Annað mót Bikarsyrpu TR hefst á morgun

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað þriðja árið í röð. Mót syrpunnar í vetur verða fimm talsins og hefur umferðum hvers móts verið fjölgað í sjö.

Annað mót Bikarsyrpunnar hefst föstudaginn 4. nóvember og stendur til sunnudagsins 6. nóvember. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Sú nýbreytni verður höfð á að meðfram Bikarsyrpunni verður Bikarmót stúlkna haldið í fyrsta sinn. Með því gefst stelpum sem vilja prófa form Bikarsyrpunnar aukið tækifæri á að spreyta sig áður en þær taka þátt í sjálfri Bikarsyrpunni. Tefldar verða fimm umferðir í stúlknamótinu, ein á föstudag og tvær hvorn daginn laugardag og sunnudag, en að öðru leyti verður fyrirkomulag hið sama og í Bikarsyrpunni. Nánari dagskrá má sjá hér að neðan.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2001 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Dagskrá Bikarsyrpu II:

• 1. umferð: 4. nóvember kl. 17.30 (fös)
• 2. umferð: 5. nóvember kl. 10.00 (lau)
• 3. umferð: 5. nóvember kl. 13.00 (lau)
• 4. umferð: 5. nóvember kl. 16.00 (lau)
• 5. umferð: 6. nóvember kl. 10.00 (sun)
• 6. umferð: 6. nóvember kl. 13.00 (sun)
• 7. umferð: 6. nóvember kl. 16.00 (sun)

Dagskrá Bikarmóts stúlkna:

• 1. umferð: 4. nóvember kl. 17.30 (fös)
• 2. umferð: 5. nóvember kl. 10.00 (lau)
• 3. umferð: 5. nóvember kl. 13.00 (lau)
• 4. umferð: 6. nóvember kl. 10.00 (sun)
• 5. umferð: 6. nóvember kl. 13.00 (sun)

Verðlaunaafhending fer fram strax að lokinni síðustu umferð hvors móts fyrir sig.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu (í stúlknamótinu er ein yfirseta leyfð í umferðum 1-3). Tilkynna þarf skákstjóra um yfirsetu fyrir lok umferðarinnar á undan.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari hvors móts hlýtur að launum bikar. Verðlaunapeningur eru veittur fyrir 2.sæti og 3.sæti. Sérstök verðlaun verða veitt næsta vor fyrir samanlagðan árangur í mótunum fimm, þar á meðal er veglegur farandbikar. Þá verða veitt sérstök verðlaun fyrir samanlagðan árangur fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1.sæti gefur 5 einkatíma, 2.sæti gefur 3 einkatíma og 3.sæti gefur 2 einkatíma.

Vinsamlegast skráið þátttakendur sem fyrst, það hjálpar til við undirbúning mótsins. Hlökkum til að sjá ykkur!

Skráningarform

Skráðir keppendur

Jón Arnljótsson er skákmeistari Skagafjarðar 2016

Lokaumferð Skákþings Skagafjarðar 2016 – Landsbankamótsins var háð í gær. Sigurganga Jóns Arnljótssonar virtist óstöðvandi, en fyrir lokaumferðina var hann búinn að leggja alla sína andstæðinga og í raun búinn að tryggja sér sigur á mótinu og hinn virðulega titil "Skákmeistari Skagafjarðar 2016". Jón tefldi við Þór Hjaltalín í lokaumferðinni og eftir mikla bráttuskák ákváðu þeir að skipta með sér jöfnum hlut og endaði Jón með 5½ vinning úr 6 skákum.

Knútur Finnbogason sótti mótið alla leið frá Siglufirði og tefldi af miklu öryggi. Eftir tap gegn Jóni í fyrstu umferð fóru hlutirnir að ganga og lagði hann alla sína andstæðinga eftir það. Hlaut hann 5 vinninga og annað sætið á mótinu. Þór Hjaltalín tók svo þriðja sætið með 3½ vinning. 

Mótsstjórn vill þakka keppendum fyrir skemmtilegt mót og drengilega keppni. Einnig viljum við færa Gunnari Björnssyni, forseta vorum bestu þakkir fyrir hjálp og stuðning og sömuleiðis Landsbanka Íslands fyrir góðan stuðning við mótið og skáklíf í Skagafirði. Nánar um úrslit á mótinu má sjá á Chess-Results.

Heimasíða Skákfélags Sauðárkróks

Skák á bókasöfnum borgarinnar

Skákakademía Reykjavíkur hefur síðustu misserin verið með skákkynningu og kennslu á bókasöfnum borgarinnar. Samhliða því að bjóða upp á kennslu hafa söfnin bætt í taflsettakost sinn svo nú má tefla á söfnum borgarinnar. Kynningarnar hafa verið vel sóttar og þá sérstaklega af fjölskyldufólki. Margir ungir áhugasamir skákmenn hafa fengið kennslu og foreldrarnir fræðslu á því hvar megi enn frekar læra skák. 

Dagur og Vignir sigurvegarar alþjóðlegs unglingamóts í Uppsölum

Dagur Ragnarsson (2232) og Vignir Vatnar Stefánsson (2163) komu sáu og sigruðu á alþjóðlegu unglingaskákmóti sem lauk í gær í Uppsölum í Svíþjóð. Þeir félagarnir hlutu 6,5 vinninga í 9 skákum. Dagur hafði svo gullið með hálfu stigi eftir stigaútreikning. Glæsilegur árangur hjá þeim félögunum sem báðir voru í toppbaráttunni allt mótið. Dagur var taplaus á mótinu en gerði 5 jafntefli. Vignir tapaði fyrir Degi í innbyrðis skák en var duglegri við að vinna sína andstæðinga.

Oliver Aron Jóhannesson (2263) tapaði í lokaumferðinni og varð í 8.-9. sæti. Oliver var einnig í toppbaráttunni allt mótið og var taplaus þar til í lokaumferðinni.

Vignir heldur áfram stigamokstri og hækkar um 52 stig fyrir frammistöðu sína á mótinu. Það þýðir að Vignir verður með ríflega 2350 skákstig á næsta stigalista. Dagur hækkar um 25 skákstig en Oliver lækkar lítilsháttar eða um 7 skákstig.

Skákklúbburinn í Uppsölum fær miklar þakkir fyrir að bjóða þeim félögum að taka þátt í mótinu. Þar ráða ríkjum Carl Fredrik forseti sænska skáksambandsins og Íslendingurinn G. Sverrir Þór.

Ítarlega umfjöllun um mótið má finna á heimasíðu sænska skáksambandsins. 

Einnig má finna umfjöllun um mótið hér.

Viðtal við Dag Ragnarsson.

• Heimasíða mótsins
• Beinar útsendingar

 

Páll efstur á Skákþingi Garðabæjar

Þriðja umferð Skákþings Garðabæjar fór fram sl. mánudagskvöld. Páll Sigurðsson hélt forustunni eftir að hafa farið heldur halloka í miðtafli en náði svo sterkum hótunum og líklega jafnteflisstöðu þegar Baldur Möller var svo vinsamlegur og sprengdi sig í endataflinu með fremur skjótum endalokum. Jón Magnússon vann nokkuð örugglega gegn Ingvar Vignissyni og hið sama gerði Jón Þór Lemery gegn Birki Ísak eftir að sá síðarnefndi missti mann í 16. leik.

Þeir Jón Þór Lemery og Jón Magnússon eru í 2.-3. sæti með 2,5 vinninga.

Loftur vann Jón Eggert í köflóttri skák en hann hafði lengst af aðeins betra. Birkir Karl vann Stefán örugglega en Bjarnsteinn og Þorsteinn gerðu jafntefli í skrautlegri skák, sem skipti a.m.k. tvisvar um eigendur. Alec og Bjarki Freyr tefldu einnig skrautlega skák þar sem Bjarki náði mjög vænlegri stöðu en í stað þess að auka pressuna fór hann í uppskipti og Alec rétti úr kútnum og endaði á að hirða drottningu. Sigurður Freyr vann svo á neðsta borði nokkuð örugglega.

Allar skákirnar má finna á chess-results mótssíðunni á pgn formi. Einnig má finna öll úrslit og stöðuna í mótinu sem og pörun næstu umferðar á Chess-results.com

 

Ný alþjóðleg hraðskákstig

Ný alþjóðleg hraðskákstig komu út í gær 1. nóvember. Hjörvar Steinn Grétarsson (2658) er langstigahæsti hraðskákmaður landsins. Tíu nýliðar eru á listanum. Stigahæstur þeirra er Björgvin Víglundsson (2122). Guðmundur Kjartansson (115) hækkar mest allra frá október-listanum.

Heildarlistann yfir þá sem hafa alþjóðleg hraðskákstig má finna hér.

Topp 20

No.	Name	Tit	Stig	Gms	Diff
1	Gretarsson, Hjorvar Steinn	GM	2658	18	29
2	Hjartarson, Johann	GM	2538	0	0
3	Stefansson, Hannes	GM	2535	23	39
4	Thorfinnsson, Bjorn	IM	2516	12	11
5	Gunnarsson, Jon Viktor	IM	2510	24	-13
6	Kristjansson, Stefan	GM	2483	0	0
7	Gunnarsson, Arnar	IM	2476	24	20
8	Gretarsson, Helgi Ass	GM	2465	24	-64
9	Olafsson, Helgi	GM	2454	18	-48
10	Kjartansson, Gudmundur	IM	2453	24	115
11	Thorhallsson, Throstur	GM	2447	12	-84
12	Thorfinnsson, Bragi	IM	2427	24	33
13	Petursson, Margeir	GM	2366	0	0
14	Johannesson, Ingvar Thor	FM	2360	12	3
15	Ulfarsson, Magnus Orn	FM	2352	24	-7
16	Asbjornsson, Asgeir	FM	2344	12	40
17	Arnason, Jon L	GM	2340	0	0
18	Olafsson, Fridrik	GM	2336	0	0
19	Kjartansson, David	FM	2329	0	0
20	Jensson, Einar Hjalti	IM	2321	0	0

Nýliðar

1	Viglundsson, Bjorgvin		2122	11	2122
2	Kristjansson, Olafur		2114	9	2114
3	Olafsson, Smari		1957	9	1957
4	Bjorgvinsson, Andri Freyr		1955	9	1955
5	Eiriksson, Sigurdur		1921	9	1921
6	Isolfsson, Eggert		1853	11	1853
7	Johannesson, Haki		1746	9	1746
8	Sigurdsson, Sveinbjorn		1740	9	1740
9	Ulfsson, Olafur Evert		1513	11	1513
10	Arnarson, David		1486	11	1486

Mestu hækkanir

1	Kjartansson, Gudmundur	IM	2453	24	115
2	Mai, Alexander Oliver		1543	11	75
3	Thorsson, Pall		1867	11	70
4	Mai, Aron Thor		1642	11	68
5	Ragnarsson, Dagur	FM	2159	11	62
6	Halldorsson, Halldor		2271	12	61
7	Karlsson, Mikael Johann		2127	12	58
8	Asbjornsson, Asgeir	FM	2344	12	40
9	Stefansson, Hannes	GM	2535	23	39
10	Gudmundsson, Gunnar Erik		1093	10	39

Reiknuð hraðskákmót

• Hraðskákkeppni talfélaga (undanúrslit og úrslit)
• Atkvöld Hugins, 26. september (1.-3. umferð)
• Hraðskákmót TR
• Hausthraðskákmót SA

 

Skrár tengdar þessari bloggfærslu:

• Alþjóðleg hraðskákstig, 1. nóvember 2016

Hraðskákmót Hugins fer fram á mánudaginn

Hraðskákmót Hugins í Mjóddinni verður haldið mánudaginn 7. nóvember nk. Teflt er í félagsheimili Hugins í Álfabakka 14a og hefst taflið kl. 20. Tefldar verða 7 umferðir með umhugsunartímanum 4 mínútur + 2 sekúndur á hvern leik.

Mótið verður reiknað til hraðskákstiga. Heildarverðlaun á mótinu eru kr. 20.000.

Núverandi hraðskákmeistari Hugins er Hjörvar Steinn Grétarsson. Þetta er í tuttugasta of fyrsta sinn sem mótið fer fram. Björn Þorfinnsson og Davíð Ólafsson hafa hampað titlinum oftast eða fjórum sinnum.

Verðlaun skiptast svo:

1. 10.000 kr.
2. 6.000 kr.
3. 4.000 kr.

Þátttökugjöld eru kr. 400 fyrir félagsmenn en kr. 600 fyrir aðra. Fyrir unglinga í Huginn eru þau kr. 300 en kr. 400 fyrir aðra.

Jón Olav sigraði á hraðkvöldi Hugins

Jón Olav Fivelstad lék á alls oddi á hraðkvöldi sem haldið var 31. október sl. Stigahærri andstæðingar voru honum engin fyrirstaða að þessu sinni og þegar upp var staðið voru 8,5 vinngingar í húsi hjá honum af 10 mögulegum og fyrsta sætið var hans. Þátttakendur tefldu tvöfalda umferð og Jon Olav missti einn vinning niður gegn Vigfúsi Ó. Vigfússyni og hálfan vinning niður gegn Omari Salama.

Þeir komu svo næstir, Vigfús í öðru sæti með 8 vinninga og Omar þriðji með 7,5 vinning. Jón Olav dró Pétur Jóhannesson í happdrættinu. Pizzumiðarnir frá Dominos voru búnir þannig að þeir fengu báðir úttektarmiða hjá Saffran. Næsta mánudag 7. nóvember verður Hraðskákmót Hugins.

Lokastaðan á hraðkvöldinu:

1. Jón Olav Fivelstad, 8,5v/10
2. Vigfús Ó. Vigfússon, 8v
3. Omar Salama, 7,5v
4. Smári Arnarson, 4v
5. Björgvin Kristbergsson 2v
6. Pétur Jóhannesson

Úrslitin í chess-results:

Dagur og Vignir efstir fyrir lokadaginn í Uppsölum

Dagur Ragnarsson (2232) og Vignir Vatnar Stefánsson (2163) eru efstir og jafnir með 5 vinninga að loknum sjöundu umferð alþjóðlega unglingamótsins í Uppsölum í Svíþjóð sem fram fór í dag. Dagur gerði jafntefli við, félaga sinn úr Rimaskóla og Fjölni, Oliver Aron Jóhannesson (2263). Vignir vann Svíann Jung Min Seo (2131). Oliver Aron er í 3.-7. sæti með 4,5 vinning.

Tvær umferðir eru tefldar á morgun. Í fyrri umferð morgundagsins teflir Dagur við Finnann Voivo Keinanen (2345), stigahæsta keppenda mótsins, Vignir við finnskættaða Svíann Felix Tuomainen (2198) og Oliver við Svíann Isak Storme (2153).

Fyrri umferð morgundagsins hefst kl. 8 og sú síðari kl. 14. Hægt er að fylgjast með strákunum í þráðbeinni á Chess24.

• Heimasíða mótsins
• Beinar útsendingar

 

Kappteflið um Skákseglið VIII - Helgað minningu Björns Víkings Þórðarsonar

Nú í nóvember - næstu 4 miðvikudaga - verður efnt til 4 móta GrandPrix kappteflis á vegum RIDDARANS, skákklúbbs eldri borgara, sem helgað er minningu fallinna félaga sem lokið hafa siglingu sinni um taflsins höf.

Um er að ræða keppni um hinn fagra farandgrip "SKÁKSEGLIÐ" sem tefld verður næstu fjóra miðvikudaga þar sem þrjú bestu mót hvers keppanda telja til stiga og vinnings. Þetta er önnur af tveim mótaröðum klúbbsins með þessu sniði og markmiði.  Hin er "Skákharpan" að vori.

Upphaflega var mótið helgað minningu Gríms heitins Ásælssonar, trillukarls og skákfrömuðar, en að þessu sinni verður það ásamt honum sérstaklega tileinkað BIRNI VÍKINGI Þórðarsyni, heiðursriddara klúbbsins, sem siglt hafði skákskútu sinni seglum þöndum um haffleti og skákreiti taflborðsins um áratugaskeið.  Fyrst hjá TR,  síðan í KR og nú síðustu árin í Riddaranum í Vonarhöfn, Strandbergi, safnaðarheimili Hafnarfjarðarkirkju, þar sem eldri skákmenn á höfuðborgarsvæðinu etja kappi allan ársins hring. (Milli þess að tefla annars staðar líka.)

Björn Víkingur sem lést fyrr á árinu er öllum sem honum kynntust og við hann tefldu afar minnisstæður maður sem mikil sjónarsviftir er af. Andi hans mun svífa yfir vötnunum og töflunum í Vonarhöfn þennan mánuðinn sem endranær.

Allir sem vilja heiðra minningu hans er hvattir til að taka þátt og geta telft með í einhverju þessarra fjögurra miðvikudagsmóta í nóvember óháð mótaröðinni - engin aldurstakmörk.  Ýtt á klukkurnar kl. 13  /ESE