Afmælismót TV: góð kjör á gistingu og góð peningaverðlaun

Afmælismót Taflfélags Vestmannaeyja fer fram komandi helgi en félagið er nú á sínu 90. ári. Helgi Ólafsson stórmeistari og Vestmanneyingur er stigahæstur skráðra keppenda sem eru nú um 20 talsins.

Enn er hægt að skrá sig til leiks á skak.is. Afar góð kjör fást á gistingu eða tveggja manna herbergi í uppábúnum rúmum á 5500 kr. samtals. Ef þrír í herbergi þá er herbergið samtals á kr. 7000. Alger kostakjör og er gistingin í göngufæri við skákstað. Áhugasamir um gistinguna hafi samband við Jóhannes í síma: 778-1500

Nánar um mótið má lesa hér; http://skak.blog.is/blog/skak/entry/2179051/

Steinþór Baldursson: Minning

Steinþór leigði bát í Tromsö fyrir dómarana og stóð að sjálfsögðu í stefni.

Steinþór Baldursson kom eins og stormsveipur inn í íslenskt skáklíf þegar sonur hans Felix byrjaði að tefla. Steinþór hafði skoðanir á hlutunum og þar fór mikill framkvæmdamaður. Á hann var hlustað með athygli og innan skamms var hann bæði kominn í stjórn Skáksambands Íslands og Taflfélagsins Hellis og reyndist gríðarlega öflugur stjórnarmaður.

Skákdómarinn Steinþór að störfum.

Að sjálfsögðu hafði gamli handboltadómarinn mikinn áhuga á skákdómgæslu og var mjög fljótlega kominn í hlutverk skákdómarans. Tæknikunnátta Steinþórs nýttist einnig mjög vel og var hann einn helsti sérfræðingur landsins í beinum skákútsendingum.

Íslensku dómararnir að störfum í Tromsó. Steinþórs er sárt saknað í Bakú.

Steinþór var einn allra öflugasti skákdómari landsins og hafði alþjóðleg dómararéttindi. Hann var einn skákdómara á Ólympíuskákmótinu í Tromsö 2014 og á Evrópumóti landsliða í Laugardalshöllinni 2015. Steinþór var þrautseigur með afbrigðum og lét veikindin sem minnst stöðva sig. Hans síðasta skákstjóraverkefni var dómgæsla á Íslandsmótinu á Seltjarnarnesi í maí-júní sl.

Það var gott að leita til Steinþórs. Hann var einstaklega úrráðagóður og reyndist mér oft mjög vel þegar ég þurfti ráð.

Garry Kasparov í góðum félagsskap.

Þegar Steinþór er borðinn til grafar eru ég og margir aðrir úr skákhreyfingunni staddir á Ólympíuskákmótinu í Bakú í Aserbaísjan. Okkur þykir leitt að geta ekki verið viðstödd útför Steinþórs, en við munum þess í stað kveðja okkar góða vin með okkar hætti í Bakú. Til Bakú stefndi Steinþór á að fara en því miður gekk það ekki eftir. Hans er sárt saknað.

Frasi Steinþórs, "gríðarlega vandað",  er mikið notaður í Bakú og mun lifa í skákhreyfingunni um ókomna tíð.

Skákhreyfingin hefur misst einn sinn besta mann. Margir í hreyfingunni hafa misst frábæran vin.

Claire, börnum Steinþórs, foreldrum hans og öðrum aðstandendum sendi ég einlægar samúðarkveðjur.

Gunnar Björnsson,
Forseti Skáksambands Íslands

Íslandsmót öldunga 65+ fer fram á laugardaginn

Íslandsmót öldunga  65 ára og eldri  verður haldið laugardaginn 10. september  nk. í Ásgarði, félagsheimili  FEB að Stangarhyl.  Að þessu sinni standa báðir skákklúbbar eldri borgara á Höfuðborgarsvæðinu, RIDDARINN og ÆSIR, sameiginlega að mótinu, sem áður hefur farið fram á vegum hins fyrrnefnda í Hafnarfirði.

Þetta er í þriðja sinn sem slíkt Íslandsmót með atskákarsniði fer fram í þessum aldursflokki.

Tefldar verða 9 umferðir með 10 mínútna umhugsunartíma auk  3 sekúndna viðbótartíma á leik. Fjórar umferðir verða tefldar fyrir hádegi en lokaumferðirnar fimm eftir hádegisverðarhlé.

Mótið hefst kl. 10 árdegis og lýkur um kl. 16.30  með verðlaunaafhendingu. 

Þátttökugjald er kr. 1000 og innifelur kaffi, svaladrykki og snarl meðan á móti stendur. Björgvin Víglundsson er núverandi Íslandsmeistari og  hefur unnið mótið í bæði skiptin sem það hefur verið haldið.  

Aðalverðlaun mótsins er kr. 50.000 ferðastyrkur á Norðurlandamótið í skák í Sastamala, Finnlandi, 22. -30. október nk.  Auk verðlaunagripa sem gefnir eru af Sportvöruverzluninni JÓA ÚTHERJA, verða veitt vegleg bókaverðlaun og aldursflokkaviðurkenningar (65-70; 71-75; 76-80; 81 og eldri). Vænst er góðrar þátttöku sem víðast hvar að af landinu.  

Mótsnefndina skipa fulltrúar "Öðlinganefndar SÍ" þeir: Einar S. Einarsson, formaður; Finnur Kr. Finnsson; Guðfinnur R. Kjartansson; Sigurður E. Kristjánsson og Össur Kristinsson.

Skráning fer fram á Skák.is (guli kassinn efst). Upplýsingar um þegar skráða keppendur má finna hér. 

 

Íslandsmót skákfélaga hefst 29. september - félagaskiptaglugginn lokar þann 9. september

Fyrri hluti Íslandsmóts skákfélaga 2016-2017 fer fram dagana 29. sept – 2. okt.  nk.  Mótið fer fram í Rimaskóla í Reykjavík.  1. umferð (eingöngu í 1.deild) mun hefjast kl. 19.30 fimmtudaginn 29. september. Aðrar deildir munu hefja taflmennsku föstudaginn 30. september. kl. 20.00 og síðan tefla 1. október  kl. 11.00 og kl. 17.00 sama dag.  Síðasta umferðin í fyrri hlutanum hefst kl. 11.00 sunnudaginn 2. október. 

Umhugsunartími er 90 mín. á skákina + 30 sek. viðbótartími bætist við eftir hvern leik.

Þátttökugjöld:

• 1. deild kr. 70.000.-
• 2. deild kr. 60.000.-
• 3. deild kr. 20.000.-
• 4. deild kr. 15.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað.

Meðfylgjandi er 3. kafli skáklaga Skáksambands Íslands sem varða Íslandsmót skákfélaga og reglugerð um Íslandsmót skákfélaga.

Vakin er athygli á viðbót við 2. grein reglugerðar um Íslandsmót Skákfélaga:

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra.  

Athugið að tilkynningar v. Keppendaskrár Skáksambands Íslands skulu hafa borist SÍ í síðasta lagi 9. september nk. sbr. 18. gr. skáklaga. 

Vakin er athygli á eftirfarandi texta í 19. grein skáklaga:  „Fyrir upphaf 1.umferðar fyrri hluta ÍS skulu félögin skila inn styrkleikaröðuðum lista allra þeirra keppenda sem þeir hyggjast nota í keppninni.“ 

Þátttökutilkynningar þurfa að berast Skáksambandi Íslands fyrir 20. september með bréfi, tölvupósti ([e-mail]), símleiðis eða á Skák.is (guli kassinn). Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild. 

Stjórn SÍ mælist til – af gefnu tilefni - að félögin skrái ekki fleiri sveitir til keppni en þau treysta sér til að manna í báðum hlutum keppninnar.

ÓL: Ísland blandar sér í toppbaráttuna í Bakú

Íslenska liðið í opnum flokki Ólympíuskákmótsins í Bakú vann Eistland í dag af miklu öryggi. Hjörvar Steinn Grétarsson, Jóhann Hjartarson og Bragi Þorfinnsson unnu sínar skákir en Guðmundur Kjartansson tapaði. Þessi 3-1 sigur tryggði liðinu 8 stig af 10 mögulegum og er sveitin því komin í hóp þjóða á borð við Rússland, Kína og Aserbaísjan.

Hjörvar Steinn Grétarsson (2547) hefur farið á kostum í mótinu til þessa og hefur unnið allar fimm skákir sínar. Aðeins þrír aðrir skákmenn hafa unnið allar fimm skákir sínar; Jan-Krzysztof Duda (2675) frá Póllandi, Santosh Gujrathi Vidit (2669) frá Indlandi og Ian Nepomniachtchi (2740) frá Rússlandi. Þá hefur Bragi Þorfinnsson (2430) einnig unnið allar sínar skákir en Bragi hefur teflt einni skák færra en Hjörvar Steinn.

Jóhann Hjartarson vann sína skák í dag með einkar laglegum hætti, en Guðmundur Kjartansson tapaði.

Kvennalið Íslands atti kappi við Mexíkó í dag og tapaði naumlega 1,5-2,5. Liðið var hársbreidd frá því að næla sér í jafntefli í viðureigninni. Eftir tap í 2.umferð gegn Ítalíu hafa hamskipti Lenku Ptacnikovu (2159) verið slík að engin mótherji hefur séð til sólar gegn henni, þó oft hafi þeim sýnst léttskýjað. Lenka hefur unnið síðustu þrjár skákir og hefur nú 4 vinninga í 5 skákum. Guðlaug Þorsteinsdóttir gerði jafntefli í dag, en Hallgerður Helga Þorsteinsdóttir og Veronika Steinunn Magnúsdóttir töpuðu sínum skákum.

Í 6.umferð opins flokks, sem hefst á fimmtudag klukkan 11 að íslenskum tíma, mætir Ísland liði Tyrklands. Í kvennaflokki mætir Ísland liði Perú. Báðar íslensku sveitirnar tefla því við andstæðinga sem hafa mun hærri meðalstig.

Í efstu sætum opins flokks eru Holland, Úkraína og Indland, öll með 10 stig. Úkraína hefur farið geysivel af stað og hefur lagt bæði Rússland og Kína að velli. Úkraína mætir ofursveit Bandaríkjanna í 6.umferð á meðan Holland og Indland leiða saman hesta sína. Í kvennaflokki eru tvær þjóðir með fullt hús, Rússland og Úkraína, en þessi lið mætast einmitt í næstu umferð.

Á morgun er eini frídagur mótsins.

Kennari verður skákkennari: Neskaupsstaður

Nesskóli Neskaupstað er þátttakandi í verkefninu Kennari verður skákkennari. Klara Sigríður Sveinsdóttir mun í vetur kenna nemendum sínum í fjórða bekk skák einu sinni í viku. Stefán Bergsson verkefnisstjóri heimsótti Klöru og nemendur hennar í morgun. Kennt var þrjá tíma fyrir hádegi og farið yfir skákleiki og kennsluaðferðir sem Klara getur nýtt sér í framhaldinu. Skólastjóri skólans er Einar Már Sigurðsson sem er mikil skákáhugamaður. Einar hafði frá ýmsu að segja og m.a. sögum af alþjóðlega skákmótinu á Neskaupstað árið 1984 sem Helgi Ólafsson vann. Skólinn fjárfesti í nýjum töflum og fara nemendur og Klara því vel búin inn í komandi skákvetur. Styrktaraðili heimsóknarinnar var Hótel Capitano.

Viðureignir dagsins: Eistland og Mexíkó

Fimmta umferð Ólympíuskákmótsins hefst kl. 11 í dag. Andstæðingar dagsins eru Eistar í opnum flokki og Mexíkóar í kvennaflokki.

Hannes Hlífar Stefánsson hvílir í dag gegn Eistum. 

Bein útsending.

Íslenska kvennaliðið mætir sveit Mexíkóa. Hrund Hauksdóttir hvílir. 

Bein útsending.

 

• Heimasíða mótsins
• Chess-Results
• Beinar útsendingar (hefjast kl. 11)

Bikarsyrpa TR hefst á föstudaginn

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað þriðja árið í röð. Mót syrpunnar í vetur verða fimm talsins og hefur umferðum hvers móts verið fjölgað í sjö.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2001 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fyrsta mót Bikarsyrpunnar hefst föstudaginn 9. september og stendur til sunnudagsins 11. september. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

 

Dagskrá Bikarsyrpu I:

1. umferð: 09.september kl. 17.30 (fös).

2. umferð: 10.september kl. 10.00 (lau).

3. umferð: 10.september kl. 13.00 (lau).

4. umferð: 10.september kl. 16.00 (lau).

5. umferð: 11.september kl. 10.00 (sun).

6. umferð: 11.september kl. 13.00 (sun).

7. umferð: 11.september kl. 16.00 (sun).

Verðlaunaafhending fer fram strax að lokinni 7.umferð.

 

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hverja yfirsetu. Tilkynna þarf skákstjóra um yfirsetu fyrir lok umferðarinnar á undan.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar. Verðlaunapeningur eru veittur fyrir 2.sæti og 3.sæti. Sérstök verðlaun verða veitt næsta vor fyrir samanlagðan árangur í mótunum fimm, þar á meðal er veglegur farandbikar. Þá verða veitt sérstök verðlaun fyrir samanlagðan árangur fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1.sæti gefur 5 einkatíma, 2.sæti gefur 3 einkatíma og 3.sæti gefur 2 einkatíma.

Vinsamlegast skráið þátttakendur sem fyrst, það hjálpar til við undirbúning mótsins. Hlökkum til að sjá ykkur!

 

Skráningarform

Skráðir keppendur

Ólympíuskákmótið: 4. umferð í kvennaflokki

Moldavía 1 ½ - Ísland 2 ½

 

 

 

Við fengum lið Moldavíu í dag, með meðalstig 2167.

Lenka hafði svart gegn WIM Diana Baciu (2279) á 1. borði. Upp kom tískuvörn sem við höfðum litið á fyrir skákina og bjuggumst við einhverju bitlausu g3-afbrigði sem Baciu hafði teflt nokkrum sinnum áður. Sú moldavíska breytti þó útaf og lék snemma h3, Be3 og Dd2 og stillti upp í kóngssókn. Lenka lenti í krappri vörn og í miðtaflinu var hún með ,,koltapað í tölvunum‘‘. Hún fann þó leiðir til þess að gera úrvinnsluna flókna fyrir hvítan og á ótrúlegan hátt missti Baciu af vinningsleiðinni sem tölvan mat á +17,98! Lenka fór með kónginn á d6, beint í skotlínu hvítu mannanna og skyndilega var hún með unnið tafl því Baciu átti engar góðar skákir vegna lúmskra máthótanna Lenku. Á þessum tímapunkti gekk undirritaður um gólf og púlsinn var að nálgast 200! Á sama tíma heima á Íslandi var einn Björn Þorfinnsson að sturlast af spennu:

Hér lék Lenka 37...Kd6! og öllum fráskákum með riddarnum er auðvitað svarað með 38...Dd2 mát, takk fyrir!

Frábær baráttusigur Lenku, sem hefur unnið tvær skákir í röð gegn mjög sterkum andstæðingum.

Guðlaug hafði hvítt gegn IM Svetlana Petrenko (2176) á 2. borði. Upp kom kóngs-indversk vörn og Gulla fékk þægilega stöðu út úr byrjuninni. Petrenko var með veikt peð á f5 og óvirka menn á kóngsvængnum og hugsanlega hefði Gulla getað haldið pressunni og gert tilraun til að tefla til vinnings. Á þessum tímapunkti var staðan í viðureigninni að snúast okkur í hag og við það slakaði Gulla aðeins á klónni og hleypti Petrenko inn í skákina. 

Hér var spurning hvort 34. a4 hefði ekki gefið hvítum smá möguleika á að svíða skákina. Gulla lék í staðinn 34. He1 og missti aðeins tökin á stöðunni í framhaldinu.

Sú moldavíska nýtti tækifærið og sýndi góða tækni í framhaldinu. Gulla neyddist út í erfitt hróksendatafl og því varð því miður ekki bjargað.

Hallgerður Helga hafði svart gegn WFM Olga Hincu (2125) á 3. borði. Upp kom óvenjuleg leið gegn Grunfelds-vörn með 3. Rd2!? Hvítur fékk rýmra og betra tafl og Halla mátti sætta sig við þrönga og erfiða stöðu. Hún hefur sýnt það hingað til í mótinu að hún er hörku varnarskákmaður og þrátt fyrir að hafa þurft að leika riddaranum sínum til a8, þar sem hann mátt dúsa í 21 leik(!), barðist hún eins og ljón.

Halla var að enda við að leika 19...Ra8 þar sem hann valdar c7-peðið. Þar fékk hann að dúsa í 21 leik þangað til að birtist skyndilega og kláraði skákina!

Hincu gerði heiðarlega tilraun til þess að vinna skákina, setti mikla pressu á Höllu sem fann alltaf varnir við hótunum hvíts. Hincu fór svo með kónginn sinn alla leið á d5 en þá sprakk svarta staðan allt í einu út með skemmtilegu trikki, og Halla var skyndilega komin með frumkvæðið. 

34...b5! og svartur er allt í einu kominn með betra. Hrókurinn á a6 sveiflar sér yfir á e6 og riddarinn á a8 vaknar til lífsins. 35. Hxb5 gengur ekki því eftir 35...c6+ fellur hrókurinn á b5.

Halla tefldi óaðfinnanlega í framhaldinu og vann frábæran sigur sem skrifast algjörlega á ótrúlega þolinmæði og baráttuþrek.

Veronika hafði hvítt gegn WGM Elena Partac (2086) á 4. borði. Við höfðum fyrir skákina krufið afbrigði Partac í sikileyjarvörn og fundið ýmsar hugmyndir til þess að gera henn lífið leitt. Veronika fór með riddarann sinn til c4 samkvæmt planinu okkar og eftir að sú moldavíska hrókaði langt upphófst mikið kapplaup á báðum vængjum; Veronika sótti á drottningarvæng og Partac á kóngsvæng. Veronika var alltaf með betra tafl og vantaði aðeins herslumuninn upp á að fá vænlegt endatafl og leggja þar með stórmeistarann að velli. Í tímahraki beggja endutóku þær stöðuna tvisvar og þá var Veronika skynsöm og spurði mig hvort hún ætti að taka jafntefli, sem var hárrétt ákvörðun hjá henni.

33. Re8+ og sama staðan komin upp þrisvar. Mikilvægt jafnteli.

Á þessum tímapunkti voru stöðurnar hjá Lenku og Höllu að snúast okkur í hug svo jafntefli voru mjög góð úrslit. Áfram hélt yfirstressaður Björn Þorfinnsson:

Flott skák hjá Veroniku, sem var vel undirbúin og hafði trú á sér í dag.

Á sama tíma og við lögðum Moldavíu að velli var Bragi að innsigla öruggan 3 1/2 - 1/2 sigur gegn Færeyjum með óaðfinnanlegri úrvinnslu í endatafli. Það voru því stoltir og glaðir landsliðsmenn Íslands sem gengu út úr Kristalhöllinni og það var glatt á hjalla í rútunni á leiðinni heim á hótel!

Á morgun fáum við sveit Mexíkó (meðalstig: 2082) og erum fullar sjálfstrausts fyrir þá viðureign. Ég er ánægður með mjög margt í taflmennsku stelpnanna. Það sem hefur skynið í gegn er baráttuþrekið í erfiðum stöðum, sem hefur verið að skila mörgum vinningum í hús. Við gætum enn bætt tímanotkunina aðeins til þess að komast hjá tímahraki. Að sama skapi hefði ég getað gert betur sem liðsstjóri í dag og bent Guðlaugu á að bjóða jafntefli í betri stöðu þegar viðureignin var að snúast okkur í vil. Það er hins vegar lúxusvandamál en maður verður ekki betri nema að vera tilbúinn að gagnrýna sjálfan sig - jafnvel eftir góða sigra!

Þangað til næst, bestu kveðjur frá Bakú.

Björn Ívar

Ólympíumót: 4. umferð í opnum flokki

Pörunin í fjórðu umferð kom okkur nokkuð á óvart. Við vorum búnir að vinna tvær viðureignir og missa niður einungis tvisvar sinnum hálfan vinning miðað við hæsta mögulega vinningafjölda með sigur í tveim viðureignum (1-3 í stað 1,5-2,5 gegn Tékkum og svo 0,5 niður gegn Sýrlandi). Við áttum því von á því að tefla upp fyrir okkur í 4. umferð. Annað kom á daginn þegar frændur okkar Færeyingar komu upp úr hattinum. 

Þrátt fyrir að við séum mun hærra skrifaðir á skáksviðinu áttum við í raun harma að hefna frá því í Tromsö þar sem jafntefli varð niðurstaðan 2-2.

Því var í raun ekki annað en sigur í boði í viðureign dagsins. 

Hannes gerði jafntefli nokkuð snemma og mér fannst Bragi hafa fína stöðu. Ég var ekki avleg viss með hinar stöðurnar. Hjörvar var klárlega alltaf með fína stöðu en ég var hræddur um að hann væri að missa frumkvæðið og væri ekki með neitt. Eitthvað var ég að misskilja stöðuna hjá Gumma líka og hélt að hún væri shaky en líklegast var allt vel "undir control".

1. borð : Hannes svart á Helga Dam Ziska (2546)

Helgi beitti rólegu afbrigði í ítslska leiknum og fékk í mesta lagi eitthvað "míkró" frumkvæði. Hannes tefldi í raun af miklu öryggi og hratt og var ekki í mikilli hættu í skákinni. Þessi skák kláraðist fyrst af öllum skákunum. Hannes muldraði einhverjar pælingar um að skipta ekki upp á riddara samkvæmt heilræði Ulf Anderson. Helgi hélt að Hannes hefði boðið jafntefli og flengdi fram spaðann sem Hannes tók glaður við og jafntefli niðurstaðan!

2. borð : Hjörvar hvítt á Jón Rauðgarð (John Rodgaard)

Hjörvar hefur í þessu móti og undanfarið sérhæft sig í að fella gamalmenni á tíma. Þessi skák var í raun engin undantekning þar sem tímahrak Jóns hafði mikil áhrif. Hjörvar kom Jóni á óvart í byrjuninni og þó e.t.v. hafi hann ekki fengið mikið hafði hann alltaf eitthvað frumkvæði og Rauðgarðinum leið ekki vel í stöðunni.

Þegar frumkvæðið virtist vera að fjara út hélt Hjörvar tangarhaldi í vonina um skemmtilega fórn á f7-reitnum. Sú fórn var skemmtilega undirbúin með lúmskum g3 og h4 leikjum.

Rauðgarðuinn féll í gildruna og var svo hrifinn af fórninni að hann leyfði Hjörvari að máta sig í lokin!

Herbergi 526 átti góðan dag gegn Færeyjum!

3. borð : Guðmundur svart á Joan Andreasen

Gummi fékk akkúrat upp afbrigðið sem hann undirbjó fyrir skákina. Leikurinn hans ...c6 var sjaldgæfur og líklegast hefur hann komið andstæðingi hans á óvart.

Byrjanavalið líklega lúmskt gott hjá Gumma sem fékk ákveðna dýnamík í stöðuna sem oft getur vantað í aðallínunum í þessu afbrigði

Þegar Gummi var að komast inn á a-línunni var hann í raun kominn með betra tafl með góðan biskup og ákveðið tangarhald á svörtu reitunum. Ég allavega misskildi eitthvað stöðuna, hélt að Gummi væri að fórna peði og ætlaði að tefla stöðulega peði undir með granítharðan svartreitabiskup. Hann átti hinsvegar kröftugt framhald í kjölfarið með ...Rxe4 og mjög mikilvægt að eiga svo ...f5-f4 í framhaldinu sem tryggði svörtum mun betra tafl.

...Rxe4 var mikilvægur leikur hér hjá Gumma!

Gummi gerði smá mistök í úrvinnslunni í síðasta leik í tímahrakinu en það kom engu að síður ekki að sök og vinningurinn hafðist. Heilt yfir fín skák hjá Gumma.

 

4. borð : Bragi hvítt á Sjúrð Þorsteinsson

Bragi tefldi aftur afar vandaða skák og virðist vera að finna sig vel á þessu móti. Ég var ánægður með samvinnu okkur í undirbúningi en þar var ákveðið að leita í smiðju Robin van Kampen sem er með góða vídeóseríu um Bb5+ í Sikileyjarvörninni. Mestur undirbúningurinn fór í að kíkja á fyrirlestrana hans á Chess24 og vorum við sammála um að þessar Maroczy stöður hentuðu skákstíl Braga fullkomlega og sérstaklega gegn þessum andstæðing. Björn Ívar hafði teflt nokkrar skákir við Sjúrð og vildi meina að styrkleiki hans væri í taktík en hann væri að sama skapi slappur í manúveringum og strategískum stöðum.

Þetta plan gekk í raun fullkomlega upp og Bragi fékk akkúrat stöðutýpuna sem við höfðum stúderað og vildum fá. Fyrirlestur van Kampen var jafnframt mjög góður og ýmsir punktar úr því sem Bragi nýtti sér eins og t.d. að drepa ekki á c6 fyrr en eftir ...a6. Reyndar vorum við ekki 100% vissir um hvort það ætti við í þessu tilviki en það hjálpar alltaf að hafa hugmyndir og punkta að vinna með.

Sjúrður gerði smá mistök í byrjuninni með ...e6 og eins missti hann af aðeins kröftugri vörn aðeins fyrr. Að öðru leiti varðist hann nokkuð vel þó svarta staðan sé alltaf passíf. Hinsvegar má Bragi eiga það að hann tefldi þessa skák mjög þétt í sannkölluðum Karpov-stíl. Bragi bætti stöðuna jafnt og þétt og tefldi mikið fyrirbyggjandi gegn plönum andstæðingsins. Staðsetning hróksins á a-línunni til að fyrirbyggja b6-break var til dæmis lærdómsríkt. Síðar hoppaði sá hrókur skemmtilega inn í skákina en það vill oft verða að skákir "flæða" vel þegar þær eru vel tefldar.

Bragi var alltaf með ný vandamál fyrir svartan þó þau væru smá og smátt og smátt molnaði Sjúrður undan pressunni. Hann fekk einn séns á að berjast á móti með því að fórna skiptamun í ca. 39. leik með ...fxg5 en missti af því og þurfti þess í stað að þjást. Bragi kláraði úrvinnsluna glæsilega og hálfgerð módelskák í afbrigðinu því niðurstaðan.

Hér seint í skákinni var Re5+ skemmtilegur og opnaði flóðgáttir fyrir hvítu hrókana.

 

Færeyingar voru því lagðir 3,5 - 0,5 sem verða að teljast glæsileg úrslit. Á tímabili var undirritaður að sætta sig við 2,5 en strákarnir voru til í meira og sóttu það!

Í 5. umferð og þeirri síðustu fyrir eina frídag mótsins mætum við ungri sveit Eista. Þeir hafa staðið sig vel en engu að síður er gríðarlega óvænt að vera með 3 sigra og 1 tap og tefla niðurfyrir okkur enn á ný! Þessi viðureign er gríðarlega mikilvæg og sigur hér setur okkur í mjög góða stöðu fyrir framhaldið. Við verðum stigahærri á öllum borðum en Eistarnir eru ungir og hungraðir og þetta verkefni verður að tækla af festu!