Magnús + Skákmót fyrir 10-18 ára

Skákviðburður fyrir ungt fólk verður haldinn eftir sýningu heimildarmyndarinnar um norska skákmeistarann Magnus Carlsen

Myndin Magnus er sýnd 12. mars kl. 13:00. Eftir myndina er ungu fólki á aldrinum 10-18 ára boðið að taka þátt í skákmóti (hraðskák).  Skáksamband Íslands skipuleggur viðburðinn í samstarfi við Norska Sendiráðið.  Verðlaunahafi hlýtur spennandi gjöf frá Norska sendiráðinu. Viltu vera með?  Sendu póst á [e-mail] með nafni og aldri fyrir 9. mars.

Myndin MAGNUS er sýnd kl. 13:00. Mótið fer fram á milli kl. 15:00 – 17:00.

Magnus (NO)

Magnus Carlsen hefur verið kallaður "Mozart of Chess" þar sem hann hefur til að bera kunnáttu og greind stórmeistara í skák ásamt framúrskarandi frumleika og innsæi. Magnus er einstök saga ungs manns sem reis upp úr vítahring eineltis í það að verða ein skærasta stjarna og leiðandi í heimi stórmeistara í skák. Magnus býður áhorfendum ekki aðeins að heyra um hinn magnaða og einstaka keppnisheim í skák, heldur líka að kynnast örlítið huga manns með snilligáfu.

Sýnishorn

Vignir byrjar vel í Stokkhólmi

Vignir Vatnar Stefánsson (2353) situr þessa dagana að tafli í Stokkhólmi þar sem hann tekur þátt í alþjóðlegu skákmóti sem ber heitið Stockholm Chess Challenge. Eftir 3 umferðir hefur Vignir 1½ vinning. 

Í fyrstu umferð vann hann Svíann Hampus Sorensen (2192), í þeirri annarri gerði hann jafntefli við sænska alþjóðlega meistarann Jonathan Westerberg (2475) og í þeirri þriðju laut hann í dúk gegn úkraínska stórmeistaranum Adam Tukhaev (2541).

Fjórða umferð fer fram í dag og þá teflir Viggi við Indverjann Sharma Hermant. Skákin hefst kl. 14 og er hægt að fylgjast með henni beint á Chess24. 

• Heimasíða mótsins
• Chess-Results
• Beinar útsendingar

 

Ný alþjóðleg hraðskákstig

Ný alþjóðleg hraðskákstig komu út 1. mars sl. Hjörvar Steinn Grétarsson (2662) er langstigahæsti hraðskákmaður landsins. Í næstu sætum eru Jóhann Hjartarson (2574) og Jón Viktor Gunnarsson (2541).

Topp 20

No.	Name	Tit	mar.17	Gms	Diff
1	Gretarsson, Hjorvar Steinn	GM	2662	0	0
2	Hjartarson, Johann	GM	2574	7	-7
3	Gunnarsson, Jon Viktor	IM	2541	0	0
4	Stefansson, Hannes	GM	2535	0	0
5	Thorfinnsson, Bjorn	IM	2506	0	0
6	Gunnarsson, Arnar	IM	2503	0	0
7	Gretarsson, Helgi Ass	GM	2483	7	17
8	Kristjansson, Stefan	GM	2483	0	0
9	Olafsson, Helgi	GM	2438	0	0
10	Thorhallsson, Throstur	GM	2431	7	-3
11	Thorfinnsson, Bragi	IM	2420	0	0
12	Kjartansson, Gudmundur	IM	2411	0	0
13	Bjornsson, Sigurbjorn	FM	2376	0	0
14	Petursson, Margeir	GM	2366	0	0
15	Johannesson, Ingvar Thor	FM	2353	0	0
16	Jensson, Einar Hjalti	IM	2352	0	0
17	Asbjornsson, Asgeir	FM	2344	0	0
18	Arnason, Jon L	GM	2320	0	0
19	Gislason, Gudmundur	FM	2315	11	49
20	Karlsson, Bjorn-Ivar	FM	2306	0	0

Nýliðar

Björn Halldórsson (2183) er stigahæsti nýliði landsins. Hannes Hrólfsson (1792) og Björn Ívarsson Schram (1715) koma næstir. 

 

No.	Name	Tit	mar.17	Gms	Diff
1	Halldorsson, Bjorn		2183	7	2183
2	Hrolfsson, Hannes		1792	11	1792
3	Ivarsson Schram, Bjorgvin		1715	0	1715
4	Steinbergsson, Hjortur		1697	0	1697
5	Petersen, Emil		1490	0	1490
6	Hardarson, Gylfi Mar		1423	0	1423
7	Bragason, Baldur Mar		1333	0	1333
8	Sigthorsson, Andri Thor		1318	0	1318
9	Bjarnason, Loftur Ingi		1283	0	1283
10	Briem, Kjartan		1263	0	1263
11	Johannsson, Bjorn Kristinn		1261	0	1261
12	Agnarsson, Bjorn		1251	8	1251
13	Claesson, Karl Andersson		1147	9	1147
14	Kjartansson, Andres Mar		1093	7	1093

Mestu hækkanir


Dawid Kolka (110( hækkar mest frá janúar-listanum. Í næstu sætum eru tvibbarnir Bárður Örn og Björn Hólm (63) Birkissynir.

No.	Name	Tit	mar.17	Gms	Diff
1	Kolka, Dawid		2021	17	110
2	Birkisson, Bardur Orn		2081	18	63
3	Birkisson, Bjorn Holm		1982	17	63
4	Kristbergsson, Bjorgvin		1311	24	55
5	Gislason, Gudmundur	FM	2315	11	49
6	Sigurdsson, Birkir Karl		1914	9	47
7	Hauksson, Hordur Aron		1857	17	46
8	Kristinsson, Ogmundur		2020	7	36
9	Halldorsson, Kristjan		1769	7	34
10	Jonatansson, Sigurdur Freyr		1607	14	34

Reiknuð hraðskámót (mars og febrúar)

• Hraðskákmót Reykjavíkur
• Hraðkvöld Hugins
• Nóa Síríus-hraðskákmótið
• Atkvöld Hugins (2 frá febrúar)

 

Skákþing Norðlendinga fer fram 24.-26. mars á Sauðárkróki

Skákþing Norðlendinga 2017 verður haldið 24.-26. mars, á Kaffi Krók, á Sauðárkróki. Mótið hefst kl. 20.00 á föstudagskvöldið 24. mars, en þá verða telfdar 4 umferðir af 25 mínútna atskákum.  5. umferð kl. 11.00 og 6 umferð kl. 17.00 laugardaginn 25. mars og 7. umferð kl. 11.00 sunnudaginn 26. mars, en þá verður umhugsunartíminn 90 mínútur á skákina + 30 sek. á hvern leik.  Að 7. umf. lokinni verður Hraðskákmót Norðlendinga haldið og hefst kl. 14.30 eða síðar. Skákmeistari Norðlendinga getur aðeins orðið sá sem á lögheimili á Norðurlandi, en mótið er öllum opið. Skákdómari verður Ingibjörg Edda Birgisdóttir.

Verðlaun eru sem hér segir 1. sæti 45.000 kr.  2. sæti 30.000  3. sæti 20.00  4. sæti 15.000 5. sæti 10.000  Aukaverðlaun fær efsti skákmaður með minna en 1800 stig, 10.000 kr. Verði menn jafnir að vinningum skiftast verðlaun  jafnt milli þeirra.

Mótið verður reiknað til alþjóðlegra kapp- og atskákstiga. 

Skráning á skák.is (skak.blog.is) og einnig er hægt að skrá sig á jhaym@simnet eða í síma 865 3827, þar sem nánari upplýsingar gæti líka verið mögulegt að fá. Upplýsingar um þegar skráða keppendur má finna hér.

Myndir frá lokaathöfn Íslandsmóts skákfélaga

Lokaathöfn Íslandsmóts skákfélaga fór fram að móti loknu í Kringlukránni. Hallfríður Sigurðardóttir mætti þar með myndavélina og tók myndir af verðlaunahöfunum. Þær fylgja hér með:

Íslandsmeistararnir

Silfurhafar TR

Bronshafar Fjölnis

2. deild

Sigurvegarnir í TG

Silfurhafar SA-b (eða silfurhafinn?)

Bronshafar Hugins-C

3. deild

Siguvegarnir Hrókar alls fagnaðar

Silfurhafar frá Selfossi

4. deild

Sigurvegarnir b-sveit Víkinganna

Silfurhafarnir frá Sauðárkróki

 

Ingvar Þór Jóhannesson var kallaður upp í tilefni fertugsafmælis síns og sungið fyrir meistarann. Hann fékk skákbókaúttekt frá Skáksambandi Íslands í afmælisgjöf.

Áfangaveiðarnir þrír voru kallaðir upp og fengu vænt klapp frá viðstöddum.

Bragi Þorfinnsson - sem náði sínum öðrum stórmeistaraáfanga

Davíð Kjartansson sem náði sínum öðrum áfanga að alþjóðlegum meistaratitli

Norski KR-ingurinn Lasse Østebø Løvik náði sínum lokaáfanga að alþjóðlegum meistaratitli jafnframt sem hann fór yfir 2400 skákstig.

 

Íslandsmót barnaskólasveita - 4.-7. bekkur fer fram á laugardaginn

Íslandsmót barnaskólasveita (4.-7. bekkkur) fer fram  laugardaginn 11. mars í Grindavík.

Teflt verður í Grunnskólanum að Ásabraut 2.

Mótið hefst klukkan 12:00 en liðsstjórar þurfa að staðfesta mætingu sinna sveita fyrir 11:40.

Tefldar verða sjö til níu umferðir (eftir fjölda sveita) með 10 mínútna umhugsunartíma og tveimur viðbótarsekúndum á hvern leik. Mótinu lýkur um seinni partinn.

Veitt verða verðlaun fyrir þrjár efstu sveitir, bestu b-e sveitir og bestu landsbyggðarsveitina. Landsbyggðarsveit skilgreinist sem sveit sem er ekki af höfuðborgarsvæðinu. Sveitir frá Suðurnesjum og Suðurlandi eru landsbyggðarsveitir.

Tvö efstu sætin gefa keppnisrétt á Norðurlandamóti barnaskólasveita sem fer fram á Íslandi í haust.

Liðsmenn sveita skulu vera í 4.-7. bekk en í a-sveit hvers skóla er þó heimilt að notast við yngri nemendur. Hverri sveit skal fylgja liðsstjóri.

Þátttökugjald er 7.500 kr. á sveit en hámark 15.000 kr. á skóla. Gjald verður innheimt með reikningi að móti loknu.

Veitingasala verður á staðnum.

Mótshaldarar eru Skákakademía Reykjavíkur og Skáknefnd UMFG.

Ef spurningar vakna má hringja í Stefán 863-7562 eða Siguringa 691-3007.

Skráning sveita á Skák.is (guli kassinn efst)

Skráningarfrestur er út fimmtudaginn 9. mars. 

Upplýsingar um þegar skráðar sveitir má finna hér.

Dramantískur lokadagur á Íslandsmóti skákfélaga - Bragi með stórmeistaraáfanga

Lokqdagur Íslandsmóts skákfélaga er einn sá mest spennandi í sögu mótsins. Huginn virtist í afar góðum málum fyrir lokadaginn en forystan var 2 vinningar á Taflfélag Reykjavíkur og félagið átti "auðveldari" andstæðinga eftir auk þess sem það dugði Hugin að vera jafnir að vinningum og TR þar sem sigur vannst í innbyrðis viðureign félaganna í fyrri hlutanum. 

En það breyttist fljótt. Eins og fram kom í frétt í gær í Skák.is gerði Huginn aðeins 4-4 jafntefli við Skákdeild KR í fyrri umferð gærdagsins sem verða að teljast ein allra óvæntustu úrslit í sögu keppninnar og á sama tíma unnu TR-ingar Bolvíkinga 5½-2½. Munurinn fyrir lokaumferðina var því aðeins hálfur vinningur Hugin í vil 

TR mætti Skákdeild Fjölnis og Huginn b-sveit TR. Enn virtist því staða Hugins vera töluvert vænlegri því á pappírnum er Fjölnir mun sterkari en b-sveit TR sem var neðst. Engu að síður var TR-sveitin langt því að vera veik með Vigni Vatnar og tvíburana Bárð Örn og Björn Hólm á neðstu borðunum þremur. Enda reyndust ungu mennirnir seigir og tóku 1½ vinning. 

Við upphaf umferðarinnar kom svo í ljós að liðsstjóri Fjölnis, Helgi Árnason, hvíldi sinn sterkasta mann, Héðin Steingrímsson í lokaskákinni gegn TR. Styrkleikamunurinn á milli TR-b og Fjölni þar með að engu orðin. 

Fljótt var samið á fyrsta borði hjá TR og Fjölni en þar mættust Bragi Þorfinnsson og Davíð Kjartansson. Þar menn höfðu þeir félagarnir báðir tryggt sér áfanga. Bragi fékk sinn annan áfanga að stórmeistaratitli og vantar aðeins einn til að fá titilinn. Davíð tók sinn annan áfanga að alþjóðlegum meistaratitli. Auk þess tók norski KR-ingurinn Lasse Lovik sinn lokaáfanga að alþjóðlegum meistaratitli. 

Á ýmsu gekk í lokaumferðinni og sveifluðust menn fram og aftur hvort TR eða Huginn væri að taka titilinn. Til að byrja með leit þetta afar vel út fyrir TR. Einar Hjalti (Hugin) og Daði Ómarsson (TR-b) gerðu stutt jafntefli og Vignir Vatnar vann peð gegn Magnúsi Erni (Hugin) og Helgi Áss Grétarsson (Hugin) náði ekkert að komast áfram gegn Þorvarði Fannari (TR-b). Aman Hambledon (TR) virtist líka hafa yfirburðastöðu á móti Degi Ragnarssyni (Fjölni). Björgvin Víglundsson (TR-b) hafði einnig mjög skemmtilega stöðu gegn Hannesi Hlífari (Hugin). 

En hlutirnir breyttust. Magnús náði að jafna taflið og halda jafntefli og Hambleton lék af sér manni og virist samt hafa jafnteflissénsa. Hannes náði að trikka Björgvin og vinna. Þá gerðist það að Björn Hólm (TR-b) snéri á Sigurð Daða (Hugin) og TR allt í einu með mjög vænlega sigurmöguleika. Staðan hjá Ingvari Þór (Hugin) og Bárði Erni (TR), var mjög óljós og tími lítill hjá báðum. Þetta var orðin eina skákin eftir hjá Hugin og ljóst að a.m.k. 3 vinningar myndu falla útbyrðis hjá félaginu. Stóra spurningin var því hversu marga vinninga TR-inga myndu missa niður í lokaskákunum. Töpuðu þeir aðeins tveimur vinningum yrði titilinn þeirra. 

Það voru Rimaskóladrengirnir og Fjölnismennirnir, Dagur Ragnarsson og Oliver Aron Jóhannesson, sem sigldu titlinum í hús fyrir Hugin þegar þeir unnu Hambledon og Björn Þorfinnsson (TR). Oliver vann Björn með glæsilegri fórn. Auk þess sem Sigurbjörn Björnsson (Fjölni) tryggði sér jafntefli gegn Guðmundi Kjartanssyni (TR). Allt í einu var ljóst að úrslitin í skák Ingvars og Bárðar Arnar skipti ekki máli þar sem sveitirnar yrðu jafnar að vinningum þótt Ingvar myndi tapa. Ingvar hélt hins vegar uppá fertugsafmælið með sigri. Huginn vann því titilinn með einum vinningi.

Skákdeild Fjölnis varð í þriðja sæti, Víkingklúbburinn í því fjórða og Bolvíkingar í því fimmta. 

Fallbaráttan var þvílíkt hörð. Þar áttu KR-ingar stórkostlegan endasprett. Ekki nóg með jafnteflið gegn Íslandmeisturunum heldur unnu þeir Akureyringa í lokaumferðinni og björguðu sér frá falli með hálfum vinningi. Fallið varð Reyknesinga og b-sveitar TR.

Einstaklingsúrslit lokaumferðirnar má nálgast á Chess-Results. 

Lokastaðan:

Sjá nánar á Chess-Results.

Sveit Íslandsmeistara Hugins í fyrri og seinni hluta skipuðu: Gawain Jones, Robin Van Kampen, Helgi Ólafsson, Hannes Hlífar Stefánsson, Hjörvar Steinn Grétarsson, Þröstur Þórhallsson, Helgi Áss Grétarsson, Einar Hjalti Jensson, Magnús Örn Úlfarsson, Ingvar Þór Jóhannesson, Sigurður Daði Sigfússon, Kristján Guðmundsson og Þorsteinn Þorsteinsson. Liðsstjórar voru Þorsteinn og Jón Þorvaldsson. 

Hjörvar var bestur Huginsmanna en hann fékk 8 vinninga í 9 skákum. Ingvar hlaut 7½ vinning.

2. deild

Taflfélag Garðabæjar vann öruggan sigur í 2. deild. B-sveit Skákfélags Akureyrar varð í öðru sæti. Þessar sveitir taka sæti TR-b og Reyknesinga í deild þerra bestu að ári. 

Skákfélag Íslands og B-sveit Fjölnis féllu niður í 3. deild

Lokastaðan:

Nánar á Chess-Results. 

3. deild

Hrókar alls fagnaðar fögnuðu sigri í deildinni - unnu allar sínar viðureignir. Skákfélag Selfoss og nágrennis varð í öðru sæti en þessar sveitir höfðu mikla yfirburði. Þær taka sæti í 2. deild að ári. Skákfélag Siglufjarðar varð í þriðja sæti. 

Ungmennasamband Borgarfjarðar og b-sveitir Taflfélags Garðabæjar og KR féllu niður í fjórðu deild.

Lokastaðan:

Nánar á Chess-Results.  

4. deild

B-sveit Víkingaklúbbsins hafði mikla yfirburði í 4. deild. Skákfélag Sauðárkróks og Taflfélag Vestmannaeyja urðu í 2.-3. sæti og fylgja Víkingunum uppí 3. deild. 

Nánar á Chess-Results.

Myndir væntanlegar!

 

Huginn Íslandsmeistari skákfélaga

Skákfélagið Huginn er Íslandsmeistari skákfélaga. Það er ljóst þó enn sé nokkrum skákum ólokið. Lokaumferðin var þvílíkt spennandi og réðust úrslitin ekki fyrr en í lokaskákunum. Skákdedild Fjölnis varð í þriðja sæti. Spennan var ekki minni í fallbaráttunni en þar björguðu KR-ingar sér frá falli með frábærum endaspretti. Reyknesingar og b-sveit TR féllu niður í 2. deild. 

Lokastaðan á Chess-Results.

2. deild

Taflfélag Garðabæjar vann aðra deildina. B-sveit Skákfélag Akureyrar varð í öðru sæti og fylgir þeim upp í efstu deild. 

Nánar á Chess-Results. 

3. deild

Hrókar alls fagnaðar unnu deildina. Selfyssingar fylgja þeim upp í 2. deild. 

Nánar á Chess-Results.  

4. deild

B-sveit Víkingaklúbbsins vann öruggan sigur. Skákfélag Sauðárkróks og Taflfélag Vestmannaeyja fylgja þeim upp í 3. deild.

Nánar á Chess-Results.

Nánari fréttir síðar.. 

Skákþáttur Morgunblaðsins: Sókndjarfir fótgönguliðar

Á hinu árlega Norðurlandamóti ungmenna sem fram fór í Drammen í Noregi um síðustu helgi tefldu Íslendingar fram ágætu liði í fimm aldursflokkum frá 10 til 19 ára aldurs. Við vorum með þrjá nýliða í hópnum en einnig stigahæsta keppandann, Vigni Vatnar Stefánsson, sem þurfti því miður að kljást við slæma hálsbólgu meðan á keppni stóð.

Aðrir liðsmenn Íslands voru Dagur Ragnarsson, Oliver Aron Jóhannesson, Hilmir Freyr Heimisson, Bárður Birkisson, Nansý Davíðsdóttir, Óskar Víkingur Davíðsson, Robert Luu, Stefán Orri Davíðsson og Gunnar Erik Guðmundsson, en tveir síðastnefndu voru nýliðar. Fararstjórar og þjálfarar voru undirritaður og Guðmundur Kjartansson.

Á NM ungmenna er keppt um verðlaun í fimm aldursflokkum og mótið er einnig keppni allra sex Norðurlandaþjóðanna þar sem samanlagður vinningafjöldi ræður niðurstöðunni. Þessi keppni hefur fengið síaukið vægi undanfarin ár. Fyrir síðustu unferð voru Íslendingar með 1 ½ vinnings forskot á gestina, Norðmenn, og með góða stöðu með tilliti til sigurs í tveim flokkum. En í lokaumferðinni var eins og hin stífa dagskrá, tvær kappskákir á dag, kæmi loksins niður á einbeitninni. Dagur Ragnarsson, Oliver Aron og Óskar Víkingur voru allir með unnar stöður en uppskeran var rýr, aðeins ½ vinningur úr þessum þrem mikilvægu skákum og til að bæta gráu ofan á svart þá sigldu Norðmenn fram úr okkur í 6-landa keppninni þar sem íslenska liðið endaði í 2. sæti, Svíar urðu í 3. sæti, Finnar og Danir í 5. sæti og Færeyingar ráku lestina. Oliver Aron fékk silfur í sínum flokki og Robert Luu brons. Þeir hlutu báðir 4 vinninga en Dagur, Vignir, Óskar Víkingur og Bárður fengu allir 3 ½ vinning.

Framkvæmd norsku skipuleggjendanna var með miklum ágætum.

Á mótinu voru tefldar fjölmargar skemmtilegar skákir en skák Dags í 5. umferð var án efa sú fallegasta. Það verður aldrei nógsamlega brýnt fyrir ungum skákmönnum að peð eru líka sóknarmenn; d- og h-peð hvíts ruddu brautina í eftirfarandi glæsiskák:

NM ungmenna 2017:

Dagur – Ragnarsson – Mikkel Jakobsen

1. d4 d5 2. c4 c6 3. Rf3 Rf6 4. Rc3 e6 5. Bg5 h6 6. Bxf6 Dxf6 7. e3 Rd7 8. Bd3 g6 9. O-O Bg7 10. Hc1 dxc4 11. Bxc4 O-O 12. He1 Hd8 13. e4 e5 14. d5 Rb6 15. Bb3 Be6?!

Óvenjulegur leikur í þekktri byrjun sem býður uppá þann athyglisverða möguleika að gefa drottninguna fyrir hrók og léttan. En Dagur ákvað að bíða átekta.

16. He3 cxd5 17. exd5 Df5 18. Re1 e4?!

Vafasamur leikur. Og nú voru öll bestu skilyrði fyrir hendi til að láta drottninguna af hendi.

19. dxe6! Hxd1 20. exf7+ Kh7 21. Hxd1 Hc8 22. Rxe4 Rc4 23. He2 Db5 24. Hc2!

Óþægileg leppun eftir c-línunni.

24. De5 25. Bxc4 Dxe4 26. Bd3! Dg4 27. Hxc8 Dxc8

28. Dxd1 29. Kf1 dugar skammt.

 

 

 

28. h4!

Loftar út og hótar 29. h5.

28. ... h5 29. Rf3 Bxb2?

Þetta peð er eitrað. Hann gat enn barist með 29. Bf6 sem hvítur svarar best með 30. b3 ásamt 31. Bc4. Að endingu mun f7-peðið alltaf ráða úrslitum.

30. Rg5+ Kg7 31. He1! Ba3 32. He6! Dc1+ 33. Kh2 Df4+ 34. g3 Dxf2+ 35. Kh3

Vel reiknað, svartur á ekki fleiri skákir.

35. Kf8 36. He8+ Kg7 37. Hg8+

- og svartur gafst upp. Eftir 37. ... Kf6 vinnur 38. f8(D)+ eða 38. Re4+ Kxf7 39. Bc4+ og síðan fellur drottningin.

 

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 25. febrúar 2017

Skákþættir Morgunblaðsins

[Event "ch-Nordic Youth"] [Site "?"] [Date "2017.02.19"] [Round "?"] [White "Ragnarsson, Dagur"] [Black "Jacobsen, Mikkel Manosri"] [ECO "D15"] [WhiteElo "2276"] [BlackElo "2300"] [Result "1-0"] 1. d4 d5 2. c4 c6 3. Nf3 Nf6 4. Nc3 e6 5. Bg5 h6 6. Bxf6 Qxf6 7. e3 Nd7 8. Bd3 g6 9. O-O Bg7 10. Rc1 dxc4 11. Bxc4 O-O 12. Re1 Rd8 13. e4 e5 14. d5 Nb6 15. Bb3 Be6 16. Re3 cxd5 17. exd5 Qf5 18. Ne1 e4 19. dxe6 Rxd1 20. exf7+ Kh7 21. Rxd1 Rc8 22. Nxe4 Nc4 23. Re2 Qb5 24. Rc2 Qe5 25. Bxc4 Qxe4 26. Bd3 Qg4 27. Rxc8 Qxc8 28. h4 h5 29. Nf3 Bxb2 30. Ng5+ Kg7 31. Re1 Ba3 32. Re6 Qc1+ 33. Kh2 Qf4+ 34. g3 Qxf2+ 35. Kh3 Kf8 36. Re8+ Kg7 37. Rg8+ 1-0

Huginn með hálfs vinnings forskot fyrir lokaumferðina - afar óvænt úrslit KR gegn Hugin

 

Ein óvæntustu úrslit í sögu Íslandsmóts skákfélaga urðu í áttundu og næstsíðustu umferð Íslandsmóts skákfélaga rétt í þessu þegar Skákdeild KR gerði 4-4 jafntefli gegn Íslandsmeisturum Hugins. Á sama tíma vann Taflfélag Reykjavíkur 5½-2½ sigur á Skákfélagi Akureyrar. Munurinn á sveitunum er því aðeins hálfur vinningur fyrir lokaumferðina sem hefst kl. 17. Búast má við gríðarlegri spennu 

Í lokaumferðinni teflir Hugin við b-sveit TR og TR við Fjölni. 

Staðan:

2. deild

Taflfélag Garðabæjar hefur örugga forystu í annarri deild og hafa nánast tryggt sér sæti í efstu deild næsta keppnistímabil. B-sveit Akureyrar er í öðru sæti og virðast einnig vera á leiðinni upp. C-sveit Hugins er í þriðja sæti.

Nánar á Chess-Results. 

3. deild

Hrókar alls fagnaðar eru efstir og hafa tryggt sér sæti í 2. deild. Skákfélag Selfoss er í öðru sæti og virðast líklegir til að fylgja þeim upp. Skákfélag Siglufjarðar er í þriðja sæti.

Nánar á Chess-Results.  

4. deild

B-sveit Víkingaklúbbsins hefur tryggt sér sigur í deildinni og sæti í 3. deild. Skákfélag Sauðárkróks og Taflfélag Vestmannaeyja eru í 2.-3. sæti. 

Nánar á Chess-Results.