Skráning hafin í Hraðskákkeppni tallfélaga

Hraðskákkeppni taflfélaga, hefst venju samkvæmt nú eftir verslunarmannahelgi. Þetta er í 21. skipti sem keppnin fer fram en Taflfélag Reykjavíkur er núverandi meistari. Í fyrra tóku 16 lið þátt keppninni.

Þátttökugjöld eru kr. 7.500 kr. á hverja sveit sem greiðist inn á reikning 327-26-6514, kt. 650214-0640.

Teflt er eftir útsláttarfyrirkomulagi.

Dagskrá mótsins er sem hér segir:

1. umferð (16 liða úrslit): Skuli vera lokið eigi síðar en 15. ágúst
2. umferð (8 liða úrslit): Skuli vera lokið eigi síðar en 30. ágúst
3. umferð (undanúrslit): Skulu fara fram laugardaginn, 5. september
4. umferð (úrslit): Skulu fara fram fram laugardaginn, 12. september

Umsjónaraðili getur heimilað breytingar við sérstakar aðstæður. Breyta má dagsetningum á úrslitum og/eða undanúrslitum með samþykki allra viðkomandi taflfélaga.

Skráning til þátttöku rennur út 31. júlí nk. Skráning fer fram á www.skak.is (guli kassinn efst). Hægt er að skrá b-sveitir til leiks en a-sveitir njóta forgangs varðandi þátttöku komi til þess að fleiri en 16 lið skrái sig til leiks.

1. Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.
2. Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar. Mótshaldari leggur fram dómara í undanúrslit og úrslit.
3. Undanúrslit og úrslit keppninnar verða reiknuð til alþjóðlegra hraðskákstiga.
4. Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.
5. Ætlast er til þess að þeir sem tefli séu fullgildir meðlimir síns félags (á Keppendaskrá SÍ). Aðeins má tefla með einu taflfélagi í keppninni.
6. Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.
7. Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást. 
8. Heimalið bjóði upp á léttar veitingar, t.d. kaffi, gos, kökur. Mótshaldari sér um veitingar í undanúrslitum og úrslitum.
9. Meðlimir b-sveita skula ávallt vera stigalægri en meðlimir a-sveitar (FIDE-stig) sömu umferðar. Skákmaður sem hefur teflt með a-sveit getur ekki teflt með b-sveit síðar í keppninni.
10. Viðureignirnar skulu fara fram innan 100 km. radíus (max 1-1,5 klst.ferðalag) frá Reykjavík nema að félög komi sér saman um annað.
11. Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.
12. Úrslit keppninnar verða ávallt aðgengileg á heimasíðu Hugins, www.skakhuginn.is sem er heimasíða keppninnar, og á www.skak.is.
13. Mótshaldið er í höndum Skákfélagsins Hugins sem sér um framkvæmd mótsins og mun útvega verðlaunagripi.

Upplýsingar um þegar skráðar sveitir má finna hér. 

Heimasíða mótsins

Staðfest: Magnus Carlsen teflir á EM landsliða í nóvember

Það er staðfest. Heimsmeistarinn í skák, Magnus Carlsen, mun leiða norsku sveitina sem teflir á Evrópumóti landsliða í Laugardalshöllinni í nóvember nk. Norska skáksambandið tilkynnti lið sitt í dag. Þetta er í fyrsta skipti sem Magnus teflir á EM síðan á Krít 2007. 

Þetta er í fyrsta skipti í ríflega aldarfjórðung að ríkjandi heimsmeistari tefli hérlendis á kappskákmótinu. Það gerðist síðast árið 1988 þegar Garry Kasparov tefldi á Heimsbikarmóti Stöðvar 2 í Borgarleikhúsinu.

Gríðarlega gaman fyrir íslenska skákhreyfingu og hinn íslenska skákáhugamann.

Norska liðið skipa:

1. Magnus Carlsen (2853)
2. Jon Ludvig Hammer (2677)
3. Simen Agdestein (2606)
4. Aryan Tari (2499)
5. Frode Urkedal (2512)

Sjá nánar frá á Skakkbloggen.

Flugfélagsmót í Vin kl. 13.

Vinaskákfélagið og Hrókurinn standa fyrir Flugfélagsmóti í Vin á mánudaginn kl. 13. Sex umferðir, 7 mínútna umhugsunartími. Komið fagnandi

Ingvar gerði jafntefli í annarri umferð gegn stórmeistara

Ingvar Þór Jóhannesson (2372) gerði jafntefli við pólska stórmeistarann Jacek Tomsczak (2579) í 2. umferð minningarmótsins um Najdorf sem fram fór í gær í Varsjá. Sigurbjörn Björnsson tapaði hins vegar fyrir búlgarska stórmeistaranum Ivan Cheparinov (2683), stigahæsta keppenda mótsins. Ingvar hefur 1½ en Sigurbjörn hefur ½ vinning. 

Ingvar teflir í dag við pólska stórmeistarann Tomasz Markowski (2566) en Sigurbjörn mætir pólsku skákkonunni Krystyna Dabrowska (2208) sem er stórmeistari kvenna. Umferðin hefst kl. 15 og verða þeir félagarnir báðir í beinni. 

Vert er að benda á skákblogg Ingvars þar sem hann fjallar um mótið.

Alls tefla 83 skákmenn í efsta flokki og þar af eru 23 stórmeistarar. Ingvar er nr. 39 í stigaröð keppenda en Sigurbjörn er nr. 52..

• Heimasíða mótsins
• Úrslitaþjónusta
• Beinar útsendingar (hefjast almennt kl. 15)
• Chessbomb

Skákþáttur Morgunblaðsins: Walter Browne setti svip sinn á skáklíf Íslendinga

Einhver litríkasti skákmaður sem Bandaríkjamenn hafa eignast og tíður gestur á skákmótum hér á landi, Walter Shawn Browne, lést 24. júní sl. 66 ára að aldri. Browne var þá meðal þátttakenda á National open, skákmóti sem hann hafði unnið ellefu sinnum. Þar voru orkuútlátin söm við sig; meðan á mótinu stóð tefldi hann fjöltefli, tók að sér skákkennslu og sat dágóða stund við pókerborðið en þar hafði hann um dagana rakað saman dágóðum skildingi. Þannig hafði hann alltaf lifað lífinu. Svo lagðist hann til svefns í húsi vinar síns í Las Vegas og vaknaði ekki aftur.

Um tíma starfaði hann sem „gjafari“ við spilavíti í Las Vegas og kynntist ýmsum skrautlegum karakterum. Í bók sinni „The stress of chess and its infinite finesse“birtist mynd af honum með Frank Sinatra, önnur með Kenny Rogers. Þegar skákferill hans er gerður upp stendur eftir að hann vann fleiri mót en nokkur annar skákmaður vestra og er einhver minnisstæðasti stórmeistari sem greinarhöfundur hefur teflt við. Síðasta viðureign okkar var á Reykjavíkurskákmótinu í fyrra þar sem hann var heiðursgestur. Þar náði ég loks fram hefndum eftir töp í Lone Pine '78, Reykjavík '80 og í New York '84. Yasser Seirawan tók í sama streng í viðtali um daginn og hikaði ekki við að kalla Browne sinn langerfiðasta andstæðing. Að tefla við Walter Browne var sérstök lífsreynsla því maðurinn bókstaflega skalf og nötraði frá fyrstu mínútu til þeirrar síðustu og dró jafnan að sér mikinn fjölda áhorfenda. Browne kom fyrst til Íslands veturinn 1978 og tefldi þar á best skipaða Reykjavíkurskákmóti frá upphafi, skaust fram úr Bent Larsen á lokametrunum og varð einn efstur. Hann bar Íslendingum alltaf vel söguna og eignaðist hér marga vini.

Örlögin höguðu því svo að Walter Browne tók við því hlutverki sem beið Bobbys Fischers í Bandaríkjunum eftir einvígið í Reykjavík 1972. Browne nýtti sér út í ystu æsar þau tækifæri sem opnast höfðu fyrir skákina eftir einvígið í Reykjavík. Hann varð „sexfaldur skákmeistari Bandaríkjanna“ og sá titill varð síðan ávallt tengdur nafni hans og ímynd. Burtséð frá bægslaganginum við skákborðið var hann hress og skemmtilegur náungi og einkar orðheppinn. Í frásögn minni af sögu Reykjavíkurmótanna frá viðburðum ársins 1986 stendur þetta skrifað: „Browne steig þá í ræðustól og minnti á framtak sitt til eflingar hraðskákeppni á heimsvísu og útgáfu sína á tímariti helguðu hraðskákinni og bætti svo við, að í einni hraðskák fælist yfirleitt meiri hugsun en hjá bandarísku ruðningsliði yfir heilt keppnistímabil.“

Á ferli sínum vann Browne tvisvar stórmótið í Wijk aan Zee í Hollandi. Í fyrra skiptið fór hann ómjúkum höndum um vin sinn frá Argentínu.

Walter Browne – Miguel Quinteros

Sikileyjarvörn

1. e4 c5 2. Rf3 d6 3. Bb5+ Bd7 4. Bxd7+ Dxd7 5. c4 Dg4

Eftir þessa skák hefur peðsránið alltaf þótt vafasamt.

6. O-O Dxe4 7. d4 cxd4 8. He1 Dc6 9. Rxd4 Dxc4 10. Ra3 Dc8 11. Bf4 Dd7 12. Rab5

Hótar 13. Rxd6+. Nú dugar ekki 12. ... e6 vegna 13 Rxe6! fxe6 14. Hxe6+! o.s.frv.

12. ... e5 13. Bxe5! dxe5 14. Hxe5+ Be7

15. Hd5! Dc8 16. Rf5 Kf8 17. Rxe7 Kxe7 18. He5+

- og svartur gafst upp. Tærasta mátið kemur upp eftir 18. ... Kf6 19. Df3+! Kxe5 20. He1 mát.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 4. júlí 2015

Skákþættir Morgunblaðsins

[Event "Wijk aan Zee (Netherlands)"] [Site "Wijk aan Zee (Netherlands)"] [Date "1974.01.31"] [EventDate "?"] [Round "14"] [Result "1-0"] [White "Walter Shawn Browne"] [Black "Miguel A Quinteros"] [ECO "B52"] [WhiteElo "?"] [BlackElo "?"] [PlyCount "35"] 1.e4 c5 2.Nf3 d6 3.Bb5+ Bd7 4.Bxd7+ Qxd7 5.c4 Qg4 6.O-O Qxe4 7.d4 cxd4 8.Re1 Qc6 9.Nxd4 Qxc4 10.Na3 Qc8 11.Bf4 Qd7 12.Nab5 e5 13.Bxe5 dxe5 14.Rxe5+ Be7 15.Rd5 Qc8 16.Nf5 Kf8 17.Nxe7 Kxe7 18.Re5+ 1-0

Ungir skákmenn gerðu það gott á Skákþingi Noregs - Aryan Tari skákmeistari Noregs

Ungir og efnilegir skákmenn voru í aðalhlutverki á Skákþingi Noregs sem lauk í Osló í dag. Sigurvegari mótsins varð Aryan Tari (2502) sem er aðeins 16 ára. Hann hlaut 7 vinninga í 9 skákum. Í öðru sæti varð Johan Salomon (2424) sem er aðeins 18 ára og þriðji varð Kristian Stuvik Holm (2376) sem er 17 ára. Framtíð Noregs er því nokkuð björt. 

Í mótið vantaði allra sterkustu skákmenn Noregs (allt ólympíuliðið) en meðal keppenda voru þó þrír stórmeistarar (Östenstad, Djurhuus og Gausel). Árangur hins unga Tari er því mikið. Þrátt fyrir ungan aldur er hann aðeins sá þriðji yngsti sem hampar titlinum en bæði Agdestein og Carlsen urðu meistarar yngri en Tari.

Heimasíða mótsins

 

Hjörvar vann í lokaumferðinni - endaði í 8.-16. sæti

Stórmeistarinn Hjörvar Steinn Grétarsson (2559) vann ástralska alþjóðlega meistarann Justin Tan (2417) í tíundu og síðustu umferð Benasque-mótsins á Spáni sem fram fór í morgun.

Hjörvar hlaut 7,5 vinning og endaði í 8.-16. sæti (10. sæti á stigum). 

Frammistaða Hjörvars samsvaraði 2580 skákstigum og hækkar hann um 8 stig fyrir hana. Hjörvar hefur því endurheimt annað sæti Íslendinga á stigalista FIDE. 

Indverski stórmeistarinn B. Adhiban (2627) sigraði á mótinu en hann hlaut 8,5 vinning.

Jón Trausti Harðarson (2141) tapaði fyrir finnsku goðsögninni Heikki Westerinen (2313) í lokaumferðinni. Jón Trausti hlaut 5,5 vinning og endaði í 108.-158. sæti (133. á stigum). 

Alls tóku 412 skákmenn frá 37 löndum þátt í mótinu. Þar af voru 34 stórmeistarar. Hjörvar var nr. 13 í stigaröð keppenda en Jón Trausti var nr. 123.

 

• Heimasíða mótsins
• Chess-Results
• Beinar útsendingar

Sumarmótið mikla við Selvatn IX - Róbert sigraði, Bragi og Gunnar komu næstir

Skákhátíðin að sveitasetri þeirra hjóna Guðfinns og Erlu Axels fór fram Í í fögru sumarveðri í faðmi náttúrunnar í Listaskálanum við Selvatn síðdegis á fimmtudaginn var (9. júlí). og stóð langt fram á kvöld.  

Umgjörð mótsins var eins og best verður á kosið og einkar glæsileg. Mættir voru 40 skákgarpar á öllum aldri til að láta ljós sitt sína og kosta kapps um að máta hvern annan eða verða sjálfir mát ella.

GRK bauð mótsgesti velkomna, ESE setti mótið; KrSt kynnti styrktaraðila þess fjölmarga; Siggi Dan sló kröftuga tóna á píanóið til að fylla menn baráttuhug og Kristján Hreinsson fór með gamanmál til að létta tapsárum mönnum lund.  Mikið var um dýrðir, hátíðarkvöldverðarhlaðborð undir beru lofti, glæsileg verðlaun og vinningahappdrætti.

Eftir harða keppni og margar æsilegar baráttuskákir á öllum borðum stóð Róbert  nokkur Lagerman uppi sem sigurvegari. Hann hlaut 9 vinninga af 11 mögulegum og  keppti fyrir Lögmannsstofu Jóns G. Briem sem styrktaraðila. Bragi Halldórsson (KPMG) varð annar og Gunnar Björnsson (Urður) í þriðja sæti.

Á eftir þeim fylgdi svo fríður flokkur skákkempna með örlítið færri vinninga eins og gengur og sjá má á meðf. mótstöflu. Ungmennaverðlaun hlaut hinn uppvaxandi meistari Gauti Páll Jónsson (Eldhús Sælkerans) Ellismellur mótsins var Sverrir Gunnarsson 88 ára (Byko). Engin fór tómhentur heim.

Skákdeild KR, Gallerý Skák og Riddarinn sem stóðu sameiginlega fyrir mótinu  þakka keppendum og stoltum stuðningsaðilum framlag þeirra til eflingar skáklífinu.

Myndaalbúm (ESE)

Ingvar vann - Sigurbjörn gerði jafntefli við Macieja

Ingvar Þór Jóhannesson (2372) vann pólska skákmeistarann Michal Karpus (2114) í fyrstu umferð minningarmóts um Najdorf sem hófst í Varsjá í dag. Sigurbjörn Björnsson (2327) saumaði lengi vel að pólska stórmeistaranum Bartomiej Macieja (2586) en varð að sætta sig að lokum við jafntefli.

Það eru hörkuskákir hjá báðum á morgun. Sigurbjörn mætir stigahæsta keppenda mótsins, búlgarska stórmeistaranum Ivan Cheparinov (2683) en Ingvar teflir við pólska stórmeistarann Jacek Tomsczak (2579). Báðir verða þeir í beinni útsendingu en umferðin kl. 15.

Alls tefla 83 skákmenn í efsta flokki og þar af eru 23 stórmeistarar. Ingvar er nr. 39 í stigaröð keppenda en Sigurbjörn er nr. 52.

.

• Heimasíða mótsins
• Úrslitaþjónusta
• Beinar útsendingar (hefjast almennt kl. 15)

Hjörvar með jafntefli við Deysi Cori - Jón Trausti á sigurbraut

Stórmeistarinn Hjörvar Steinn Grétarsson (2559) gerði jafntefli við Deyri Cori (2421), stórmeistara kvenna frá P, í níundu og næstsíðustu umferð Benasque-mótsins á Spáni.

Hjörvar hefur 6,5 vinning og er í 12.-40. sæti. Í lokaumferðinni sem fram fer á morgun teflir Hjörvar við ástralska alþjóðlega meistarann Justin Tan (2417). Skákin verður sýnd beint og hefst umferðin kl. 7 í fyrramálið.

Jón Trausti Harðarson (2141) vann sína þriðju skák í röð og er kominn með 5,5 vinning. Á morgun teflir hann við finnska stórmeistarann Heikki Westerinen (2313). 

Alls taka 412 skákmenn frá 37 löndum þátt í mótinu. Þar af eru 34 stórmeistarar. Hjörvar er nr. 13 í stigaröð keppenda en Jón Trausti er nr. 123.

 

• Heimasíða mótsins
• Chess-Results
• Beinar útsendingar