpa Nóa Síríus og Taflfélags Reykjavíkur hélt áfram síðastliðinn sunnudag er annað mótið af þremur var haldið. Sem fyrr öttu ungir skákmenn kappi í tveimur flokkum og tefldu sex umferðir með 10 mínútna umhugsunartíma. Yngri flokkur samanstóð af börnum fædd árið 2006 eða síðar, en í eldri flokki tefldu þeir sem eru fæddir 1999-2005. 

Í yngri flokki fylgdi Stefán Orri Davíðsson eftir góðri frammistöðu sinni á nýafstöðnu Reykjavíkurskákmóti með því að leggja alla sex andstæðinga sína að velli. Stefán Orri stóð því uppi sem öruggur sigurvegari. Í 2.sæti varð Guðni Viðar Friðriksson með 5 vinninga, en hann tapaði einungis fyrir sigurvegaranum Stefáni Orra. Guðni Viðar varð einnig í 2.sæti í fyrsta móti Páskaeggjasyrpunnar. Um 3.sætið var hart barist því hvorki fleiri né færri en 6 skákmenn voru jafnir með 4 vinninga. Eftir stigaútreikning reyndist Adam Omarsson hlutskarpastur. Af þessum sex skákmönnum með 4 vinninga voru tvær stúlkur og því þurfti að grípa til stigaútreiknings til þess að fá úr því skorið hvor þeirra hlyti stúlknaverðlaunin. Freyja Birkisdóttir var þar sjónarmun á undan Elsu Kristínu Arnaldardóttur.

Í eldri flokki var spennan mikil allt fram í síðustu umferð. Þorsteinn Magnússon fór mikinn í upphafi og hafði 4,5 vinning eftir 5 umferðir. Hann lagði að velli Róbert Luu og gerði jafntefli við Björn Hólm Birkisson eftir að hafa staðið til vinnings lengi vel. Í 5.umferðinni mættust tvíburabræðurnir Björn Hólm og Bárður Örn Birkissynir í æsispennandi skák þar sem taugar keppenda sem og áhorfenda voru þandar. Endataflið reyndist afar fjörlegt og erfitt fyrir áhorfendur að spá hvor myndi hafa betur. Þá varð Bárði Erni fótaskortur sem Björn Hólm nýttir sér til þess að ná vinningsstöðu. Sá galli var á gjöf Bárðar að mikill tími fór í að finna vinningsleiðina hjá Birni Hólm. Svo fór að Björn Hólm féll á tíma við að reyna að máta stakan kóng bróður síns og niðurstaðan því spennuþrungið jafntefli. Því var ljóst að síðasta umferðin yrði æsispennandi. Þá mættust Þorsteinn og Bárður Örn á efsta borði. Þá skák vann Bárður Örn snaggaralega og tryggði hann sér þar með sigur í mótinu með 5,5 vinning. Björn Hólm vann sína skák og lauk tafli með 5 vinninga. Sama vinningafjölda náði Óskar Víkingur Davíðsson. Björn Hólm hlaut 2.sætið eftir stigaútreikning og Óskar Víkingur endaði í 3.sæti. Stúlknaverðlaunin í eldri flokki komu í hlut Kötlu Torfadóttur en hún vann fjórar skákir. Ylfa Ýr Welding Hákonardóttir kom fast á hæla Kötlu með 3,5 vinning.

Að venju var dregin út happadrættisvinningur að móti loknu. Líkt og í fyrsta mótinu var vinningurinn glæsileg DGT skákklukka. Upp úr pottinum kom nafn Ásgeirs Braga Baldurssonar, sá hinn sami og vann happadrættisvinninginn í fyrstu Páskaeggjasyrpunni -ótrúlegt en satt! Ásgeir Bragi var hins vegar ekki á staðnum þegar kom að útdrætti og því þurfti að draga aftur. Sá sem hlaut happadrættisvinninginn að þessu sinni var hinn ungi en snjalli skákmaður Róbert Luu.

Taflfélag Reykjavíkur þakkar öllum keppendum og áhorfendum fyrir skemmtilegt mót og hlakkar til að taka á móti öllum aftur næsta sunnudag er þriðja og síðasta mót Páskaeggjasyrpu Nóa Síríus og TR verður haldið. Þá verða jafnframt afhent páskaegg til þeirra sem teflt hafa í að minnsta kosti tveimur mótum Páskaeggjasyrpunnar. Hlökkum til að sjá ykkur næsta sunnudag!

•  Heildarúrslit yngri flokkur
•  Heildarúrslit eldri flokkur
•  Mót #1
•  Myndir

Björgvin sterkastur í Stangarhyl í dag

Það var vel mætt í Stangarhylnum í dag eins og það er oftast nær. 29 skákljón mættu til leiks. Björgvin Víglundsson var sterkastur í dag eins og hann er oftast. Björgvin fékk 8 vinninga af 10 mögulegum.

Fast á hæla honum komu fjórir skákmenn allir með 7 vinninga. Það voru þeir Össur Kristinsson, Ari Stefánsson, Viðar Jónsson og Kristinn Bjarnason. Össur og Ari voru hæstir á stigum af þessum fjórum. Viðar og Kristinn voru þeir einu sem náðu að vinna Björgvin í dag. Stefán Þormar var svo einn í sjötta sæti með 6.5 vinninga.

Allir hinir urðu að sætta sig við örlítið færri vinninga í þetta sinn. 

Sjá nánari úrslit í töflu og myndum frá ESE

 

 

 

Skákmót öðlinga hefst á morgun

Skákmót öðlinga 40 ára og eldri hefst miðvikudaginn 25. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.

Skákmót öðlinga verður nú haldið í 24. sinn. Núverandi Skákmeistari öðlinga er alþjóðlegi meistarinn Sævar Bjarnason.

 

Dagskrá:

• 1. umferð miðvikudag 25. mars kl. 19.30

• 2. umferð miðvikudag 8. apríl kl. 19.30

• 3. umferð miðvikudag 15. apríl kl. 19.30

• 4. umferð miðvikudag 22. apríl kl. 19.30

• 5. umferð miðvikudag 29. apríl kl. 19.30

• 6. umferð miðvikudag 6. maí kl. 19.30

• 7. umferð miðvikudag 13. maí kl. 19.30

Mótinu lýkur miðvikudaginn 20. maí kl. 19:30 með hraðskákmóti og verðlaunaafhendingu. Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið. Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráning fer fram hér.

Hér er hægt að fylgjast með skráningu.

• Skákmót öðlinga 2014
• Skákmeistarar öðlinga
• Mótstöflur

Áskorendaflokkur Íslandsmótsins í skák

Áskorendaflokkur Íslandsmótsins í skák fer fram um páskana, 27. mars – 5. apríl nk. Teflt er húsnæði Taflfélag Reykjavíkur, Faxafeni 12. Tefldar verða níu umferðir eftir svissneska kerfinu. Mótið verður jafnframt Íslandsmót kvenna.

Einnig verður teflt í opnum flokki sem verður opinn fyrir skákmenn með 1600 skákstig eða minna. Keppendur með minna en 1600 skákstig geta valið á milli flokka.

Í áskorendaflokki verða tefldar níu umferðir en í opnum flokki verða tefldar sjö umferðir. Opnum flokki lýkur á föstudeginum langa. 

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun í opnum flokki: 

1. Þrjár skákbækur hjá bóksölu Sigurbjörns
2. Tvær skákbækur hjá bóksölu Sigurbjörns
3. Skákbók hjá bóksölu Sigurbjörns. 

Auk þess verði sérstök stigaverðlaun fyrir þá sem hafa minna en 1200 stig í opnum flokki. 

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki að ári. Séu menn jafnir ræður stigaútreikningur (nánar í mótsreglum hér að neðan). Í opnum flokki gildir stigaútreikningur um verðlaunsæti.  

Skráning

Þátttökugjöld eru 5.000 kr. Unglingar 15 ára og yngri (1999 og síðar) og F3-félagar fá 50% afslátt. 

Í opnum flokki (sem eingöngu fyrir opinn fyrir þá sem hafa 1600 skákstig eða minna) eru þátttökugjöld fyrir alla kr. 2.000. 

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 30 mínútur eftir 40 leiki. 30 sekúnda viðbótartími eftir hvern leik.

Opinn flokkur: 60 mínútur auk 30 sekúnda viðbótartími eftir hvern leik.

Dagskrá: 

1. umferð, Föstudagurinn, 27. mars, kl. 18 
2. umferð, Laugardagurinn, 28. mars, kl. 10
3. umferð, Laugardaginn, 28. mars, kl. 16 
4. umferð, þriðjudaginn 31. mars, kl. 18
5. umferð, miðvikudaginn, 1. apríl, kl. 18
6. umferð, föstudagurinn (langi), 3. apríl, kl. 10
7. umferð, föstudagurinn (langi), 3. apríl, kl. 16
8. umferð, laugardagurinn, 4. apríl, kl. 14
9. umferð, sunnudagurinn, 5. apríl, kl. 14

Opinn flokkur klárast föstudaginn 3. apríl.

Nánari mótreglur

Ef tveir eða fleiri eru jafnir í sæti mun stigaútreikningur ráða ferð.

Nánar um útreikninginn:

• Samanlagðir vinningar allra andstæðinga lagðir saman nema þess stigalægsta
• Samanlagðir vinningar allra andstæðinga lagðir saman.
• Samanlagðir vinningar allra andstæðinga lagðir saman nema tveggja stigalægstu
• Innbyrðis úrslit  þeirra sem eru jafnir
• Sonneborn-Berger
• Hlutkesti

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur  í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra. 

Skákþáttur Morgunblaðsins: Erwin L'ami lagði Mamedyarov og er efstur

Hollendingurinn Erwin L'ami er efstur þegar sjö umferðir hafa verið tefldar á Reykjavíkurskákmótinu í Hörpu en í uppgjöri efstu manna í gær vann hann Aserann Mamedyarov í aðeins 21 leik. Þrjár umferðir eru eftir af mótinu og línur teknar að skýrast hvað varðar baráttuna um efsta sætið en illa gekk hjá okkur mönnum á efstu borðum. Hannes Hlífar Stefánsson var ekki vel með á nótunum í hvössu afbrigði Caro-Kann varnar í skákinni við Perúmanninn Granda Zuniga og tapaði með hvítu í aðeins 18 leikjum. Afbrigðið er það sama og Kasparov tefldi í lokaskák einvígisins við ofurtölvu IBM Dimmblá vorið 1997 og tapaði sem frægt varð í aðeins 19 leikjum.

Jón Viktor Gunnarsson hafði fyrir umferðina hlotið 5 vinninga af sex mögulegum í viðureignum við hvern stórmeistarann á fætur öðrum. Hann missti niður afar vænlega stöðu gegn Kanadamanninum Eric Hansen í áttundu umferð og tapaði. Fyrir áttundu umferð sem fram fer í dag er staða efstu manna þessi:

1. Erwin L'ami (Holland) 6½ v.( af 7) 2.-5. Pavel Eljanov ( Úkraína ) Daniel Naroditsky (Bandaríkin), Granda Zuniga (Perú) og Eric Hansen (Kanada) 6 v.

Henrik Danielsen er sem stendur efstur íslensku skákmannanna og er með með 5½ vinning ásamt 12 öðrum skákmönnum. Með 5 vinninga eru Jón Viktor Gunnarsson, Hannes Hlífar Stefánsson, Hjörvar Steinn Grétarsson, Héðinn Steingrímsson og Dagur Arngrímsson. Þeir geta allir náð háu sæti með góðum endaspretti.

Mamedyarov sem vann fimm fyrstu skákir sínar á mótinu einsetti sér greinilega að flækja taflið gegn Hollendingum L'ami og lagði ýmsar gildrur fyrir hann í miðtaflinu. Það kom svo flatt uppá menn þegar hann féll á eigin bragði:

Reykjavíkurskákmótið 7. umferð

Erwin L´ami – Shakriyar Mamedyarov

Enskur leikur

1. d4 d6 2. c4 e5 3. Rc3 exd4 4. Dxd4 Rc6 5. Dd2 g6 6. b3 Bg7 7. Bb2 Rf6 8. g3 O-O 9. Bg2 He8 10. Rf3 Bf5 11. Rh4 Bd7 12. O-O Dc8 13. Hfe1 Bh3 14. Bh1 Dg4 15. Rg2 Dd4 16. Had1 Re4 17. Dxd4 Bxd4 18. Hxd4 Rxd4 19. Rf4 Rg5 20. Rxh3 Rxh3 21. Kf1 

Í þessari stöðu lagði Mamedyarov niður vopnin og fannst mönnum það sérkennilegt þegar slíkur baráttujaxl á í hlut. Þó hann sé skiptamun undir er staðan töpuð, t.d. 21. ... c6 22. Re4! o.s.frv. eða 21. ... Rc6 22. Rd5 Hec8 23. f4 og riddarinn á h3 sleppur ekki út.

Fjölmargir skákmenn eru að ná góðum árangri á þessu Reykjavíkurmóti og sjá fram á mikla stigahækkun. Einn þeirra er hinn 13 ára gamli Hilmir Freyr Heimisson sem vann þrautreyndan skákmann, Erling Þorsteinsson, í 33 leikjum í gær. Lok skákarinnar vöktu athygli: 

Hilmir Freyr Heimisson – Erlingur Þorsteinsson

Hilmir hafði fórnað manni snemma tafls, Erlingur hitti ekki á bestu vörnina og átti í vök að verjast þegar hér var komið sögu:

33. Hb7+!

– og svartur gafst upp því mátið blasir við, 33. .... Bxb7 34. Dc7+ Ka8 35. Hd8+ Hxd8 36. Dxd8+ Bc8 37. Dxc8 mát.

Heimsmeistarinn Magnús Carlsen kom til landsins seinni part föstudagsins og vann um kvöldið hina vinsælu „pub-quiz“ keppni ásamt landa sínum Jon Ludwig Hammer. Mætti í Hörpuna á laugardaginn og skýrði nokkrar skákir í „streymis-útsendingum“ mótshaldarans, fór á pöbba-rölt um kvöldið og mætti síðan í hefðbundna knattspyrnukeppni á sunnudagskvöldið sem fór fram í Mýrinni.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 16. mars 2015.

Skákþættir Morgunblaðsins

[Event "Reykjavik Open"] [Site "Reykjavik ISL"] [Date "2015.03.15"] [EventDate "2015.03.10"] [Round "7.1"] [Result "1-0"] [White "Erwin L'Ami"] [Black "Shakhriyar Mamedyarov"] [ECO "A41"] [WhiteElo "2605"] [BlackElo "2756"] [PlyCount "41"] 1. d4 d6 2. c4 e5 3. Nc3 exd4 4. Qxd4 Nc6 5. Qd2 g6 6. b3 Bg7 7. Bb2 Nf6 8. g3 O-O 9. Bg2 Re8 10. Nf3 Bf5 11. Nh4 Bd7 12. O-O Qc8 13. Rfe1 Bh3 14. Bh1 Qg4 15. Ng2 Qd4 16. Rad1 Ne4 17. Qxd4 Bxd4 18. Rxd4 Nxd4 19. Nf4 Ng5 20. Nxh3 Nxh3+ 21. Kf1 1-0

[Event "Reykjavik Open"] [Site "Reykjavik ISL"] [Date "2015.03.15"] [EventDate "2015.03.10"] [Round "7.76"] [Result "1-0"] [White "Hilmir Freyr Heimisson"] [Black "Erlingur Thorsteinsson"] [ECO "D43"] [WhiteElo "1861"] [BlackElo "2119"] [PlyCount "65"] 1. d4 d5 2. c4 e6 3. Nc3 Nf6 4. Nf3 c6 5. Bf4 Bd6 6. Bxd6 Qxd6 7. e3 Nbd7 8. c5 Qc7 9. Bd3 e5 10. Nxe5 Nxe5 11. dxe5 Qxe5 12. O-O Ng4 13. g3 h5 14. Qf3 f5 15. e4 fxe4 16. Bxe4 dxe4 17. Nxe4 Rf8 18. Qd3 Kf7 19. f4 Qd5 20. Ng5+ Ke7 21. Rfe1+ Kd8 22. Qc3 Kc7 23. Rad1 Qf5 24. h3 Qf6 25. Qa5+ b6 26. cxb6+ Kb7 27. Qb4 a5 28. Re7+ Kb8 29. Qc5 Ra6 30. hxg4 Qxb2 31. Qd6+ Ka8 32. Qxc6+ Kb8 33. Rb7+ 1-0

Páskaeggjamót Víkingaklúbbsins fer fram á miðvikudaginn

Páskaeggjamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 25. mars. Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og þátttaka er ókeypis. Keppt verður þrem flokkum: Flokki fæddra 1999-2005, flokki fæddra 2006 og yngstu krakkarnir og byrjendur tefla tefla í sérflokki. (þrjú mót).  

Allir fá páskaegg fyrir framistöðu sína og  þátttaka í mótinu er ókeypis.  Barna og unglingaæfingar Víkingaklúbbsins verða vikulega á miðvikudögum fram á sumar.

ATH:  Nauðsynlegt er að skrá sig (nafn og fæðingarár) til að tryggja þátttöku.

Skráning á mótið fer fram á Skák.is (guli kassinn efst)

Heimilisfang hér:

Knattspyrnufélagið Víkingur
Traðarlandi 1, 108 Reykjavík

Páskaeggjamót Hugins

Páskaeggjamót Hugins verður haldið í 23. sinn mánudaginn 23. mars 2015, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 1999 – 2002) og yngri flokki (fæddir 2003 og síðar). Sá sem er efstur í hverjum árgangi fær einnig páskaegg sem og efstu þrjár stúlkurnar á mótinu. Að auki verða tvö páskaegg dregin út. Enginn fær þó fleiri en eitt páskaegg. Lítið páskaegg verður svo fyrir þá sem ekki vinna til verðlauna.

Páskaeggjamótið verður haldið í félagsheimili Hugins í  Álfabakka 14a í Mjóddinni. Inngangur er milli Subway og Fröken Júlíu en salur félagsins er á þriðju hæð hússins.

Skákfélagið Huginn Íslandsmeistari skákfélaga

Skákfélagið Huginn sigraði á æsispennandi Íslandsmóti skákfélaga sem lauk í gær í Rimaskóla. Sveitin vann Skákfélag Reykjanesbæjar 7,5-0,5 í lokaumferðinni á meðan helsti keppinauturinn Taflfélag Reykjavíkur sigraði Skákdeild Fjölnis 6,5-1,5. Taflfélag Vestmannaeyja varð í þriðja sæti. B-, C- og D-sveitir TR unnu 2.-4. deild. 

Lokastaðan:

1. Skákfélagið Huginn 56,5 v.
2. Taflfélag Reykjavíkur 55 v.
3. Taflfélag Vestmannaeyja 52,5 v.
4. Skákdeild Fjölnis 38 v.
5. Taflfélag Bolungarvíkur 36 v.
6. Skákfélag Akureyrar 33,5 v.
7. Víkingaklúbburinn 29,5 v.
8. Skákfélagið b-sveit 25 v.
9. Skákfélag Reykjanesbæjar 17,5 v.
10. Skákfélag Íslands 16,5 v.

Nánar á Chess-Results.

Skákfélag Reykjanesbæjar og Skákfélag Íslands falla niður í 2. deild.

Hjörvar Steinn Grétarsson, Hugin, og Björn Þorfinnsson, TR, stóðu sig best allra en þeir hlutu 8 vinninga í 9 skákum. 

2. deild

B-sveit TR vann öruggan sigur en hún hlaut 31,5 v. Skákdeild KR varð í öðru sæti með 28,5. Þessar tvær sveitir hafa áunnið sér rétt til að tefla í fyrstu deild að ári.

Spennan um þriðja sæti var mikil. Það féll í skaut b-sveitar Skákfélags Akureyrar en sveitin hlaut 22,5 vinning. Aðeins munaði 3 vinningum á verðlaunasæti og fallsæti. 

Lokastaðan:

1. Taflfélag Reykjavíkur b-sveit 31,5 v.
2. Skákdeild KR 28,5 v.
3. Skákfélag Akureyrar b-sveit 22,5 v.
4. Skákdeild Hauka 21,5 v. (9 stig)
5. Taflfélag Garðabæjar 21,5 v. (7 stig)
6. Skákfélagið Huginn c-sveit 20 v.
7. Vinaskákfélagið 19,5 v.
8. Víkingaklúbburinn b-sveit3 v.

Vinaskákfélagið og Víkingaklúbburinn féllu niður í 3. deild. Afar litlu munaði að Vinaskákfélagið hefði fengið hálfan vinning til viðbótar í lokaumferðinni. Þá hefði komið til þeirra sérstöku stöðu og draga hefði þurft um hvort Vinaskákfélagið eða b-sveit Hugins hefði fallið en liðin hefðu verið hnífjöfn eftir allan stigaútreikning.

Stöðuna má nálgast á Chess-Results.

3. deild

C-sveit Taflfélags Reykjavíkur vann öruggan sigur en sveitin hlaut fullt hús stiga. Borgnesingar og Selfyssingar urðu í 2. og 3. sæti með 9 stig. Borgnesingar fengu fleiri vinninga og fá sæti í 2. deild að ári.

D-sveit Skákfélaga Akureyrar, a-unglingasveit TR og f-sveit Hugins féllu niður í 4. deild

Stöðuna má nálgast á Chess-Results.

4. deild

D-sveit TR vann öruggan sigur en sveitin hlaut 13 stig. B-sveit Taflfélags Garðabæjar varð í öðru sæti 12 stig. Skákgengið varð í þriðja sæti með 10 stig. Þessar þrjár sveitir unnu sér keppnisrétt í 3. deild að ári. 

Stöðuna má nálgast á Chess-Results.

Myndir væntanlegar!

Skákþáttur Morgunblaðsins: Hjörvar og Jón Viktor í fararbroddi

Hjörvar Steinn Grétarsson vann Zhansaya Abdumalik frá Kasakstan í fjórðu umferð Reykjavíkurskákmótsins á fimmtudagskvöldið og var með fullt hús vinninga ásamt fimm öðrum fyrir fimmtu umferð sem fram fór í gærkvöldi. Hann átti að tefla við Aserann Shakriyar Mamedyarov í toppslag umferðarinnar. Íslensku skákmennirnir hafa margir hverjir staðið sig prýðilega þó enginn eins vel og Jón Viktor Gunnarsson sem hafði hlotið 3 ½ vinning úr fjórum skákum eftir sigur á Gawain Jones á fimmtudagskvöldið. Hann gerði jafntefli við næststigahæsta keppanda mótsins, Tékkann David Navara, sem mátti berjast fyrir jafntefli peði undir í erfiðu hróksendatafli.

Með 3 vinninga af fjórum voru meðal annarra Hannes Hlífar Stefánsson, Einar Hjalti Jensson, Guðmundur Kjartansson, Henrik Danielsen, Einar Valdimarsson og Þröstur Þórhallsson. Athygli vekur einnig frammistaða hins unga Jóns Kristins Þorgeirssonar sem er með 2 ½ vinnning eftir jafntefli við indverska stórmeistarann Sahaj Grover í 4. umferð. Í þeirri umferð var heldur meira jafnræði með keppendum en í þeim fyrstu og margar stórskemmtilegar baráttuskákir sáu dagsins ljós. Mikla athygli vakti skák Héðins Steingrímssonar við Aserann Shakriyar Mamedyarov en Mamedyarov hafði sigur eftir að hafa náð að snúa á Héðin í miðtaflinu.

Jón Viktor Gunnarsson dróst á móti Svíanum Nils Grandelius í umferð gærdagsins. Það vita flestir að hann á heilmikið inni og gæti hæglega nælt sér í áfanga að stórmeistatatitli ef svo heldur fram sem horfir. Hann fann glæsilega vinningsleið gegn Gawain Jones þegar margir töldu að hann þyrfti að taka jafntefli með þráskák.

Gawain Jones – Jón Viktor Gunnarsson

Enskur leikur

1. c4 c5 2. Rf3 g6 3. g3 Rc6 4. Rc3 Bg7 5. Bg2 d6 6. O-O Bf5 7. d3 Dd7

Þetta dálítið frumstæða kerfi sem byggist á framrás h-peðsins hefur Jón Viktor margoft reynt í hraðskák. Hvers vegna ekki að prófa það líka í kappskák?

8. He1 Bh3 9. Bh1 h5 10. Rg5 h4 11. Rd5 hxg3 12. hxg3 Rf6 13. Rf4 Bg4 14. f3 e5!

Byrjunartaktík Jóns hefur gengið fullkomlega upp, hann hefur náð að opna h-línuna og getur hrókerað langt.

15. Rd5 Be6 16. e4 Rh5 17. Kf2 Bxd5 18. exd5 Rd4 19. g4 Rf6 20. Bg2 O-O-O 21. Be3 Rh7 22. Rxh7 Hxh7 23. Dd2 f5 24. Hh1 Hdh8 25. Bxd4 cxd4 26. Hxh7 Hxh7 27. Hh1 Hxh1 28. Bxh1 Dd8!

Mislitir biskupar eru engin trygging fyrir jafntefli því biskup svarts er miklu virkari en sá hvíti.

29. Kg3 Bf6 30. Dh6!

Góður varnarleikur, annars kemst biskupinn til g5.

30. ... Da5!?

Lítur glæfralega út en Jón Viktor hafði komið auga á hinn snjalla 32. leik.

31. gxf5 De1+ 32. Kh2 e4! 

Leikur peðinu ofan í þrælvaldaða reitinn! Þessu þema beitti Kasparov betur en aðrir.

33. Df8+ Bd8! 34. fxg6 Dh4+ 35. Kg2 Dg5+ 36. Kf1 Dc1+ 37. Kg2 Dg5+ 38. Kf1 exd3 39. Dxd6 Dc1+ 40. Kg2 Dg5+ 41. Kf1

 

 

 

 

Það lá ekki alveg ljóst fyrir hvernig svartur ætlaði að tefla þessa stöðu til vinnings. Þannig gengur ekki 41. ... d2 vegna 42. De6+ Kb8 43. Ke2! o.s.frv. En Jón fann lausnina.

41. ... Dc1+ 42. Kg2 Dd2+ 43. Kh3

Eða 43.Kg1 De3+ og 44. ... d2.

43. ... Dh6+ 44. Kg2 d2! 45. Dc5+ Kb8 46. Dxd4 Dxg6+ 47. Kh3 Dh7+ 48. Kg2 Dc2! 49. Df4+ Ka8

- og hvítur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 14. mars 2015

Skákþættir Morgunblaðsins