Bárður Örn, Mikael Maron og Nansý unnu Rótarýbikarana á fjölmennu sumarskákmóti Fjölnis 2015

Skákkrakkar á öllum grunnskólaaldri fjölmenntu í sumarskapi á Sumarskákmót Fjölnis sem haldið var í troðfullum skáksal Rimaskóla á sumardaginn fyrsta. Mótið sem 62 þátttakendur skráðu sig á gekk afar vel fyrir sig enda margir af okkar efnilegustu og áhugasömustu skákkrökkum landsins mættir til leiks og um skránngu og úrslit sá enginn annar um en Omar Salama alþjóðlegur skákdómari.

Tefldar voru sex umferðir og var mótið jafnt og spennandi frá upphafi til enda. Þegar fjórum umferðum var lokið voru fjórir keppendur jafnir með fullt hús, bræðurnir Aron og Alexander Mai og tvíburabræðurnir Bárður Örn og Björn Hólm. Bárður Örn og Aron Thor unnu í 5 og næstsíðustu umferð og tefldu úrslitaskák í lokaumferðinni sem Bárður Örn nemandi Smáraskóla vann og fékk fullt hús vinninga sem er flottur árangur. Bárður Örn varð jafnframt sigurvegari í eldri flokki.

Aron Mai og Björn Hólm urðu í 2. og 3. sæti þar. Hinn 11 ára Mikael Maron Torfason nemandi í Rimaskóla varð efstur í yngri flokk með 5 vinninga en næstir á eftir honum urðu þeir Robert Luu og Joshua Davíðsson.

Nansý Davíðsdóttir í Rimaskóla varð efst stúlkna með 4,5 vinninga og næstar á eftir henni urðu bekkjarsystur úr 4. bekk Foldaskóla, þær Eydís Magnea og Ylfa Ýr. Bárður Örn, Mikael Maron og Nansý hlutu hina eftirsóttu Rótarýbikara.

Mikil verðlaunahátíð var í lok mótsins og fengu 20 þátttakendur bíómiða í SAMbíóunum fyrir efstu sætin. Það var Helgi Árnason formaður skákdeildar Fjölnis sem var mótstjóri og fékk afar góðan stuðning foreldra við framkvæmdina. Skákmótið var valið sem einn af viðburðum Barnamenningarhátíar Reykjavíkur 2015.

Sumarskákmótið er einn af föstum liðum í vetrarstarfi Fjölnis sem hefur verið afar blómlegt, æfingar á miðvikudögum fjölsóttar og gífurleg þátttaka í Torgmóti (50), Rótarýskákmóti (115) og nú Sumarskákmóti (62) skákdeildarinnar.

Lokastöðu mótsins má finna á Chess-Results.

Íslandsmótið í Fischer Random fer fram í kvöld

Þá er komið að því!  Hið goðsagnakennda Íslandsmót í Fischer random verður haldið næstkomandi föstudagskvöld á skemmtikvöldi Taflfélags Reykjavíkur. 

Allir sem hafa aldur og þor til að kljást við furðulegar stöður er hvattir til að mæta.  Núverandi íslandsmeistari í Fischer Random er alþjóðlegi meistarinn Guðmundur Kjartansson.

Upplýsingar og dagskrá:

• Kvöldið hefst kl. 20.00  Skráning á staðnum.
• 12 umferðir, 5 mínútna umhugsunartími á skák
• Tvö hlé gerð á taflmennskunni.  Bjórinn á 500 kr. fyrir keppendur allt kvöldið á Billiardbarnum.
• Verðlaunaafhending í mótslok: 
• Bikar + 8000 króna inneign á Billiardbarnum
• Verðlaunapeningur + 5000 króna inneign á Billiardbarnum  
• Verðlaunapeningur + 2000 króna inneign á Billiardbarnum
• Aðgangseyrir 500 kr. 
• Bjórinn á Billiardbarnum 500 kr. allt kvöldið fyrir keppendur og gesti skemmtikvöldsins.  30% afsláttur af tímagjaldi í pool eftir mót. 

• Tekið skal fram að öll meðferð áfengra drykkja er bönnuð í húsnæði TR
• Allir skákáhugamenn velkomnir og 20 ára aldurstakmark 

Sigurvegarinn fær sæti á úrslitamóti skemmtikvöldakónganna í maí!

Taflfélag Reykjavíkur vonast til að sjá sem flest ykkkar!

Carlsen enn efstur í Shamkir - Caruana eini sigurvegari dagsins

ítalinn Fabiano Caruana (2802) vann Vladimir Kramnik (2783) í sjöttu umferð minningarmótsins um Gashimov sem nú fer fram í Shamkir í Aserbaídsjan. Öðrum skákum lauk með jafntefli. Carlsen (2863) gerði jafntefli við Giri (2790) og Wesley So (2788) við Mamedyarov (2754). 

Carlsen er efstur með 4,5 vinning, So annar með 4 vinninga og Anand (2791) þriðji með 3,5 vinning.

Í sjöundu umferð, sem fram fer á morgun og hefst kl. 10, teflir Carslen við Kramnik, og So við Caruana.

Vert er að benda skákáhugamönnum á hópinn "Íslenskir skákmenn" á Facebook en þar eru skákirnar ræddar á meðan þær fara fram. Fjörlegar og skemmtilegar umræður!

• Heimasíða mótsins
• Beinar útsendingar

Íslandsmót barnaskólasveita fer fram um helgina - skráningarfrestur rennur út í dag

Íslandsmót barnaskólasveita 2015 fer fram í Rimaskóla dagana 25. og 26. apríl nk. 

Tefldar verða níu umferðir eftir svissneska kerfinu. Fimm á laugardegi,og fjórar á sunnudegi Umhugsunartími 15 mínútur á skák fyrir hvern keppenda. Taflið hefst kl. 13 á laugardeginum en kl. 11 á sunnudeginum.

Hver skóli getur sent fleiri en eina sveit - en hver sveit er skipuð fjórum nemendum 1.-7. bekkjar (auk 4 varamanna)

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðlaunum fyrir efstu sveitina sem er einungis skipuð nemendum í 1.-4. bekk.

Veitt verða borðaverðlaun fyrir bestan árangur á 1.-4. borði. 

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer í Danmörku í september næstkomandi.  

Skráning fer fram á Skák.is (guli kassinn efst).

Skráningu skal lokið í í síðasta lagi 23. apríl

Hægt er að fylgjast með þegar skráðum sveitum hér.

Ath. Áríðandi er að sveitirnar séu skráðar fyrirfram.

 

Björgvin efstur í Ásgarði í gær

Það var hefðbundinn skákdagur hjá Ásum í Ásgarði í gær. Björgvin  Víglundsson sannaði það enn og aftur að hann er vígfimastur allra sem berjast þar á þriðjudögum. Það þykja stór tíðindi ef hann tapar skák og fréttir ef hann sættir sig við jafntefli, hvor tveggja gerist nú einstaka sinnum samt. Björgvin fékk 9½ vinning í gær af 10

Guðfinnur var sá eini sem náði að gera jafntefli við hann, enda er hann vopnfimur vel, þegar sá gállinn er á honum. Guðfinnur fékk 7 vinninga og varð í þriðja sæti. Aldursforsetinn Páll G Jónsson tók annað sætið með 7½ vinning. Páll harðnar bara með aldrinum. 

Sjá nánari úrslit og myndir frá ESE. Hægt að stækka og gera skýrara með því a tvíklikka.

Sumarskákmót Fjölnis fer fram á morgun sumardaginn fyrsta í Rimaskóla

Hið árlega sumarskákmót Fjölnis verður haldið í Rimaskóla á sumardaginn fyrsta, n.k. frá kl. 14:00 - 16:00. Sumarskákmótið er að þessu sinni hluti af dagskrá Barnamenningarhátíðar Reykjavíkur og einnig á dagskrá hverfishátíðar Grafravogs sem að vanda er haldin í Rimaskóla. 

Mótið hefst eins og áður segir í Rimaskóla kl. 14.00 og því lýkur rúmlega 16:00 með verðlaunahátíð þar sem afhentir verða þrír verðlaunagripir sem Rótarýklúbbur Grafarvogs gefur til mótsins. Bikarana hljóta sigurvegari eldri flokks 1999-2003, sigurvegari yngri flokks og sigurvegari stúlkna. 

Að vanda eru ótrúlega margir vinningar á skákmótum Fjölnis og nú eru það 20 bíómiðar á SAMbíó - Egilshöll sem dreifast á 20 þátttakendur. Í skákhléi verða seldar veitingar á 300 kr.  

Mótið er ætlað nemendum grunnskóla og er þátttaka ókeypis. Tefldar verða sex umferðir með sex mínútna umhugsunartíma. Skákstjórar verða þeir Omar Salama alþjóðlegur skákdómari og Helgi Árnason formaður Skákdeildar Fjölnis. Fjölmennum á skákmót Fjölnis

Íslandsmótið í Fischer Random á föstudagskvöld!

Þá er komið að því!  Hið goðsagnakennda Íslandsmót í Fischer random verður haldið næstkomandi föstudagskvöld á skemmtikvöldi Taflfélags Reykjavíkur. 

Allir sem hafa aldur og þor til að kljást við furðulegar stöður er hvattir til að mæta.  Núverandi íslandsmeistari í Fischer Random er alþjóðlegi meistarinn Guðmundur Kjartansson.

Upplýsingar og dagskrá:

• Kvöldið hefst kl. 20.00  Skráning á staðnum.
• 12 umferðir, 5 mínútna umhugsunartími á skák
• Tvö hlé gerð á taflmennskunni.  Bjórinn á 500 kr. fyrir keppendur allt kvöldið á Billiardbarnum.
• Verðlaunaafhending í mótslok: 
• Bikar + 8000 króna inneign á Billiardbarnum
• Verðlaunapeningur + 5000 króna inneign á Billiardbarnum  
• Verðlaunapeningur + 2000 króna inneign á Billiardbarnum
• Aðgangseyrir 500 kr. 
• Bjórinn á Billiardbarnum 500 kr. allt kvöldið fyrir keppendur og gesti skemmtikvöldsins.  30% afsláttur af tímagjaldi í pool eftir mót. 

• Tekið skal fram að öll meðferð áfengra drykkja er bönnuð í húsnæði TR
• Allir skákáhugamenn velkomnir og 20 ára aldurstakmark 

Sigurvegarinn fær sæti á úrslitamóti skemmtikvöldakónganna í maí!

Taflfélag Reykjavíkur vonast til að sjá sem flest ykkkar!

Fjörlega teflt í 4. umferð Wow air mótsins!

Í gærkvöld fór fram fjórða umferð í Wow air vormóti Taflfélags Reykjavíkur. Afar hart var barist á öllum borðum í A flokki.  Sannkölluð háspenna var á fyrsta borði þar sem Sigurður Daði Sigfússon og Hannes Hlífar Stefánsson sættust á endanum á skiptan hlut. 

Þar varðist Sigurður Daði afar vel í flókinni stöðu og miklu tímahraki.  Var hann ítrekað kominn niður á seinustu sekúndu þegar að hann lék! 

Davíð Kjartansson stýrði hvítu mönnunum til sigurs gegn Einari Hjalta Jenssyni sem fann ekki svar við öflugri mátssókn hótelstjórans geðþekka.

Mikið tímahrak og spenna einkenndi skák Nakamura banans Ingvars Þórs Jóhannessonar og nýjasta hnakkans okkar Dags Ragnarssonar.  Ingvar lenti í miklu tímahraki fyrir tímamörkin og þurfti þá að verjast vænlegri kóngssókn Dags.  Hann reyndist vandanum vaxinn og þegar sóknin rann út í sandinn réðu öflug frípeð hans úrslitum.  Mjög skemmtileg skák.

Á fjórða borði vann Bragi Þorfinnsson skák sína gegn Örn Leó Jóhannessyni nokkuð sannfærandi.

Líkt og í annari umferð gegn Hrafni Loftssyni komst Þorvarður Fannar Ólafsson út í hróksendatafl peði yfir, nú gegn Jóni Trausta Harðarssyni en það dugði ekki til sigurs frekar en gegn Hrafni.

Björgvin Víglundsson tefldi afar frísklega gegn Oliver Aron Jóhannessyni, fórnaði peði fyrir mikið spil.  Virtist staða hans afar vænleg á tímabili.  En Oliver er enginn aukvisi í spilinu, varðist fimlega og snéri vörn í sókn og sigraði.

Á sjöunda borði sættust Hrafn Loftsson og Jóhann Ingvason á skiptan hlut.

Eftir fjórar umferðir er Hannes Hlífar efstur með 3.5 vinninga en næstir koma Davíð Kjartansson og Sigurður Daði Sigfússon með 3 vinninga.

Í B flokki varð jafntefli á þremur efstu borðunum.   Halldór Pálsson virtist nálægt sigri í skák sinni gegn Sverri Erni Björnssyni sem varðist þó vel og uppskar hálfan vinning.  Hallgerður Helga bjargaði jafntefli á stórglæsilegan hátt gegn Vigni Vatnar Stefánssyni.  Stubburinn var með kolunnið tafl þegar hann féll í patt gildru landsliðskonunnar.

Tvíburarbræðurnir Björn Hólm og Bárður Örn Birkissynir þrátefldu í miðtaflinu og virtust báðir býsna sáttir með þau málalok. 

Stefán Bergsson heldur áfram að tefla fyrir augað, fórnaði peði snemma gegn Birki Kar Sigurðssyni fyrir fremur óljósar bætur en náði að flækja taflið.  Það virðist ávísun á öruggan sigur Stefáns fái hann hartnær tapað tafl því hann snéri á pilt og sigraði örugglega.

Gauti Páll Jónsson ákvað að leika af sér biskup fyrir engar bætur gegn Jóhanni Óla Eiðssyni sem brá þó á það ráð að hirða ekki biskupinn heldur gefa tvö peð í staðinn og tapa örugglega.  Skák hinna glötuðu tækifæra!

Engin breyting varð því á toppnum í B flokki.  Halldór og Sverrir leiða með 3 vinninga af fjórum.  Næstir þeim koma svo Bárður Örn og Vignir Vatnar með 2.5 vinninga.

Það verður stórviðureign í fimmtu umferð Wow air mótsins en þá mætast tveir stigahæstu menn mótsins, Hannes Hlífar og Bragi Þorfinnsson.  Oliver Aron mætir Davíð meðan Einar Hjalti teflir við Þorvarð Fannar.

Í B flokki mætast Sverrir og Bárður Örn, meðan Vignir Vatnar teflir við Halldór Pálsson.

5. umferð fer fram næstkomandi mánudag.

Nánari upplýsingar um stöðu og pörun hér

• Heimasíða TR
• Chess-Results

Carlsen efstur í Shamkir

Magnus Carlsen (2863) er efstur á minningarmótinu um Gashimov eftir sigur á Maxime Vachier-Lagrave (2762) í dag. MVL kom heimsmeistaranum strax á óvart í öðrum leik (1. Rf3 Rf6. 2. g3 b5!). Það dugði þó skammt því Norðmaðurinn vann nokkuð öruggan sigur.

Being out of book on move 2 has never been as fun as it was today! #ShamkirChess @MVL

— Magnus Carlsen (@MagnusCarlsen) April 21, 2015 

Vishy Anand (2791) vann góðan sigur á Wesley So (2788) með afar kröftugri taflmennsku. Mamedyarov (2754) vann svo Kramnik (2783).

Carlsen er efstur með 4,5 vinning, So annar með 4 vinninga og Anand þriðji með 3 vinninga. Mamedyarov og og Kramnik koma næstir með 2,5 vinning.

Frídagur er á morgun. 

Vert er að benda skákáhugamönnum á hópinn "Íslenskir skákmenn" á Facebook en þar eru skákirnar ræddar á meðan þær fara fram. Fjörlegar og skemmtilegar umræður!

• Heimasíða mótsins
• Beinar útsendingar

Íslandsmót grunnskólasveita: Rimaskóli Íslandsmeistari

Sjaldan eða aldrei hefur verið jafn gríðarlega mikil spenna á Íslandsmóti grunnskólasveita og liðna helgi. Rúmlega þrjátíu sveitir voru mættar til leiks. Nokkrar þeirra voru afar vel mannaðar og meiri breidd greinilega ríkjandi í skólaskákinni en oft áður: Álfhólsskóli hefur verið sigursæll á undanförnum árum og sveit skólans sem varð Íslandsmeistari barnaskólasveita fyrst árið 2013 var nú sameinuð á unglingastigi. Ölduselsskóli er afar efnileg sveit sem hefur náð góðum árangri undanfarin ár. Hörðuvallaskóli hefur Vigni Vatnar á fyrsta borði og annar skóli úr Kópavogi, Smáraskóli,  er afar sterkur með tvíburana Bárð Örn og Björn Hólm á fyrstu tveimur borðunum. Laugalækjarskóli hefur sennilega á að skipa virkustu ungu skákmönnum landsins sem tefla nokkurn veginn á öllum mótum og hafa verið í mikilli framför þó ekki hafi þeir teflt af alvöru í mörg ár. Þá á eftir að telja upp sveit Rimaskóla sem var ekki endilega sigurstrangleg fyrir mótið þar sem sveitin hefur endurnýjast gríðarlega mikið á síðustu árum eftir að Dagur Ragnarsson, Oliver Aron og Jón Trausti Harðarson kláruðu grunnskóla.

Í fyrstu umferð mættust tvær af sterkustu sveitunum: Rimaskóli og Álfhólsskóli. Álfhólsskóli fór með nokkuð þægilegan 3-1 sigur af hólmi. Í annarri umferð skildu Smáraskóli og Álfhólsskóli jafnir þar sem tvíburarnir stóðu fyrir sínu. Í þriðju umferð tefldu tvær af efnilegustu sveitum landsins þegar Hörðuvallaskóli lagði Ölduselsskóla 2.5- 1.5. Leiddir áfram af Vigni Vatnari sýndi Hörðuvellingar piltunum úr Laugarlæk engin grið í fjórðu umferð og komust á toppinn með 3-1 sigri. Á meðan vann Rimaskóli góðan sigur á Smáraskóla 3-1. Í fimmtu ferð hélt spútniklið Hörðuvallaskóla áfram á sinni fljúgandi siglingu og lagði b-sveit Álfhólsskóla. A-sveit skólans hafði í síðustu umferðum unnið stóra sigra og komin ofarlega en missti niður 2 vinninga gegn Laugalækjarskóla eftir að stöðurnar gáfu um tíma til kynna að 4-0 sigur myndi vinnast.

Staðan eftir fyrri dag var því þannig að sveit Hörðuvallaskóla var óvænt efst en með nauma forystu og átti eftir að tefla við sterkar sveitir.  Nokkrar sterkar sveitir komu skammt undan og því ljóst að spennan á seinni deginum yrði gríðarleg.

Teningunum var kastað í sjöttu umferð: Rimaskóli skellti Hörðuvallaskóla 3-1 og Álfhólsskóli sigraði b-sveit sína örugglega 4-0: einvígi var framundan milli Rimaskóla og Álfhólsskóla. Í sjöundu og áttundu umferð fengu báðar sveitirnar samtals sjö vinninga af átta og voru hnífjafnar fyrir síðustu umferð með 25.5 vinning!

Rimaskóli átti Salaskóla og Álfhólsskóli tefldi gegn sveit Ölduselsskóla. Sannarlega erfiðara hlutskipti sem Álfhólsskóli fékk enda sveit Ölduselsskóla sennilegasta efnilegasta sveit landsins með bræðurna Óskar Víking og Stefán Orra Davíðssyni sem eru einungis í 4. og 5. bekk. Fór svo að Álfhólsskóli missti niður vinning á meðan Rimaskóli smám saman mjatlaði niður vinninga inn gegn Salaskóla. Að lokum samdi Jóhann Arnar Finnsson annars borðs maður Rimaskóla jafntefli í mun betri stöðu og tryggði þannig Rimskælingum titilinn sjónarmun og hálfum vinningi á undan Álfhólsskóla. Sannarlega æsispennandi keppni og aðdáunarvert að fylgjast með efnilegum skákmönnum sveitanna leggja allt undir fyrir heiður sinna skóla. Glæsilegur árangur hjá Rimaskóla sem vann nú titilinn fimmta árið í röð! Þriðja sætinu náði vösk sveit Laugalækjarskóla sem verður spennandi að fylgjast með á næstu árum enda á sveitin eftir að haldast óbreytt næstu 2-3 árin.

Lokastöðuna má finna á Chess-Results.

Sveit Rimaskóla skipa: Nansý Davíðsdóttir, Jóhann Arnar Finnsson, Kristófer Jóel Jóhannsson, Joshua Davíðsson og Kristófer Halldór Kjartansson. Liðsstjóri Jón Trausti Harðarson.

Sveit Álfhólsskóla skipa: Dawid Kolka, Felix Steinþórsson, Róbert Luu, Guðmundar Agnar Bragason og Halldór Atli Kristjánsson. Liðsstjóri Lenka Ptacnikova.

Sveit Laugalækjarskóla skipa: Aron Þór Mai, Daníel Ernir Njarðarson, Jón Þór Lemery, Eldar Sigurðarson, Jason Gíslason og Alexander Sigurðarson. Liðsstjóri Daði Ómarsson.

Borðaverðlaun

1. Vignir Vatnar Stefánsson Hörðuvallaskóla 9v/9!
2. Bárður Örn Birkisson 8v/9
3. Kristófer Jóel Jóhannsson 7.5v/8
4. Atli Mar Baldursson 7v/9

Salaskóli náði eins og oft áður góðum árangri sem sýnir enn og aftur það góða starf sem Tómas Rasmus vinnur í skólanum.

Efst b-sveita Álfhólsskóli.

Efst c-sveita Rimaskóla.

Efst d-g sveita Salaskóli.

Skákstjórar voru Omar Salama og Stefán Bergsson.