Kristinn Jens sigurvegari skákkeppni Landsmóts 50+

Kristinn Jens Sigþórsson (UMSB) sigraði í skákinni sem var hluti af Landsmóti 50+ sem fram fór í Blönduósi 27. júní sl. Kristinn hlaut 4½ í 5 skákum. Þorleifur Ingvarsson (USAH) varð annar með 3½ vinning. Í 3.-4. sæti urðu Jón Arnljótsson (UMSS) og Sveinbjörn Óskar Sigurðsson (ÍBA) með 3 vinninga. 

Lokastöðuna má nálgast hér.

 

Caruana sigurvegari Dortmund-mótsins - vann fimm skákir í röð!

Fabiano Caruana (2805) sigraði á Dortmund-mótinu sem lauk í gær. Það var frábær árangur Ítalans sem tryggði honum sigur enn hann vann fimm síðustu skákirnar! Í lokaumferðinni vann Nisipeanue (2654) á laglegan hátt. Wesley So (2778)og Nisipeanu urðu jafnir í 2.-3. sæti með 4 vinninga.

Kramnik (2783), sem tapaði fyrir So í lokaumferðinni þrátt fyrir að tefla Berlínarvörnina varð í 4.sæti með 3,5 vinning.

• Heimasíða mótsins
• Beinar útsendingar

 

Róbert Luu öruggur sigurvegari fyrri Sumarsyrpu Breiðabliks

Róbert Luu kom sá og sigraði í fyrri Sumarsyrpu Breiðabliks. Hann vann fyrstu fjórar skákirnar og gerði svo jafntefli til að tryggja sér sigurinn í síðustu umferð. Átján krakkar á grunnskólaaldri tóku þátt í mótinu og var það framar vonum svona á miðju sumri. Ellefu af átján voru 10 ára eða yngri og m.a. sigurvegarinn. Framtíð Íslands í skákinni er því björt.

1. Róbert Luu 4,5 vinninga
2. Nikulás Ýmir Valgeirsson 4,0
3. Birkir Ísak Jóhannsson 3,5
4. Hjörtur Kristjánsson 3,5
5. Atli Mar Baldursson 3,5
6. Jón Þór Lemery 3,5

10 ára og yngri
1. Alexander Már Bjarnþórsson 3,0
2. Gunnar Erik Guðmundsson 2,5
3. Gabríel Sær Bjarnþórsson 2,0

• Nánari úrslit
• Myndaalbúm

Hjörvar með fullt hús í Benasque - Jón Trausti með jafntefli við Úlfinn

Stórmeistarinn Hjörvar Steinn Grétarsson (2559) hefur fullt hús að loknum þremur umferð á alþjóðlega mótinu í Benasque á Spáni. Hjörvar vann finnsku goðsögnina Heikki Weisterinen (2313) í 3. umferð í gær. Jón Trausti Harðarson hefur 1,5 vinning. Hann gerði sér lítið fyrir og gerði jafntefli við sænsku goðsögnina Ulf Andersson (2519) sem var um tíma næststigahæsti skákmaður heims.

Fjórða umferð fer fram í dag. Þá teflir Hjörvar við indverska alþjóðlega meistarann Shardul Gagare (2425) en Jón Trausti við heimamann með 1933 skákstig. Hvorugur verður í beinni á vefsíðu mótsins.

Alls taka 412 skákmenn frá 37 löndum þátt í mótinu. Þar af eru 34 stórmeistarar. Hjörvar er nr. 13 í stigaröð keppenda en Jón Trausti er nr. 123.

 

• Heimasíða mótsins
• Chess-Results
• Beinar útsendingar

Róbert Luu efstur á Sumarsyrpu Breiðabliks

Róbert Luu (1525) er efstur með fullt hús á Sumarsyrpu Breiðabliks þegar þremur umferðum af fimm er lokiið. Nikulás Ýmis Valgeirsson (1197), Birkir Ísak Jóhannsson (1313) og Jón Þór Lemery (1281) er í 2.-4. sæti með 2,5 vinning.

Mótinu lýkur með tveimur umferðum í dag.

• Heimasíða Skákdeildar Breiðabliks
• Chess-Results

Skákþáttur Morgunblaðsins: Hannes Hlífar vann opna mótið í Treplica

Stórmeistarinn Hannes Hlífar Stefánsson vann glæsilegan sigur á opna skákmótinu í Treplica í Tékklandi, sem lauk um síðustu helgi. Hannes kom fyrstur í mark ásamt Ísraelsmanninum Evgení Postny en báðir hlutu þeir 7 ½ vinning af níu mögulegum. Hannesar var úrskurðaður sigurvegari mótsins eftir stigaútreikning. Árangur hans reiknast upp á 2687 elo-stig og hækkar hann um 13 elo-stig fyrir frammistöðu sína. Hannes tefldi síðast í landsliðsflokki á Skákþingi Íslands og varð þar í 3. sæti. Mönnum fannst vanta einhvern kraft í taflmennsku hans þar, sem skýrist kannski af því að hann hefur unnið Íslandsmótið oftar en nokkur annar. Í Treplica var þessu öðruvísi farið og tefldi Hannes af miklum þrótti. Keppendur voru alls 165 talsins og var Hannes sá fimmti í styrkleikaröðinni.

Lenka Ptacnikova var einnig meðal þátttakenda og varð hún í 57. sæti með 5 vinninga.

Góður endasprettur lagði grunninn að árangri Hannesar sem vann tvær síðustu skákir sínar á sannfærandi hátt. Hann var einnig sterkur um miðbik mótsins og vann þá Pólverjann Lukacz í eftirfarandi viðureign:

Treplica 2015; 5. umferð

Butkiewicz Lukacz – Hannes Hlífar Stefánsson

Skoskur leikur

1. e4 e5 2. Rf3 Rc6 3. d4 cxd4 4. Rxd4 Rf6 5. Rxc6 bxc6 6. e5 De7 7. De2 Rd5 8. c4 Ba6 9. b3 g6 10. f4

Þó að Kasparov hafi teflt svona í árdaga þessa afbrigðis og unnið höfuðandstæðing sinn Karpov í Tilburg 1991 er leikurinn talinn fremur slakur og að betra sé 10. g3 eða 10. Bb2. Karpov lék nú 10. ... f6 en Hannes hefur annað í huga.

10. ... d6! 11. g3

11. exd6 er hæpið vegna 11. ... Dxe2+ 12. Kxe2 Bg7 og hrókurinn á a1 fellur.

11. ... dxe5 12. Ba3 Rb4 13. fxe5 Bg7 14. Rc3 O-O 15. O-O-O Rd3+! Öflugur leikur. Hvítur má alls ekki við því að missa svartreita biskupinn.

16. Hxd3 Dxa3 17. Kc2 Hae8 18. He3 Bh6! 19. Bh3

Eftir byrjun sem ekki hefur gengið upp er hvítur í vandræðum með hrókinn sem getur sig hvergi hrært vegna ...Dc1+. Hann á einhverja möguleika eftir 19. ...Bxe3 20. Dxe3 vegna veikleika á svörtu reitunum, einkum þó f6-reitnum.

19. ... Bxc4!

Slagkraftur mikill.

20. bxc4 Hb8! 21. Hb1 Hxb1 22. Kxb1 Hb8+ 23. Kc2 Hb2+ 24. Kd3 Hxe2 25. Hxe2 Bg7 26. Bg2 Dc5 27. Ra4 Dg1 28. Bxc6 Db1+ 29. Kc3 Dd1 30. Hd2 Bxe5+ 31. Kd3 Db1+ 32. Ke2 Dg1

- og hvítur gafst upp. 

Magnús Carlsen með neðstu mönnum

Tap Magnúsar Carlsen í fyrstu umferð norska skákmótsins sem lauk í Stavangri á fimmtudaginn og birt var í síðasta pistli átti eftir að draga dilk á eftir sér. Heimsmeistarinn var óvenju lengi að hrista ólundina úr sér; eftir fjórar umferðir sat hann í neðsta sæti með ½ vinning. Hann náði aftur vopnum sínum og virtist ætla að enda mótið á sómasamlegan hátt en í lokaumferðinni tefldi hann hörmulega illa gegn vini sínum og aðstoðarmanni, Jon Ludwig Hammer, og tapaði. Sigurvegarinn Topalov fékk vind í seglin í byrjun og fylgdi því eftir með frábærri taflmennsku.

Lokastaðan: 1. Topalov 6 ½ v.

2.- 3. Anand og Nakamura 6 v.

4. Giri 5 ½ v. 5.- 6. Crauana og Vachier-Lagrave 4 v. 7.- 8. Carlsen og Grischuk 3 ½ v. 9.-10. Hammer og Aronjan 3 v.

Við lauslega athugun finnast ekki önnur dæmi um að ríkjandi og ótvíræður heimsmeistari hafi fengið lægra en 50% vinningshlutfall á móti sem þessu.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 27. júní 2015

Skákþættir Morgunblaðsins

[Event "10th Teplice Open"] [Site "?"] [Date "2015.06.17"] [Round "?"] [White "Butkiewicz, Lukasz"] [Black "Stefansson, Hannes"] [ECO "C45"] [WhiteElo "2433"] [BlackElo "2580"] [Result "0-1"] 1. e4 e5 2. Nf3 Nc6 3. d4 exd4 4. Nxd4 Nf6 5. Nxc6 bxc6 6. e5 Qe7 7. Qe2 Nd5 8. c4 Ba6 9. b3 g6 10. f4 d6 11. g3 dxe5 12. Ba3 Nb4 13. fxe5 Bg7 14. Nc3 O-O 15. O-O-O Nd3+ 16. Rxd3 Qxa3+ 17. Kc2 Rae8 18. Re3 Bh6 19. Bh3 Bxc4 20. bxc4 Rb8 21. Rb1 Rxb1 22. Kxb1 Rb8+ 23. Kc2 Rb2+ 24. Kd3 Rxe2 25. Rxe2 Bg7 26. Bg2 Qc5 27. Na4 Qg1 28. Bxc6 Qb1+ 29. Kc3 Qd1 30. Rd2 Bxe5+ 31. Kd3 Qb1+ 32. Ke2 Qg1 0-1

Rauðhærðir tefla í Benasque

Stórmeistarinn Hjörvar Steinn Grétarsson (2559) og Jón Trausti Harðarson (2141) sitja báðir að tafli á alþjóðlegu móti í Benasque á Spáni. Fyrsta umferð fór fram í gær og unnu þeir báðir mun stigalægri andstæðing. Í dag eru tefldar tvær umferðir og mætir Jón Trausti sænsku goðsögninni Ulf Andersson (2519) í 2. umferð en Hjörvar teflir stigalágan andstæðing. Hvorugur þeirra er í beinni.

Alls taka 412 skákmenn frá 37 löndum þátt í mótinu. Þar af eru 34 stórmeistarar. Hjörvar er nr. 13 í stigaröð keppenda en Jón Trausti er nr. 123.

 

• Heimasíða mótsins
• Chess-Results
• Beinar útsendingar

Sumarsyrpa Breiðabliks hefst í dag

Sumarsyrpa Breiðabliks er með samskonar fyrirkomulagi og hin vinsæla Bikarsyrpa TR.
Tvö mót verða haldin, það fyrra helgina 3.-5. júlí og það seinna helgina 7.-9.ágúst. Mótin eru ætluð börnum á grunnskólaaldri (fæddum 1999 og síðar) sem ekki hafa náð 1600 skákstigum. Þau eru reiknuð til íslenskra og alþjóðlegra skákstiga.
Tefldar eru 5 umferðir eftir svissneska kerfinu. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Það margborgar sig að vanda sig og nota tímann, en samt má búast við því að margar skákir klárist á styttri tíma.

Dagskrá:
1. umferð kl 17:30 á föstudegi
2. umferð kl 10:30 á laugardegi
3. umferð kl 14:00 á laugardegi
4. umferð kl 10:30 á sunnudegi
5. umferð kl 14:00 á sunnudegi

Teflt er í Glersalnum í Stúkunni við Kópavogsvöll.

Skráning í mótið 3.-5.júlí:  https://docs.google.com/forms/d/1rsyp1VnMmVd2Xx2C1UqPVpGvY6p7sngkJOjawyGihZA/viewform?usp=send_form

Skráðir keppendur: https://docs.google.com/spreadsheets/d/1baghnMaXs2DH85jja-DwZ_b9eSeL2uLd6orNtrIAwsI/edit#gid=975323026

Heimasíða Skákdeildar Breiðabliks: http://www.breidablik.is/skak

Hannes í viðtali við ChessBase - umfjöllun um Teplice-mótið

 

ChessBase gerir Teplice-mótinu sem Hannes sigraði fyrir skemmstu góð skil á heimasíðu sinni. 

 

Meðal annars má þar finna viðtal við Hannes.

 

Umfjöllun ChessBase.

Nisipeanu og Kramnik efstir í Dortmund

Fjórum umferðum af sjö er lokið á Dortmund-ofurmótinu sem nú er í gagni. Nisipeanu (2654) og Kramnik (2783) eru efstir með 3 vinninga. Kramnik tapaði fyrir Naiditsch (2722) í fyrstu umferð en hefur nú unnið þrjár skákir í röð. Caruana (2805) er þriðji með 2½ vinning og Naiditsch fjórði með 2 vinninga.

Fjörlega hefur verið teflt á mótinu. Wesley So (2778) og Hou Yifan (2676) hafa ekki náð sér nægilega á strik og hafa 1½ vinning. So vann þó tilvonandi landa sinn Caruana.

Frídagur er í dag en mótinu mótinu lýkur með 5.-7. umferðum sem fram fara föstudag-sunnudag. Taflmennskan hefst kl. 13 en þó kl. 11 á sunnudaginn.

• Heimasíða mótsins
• Beinar útsendingar