Smári hraðskákmeistari Hugins á Húsavík

Smári Sigurðsson vann öruggan sigur á hinu árlega hraðskákmóti Hugins sem fram fór á Húsavík í kvöld. Smári fékk níu vinning og komst taplaus í gegnum mótið, en hann vann átta skákir og gerði tvö jafntefli.

Hjörleifur Halldórsson varð í öðru sæti á mótinu með 7,5 vinninga og Sigurður Daníelsson varð þriðji með 7 vinninga. Smári Ólafsson varð í 4. sæti með 7 vinninga og Tómas Veigar Sigurðarson varð í 5. sæti með 6 vinninga. Þar sem Hjörleifur og Smári Ólafsson kepptu sem gestir á mótinu fékk Sigurður Daníelsson sifurverðlaun og Tómas Veigar bronsið.

11 keppendur tóku þátt í mótinu og tefld var einföld umferð, allir við alla.

Lokastaðan á Chess-Results.

Atskákmót Skákklúbbs Icelandair - Íslandsmótið í atskák fer fram 26. desember

Atskákmót Skákklúbbs Icelandair – Íslandsmótið í atskák fer fram mánudaginn 26. desember í húsakynnum http://whalesoficeland.is/ á Granda og hefst kl. 13:00 keppendur eru hvattir til að mæta tímanlega. 

Whales of Iceland opnar kl 10:00 fyrir þá sem vilja skoða sýninguna fyrir mót.
Staðsetningin: https://goo.gl/maps/JzsfBuhpqTk

Tefldar verða 9 umferðir eftir svissneska kerfinu með 10 mín. + 5 sek. umhugsunartíma. Teflt verður í einum flokki.

Þátttökugjald: 3.000 Kr. og 2.000 Kr. fyrir 12 og yngri. Stórmeistarar og alþjóðlegir meistarar fá frítt í mótið en FM-meistararar greiða 1.500 kr.

Þátttakendur fá með sér tvo á gestalista á hvalasýninguna sem er alveg mögnuð.  Aðrir mótsgestir borga 1.000 kr sem er einnig aðgangseyrir á hvalasýninguna.

Greitt verður við innganginn. 

Teflt verður í baksal við góð skilyrði. 

Verðlaunin fyrir efstu þrjú sætin í mótinu eru:

1. 100.000 kr.
2. 50.000 kr.
3. 25.000 kr.

Verðlaun skiptast eftir Hort-kerfi. 

Einnig verða veitt verðlaun fyrir efsta keppandann í fjórum undirflokkum.

Efsti keppandinn í hverjum flokki fær farmiða fyrir tvo til Evrópu með Icelandair (skattar ekki innifaldir) 

• 2300-yfir
• 2000-2299
• 1700-1999
• 0-1699

Einnig verða veitt verðlaun fyrir: 

• Óvæntasta sigurinn: 40.000 inneign hjá Flugfélaginu fyrir óvæntasta sigurinn samkvæmt stigamun.
• Efsta unglinginn fæddan 2001 eða síðar sem fær 40.000 kr inneign hjá Flugfélagi Íslands.
• Bestan árangur miðað við stig sem fær gjafabréf fyrir tvo hjá Eldingu í hvalaskoðun. 

Útdráttarverðlaun:

• 10.000 vildarpunktar hjá Saga Club 

Miðað verður við atskákstig FIDE stig 1. des -> annars FIDE stig -> annars íslensk stig 1. des -> svo frammistöðu á síðasta atskákmóti ef fyrir hendi annars 1.500 stig.

Verða tveir eða fleiri jafnir í verðlaunaflokkum gildir stigaútreikningur. Sama gildir um Íslandsmeistaratitilinn.

Skráning fer fram í gula kassanum efst Skák.is og stendur til kl. 23:59 þann 25. desember og hér er hægt að sjá þegar skráða keppendur. 

Nánari upplýsingar veitir Óskar Long Einarsson  [e-mail].

Núverandi Íslandsmeistari í atskák er Helgi Ólafsson stórmeistari í skák. 

Skákþing Reykjavíkur hefst sunnudaginn 8. janúar

Skákþing Reykjavíkur hefst sunnudaginn 8. janúar kl. 13. Tefldar verða níu umferðir eftir svissnesku kerfi. Tímamörk eru 90 mínútur og bætast við 15 mínútur eftir 40 leiki. 30 sekúndur bætast við eftir hvern leik alla skákina. Teflt er í húsnæði Taflfélags Reykjavíkur að Faxafeni 12.

Keppendur geta tekið tvær yfirsetur (bye) í umferðum 1-6. Leggja skal inn ósk um yfirsetu til skákstjóra áður en parað er í viðkomandi umferð. Hálfur vinningur fæst fyrir yfirsetu.

Athygli er vakin á því að umferðir á sunnudögum hefjast kl. 13:00.

Dagskrá

1. umferð sunnudag 8. janúar kl. 13.00
2. umferð miðvikudag 11. janúar kl. 19.30
3. umferð sunnudag 15. janúar kl. 13.00
4. umferð miðvikudag 18. janúar kl. 19.30
5. umferð sunnudag 22. janúar kl. 13.00
6. umferð miðvikudag 25. janúar kl. 19.30
7. umferð sunnudag 29. janúar kl. 13
8. umferð miðvikudag 01. febrúar kl. 19.30
9. umferð föstudag 03. febrúar kl. 19.30

Hraðskákmót Reykjavíkur fer fram sunnudaginn 5. febrúar kl. 13 og verður þá jafnframt verðlaunaafhending fyrir Skákþingið.

Tímamörk

90 mín á 40 leiki, síðan 15 mín, auk 30 sek eftir hvern leik alla skákina.

Skákstjórn

Yfirdómari mótsins verður Ríkharður Sveinsson ([e-mail] / s.772 2990).

Aðalverðlaun

• 1. sæti kr. 120.000
• 2. sæti kr. 60.000
• 3. sæti kr. 30.000

Stigaverðlaun

• Besta frammistaða miðað við eigin stig (rating performance – eigin stig) – kr. 10.000.
• U2000 og U1800 – kr. 10.000.
• U1600, U1400, U1200, stigalausir – bókaverðlaun.

Æskulýðsverðlaun

• Bókaverðlaun fyrir efstu stúlkuna og efsta piltinn í árgangaflokkum 2001-2003, 2004-2007, 2008 og yngri.

Fide stig gilda við úthlutun stigaverðlauna (íslensk stig til vara). Hver keppandi getur aðeins hlotið ein aukaverðlaun (ofangreind röð verðlauna gildir).

Þátttökugjöld (greiðist með reiðufé við upphaf móts).

kr. 5.000 fyrir 18 ára og eldri.
kr. 2.500 fyrir 17 ára og yngri.

Skráningarform

Skráðir keppendur

Keppt er um titilinn “Skákmeistari Reykjavíkur 2017” og hlýtur sá keppandi sem verður efstur þeirra sem eiga lögheimili í Reykjavík, eða eru félagsmenn í reykvísku skákfélagi, titilinn og farandbikar til varðveislu í eitt ár. Núverandi Skákmeistari Reykjavíkur er alþjóðlegi meistarinn Jón Viktor Gunnarsson.

Verði keppendur jafnir að vinningum í þremur efstu sætunum, verður verðlaunum skipt (Hort útreikningur), en stigaútreikningur (tiebreaks) látinn skera úr um verðlaunasæti. Í öðrum verðlaunaflokkum ganga verðlaun óskipt til þess sem hefur flest stig eftir stigaútreikning. Stigaútreikningur verður eftirfarandi: 1. Sonneborn-Berger 2. Innbyrðis úrslit 3. Fjöldi sigra 4. Median Buchholz.

Skákþing Reykjavíkur er reiknað til alþjóðlegra skákstiga. Skákir mótsins verða slegnar inn og birtar á pgn formi.

Vinsamlegast mætið tímanlega á skákstað til að staðfesta skráningu og greiða þátttökugjald. Skráningu lýkur 15 mínútum fyrir auglýst upphaf móts, þ.e. kl. 12.45.

Jólaskákmótið á Kleppi fer fram í dag

Hið árlega jólaskákmót á Kleppi verður haldið þriðjudaginn 20.desember kl. 13.00. Mótið fer fram í hinum eina sanna samkomusal á Kleppi. Við lofum flottri jólastemmningu , heitu jólakaffi, girnilegu meðlæti, og glæsilegum vinningum (verðlaunapeningar og bókavinningar).

Mótið er liðakeppni ( þrír einstaklingar í liði ) Allar deildir bæði á Kleppi og á Landspítalanum, athvörf og búsetukjarnar geta tekið þátt. Ef vandræði er að smala saman í lið, þá er það engin fyrirstaða, hægt er búa til lið úr samsettum deildum, búsetukjörnum eða athvörfum, (oft eru liðin púsluð saman á mótstað) Fyrst og fremst er að mæta, og taka jólaskapið með. Að mótinu standa Vinaskákfélagið og Skákfélagið Hrókurinn. Ef spurningar vakna er hægt að hafa samband við  Hörð Jónasson sími 777 4477 eða Róbert Lagerman sími 696 9658. Allir hjartanlega velkomnir, áhorfendur sem keppendur.

Glæsilegt unglingamót í Garði

Glæsilegt Jólaskákmót haldið í fimmta sinni á vegum Samsuð og Krakkskákar síðastliðinn17.desember. Mótið var haldið í Gerðaskóla og 48 keppendur mættu til leiks. Þeir voru úr flestum bæjarfélögum á Suðurnesjum. Grindvíkingar, Njarðvíkingar og Garðbúar voru fjölmennastir þátttakanda.

 

Nettó gaf glæsilega happadrættisvinninga í lok mótsins eins og vanalega á þessu skákmóti. Keppnin var spennandi allt fram á síðustu stundu. 

Sigurvegarar í yngri flokki stúlkna: 

1. Svanhildur Róbertsdóttir Grindavík
2. Birta Eiríksdóttir Grindavík
3. Ólöf Bergvinsdóttir Grindavík

Þær eru einnig núverandi Íslandsmeistarar í liðakeppni grunnskóla yngri stúlkur.

Sigurvegarar í yngri flokki pilta: 

1. Sigurður Bergvin Ingibergsson    Grindavík
2. Andrés Kristinn Haraldsson    Reykjanesbæ
3. Hjörtur Líndal Jónsson       Garði

 

Sigurvegarar í eldri stúlkur: 

1. Nadía Arthúrsdóttir       Grindavík
2. Lovísa Ólafsdóttir           Sandgerði
3. Aþena Rún Helgadóttir     Sandgerði

 

Sigurvegarar í eldri pilta: 

1. Sólon Siguringason Reykjanesbær
2. Hjörtur Jónas Klemensson Grindavík
3. Róbert Birmingham  Reykjanesbær

Stóra-Jólamót KR verður í kvöld

 

Mánudagsmót KR eru fyrir löngu orðin föst og vinsæl hefð í skáklífinu. Þau eru  einnig haldin allan ársins hring nema stórhátíðir eða aðrir viðburðir hamli, þá daginn eftir.  Stóra-Jólamót KR verður haldið á mánudagskvöldið kemur, þann 19 desember. Telfdar verða 13 umferðir með 7 mín. umhugsunartíma. Mótin eru öllum opin og jafnt ungir sem aldnir hvattir til að mæta.   

Hraðskákmót Hugins á Húsavík fer fram í kvöld

Mánudagskvöldið 19. desember kl 20:00 fer fram okkar árlega hraðskákmót. Mótið fer fram í Framsýnarsalnum á Húsavík. Tefldar verða skákir með 5 mín umhugsunartíma á mann og allir við alla. Mótið verður reiknað til hraðskákstiga hjá FIDE.

Tómas Veigar Sigurðarson vann mótið í fyrra með mikilum yfirburðum, en Smári Sigurðsson hefur unnið þetta mót oftast í gegnum tíðina.

Verðlaun veitt í fullorðinsflokki og U-16 ára til þriggja efstu í hvorum flokki. Nánari útfærsla og umferðafjöldi fer þó mjög eftir fjölda keppenda.

Þátttökugjald er krónur 500 á alla keppendur.

Vonast er eftir góðri þátttöku í mótinu og eru áhugasamir beðnir um að skrá sig til leiks með því að senda póst á [e-mail] eða hringja í Hermann í síma 4643187 eða 8213187.

Jóhann Hjartarson Íslandsmeistari í hraðskák eftir sigur á Friðriksmóti Landsbankans

Friðriksmót Landsbankans - Íslandsmótið í hraðskák fór fram við glæsilegar aðstæður í útibúi bankans í Austurstræti 11 í gær. Alls tóku 98 skákmenn þátt í mótinu og hafa aldrei verið fleiri. Mótið hófst með því að Þorsteinn Þorsteinsson, útibússtjóri, lék fyrsta leikinn fyrir Jóhann Hjartarson gegn Björvini Ívarssyni Schram, d2-d4. 

Upphafsleikur Þorsteins dugði Jóhanni vel því hann vann fimm fyrstu skákirnar. Þá vann Jón Viktor Gunnarsson stórmeistarann og náði forystunni. Eftir átta umferðir voru Jóhann og Jón efstir með 7 vinninga. Þá gerði Björn Þorfinnsson sér lítið fyrir og lagði Jón Viktor að velli. Jóhanni fataðist hins vegar aldrei flugið og endaði mótið eins og hann byrjaði það - með fimm vinningsskákum í röð! Hlaut 10 vinninga í 11 skákum. 

Jón varð í 2.-3. sæti ásamt Arnar E. Gunnarssyni en þeir hlut 9 vinninga. Það vinningshlutfall hefur oftsinnis dugað til sigurs á mótinu en Jóhann kom í veg fyrir allt slíkt nú. 

Í 4.-8. sæti með 8 vinninga urðu Einar Hjalti Jensson, bræðurnir Björn og Bragi Þorfynnssynir, Þröstur Þórhallsson, sem ekki tókst að verja titilinn frá í fyrra og Dagur Ragnarsson. 

Aukaverðlaunahfar urðu sem hér segir:

• Efstur með 2001-2200 hraðskákstig - Dagur Ragnarsson
• Efstur undir 2000 hraðskákstigum - Bárður Örn Birkisson
• Efstur stráka 16 ára og yngri - Björn Hólm Birkisson
• Efsta stúlka 16 ára og yngri - Nansý Davíðsdóttir
• Efstur skákmanna 60 ára og eldri - Jón Þorvaldsson
• Efsta konan - Lenka Ptácníková
• Útdreginn heppinn keppandi - Björgvin Ívarsson Schram

Friðriksmóti er einfaldlega það eitt það allra skemmtilegasta ár hvert og mátti sjá tilhlökkun í mörgu andlitinu við mótsbyrjun.

Fjöldi áhorfenda mætti á skákstað og mátti sjá spennuna skína úr hverju andliti en einni skák úr hverri umferð var varpað uppá skjá. 

Í mótslok var Sæmundur Pálsson, Sæmi rokk, sem varð áttræður fyrr á árinu heiðraður af Skáksambandinu. Fékk Sæmi afhent gullmerki Skáksambandsins. Í ræðu Gunnars Björnssonar, forseta SÍ, var honum sérstaklega þakkað fyrir aðstoð hans við Bobby Fischer, á meðan einvíginu aldarinnar stóð en Sæmi var þá kallaður af Fischer; "My friend Sæmi". Sæmundur átti líka sinn þátt í björgun Fischers úr fangelsi í Japan ásamt RJF-nefndinni svonefndu. 

Skáksamband Íslands vill nota tækifærið til að þakka Landsbankanum fyrir frábært samstarf í kringum mótið. 

Lokastöðu mótsins má finna á Chess-Results.

Myndir frá mótinu má finna hér. 

Skákþáttur Morgunblaðsins: Mark Taimanov var frægastur fyrir einvígið við Fischer

Hann var gæfumaður í lífinu en er samt frægastur fyrir að tapa með núlli í einvígi við Bobby Fischer í Vancouver í Kanada vorið 1971. Rússneski stórmeistarinn Mark Taimanov sem lést þann 28. nóvember sl., 90 ára að aldri, var eitt af óskabörnum Sovétríkjanna; hann lék kornungur stórt hlutverk í frægri kvikmynd um Beethoven, fékk tónlistaruppeldi sem aflaði honum heimsfrægðar sem m.a. kom fram í því að verk sem hann flutti tvíhent með fyrstu eiginkonu sinni Kjuob Bruk var nýlega gefið út af stóru forlagi, Philips & Steinway, undir titlinum Great pianists of the 20th century. Löngu fyrir einvígið við Fischer var Taimanov landsfrægur hér – fyrst þegar hann tapaði fyrir Friðriki Ólafssyni á skákmótinu í Hastings um áramótin 1955–´56 og nokkrum vikum síðar tefldi hann hér á landi en jafnteflisskák við Benóný Benediktsson á Guðjóns-mótinu verður lengi í minnum höfð. Þetta sama ár varð Taimanov Sovétmeistari eftir aukakeppni við Spasskí og Averbakh.

Taimanov mátti þola margháttaðar kárínur af hendi yfirvalda þegar hann sneri til baka eftir einvígið við Fischer. Tollverðir veiddu upp úr farangri hans bannfærða bók eftir Alexandr Solzhenitsyn og erlendan gjaldeyri. Fyrir þessar syndir en fyrst og fremst 0:6 tapið var hann settur í keppnisbann og farbann, sviptur launum, titlum og tækifærum og var um skeið það sem kalla mátti óæskileg persóna í Sovét. Þegar eiginkonan svo yfirgaf hann leystist hinn frægi píanó-dúett sjálfkrafa upp. Um þetta tímabil skrifaði Taimanov síðar bókina: Hvernig ég varð fórnarlamb Fischers.

Um mitt sumar 1971 mildaðist þó afstaðan til hans; Bent Larsen tapaði nefnilega líka 0:6 fyrir Fischer og svo féll síðasta vígið; Tigran Petrosjan steinlá um haustið í Buenos Aires, 2 ½ : 6 ½, og Bobby Fischer vann réttinn til að skora á heimsmeistarann, Boris Spasskí.

Hlutlæg endurskoðun á einvígi Fischers og Taimanovs leiðir í ljós að barátta þeirra var afar innihaldsrík. Við undirbúning naut Taimanov aðstoðar gamla heimsmeistarans Botvinniks sem sat heima en fékk leikina gefna upp í langlínusamtali. Honum var ekki skemmt þegar Taimanov klúðraði jafntefli í þessari stöðu:

Vancover 1971; 2. einvígisskák:

Fischer – Taimanov

Fischer var snillingur með hvítreita biskupinn en Botvinnik sá á augabragði að svartur gæti náð jafntefli, 81. ... Rd3 82. h4 Rf4 83. Kf5 Kd6 84. Kxf4 Ke7 og kóngurinn kemst til h8 og staðan er fræðilegt jafntefli. Taimanov lék hinsvegar 81. ... Ke4?? og Fischer svaraði að bragði, 82. Bc8! og nú var ekki nokkur leið að hindra för h-peðsins upp í borð.

En öll él styttir upp um síðir. Hann varð heimsmeistari öldunga árið 1994, kvæntist aftur og eignaðist tvíbura 78 ára gamall. Taimanov hvíldi sig á skákinni með því að spila á tónleikum og hvíldi sig á píanóleik með því að tefla. Árið 1977 skein stjarna Karpovs heimsmeistara skært og þeir mættust á heimavelli:

Leningrad 1977:

Karpov – Taimanov

Karpov sem skynjaði hættu betur en flestir uggði ekki að sér í þessari stöðu sem er í dínamísku jafnvægi og lék 37. b6 en eftir 37. ... Ha1! 38. Hb1 kom alveg óvænt 38. ... Rg3 +! og hvítur gafst upp því að 39. hxg3 er svarað með 39. .. Ha8! með óverjandi máthótun á h8.

Grein þessi birtist í Morgunblaðinu 10. desember 2016

Skákþættir Morgunblaðsins

Friðriksmót Landsbankans - íslandsmótið í hraðskák hefst kl. 13

 

Friðriksmót Landsbankans - Íslandsmótið í hraðskák - fer fram í útibúi Landsbankans við Austurstræti 11 laugardaginn 17. desember nk. Mótið hefst kl. 13 og stendur til kl. 16.30. 

Ríflega 100 keppendur eru skráðir til leiks. Meðal skráðra keppenda eru stórmeistararnir Jóhann Hjartarson, Helgi Áss Grétarsson, Helgi Ólafsson, Jón L. Árnason og Þröstur Þórhallsson en sá síðastnefndi hefur titil að verja. Sex alþjóðlegir meistarar eru skráðir til leiks.  Okkar flestu sterkustu skákkonur er jafnframt skráðar til leiks og má þar nefna landsliðskonurnar Lenku Ptácníková, Guðlaug Þorsteinsdóttur, Veroniku Steinunni Magnúsdóttur og Nansý Davíðsdóttur. 

Ungir og efnilegir skákmenn sitja svip sinn á mótið. Okkar nýjasti FIDE-meistari, Vignir Vatnar Stefánsson lætur sig ekki vatna. Nýlega varð hann yngsti íslenski skákmaðurinn til að ná 2400 skákstigum en hann er aðeins 13 ára.   

Þetta er þrettánda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga.

Verðlaun fyrir efstu sæti eru eftirfarandi: 

1. 100.000 kr.
2. 60.000 kr.
3. 50.000 kr.
4. 30.000 kr.
5. 20.000 kr. 

Séu tveir eða fleiri jafnir í efsta sætinu verður stigaútreikningur látinn ráða Íslandsmeistaratitlinum. Verðlaunafé skiptist eftir Hort-kerfinu. 

Aukaverðlaun 

• Efsti maður með 2001-2200 skákstig 10.000 kr.
• Efsti maður með 2000 stig og minna: 10.000 kr.
• Efsta konan: 10.000 kr.
• Efsti strákur 16 ára og yngri (2000 eða síðar): 10.000 kr.
• Efsta stúlka 16 ára og yngri (2000 eða síðar): 10.000 kr.
• Efsti eldri skákmaður (1956 eða fyrr): 10.000 kr.
• Útdreginn heppinn keppandi: 10.000 kr.

Aukaverðlaun eru miðað við alþjóðleg hraðskákstig 1. desember sl.(alþjóðleg og íslensk skákstig til vara hafi menn ekki alþjóðleg hraðskákstig). Stigaútreikningur ræður séu menn jafnir og efstir.

Hver keppandi getur aðeins unnin ein aukaverðlaun og eru aukaverðlaunin valin í þeirri röð sem fram kemur að ofan.

Mótið er reiknað til alþjóðlegra hraðskákstiga.

Fyrri sigurvegarar 

• 2015 - Þröstur Þórhallsson
• 2014 - Héðinn Steingrímsson
• 2013 - Helgi Ólafsson
• 2012 - Bragi Þorfinnsson, Hjörvar Steinn Grétarsson og Jón Viktor Gunnarsson
• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson